Mose IV, 12 - BAIBLO ALOO NGMAMI KLƆUKLƆU Ɔ

A gbla Miriam tue

¹ Mose ya ngɔ Kush yo ko, nɛ Miriam kɛ Aaron tu munyu kɛ si Mose ngɛ nɔ́ nɛ ɔ he.

² A bi ke, “Anɛ Mose nɔ kake too nɔ Yawɛ gu kɛ tu munyu lo? Anɛ wɔɔ lɛɛ e gui wa nɔ kɛ tu we munyu lo?” Yawɛ nu nɔ́ nɛ a de ɔ.

³ Mose nɛ ɔ, nɔmlɔ nɛ he jɔ ji lɛ; niinɛ e he jɔ pe nimli adesahi tsuo nɛ a ngɛ zugba a nɔ ɔ.

⁴ Tlukaa a, Yawɛ de Mose, Miriam, kɛ Aaron ke, “Nyɛ ni etɛ ɔmɛ tsuo nyɛɛ ba kpe he bo tsu ɔ mi.” A ho,

⁵ nɛ Yawɛ kple si ngɛ bɔku titima ko mi ba da bo tsu sinya a nya. E tsɛ Aaron kɛ Miriam, nɛ a je kpo kɛ ba.

⁶ Yawɛ de mɛ ke, “Jehanɛ, nyɛɛ bu mi tue! Ke gbalɔ ko ngɛ nyɛ kpɛti ɔ, ní nami mi nɛ imi Yawɛ, i jeɔ ye he si kɛ tsɔɔ lɛ ngɛ. Nlami mi nɛ i kɛ lɛ tuɔ munyu ngɛ.

⁷ Ye tsɔlɔ Mose lɛɛ e slo lɛ! Lɛɛ i ngɔ lɛ ngɔ to ye ma Israel tsuo nya.

⁸ Lɛɛ i kɛ lɛ tuɔ munyu hɛ mi kɛ hɛ mi paa; se pi ngɛ abɛ gbi mi. Ye su nitsɛ po lɛɛ e na hyɛ. Mɛni he je mɔ nɛ nyɛ yi gbeye, nɛ nyɛ tu munyu kɛ si ye tsɔlɔ Mose?”

⁹ Yawɛ mi mi fu mɛ wawɛɛ nitsɛ. Nɛ benɛ e si mɛ,

¹⁰ nɛ bɔku ɔ je bo tsu ɔ yi mi ɔ, he womi nɔ hiɔ yaya pue Miriam he, nɛ e pee sakoo kaa snoo. Benɛ Aaron plɛ hyɛ Miriam nɛ e na kaa he womi nɔ hiɔ yaya lɛ ngɛ e he ɔ,

¹¹ e de Mose ke, “Ye nyɔmtsɛ, i kpa mo pɛɛ, koo gbla wa tue ngɛ kuasia nɛ wa je, kɛ yayami nɛ wa pee nɛ ɔ he.

¹² Ko ha nɛ Miriam nɛ pee kaa nɔ ko nɛ gbo ngɛ e nyɛ muklii mi, nɛ benɛ a fɔ lɛ ɔ, e he womi ɔ fa pɔtɔ momo.”

¹³ Mose kpa ngmlaa kɛ tsɛ Yawɛ, nɛ e de ke, “Mawu lee, i kpa mo pɛɛ nɛ o tsa lɛ!”

¹⁴ Se Yawɛ de Mose ke, “Ke Miriam tsɛ su lada pue e hɛ mi ɔ, anɛ e kɛ zo be e he lae ligbi kpaago lo? A je lɛ kɛ je sito he ɔ, nɛ a ya tsi e nya ligbi kpaago loko a ngɔ lɛ kɛ ba ekohu.”

¹⁵ Lɔ ɔ he ɔ, a je Miriam kɛ je sito he ɔ, nɛ a ya tsi e nya otsi. Ma a hiɛ blɔ kɛ ya si a kpale ngɔ lɛ kɛ ba ekohu.

¹⁶ Lɔ ɔ se ɔ, ma a hia kɛ je Hazerot, nɛ a ya to si ngɛ Paran nga a nɔ.