Mose III, 8 - BAIBLO ALOO NGMAMI KLƆUKLƆU Ɔ

Aaron kɛ e binyumu ɔmɛ a we osɔfo womi

¹ Yawɛ de Mose ke,

² “Ngɔɔ Aaron kɛ e binyumu ɔmɛ, a tade ɔmɛ, nɔ pɔmi nu ɔ, na ku ɔ nɛ a kɛ maa sã yayami pami bɔ ɔ, agbosu enyɔ ɔmɛ, kɛ kusii kɛ e mi abolo kplolo ɔ kɛ ba kpe he bo tsu ɔ sinya a nya;

³ nɛ o kpee ma a tsuo kɛ ba lejɛ ɔ.”

⁴ Mose pee kaa bɔ nɛ Yawɛ fa lɛ ɔ, nɛ benɛ ma a tsuo ba kpe ɔ,

⁵ e de mɛ ke, “Nɔ́ nɛ Yawɛ fa ke a pee ji nɛ ɔ nɛ.”

⁶ Mose ngɔ Aaron kɛ e binyumu ɔmɛ kɛ ba nɛ e ba du a he ha mɛ.

⁷ E ngɔ yi nɔ tade ɔ ngɔ wo Aaron, nɛ e kɛ mlɛ mi fimi nɔ́ fi e mlɛ mi, nɛ e wo lɛ tade klɔii ɔ. Jehanɛ e ngɔ tade nɛ a tsɛɛ efɔd ɔ ngɔ wo lɛ, nɛ e kɛ efɔd ɔ he kpa nɛ a lo lɛ saminyayoo ɔ fi efɔd ɔ nɔ.

⁸ Lɔ ɔ se ɔ, e ngɔ hiɔwe tade ɔ nɛ Urim kɛ Tumim ngɛ mi ɔ ngɔ wo lɛ.

⁹ E bu lɛ pɛɛ kɛ e hɛ mi sika tsu june nɛ ji jlasi klɔuklɔu kaa bɔ nɛ Yawɛ fa lɛ Mose ɔ.

¹⁰ Lɔ ɔ se ɔ, Mose ngɔ nɔ pɔmi nu ɔ kɛ pɔ kpe he bo tsu ɔ, kɛ nɔ́ tsuaa nɔ́ nɛ ngɛ mi ɔ kɛ pee mɛ klɔuklɔu.

¹¹ E kɛ nu ɔ eko fĩa bɔ sami la tɛ ɔ nɔ si kpaago kɛ pɔ bɔ sami la tɛ ɔ kɛ e he ní ɔmɛ tsuo kɛ kã a kɛ e sisi kla a nu, nɛ e kɛ tsukɔ a he.

¹² E plɛ nɔ pɔmi nu ɔ eko kɛ pue Aaron yi mi kɛ pɔ lɛ nu kɛ tsukɔ e he.

¹³ Enɛ ɔ se ɔ, Mose ngɔ Aaron binyumu ɔmɛ kɛ ba, nɛ e ngɔ hiɔwe tadehi kɛ wo mɛ, nɛ e kɛ mlɛ mi fimi níhi fi a mlɛ mi ha mɛ, nɛ e bu mɛ pɛɛ kaa bɔ nɛ Yawɛ fa lɛ ɔ.

¹⁴ Jehanɛ, Mose ngɔ na ku ɔ nɛ a kɛ maa sã yayami pami bɔ ɔ kɛ ba, nɛ Aaron kɛ e binyumu ɔmɛ ngɔ a nine kɛ pue lohwe ɔ yi mi.

¹⁵ Mose gbe lohwe ɔ, nɛ e ngɔ e nine nguɛ kɛ sɔ muɔ ɔ mi, nɛ e kɛ kpa bɔ sami la tɛ ɔ koli ɔmɛ a he. Kɛkɛ nɛ e tsɛ̃ muɔ ɔ kɛ pue bɔ sami la tɛ ɔ sisi. Blɔ nɔ nɛ a gu kɛ tsukɔ bɔ sami la tɛ ɔ he ji nɛ ɔ nɛ.

¹⁶ Mose ngɔ zɔ ɔ tsuo nɛ ngɛ mi ní ɔmɛ a he ɔ, kɛ fafali ɔ he nɛ hi pe kulaa a, kɛ se tso mi ngmɛ enyɔ ɔmɛ kɛ mɛ hu a he zɔ ɔ tsuo, nɛ e sã ngɛ bɔ sami la tɛ ɔ nɔ.

¹⁷ Se lohwe ɔ he womi ɔ, e lo ɔ, kɛ e mi fĩ ɔmɛ lɛɛ, e ya sã ngɛ ma si tomi he ɔ se kaa bɔ nɛ Yawɛ fa lɛ ɔ.

¹⁸ Enɛ ɔ se ɔ, Mose ngɔ agbosu ɔ nɛ a kɛ maa sã sami bɔ ɔ kɛ ba, nɛ Aaron kɛ e binyumu ɔmɛ ngɔ a nine ngɔ pue lohwe ɔ yi mi.

¹⁹ Mose gbe lohwe ɔ, nɛ e tsɛ̃ muɔ ɔ kɛ pue bɔ sami la tɛ ɔ he tsuo kɛ kpe.

^20-21 Jehanɛ, e saa agbosu ɔ, nɛ e poo lɛ kpɔ nya kpɔ nya, nɛ e fɔ e mi ní ɔmɛ, kɛ e nane ɔmɛ a he. Nɛ kaa bɔ nɛ Yawɛ fa a, Mose sã e yi ɔ, zɔ ɔ, kɛ nɔ́ tsuaa nɔ́ ngɛ bɔ sami la tɛ ɔ nɔ. Niye ní bɔ nɛ jee via ha Yawɛ ji nɛ ɔ nɛ.

²² Enɛ ɔ se ɔ, Mose ngɔ agbosu enyɔne ɔ nɛ a kɛ maa pee kusumi kɛ wo osɔfo ɔ hu kɛ ba, nɛ Aaron kɛ e binyumu ɔmɛ ngɔ a nine ngɔ pue e yi mi.

²³ Mose gbe lɛ, nɛ e ngɔ e muɔ ɔ eko kɛ sa Aaron hiɔ nɔ tue nya lo ɔ he, nɛ e kɛ eko sa e hiɔ nine nguɛ gɔleku ɔ kɛ e hiɔ nane nguɛ gɔleku ɔ he.

²⁴ Jehanɛ Mose ngɔ Aaron binyumu ɔmɛ hu kɛ ba nɛ e kɛ muɔ ɔ eko sa a hiɔ tue nya lo ɔmɛ, a hiɔ nine gɔleku ɔmɛ, kɛ a hiɔ nane gɔleku ɔmɛ hu a he; lɔ ɔ se ɔ, Mose tsɛ̃ muɔ nɛ piɛ ɔ kɛ pue bɔ sami la tɛ ɔ he tsuo kɛ kpe.

²⁵ Jehanɛ, e ngɔ zɔ ɔ kɛ e hlemi ɔ, kɛ zɔ ɔ tsuo nɛ ngɛ mi ní ɔmɛ a he ɔ, fafali ɔ he nɛ hi pe kulaa a, se tso mi ngmɛ enyɔ ɔmɛ kɛ a he zɔ ɔ, kɛ hiɔ nɔ fiɔ ɔ.

²⁶ E je abolo kplolo kake, kɛ abolo nɛ a futu mi nu, kɛ akpɔɔnɔɔ kake kɛ je abolo kplolo nɛ ngɛ kusii nɛ maa si ngɛ Yawɛ hɛ mi ɔ mi kɛ pue zɔ ɔ, kɛ hiɔ nɔ fiɔ ɔ a nɔ.

²⁷ E ngɔ ní nɛ ɔmɛ tsuo ngɔ wo Aaron kɛ e binyumu ɔmɛ a dɛ mi, nɛ a wo nɔ kaa bɔ nɛ a fɔɔ kɛ yaa kɛ baa ngɛ Yawɛ hɛ mi.

²⁸ Mose he ní nɛ ɔmɛ ngɛ a dɛ mi, nɛ e sã mɛ kɛ piɛ sami bɔ ɔ he ngɛ bɔ sami la tɛ ɔ nɔ. Osɔfo womi bɔ nɛ a kɛ la sãã, nɛ jee via ha Yawɛ ji nɛ ɔ nɛ.

²⁹ Mose wo agbosu ɔ gugue ɔ nɔ kaa bɔ nɛ a fɔɔ kɛ yaa kɛ baa ngɛ Yawɛ hɛ mi. Kaa bɔ nɛ Yawɛ fa Mose ɔ, ke a gbe agbosu kɛ pee kusumi kɛ wo osɔfo ɔ, Mose lɛɛ e blɔ fa mi nɔ́ ji nɛ ɔ nɛ.

³⁰ Jehanɛ Mose ngɔ nɔ pɔmi nu ɔ eko, kɛ muɔ nɛ ngɛ bɔ sami la tɛ ɔ nɔ ɔ hu eko, nɛ e kɛ fĩa Aaron kɛ e tade ɔmɛ a nɔ, kɛ e binyumu ɔmɛ kɛ mɛ hu a tade ɔmɛ a nɔ. Mose pee enɛ ɔmɛ kɛ tsukɔ Aaron kɛ e tade ɔmɛ, kɛ e binyumu ɔmɛ kɛ mɛ hu a tade ɔmɛ a he.

³¹ Enɛ ɔ se ɔ, Mose de Aaron kɛ e binyumu ɔmɛ ke, “Nyɛ ya hoo lo ɔ ngɛ kpe he bo tsu ɔ sinya a nya, nɛ nyɛɛ ye ngɛ lejɛ ɔ; nyɛɛ ngɔ abolo ɔ nɛ ngɛ kusii nɛ osɔfo womi bɔ sami ní ɔmɛ ngɛ mi ɔ kɛ ye kaa bɔ nɛ Yawɛ fa ke Aaron kɛ e binyumu ɔmɛ pɛ nɛ a ye ɔ.

³² Lo, loo abolo nɛ maa piɛ ɔ lɛɛ nyɛɛ sã.

³³ Nyɛɛ hi kpe he bo tsu ɔ sinya a nya ligbi kpaago. Nyɛ ko je lejɛ ɔ kɛ yaa su ligbi nɛ nyɛ maa gbe osɔfo womi kusumi ɔ nya. Ejakaa ligbi kpaago nɛ a kɛ maa wo nyɛ osɔfo.

³⁴ Nɔ́ nɛ a pee mwɔnɛ nɛ ɔ, ja nɛ Yawɛ fa ke a pee, konɛ a kɛ je nyɛ he yayami.

³⁵ Nyɛɛ hi kpe he bo tsu ɔ sinya a nya nyɔ kɛ pia ligbi kpaago kɛ tsu ní tsumi nɛ Yawɛ kɛ wo nyɛ dɛ ɔ; ke pi ja a, nyɛ ma gbo. Bɔ nɛ a fa mi ke ma de ji nɛ ɔ nɛ.”

³⁶ Lɔ ɔ he ɔ, Aaron kɛ e binyumu ɔmɛ pee nɔ́ tsuaa nɔ́ nɛ Yawɛ fa Mose ke a pee ɔ.