Mose III, 9 - BAIBLO ALOO NGMAMI KLƆUKLƆU Ɔ

Aaron sã bɔhi

¹ Ligbi kpaanyɔne ɔ nɔ ɔ, Mose tsɛ Aaron kɛ e binyumu ɔmɛ, kɛ Israel ma nikɔtɔma amɛ kɛ ba e ngɔ,

² nɛ e de Aaron ke, “Ngɔɔ na niheyo, kɛ agbosu nɛ kpa ko be a he kɛ ba sã bɔ ha Yawɛ. Ngɔɔ na niheyo ɔ kɛ sa yayami pami bɔ, nɛ o ngɔ agbosu ɔ kɛ sã sami bɔ.

³ De Israel bi ɔmɛ ke a ngɔ akpakpo kɛ ba sã yayami pami bɔ, nɛ a ngɔ na bi nɛ ye jeha kake, kɛ jijɔ nɛ ye jeha kake, nɛ kpa ko be a he kɛ ba sa sami bɔ.

⁴ Á ngɔ na ku, kɛ agbosu kɛ ba sã tue mi jɔmi bɔ ha Yawɛ kɛ piɛ niye ní bɔ nɛ a futu mi nu ɔ he. Á pee nɔ́ nɛ ɔ, ejakaa Yawɛ ma je e he kpo kɛ tsɔɔ mɛ mwɔnɛ ɔ.”

⁵ A ngɔ ní nɛ ɔmɛ tsuo kɛ ba kpe he bo tsu ɔ hɛ mi kaa bɔ nɛ Mose fa mɛ ɔ. Kɛkɛ nɛ ma a tsuo bua a he nya ngɛ Yawɛ hɛ mi.

⁶ Mose de mɛ ke, “Enɛ ɔ ji nɔ́ nɛ Yawɛ fa ke nyɛɛ pee konɛ nyɛɛ na Yawɛ hɛ mi nyami ɔ.”

⁷ Enɛ ɔ se ɔ, Mose de Aaron ke, “Yaa bɔ sami la tɛ ɔ he, nɛ o ya sã yayami pami bɔ, kɛ sami bɔ kɛ je o kɛ ma a tsuo nyɛ he yayami ɔmɛ. Sãã bɔ nɛ ɔ nɛ o kɛ je ma a he yayami ɔmɛ kaa bɔ nɛ Yawɛ fa a.”

⁸ Aaron hɛ lɛ kɛ su bɔ sami la tɛ ɔ he, nɛ e gbe na niheyo ɔ nɛ e kɛ maa sã yayami pami bɔ kɛ ha lɛ nitsɛ e he ɔ.

⁹ E binyumu ɔmɛ ngɔ muɔ ɔ kɛ ya ha lɛ, nɛ e ngɔ e nine nguɛ kɛ sɔ mi, nɛ e kɛ kpa bɔ sami la tɛ ɔ koli ɔmɛ a he. Lɔ ɔ se ɔ, e tsɛ̃ muɔ ɔ ngɔ pue bɔ sami la tɛ ɔ sisi.

¹⁰ Jehanɛ, e sã zɔ ɔ kɛ se tso mi ngmɛ enyɔ ɔmɛ, kɛ fafali ɔ he nɛ hi pe kulaa a ngɛ bɔ sami la tɛ ɔ nɔ kaa bɔ nɛ Yawɛ fa Mose ɔ pɛpɛɛpɛ.

¹¹ Se lohwe ɔ lo ɔ kɛ e he womi ɔ lɛɛ e ya sã mɛ ngɛ ma sito he ɔ se.

¹² Enɛ ɔ se ɔ, e gbe lohwe ɔ nɛ e kɛ maa sã sami bɔ kɛ ha lɛ nitsɛ e he ɔ. E binyumu ɔmɛ ngɔ muɔ ɔ kɛ ba ha lɛ, nɛ e tsɛ̃ ngɔ pue bɔ sami la tɛ ɔ he kɛ kpe.

¹³ A ngɔ lohwe ɔ yi ɔ, kɛ lo ɔ nɛ a poo kpɔ nya kpɔ nya a kɛ ha lɛ, nɛ e sã ngɛ bɔ sami la tɛ ɔ nɔ.

¹⁴ Lɔ ɔ se ɔ, e fɔ mi ní ɔmɛ, kɛ nane ɔmɛ a he, nɛ e ngɔ mɛ ngɔ pue sami bɔ ɔmɛ a nɔ, nɛ e sã mɛ ngɛ bɔ sami la tɛ ɔ nɔ.

¹⁵ Jehanɛ, e sã bɔ kɛ ha ma a. E nu akpakpo ɔ nɛ a kɛ maa sã yayami pami bɔ kɛ ha ma a, nɛ e gbe lɛ, nɛ e kɛ sã bɔ kaa bɔ nɛ e pee lohwe ɔ nɛ e kɛ sã bɔ kɛ ha lɛ nitsɛ e he yayami pami ɔ.

¹⁶ Lɔ ɔ se ɔ, e ngɔ lohwe ɔ nɛ a kɛ maa sã sami bɔ ɔ hu kɛ ba sã bɔ kaa bɔ nɛ blɔ nya tomi ɔ ngɛ ɔ.

¹⁷ Enɛ ɔ se ɔ, e sã niye ní bɔ ɔ. E piti ngma a e dɛ kɔkɔ kake, nɛ e sã ngɛ bɔ sami la tɛ ɔ nɔ kɛ piɛ mɔtu sami bɔ ɔ he.

¹⁸ E gbe na ku ɔ, kɛ agbosu ɔ kɛ sã tue mi jɔmi bɔ kɛ ha ma a. E binyumu ɔmɛ ngɔ muɔ ɔ kɛ ba ha lɛ, nɛ e tsɛ̃ kɛ pue bɔ sami la tɛ ɔ he kɛ kpe.

¹⁹ Na ku ɔ zɔ ɔ, agbosu ɔ zɔ ɔ, kɛ hlemi ɔ, kɛ se tso mi ngmɛ ɔmɛ, kɛ fafali ɔ he nɛ hi pe kulaa a,

²⁰ Aaron ngɔ mɛ ngɔ pue lohwe ɔmɛ a gugue ɔmɛ a nɔ, nɛ e ya sã mɛ ngɛ bɔ sami la tɛ ɔ nɔ.

²¹ Kaa bɔ nɛ Mose fa ke a pee ɔ, gugue ɔmɛ, kɛ hiɔ nɔ fiɔ ɔ lɛɛ Aaron wo a nɔ kaa bɔ nɛ a fɔɔ kɛ yaa kɛ baa ngɛ Yawɛ hɛ mi.

²² Benɛ Aaron sã yayami pami bɔ ɔ, sami bɔ ɔ, kɛ tue mi jɔmi bɔ ɔ gbe nya a, e wo e nine nɔ ngɛ ma a nɔ nɛ e gbaa mɛ. Lɔ ɔ se ɔ, e kple si kɛ je he nɛ e sã bɔ ɔmɛ ngɛ ɔ.

²³ Jehanɛ, Mose kɛ Aaron sɛ kpe he bo tsu ɔ mi, nɛ benɛ a je kpo ɔ, a gbaa ma a. Kɛkɛ nɛ Yawɛ hɛ mi nyami ɔ je kpo, nɛ ma a tsuo pɛpɛɛpɛ na.

²⁴ Tlukaa a, Yawɛ ha nɛ la ba, nɛ e ba sã sami bɔ ɔ, kɛ zɔ ɔ nɛ ngɛ bɔ sami la tɛ ɔ nɔ ɔ. Benɛ ni ɔmɛ tsuo na nɔ́ nɛ ɔ, a he ose, nɛ a kɛ a hɛ mi bu si.