Mose III, 5 - BAIBLO ALOO NGMAMI KLƆUKLƆU Ɔ

Sanehi nɛ hia yayami pami bɔ sami

¹ Ke a tsɛ nɔ ko ke e ba ye odase ngɛ sane yemi he, nɛ nɔ ɔ de we nɔ́ nɛ e na, loo e le ngɛ munyu ɔ he ɔ, e pee yayami; a gbla e tue.

² Ke nɔ ko li e he be, nɛ e ya ta nɔ́ ko nɛ he tsɔ we he, we mi lohwe gbogboe jio, nga mi lohwe gbogboe jio, lohwe tsɔwi a gbogboe jio, nɔ́ nɛ e pee ɔ woɔ e he mu nɛ, e yeɔ fɔ.

³ Ke nɔ ko li e he be, nɛ e ya ta nɔ́ ko nɛ he tsɔ we he, nɔ́ nɛ jeɔ nɔmlɔ mi jio, nɔ́ nɛ jeɔ e he jio, ke e ba na le nɔ́ nɛ e pee ɔ, e yeɔ fɔ.

⁴ Ke nɔ ko ka kita nya mi gu kaa e maa pee nɔ́ ko, kpakpa jio, yaya jio, nɛ e li e he be ɔ, ke e ba na le ɔ, e yeɔ fɔ.

⁵ Ke nɔ ko na le kaa e ye fɔ ngɛ ní nɛ ɔmɛ eko mi ɔ, é jaje e tɔmi ɔ ngɔ tsɔɔ;

⁶ nɛ é ngɔ jijɔ yo, loo apletsi yo kɛ ba sã yayami pami bɔ ha Yawɛ. Osɔfo ɔ nɛ sã bɔ ɔ ha lɛ ngɛ e yayami ɔ he.

⁷ Ke nɔ ko be nyɛe ma ha jijɔ ɔ, é ngɔ lahuɛ enyɔ, loo beleku lahuɛ enyɔ kɛ ba ha Yawɛ kaa e yayami nɛ e pee ɔ he bɔ. Á ngɔ kake kɛ pee yayami pami bɔ, nɛ enyɔne ɔ, a kɛ pee sami bɔ.

⁸ Nɔ ɔ nɛ ngɔ lahuɛ ɔmɛ kɛ ba ha osɔfo ɔ; nɛ lɛ hu e tsu yayami pami bɔ ɔ he ní kekle. É ku lahuɛ ɔ kuɛ, se e ko tsɔ e yi ngɛ nya,

⁹ nɛ é ngɔ muɔ ɔ eko kɛ fia bɔ sami la tɛ ɔ he. É tsle muɔ nɛ maa piɛ ɔ kɛ pue bɔ sami la tɛ ɔ sisi. Yayami pami bɔ ji nɛ ɔ nɛ.

¹⁰ Enɛ ɔ se ɔ, é ngɔ lohwe enyɔne ɔ kɛ sã sami bɔ kaa bɔ nɛ a to ke a pee ɔ. Bɔ nɛ osɔfo ɔ maa pee kɛ kpata Mawu ha nɔ ɔ, konɛ a kɛ e he yayami nɛ pa lɛ ji nɛ ɔ nɛ.

¹¹ Se ke nɔ ɔ be nyɛe ma ha lahuɛ enyɔ, loo beleku lahuɛ enyɔ ɔ, lɛɛ é ngɔ mamu bukɔbukɔ kilo kake kɛ ba kaa yayami pami bɔ. E ko ngɔ nu, loo tsopa kɛ e he via kɛ pue nɔ, ejakaa e ji yayami pami bɔ.

¹² E ngɔ kɛ ba ha osɔfo ɔ, nɛ osɔfo ɔ nɛ ngɔ mamu ɔ e dɛ kɔkɔ kake kaa bɔ ɔ tsuo nane mi dami okadi. Osɔfo ɔ nɛ sã enɛ ɔ tsuo kaa bɔ nɛ a kɛ la sãã ha Yawɛ ngɛ bɔ sami la tɛ ɔ nɔ. Yayami pami bɔ ji nɛ ɔ nɛ.

¹³ Bɔ nɛ osɔfo ɔ maa pee kɛ kpata Mawu ha nɔ ɔ, konɛ a kɛ e he yayami nɛ pa lɛ ji nɛ ɔ nɛ. Mamu nɛ piɛ ɔ peeɔ osɔfo ɔ nɔ́ kaa bɔ nɛ e ngɛ ngɛ niye ní bɔ sami he ɔ.

Fɔ yemi bɔ sami

¹⁴ Yawɛ de Mose ke,

¹⁵ ke nɔ ko li e he be nɛ e pee yayami kɛ si Mawu, lɔ ɔ ji kaa e ha we Yawɛ ní klɔuklɔu ɔmɛ nɛ sa nɛ e ha lɛ sisiisi ɔ, é ngɔ agbosu nɛ kpa ko be e he kɛ ba. Lohwe ɔ jua nɛ pee bɔ nɛ he klɔuklɔu ɔ mlaa a tsɔɔ ɔ. Fɔ yemi bɔ ji nɛ ɔ nɛ.

¹⁶ Ní klɔuklɔu ɔmɛ nɛ e ha we sisiisi, nɛ́ ba pee hiɔ nɛ ɔ, é wo. Jehanɛ, é ngɔ hiɔ ɔ mi dlami enuɔ mi kake kɛ bɔ he kɛ ba ha osɔfo ɔ. Osɔfo ɔ maa ngɔ agbosu ɔ kɛ sã fɔ yemi bɔ, nɛ e kɛ ma kpata Mawu ha nɔ ɔ, konɛ a kɛ e he yayami ɔ nɛ pa lɛ.

¹⁷ Ke nɔ ko li e he be, nɛ e pee yayami, nɛ e tɔ̃ Yawɛ mlaa amɛ eko nɔ ɔ, e yeɔ fɔ, nɛ e sa nɛ a gbla e tue.

¹⁸ É ngɔ agbosu nɛ kpa ko be e he, loo nɔ́ ko nɛ he jua kɛ lɛ sɔ kɛ ba ha osɔfo ɔ kaa fɔ nɛ e ye ɔ he bɔ. Osɔfo ɔ maa ngɔ kɛ sã bɔ kɛ kpata Yawɛ ha lɛ, nɛ a kɛ e he yayami ɔ maa pa lɛ.

¹⁹ E ji fɔ yemi bɔ, ejakaa e pee yayami kɛ si Yawɛ.