Mose III, 7 - BAIBLO ALOO NGMAMI KLƆUKLƆU Ɔ

Fɔ yemi bɔ

¹ Fɔ yemi bɔ sami he mlaahi ji nɛ ɔmɛ nɛ. E ji bɔ nɛ ngɛ klɔuklɔu pe kulaa.

² He nɛ a gbee lohwe nɛ a kɛ sãã sami bɔ ngɛ ɔ, á gbe lohwe nɛ a kɛ maa sã fɔ yemi bɔ ɔ ngɛ lejɛ ɔ kɛ̃. A tsɛ̃ e muɔ ɔ ngɔ pue bɔ sami la tɛ ɔ he tsuo.

³ A ngɔ e zɔ ɔ tsuo kɛ sã bɔ ɔ: e hlemi ɔ, zɔ nɛ ngɛ e mi ní ɔmɛ a he ɔ,

⁴ e se tso mi ngmɛ enyɔ ɔmɛ kɛ a he zɔ nɛ ngɛ e mi si ɔ, kɛ e fafali ɔ he nɛ hi pe kulaa a.

⁵ Osɔfo ɔ nɛ sã ní nɛ ɔmɛ tsuo ngɛ bɔ sami la tɛ ɔ nɔ kaa bɔ nɛ a kɛ la sãã kɛ ha Yawɛ; fɔ yemi bɔ ji nɛ ɔ nɛ.

⁶ Nyumu tsuaa nyumu ngɛ osɔfo ɔmɛ a weku ɔ mi ma nyɛ maa ye. Se a ye lɛ ngɛ he ko nɛ ngɛ klɔuklɔu ejakaa e ji bɔ nɛ ngɛ klɔuklɔu pe kulaa.

⁷ Yayami pami bɔ ɔ ngɛ kaa fɔ yemi bɔ ɔ kɛ̃. Mlaa kake lɛ ngɛ ha mɛ tsuo; osɔfo nɛ maa sã bɔ ɔ kɛ pee kpatami ɔ, e nɔ́ ji lo ɔ nɛ.

⁸ Lohwe nɛ a kɛ sã sami bɔ ɔ he womi ɔ peeɔ osɔfo nɛ sã bɔ ɔ nɔ́.

⁹ Niye ní bɔ tsuaa niye ní bɔ nɛ a sã ngɛ flɔɔnɔɔ mi, aloo nɔ́ nɛ a si ngɛ kutu mi, loo ngɛ ngɛyu mi ɔ, osɔfo ɔ nɛ sã bɔ ɔ nɔ́ ji lɔ ɔ nɛ.

¹⁰ Se niye ní bɔ saisaa nɛ a futu mi nu, loo a futuu we mi nu ɔ, osɔfo Aaron binyumu ɔmɛ tsuo a nɔ́ ji lɔ ɔ nɛ; a dla lɛ fiee.

Tue mi jɔmi bɔhi

¹¹ Tue mi jɔmi bɔhi nɛ a kɛ ba haa Yawɛ ɔ a he mlaahi ji nɛ ɔmɛ nɛ.

¹² Ke nɔ ko ma bɔ ɔ sami nɛ e kɛ na Yawɛ si ɔ, e ngɔ ní nɛ ɔmɛ kɛ piɛ e lohwe nɛ e kɛ ma bɔ sami ɔ he kɛ ba: abolo kplolo nɛ a wo mi nu, akpɔɔnɔɔ nɛ a kɛ kplolo sã nɛ a kpa he nu, kɛ akpɔɔnɔɔ nɛ a kɛ mamu bukɔbukɔ nɛ a wo mi nu saminya sã.

¹³ E ngɔ abolo nɛ a wo mi masa kɛ piɛ ní ɔmɛ nɛ e kɛ ma tue mi jɔmi bɔ sami kɛ na Yawɛ si ɔ a he kɛ ba.

¹⁴ Níhi nɛ a kɛ ma bɔ sami ɔ, e je mi kakaaka kɛ pee nike ní pɔtɛɛ kɛ ha Yawɛ. Osɔfo ɔ nɛ maa tsɛ̃ muɔ ɔ kɛ pue bɔ sami la tɛ ɔ he ɔ, enɛ ɔ maa pee e nɔ́.

¹⁵ A ye lohwe ɔ nɛ a kɛ ba sã bɔ ɔ jamɛ a ligbi ɔ nɔuu; a ko si eko nɛ je nɛ e na yi.

¹⁶ Ke nɔ ko ba sã tue mi jɔmi bɔ ɔ; nɔ́ ko nɛ e wo he si jio, nɔ́ nɛ je e tsui mi faa jio, a ma nyɛ ye lo ɔ ligbi ɔ nɛ e kɛ ba a. Ke eko piɛ ɔ, a ye e nɔ jena.

¹⁷ Ligbi etɛne ɔ, ke lo ɔ eko piɛ ɔ, á sã.

¹⁸ Ke nɔ ko ye lo nɛ ye ligbi etɛ ɔ eko ɔ, Mawu be e bɔ sami ɔ he tsui nae, nɛ a be bue ha lɛ kaa e sã bɔ hulɔ. A hiɔ; nɔ nɛ maa ye eko ɔ, e musu maa tloo lɛ.

¹⁹ Ke nɔ́ ko nɛ he tsɔ we he sa lo nɛ ɔ he ɔ, á ko ye; á sã. Nɔ tsuaa nɔ nɛ he tsɔ ngɛ he blɔ kaa e maa ye lo nɛ a kɛ ba sã bɔ ɔ eko.

²⁰ Se nɔ nɛ he tsɔ we nɛ maa ye eko ɔ, á je lɛ we; á ko bu lɛ ngɔ si Mawu ma a mi bi ɔmɛ a nɔ hu.

²¹ Jehanɛ hu, nɔ tsuaa nɔ nɛ maa ta nɔ́ ko nɛ he tsɔ we he, nɔmlɔ jio, lohwe jio, bɔ nɔ́ ko jio, nɛ e maa ye lo nɛ a kɛ sã tue mi jɔmi bɔ ha Yawɛ ɔ, á je lɛ we, á ko bu lɛ ngɔ si Mawu ma a mi bi ɔmɛ a nɔ hu.

²² Yawɛ wo Mose mlaa nɛ ɔ ke

²³ e de Israel bi ɔmɛ ke, á ko ye zɔ, na zɔ jio, jijɔ zɔ jio, apletsi zɔ jio.

²⁴ Ke lohwe ko gbo lɛ nitsɛ e gbenɔ, aloo lohwe awi yelɔ ko tsɔtslɔɔ e mi ɔ, a ko ye e zɔ ɔ; a ma nyɛ kɛ tsu nɔ́ kpa ko.

²⁵ Ke a kɛ lohwe ko ba sã bɔ nɛ a kɛ la sãã ha Yawɛ ɔ, nɔ tsuaa nɔ nɛ maa ye e zɔ ɔ, á je lɛ we, nɛ á ko bu lɛ ngɔ si Mawu ma a mi bi ɔmɛ a nɔ hu.

²⁶ Jehanɛ hu, nɔ ko nɔ ko kó ye lohwe pɛlitsɛ, loo nane eywiɛtsɛ ko muɔ ngɛ nyɛ hi he ɔmɛ.

²⁷ Nɔ tsuaa nɔ nɛ maa ye muɔ ɔ, á je lɛ we; a ko bu lɛ ngɔ si Mawu ma a mi bi ɔmɛ a nɔ hu.

²⁸ Yawɛ de Mose ke

²⁹ e de Israel bi ɔmɛ ke, nɔ tsuaa nɔ nɛ maa sã tue mi jɔmi bɔ ɔ, lɛ nitsɛ e ngɔ bɔ ɔmi eko kaa sina pɔtɛɛ kɛ ba ha Yawɛ.

³⁰ Lɛ nitsɛ e hɛɛ ngɛ e dɛ mi kɛ ba kaa bɔ nɛ a kɛ la sãã kɛ ha Yawɛ. É ngɔ zɔ ɔ kɛ piɛ lohwe ɔ gugue ɔ he kɛ ba kaa bɔ nɛ á fɔɔ kɛ yaa kɛ baa ngɛ Yawɛ hɛ mi.

³¹ Osɔfo ɔ nɛ sã zɔ ɔ tsuo ngɛ bɔ sami la tɛ ɔ nɔ, se gugue ɔ lɛɛ, e maa pee Aaron, kɛ e bimɛ ɔmɛ a nɔ́.

^32-33 Á ngɔ lohwe ɔ hiɔ fiɔ ɔ kɛ ha osɔfo ɔ nɛ ngɔ muɔ kɛ zɔ ɔ kɛ sã tue mi jɔmi bɔ ɔ kaa nike ní pɔtɛɛ ko. E blɔ nya nɔ́ ji nɛ ɔ nɛ.

³⁴ Lohwe ɔ gugue, kɛ e hiɔ nɔ fiɔ ji nike ní pɔtɛɛ nɛ Yawɛ he ngɛ Israel bi ɔmɛ a dɛ kɛ ha osɔfo ɔmɛ. Nike ní nɛ ɔ ji nɔ́ nɛ sa nɛ Israel bi ɔmɛ nɛ ha osɔfo ɔmɛ be tsuaa be.

³⁵ Bɔhi nɛ a kɛ la sãã ha Yawɛ ɔ, Aaron kɛ e bimɛ ɔmɛ a blɔ fa mi nɔ́ nɛ a gbaa nɔ kɛ ha mɛ kɛ je be nɛ a wo mɛ osɔfo ji nɛ ɔ nɛ.

³⁶ Jamɛ a ligbi ɔ nɛ Yawɛ pɔ mɛ nu ɔ nɛ e fa Israel bi ɔmɛ ke a ngɔ bɔ nɛ a sãã a mi fa nɛ ɔ ngɔ ha mɛ. E ji mlaa nɛ fɔɔ si ha Israel bi ɔmɛ kɛ a nina tsuo kulaa yi nɔhi tsuo.

³⁷ Mlaahi nɛ ngɛ kɛ ha sami bɔ, niye ní bɔ, yayami pami bɔ, fɔ yemi bɔ, osɔfo womi bɔ, kɛ tue mi jɔmi bɔ ji nɛ ɔmɛ nɛ.

³⁸ Yawɛ wo Mose mlaa nɛ ɔmɛ ngɛ Sinai yo ɔ nɔ ngɛ nga a nɔ. Jamɛ a ligbi ɔ nɛ Yawɛ de Israel bi ɔmɛ ke a ngɔ a nike ní kɛ ba ha lɛ ɔ nɛ.