Mose IV, 11 - BAIBLO ALOO NGMAMI KLƆUKLƆU Ɔ

Tabera

¹ Ma a tu munyu huitihuiti ngɛ a haomihi a he. Benɛ Yawɛ nu ɔ, e mi mi fu, nɛ e ha la tso ngɛ ni ɔmɛ a kpɛti; nɛ la a kpata níhi a hɛ mi ngɛ a sito he ɔ kasa fa kake.

² Ma a kpa ngmlaa kɛ tsɛ Mose, nɛ Mose hu kpa Yawɛ pɛɛ; kɛkɛ nɛ la a gbo.

³ Enɛ ɔ he je ɔ, a wo lejɛ ɔ biɛ ke Tabera, nɛ a de ke, “Wa wo kikɛmɛ a biɛ nɛ ɔ, ejakaa Yawɛ la sã ní ngɛ lejɛ ɔ.”

Mose hla nikɔtɔmahi nyingmi kpaago

⁴ E ba mi kaa de lo ba bɔni futufututsɛmɛ nɛ ngɛ Israel bi ɔmɛ a kpɛti ɔ jlomi. Israel bi ɔmɛ nitsɛ hu wo yana ekohu nɛ a bi ke, “Ao, wa be de lo nae maa ye lo?

⁵ Nyɛɛ hyɛ bɔ nɛ lo pueɔ si ngɛ Egipt nɛ a pee we he nɔ́ ko, nɛ wa yeɔ bɔ nɛ wa suɔ. Nyɛɛ hyɛ jamatlɛ ɔmɛ, atlɛ ɔmɛ, pui ɔ, kɛ sabola amɛ!

⁶ Se jehanɛ lɛɛ wa he wami nɔ gbɔ, nɛ wa na we nɔ́ ko nɔ́ ko kulaa kaa ja mana nɛ ɔ kɛkɛ.”

⁷ Mana ngɛ kaa nya mi saalɔ, nɛ e su ngɛ kaa hlɔɔba nyu nɛ je tso he toto mi pue si.

⁸ Ke ni ɔmɛ ya bua mana nya kikɛ nɛ ɔ, a wɛɛɔ ngɛ wɛ nɔ, aloo a gbeeɔ ngɛ fufui tso mi. Lɔ ɔ se ɔ, a hooɔ ngɛ buɛ mi, nɛ a kɛ peeɔ keeki; e ngɔɔ kaa keeki nɛ a ngɔ nu kɛ sã.

⁹ Ke bɔ́ nɛ ngɛ sito he ɔ nyɔ mi kɛkɛ mana a hu pue si.

¹⁰ Mose nu nɛ ma a tsuo wo yana ngɛ a we puɔ nya ngɛ a bo tsu sinya amɛ a nya. Kɛkɛ nɛ Yawɛ mi mi fu wawɛɛ nitsɛ, nɛ nɔ́ nɛ ɔ ngɔɛ Mose nya kulaa.

¹¹ Mose bi Yawɛ ke, “Mɛni he je nɛ o ye imi, o tsɔlɔ sane yayami kikɛ nɛ ɔ? Mɛni he je nɛ o ná ye he abofu, nɛ o ngɔ ma nɛ ɔ tsuo yi tlomi ngɔ tloo mi ɔ?

¹² Imi lɛ i ngɔ nimli nɛ ɔmɛ tsuo a hɔ? Imi lɛ i fɔ mɛ, loko o deɔ mi ke ma hɛɛ mɛ ngɛ ye mi si kaa bimɛanyɛ hɛɛɔ bimwɔyo, kɛ ya zugba nɛ o ka kita ke o maa ngɔ kɛ ha a tsɛmɛ ɔmɛ ɔ nɔ ɔ?

¹³ Jije ma ná de lo ngɛ kɛ ha ma nɛ ɔ tsuo? Ejakaa a wo yana kɛ wo mi, nɛ a ngɛ mi dee ke ma ha mɛ de lo nɛ a ye.

¹⁴ Imi nɔ kake too pɛ i be nyɛe ma hɛɛ ma nɛ ɔ; tlomi ɔ jiɔ tsɔ ha mi.

¹⁵ Ke kikɛ nɛ ɔ o kɛ mi maa ye ɔ, lɛɛ ke o ngɛ ye he suɔmi ɔ, gbee mi amlɔ mohu, konɛ ma ko na nɔ́ kaa kikɛ nɛ ɔ ngɛ o dɛ mi ekohu.”

¹⁶ Yawɛ de Mose ke, “Yaa nɛ o ya hla nikɔtɔmahi nɛ bu ngɛ a he nyingmi kpaago kɛ je Israel bi ɔmɛ a kpɛti. A pee nikɔtɔmahi nɛ mo nitsɛ o le kaa a hɛɛ blɔ nya ngɛ ma a mi. Ngɔɔ mɛ kɛ ba ye ngɔ ngɛ kpe he bo tsu ɔ mi, nɛ a ba da si ngɛ o kasa nya ngɛ lejɛ ɔ.

¹⁷ Ma kple si, nɛ i kɛ mo ma ba tu munyu ngɛ lejɛ ɔ. Ma je mumi nɛ ngɛ o mi ɔ eko kɛ ha mɛ. A maa kpee mo kɛ tloo ma a tlomi ɔ, nɛ mo nɔ kake too pɛ o be tlooe hu.

¹⁸ Jehanɛ, mo de ma a ke, ‘Nyɛɛ tsukɔ nyɛ he kɛ ha hwɔɔ; ejakaa nyɛ maa ye de lo. Benɛ de lo jlo nyɛ, nɛ nyɛ fo he ya, nɛ nyɛ de ke nyɛ he mi jɔ nyɛ ngɛ Egipt zugba a nɔ mohu ɔ, Yawɛ nu. Lɔ ɔ he ɔ, Yawɛ ma ha nyɛ de lo nɛ nyɛɛ ye.

¹⁹ Pi ligbi kake, loo ligbi enyɔ, loo ligbi enuɔ, loo ligbi nyɔngma, loo ligbi nyingmi enyɔ kɛkɛ nɛ nyɛ maa ye.

²⁰ Se mohu, nyɛ maa ye de lo nyɔhiɔ mluku kɛ yaa si be nɛ e maa je kpo ngɛ nyɛ gugwɔ puɔ mi, nɛ e maa gbe nyɛ nya. Ejakaa nyɛ kua Yawɛ nɛ ngɛ nyɛ kpɛti ngɛ hiɛmɛ nɛ ɔ, nɛ nyɛ wo yana nɛ nyɛ bi ke mɛni he je nɛ a ha nyɛ je Egipt mɔ?’ ”

²¹ Mose de Yawɛ ke, “Ma a nɛ i hɛɛ ɔ, a kpɛti nyumuhi kɛkɛ a hiɛmi ji akpe lafa ekpa. Nɛ o deɔ ke o ma ha mɛ de lo nɛ a ye nyɔhiɔ mluku!

²² Anɛ a ma na tohi kɛ nahi maa gbe nɛ maa su mɛ? Aloo ke a bua wo mi lohi tsuo pɛpɛɛpɛ a nya a, e maa su mɛ?”

²³ Yawɛ bi Mose ke, “Anɛ nɔ́ nɛ ɔ pe Yawɛ, nɛ e be nyɛe maa pee lo? Si nɛ i wo ɔ, e maa ba mi jio, e be mi bae jio, o maa na piɔ.”

²⁴ Mose je kpo, nɛ e ya bɔ ma a nɔ́ nɛ Yawɛ de lɛ ɔ. E ya bua ma nimeli nyingmi kpaago a nya, nɛ e ngɔ mɛ ba da si kɛ bɔle bo tsu ɔ.

²⁵ Kɛkɛ nɛ Yawɛ kple si kɛ je bɔku mi kɛ ba, nɛ e kɛ Mose ba tu munyu. E je mumi nɛ ngɛ Mose mi ɔ eko kɛ ha ma nimeli nyingmi kpaago ɔmɛ. Benɛ mumi ɔ ba a nɔ ɔ, a bɔni ngmlaa kpami kaa gbali; se nɔ́ nɛ ɔ se kɛ we.

²⁶ Ma nimeli nyingmi kpaago ɔmɛ nɛ a ngma a biɛ ɔ, a ti ni enyɔ tlɔ sito he ɔ, nɛ mɛɛ a na we nɛ a ya bo tsu ɔ mi. Nɔ kake biɛ ji Eldad, nɛ nɔ kake hu biɛ ji Medad. Benɛ a ngɛ lejɛ ɔ, mumi ɔ ba a nɔ, nɛ mɛ hu a bɔni ngmlaa kpami kaa gbali.

²⁷ Kɛkɛ nɛ niheyo ko gbɔ fo ya de Mose ke, “Eldad kɛ Medad ngɛ gbae ngɛ sito he ɔ.”

²⁸ Kɛkɛ nɛ Nun binyumu Yoshua, nɛ ji Mose sɔmɔlɔ kɛ je e nihe mi ɔ tu munyu nɛ e de ke, “Ye nyɔmtsɛ Mose, ha nɛ a kpa nɔ́ nɛ a ngɛ pee ɔ!”

²⁹ Se Mose he nɔ ke, “Imi lɛ o ngɛ hunga jee ha nɛ ɔ? I na jinɛ Yawɛ ngɔ e mumi ɔ ngɔ ha e ma a tsuo, nɛ mɛ tsuo a kpa ngmlaa kaa gbali!”

³⁰ Enɛ ɔ se ɔ, Mose kɛ Israel ma nimeli nyingmi kpaago ɔmɛ tsuo kpale a se kɛ ho sito he ɔ ya.

Bebeehi

³¹ Kɛkɛ nɛ Yawɛ ha kɔɔhiɔ fia, nɛ kɔɔhiɔ nɛ ɔ muɔ bebeehi kɛ je wo ɔ mi ba pue si maa pee ligbi kake blɔ nyɛɛmi kɛ bɔle sito he ɔ tsuo kɛ kpe. Bebee ɔmɛ te kɛ mimla sito he ɔ haa maa pee kaa nine mi blimi eywiɛ kɛ je zugba.

³² Jamɛ a ligbi ɔ tsuo, piani, nyɔ mi, kɛ jena nɔ ɔ, ma a tsuo ho nɛ a ya bua bebeehi a nya; nɔ nɛ na we pe kulaa po na kilo akpe. A ka bebee ɔmɛ tsɛtsɛ kɛ bɔle sito he ɔ kɛ kpe.

³³ Benɛ a ngɛ lo ɔ yee, nɛ e na we nɛ e ta a, Yawɛ mi mi fu ma a, nɛ e ha gbenɔ hiɔ ba sɛ a kpɛti.

³⁴ Enɛ ɔ he je ɔ, a wo lejɛ ɔ biɛ ke, “Jiklɔɔtsɛmɛ a Yɔkɔhi.” Ejakaa nihi nɛ pee de lo he jiklɔɔ ɔ, lejɛ ɔ a pu mɛ ngɛ.

³⁵ Lɔ ɔ se ɔ, ma a hia kɛ je lejɛ ɔ kɛ ho Hazerot ya, nɛ a ya to si ngɛ lejɛ ɔ.