Mose IV, 10 - BAIBLO ALOO NGMAMI KLƆUKLƆU Ɔ

Sika hiɔ titimati ɔmɛ

¹ Yawɛ de Mose ke,

² “Ngɔɔ sika hiɔ nɛ a fia nɔ tɛtlɛɛ kɛ pee titimati enyɔ, konɛ ke a ma bua ma kpekpemi ɔ nya, aloo ke ma a maa hia blɔ ɔ, a kpa.

³ Ke a kpa titimati enyɔ ɔmɛ tsuo ɔ, ma kpekpemi ɔ tsuo kɛ mo ma ba kpe ngɛ kpe he bo tsu ɔ sinya a nya.

⁴ Se ke a kpa kake pɛ lɛɛ Israel ma nimeli, nɛ ji wɛtsoyi ɔmɛ pɛ lɛ a kɛ mo ma ba kpe.

⁵ Ke titimati ɔ pɛ, nɛ a he ose ɔ, ma a nɛ pueɔ si ngɛ beleku je ɔ maa hia.

⁶ Ke titimati ɔ pɛ, nɛ a he ose si enyɔne ɔ, ma a nɛ ngɛ omleyi je ɔ maa hia. Be tsuaa be nɛ a maa hia blɔ ɔ, a kpa titimati ɔ, nɛ a he ose.

⁷ Ke a ma bua ma kpekpemi ɔ nya a, lɛɛ a kpa titimati ɔ kɛkɛ, se a ko he ose.

⁸ Aaron bimɛ ɔmɛ, nɛ ji osɔfo ɔmɛ ji ni nɛmɛ nɛ ma kpa titimati ɔmɛ. “Mlaa nɛ maa fɔ si kɛ ha yi nɔhi tsuo pɛpɛɛpɛ kɛ yaa neneene ji nɛ ɔ nɛ.

⁹ Ke he nyɛli ba tua nyɛ ngɛ nyɛ nitsɛmɛ nyɛ zugba nɔ, nɛ e ba mi kaa nyɛ gba ta kɛ fa nyɛ he ɔ, nyɛ kpa titimati ɔmɛ, nɛ nyɛ he ose. Kɛkɛ ɔ, Yawɛ, nyɛ Mawu ɔ ma kai nyɛ, nɛ e ma kpɔ nyɛ kɛ je nyɛ he nyɛli ɔmɛ a dɛ mi.

¹⁰ Jehanɛ, ngɛ nyɛ nyami ligbihi, kɛ ligbi kpahi nɛ a to ɔ, kɛ Nyɔhiɔhe nyami be ɔmɛ hu nyɛ kpa titimati ɔmɛ be mi nɛ nyɛ ngɛ sami bɔ ɔmɛ, kɛ tue mi jɔmi bɔ ɔmɛ sãe. Nɔ́ nɛ ɔ ma ha nɛ nyɛ Mawu ɔ ma kai nyɛ. Imi ji Yawɛ, nyɛ Mawu ɔ nɛ.”

Israel bi ɔmɛ hia kɛ je Sinai

¹¹ Benɛ Israel bi ɔmɛ je Egipt ɔ se jeha nɛ ji enyɔ ɔ, nyɔhiɔ enyɔne ɔ we ligbi nɛ ji nyingmi enyɔ ɔ, bɔku ɔ wo e he nɔ kɛ je kpe he ɔ he nɛ mlaa womi ɔ ngɛ ɔ.

¹² Kɛkɛ nɛ Israel bi ɔmɛ hia kɛ je Sinai nga a nɔ, nɛ a tsa a nyɛɛmi ɔ nɔ hluu kɛ ya si bɔku ɔ ya da si ngɛ Paran nga a nɔ.

¹³ Benɛ Yawɛ fa mɛ kɛ gu Mose nɔ, nɛ a maa hia nyɛɛmi kekleekle ɔ,

¹⁴ Yuda bi ɔmɛ kɛ a wɛtso aflaangaa a hia kekle tabo nya tabo nya. A nyatsɛ ji Aminadab bi Nashon.

¹⁵ Zuar bi Netanel ji Isakar bi ɔmɛ a nyatsɛ.

¹⁶ Zebulun bi ɔmɛ hu a nyatsɛ ji Helon bi Eliab.

¹⁷ Kɛkɛ nɛ a gbɛ bo tsu ɔ; nɛ Gershon bi ɔmɛ, kɛ Merari bi ɔmɛ nɛ tloo bo tsu ɔ hia nyɛɛmi.

¹⁸ Ruben bi ɔmɛ nyɛɛ a se tabo nya tabo nya kɛ a wɛtso aflaangaa. A nyatsɛ ji Shedeur bi Elizur.

¹⁹ Zurishadai bi Shelumiel ji Simeon bi ɔmɛ a nyatsɛ.

²⁰ Deuel bi Eliasaf hu ji Gad bi ɔmɛ a nyatsɛ.

²¹ Jehanɛ, Kohat bi ɔmɛ nɛ tloo ní klɔuklɔu ɔmɛ hu hia; nɛ benɛ a ke a suu sito he kpa a, a na kaa a kɛ bo tsu ɔ ma si ngɛ lejɛ ɔ momo.

²² Efraim bi ɔmɛ nyɛɛ Kohat bi ɔmɛ a se tabo nya tabo nya kɛ a wɛtso aflaangaa. A nyatsɛ ji Amihud bi Elishama.

²³ Pedazur bi Gamaliel ji Manase bi ɔmɛ a nyatsɛ.

²⁴ Gideoni bi Abidan hu ji Benyamin bi ɔmɛ a nyatsɛ.

²⁵ Nyagbe ɔ, Dan bi ɔmɛ hia tabo nya tabo nya kɛ a wɛtso aflaangaa. Mɛ ji Israel ta a tsuo a se tabo, nɛ a nyatsɛ ji Amishadai bi Ahiezer.

²⁶ Okran bi Pagiel ji Asher bi ɔmɛ a nyatsɛ.

²⁷ Enan bi Ahira hu ji Naftali bi ɔmɛ a nyatsɛ.

²⁸ Ke Israel ma a maa hia blɔ ɔ, bɔ nɛ a plɛɔ kɛ nyɛɛɔ tabo nya tabo nya ji nɛ ɔ nɛ.

²⁹ Kɛkɛ nɛ Mose de e ngatsɛ Yetro, Midian no ɔ bi Hobab ke, “Wa ngɛ hiae kɛ yaa he nɛ Yawɛ de to ke e ma ha wɔ ɔ. Yawɛ nitsɛ wo Israel ní kpakpahi a he si. Lɔ ɔ he ɔ, ha waa ho nɛ waa kɛ mo ya ye wa kplɔkɔtɔ ɔ.”

³⁰ Se Hobab de lɛ ke, “Dɛbi; i be yae; ma kpale kɛ ya imi nitsɛ ye ma mi, kɛ imi nitsɛ ye nyɛmimɛ a ngɔ mohu.”

³¹ Mose ya nɔ nɛ e de lɛ ke, “I kpa mo pɛɛ, ko si wɔ. Mo lɛ o le nga a nɔ hehi nɛ hi nɛ wa maa to si ngɛ; mo ji nɔ nɛ maa tsɔɔ wɔ blɔ.

³² Ke o kɛ wɔ ya a, nɔ́ kpakpa tsuaa nɔ́ kpakpa nɛ Yawɛ kɛ maa gbaa wɔ ɔ, waa kɛ mo maa dla.”

³³ Kɛkɛ nɛ ma a hia kɛ je Yawɛ yo ɔ he, nɛ a nyɛɛ ligbi etɛ. Yawɛ somi daka a nyɛɛ a hɛ mi kɛ hla sito he ha mɛ.

³⁴ Be tsuaa be nɛ a maa hia kɛ je a sito he ɔ, Yawɛ bɔku ɔ ma ba da a yi mi piani.

³⁵ Be tsuaa be nɛ somi daka a maa hia a, Mose ma de ke, “Yawɛ, tee si! Gbɛɛ o he nyɛli ɔmɛ ngɔ fĩa; nɛ o ha ni nɛmɛ nɛ sume mo ɔ nɛ a tu fo ngɛ o hɛ mi!”

³⁶ Be tsuaa be nɛ somi daka a maa da si ɔ, e ma de ke, “Yawɛ, kpale o se! Kpale kɛ ba Israel bi akpeakpe abɔ ɔ a ngɔ!”