Mose III, 4 - BAIBLO ALOO NGMAMI KLƆUKLƆU Ɔ

Yayami pami bɔ sami

¹ Yawɛ de Mose

² ke e de Israel bi ɔmɛ ke, ke a ti nɔ ko pee nɔ́ ko nɛ a nyɛ nɛ e kɛ tɔ̃ Yawɛ mlaa amɛ eko nɔ, nɛ pi kaa nɔ ɔ je blɔ tɔ̃ ɔ, a ye blɔ nya tomi nɛ ɔmɛ a nɔ.

³ Ke osɔfo nɛ a pɔ lɛ nu nɛ tɔ̃, nɛ lɔ ɔ he ɔ, e gbla musu kɛ ba ma a nɔ ɔ, e ngɔ na ku nɛ kpa ko be e he kɛ ba sã yayami pami bɔ ha Yawɛ.

⁴ É ngɔ na ku ɔ kɛ ba kpe he bo tsu ɔ sinya a nya, nɛ e ngɔ e nine ngɔ fɔ lohwe ɔ yi mi, nɛ e gbe lɛ ngɛ lejɛ ɔ ngɛ Yawɛ hɛ mi.

⁵ Jehanɛ, osɔfo nɛ a pɔ lɛ nu ɔ nɛ ngɔ na ku ɔ muɔ ɔ eko kɛ ya kpe he bo tsu ɔ mi.

⁶ É ngɔ e nine nguɛ ngɔ sɔ muɔ ɔ mi, nɛ é fĩa ngɛ tsu mi pomi bo klɔuklɔu ɔ hɛ mi si kpaago.

⁷ Lɔ ɔ se ɔ, e ngɔ muɔ ɔ eko kɛ kpa la tɛ ɔ nɛ a sãã tsopa kɛ e he via ngɛ nɔ ɔ koli ɔmɛ a he ngɛ kpe he bo tsu ɔ mi. É tsɛ̃ muɔ nɛ piɛ ɔ ngɔ pue bɔ sami la tɛ ɔ nɛ ngɛ kpe he bo tsu ɔ sinya nya a sisi.

⁸ Jehanɛ, na ku ɔ nɛ a kɛ ba sã yayami pami bɔ ɔ, é je e mi zɔ ɔ, kɛ zɔ nɛ ha e mi ní ɔmɛ a he ɔ tsuo.

⁹ É je e se tso mi ngmɛ enyɔ ɔmɛ a he zɔ ɔ, kɛ fafali ɔ he nɛ hi pe kulaa a hulɔ.

¹⁰ Osɔfo ɔ nɛ sã zɔ nɛ ɔ ngɛ bɔ sami la tɛ ɔ nɛ a sãã sami bɔ ngɛ nɔ ɔ nɔ. Ke a gbe lohwe nɛ a kɛ maa sã tue mi jɔmi bɔ ɔ, kikɛ nɛ ɔ nɔuu osɔfo ɔ jeɔ e mi ní ɔmɛ.

¹¹ Se na ku ɔ he womi ɔ, e lo ɔ, e yi ɔ, e nane ɔmɛ, kɛ e mi ní ɔmɛ, kɛ e fĩ ɔ tsuo lɛɛ

¹² é ngɔ lɛ tsuo kɛ je ma sito he ɔ kɛ ya he ko nɛ tsɔ, he nɛ a plɛɔ la zu ngɔ pueɔ ɔ. É ngɔ mɛ kɛ pue lɛ́ nɔ nɛ e sã ngɛ lejɛ ɔ.

¹³ Ke e ba mi kaa Israel ma a tsuo tɔ̃ Yawɛ mlaa a eko nɔ, nɛ pi kaa a je blɔ tɔ̃ ɔ,

¹⁴ ke a na le kaa a tɔ̃ ɔ, ma a nɛ ngɔ na ku kake kɛ ba sã yayami pami bɔ. Á ngɔ lohwe ɔ kɛ ba kpe he bo tsu ɔ hɛ mi.

¹⁵ Ma nimeli ɔmɛ nɛ á ngɔ a nine ngɔ pue lohwe ɔ yi mi, nɛ á gbe lɛ ngɛ lejɛ ɔ ngɛ Yawɛ hɛ mi.

¹⁶ Osɔfo nɛ a pɔ lɛ nu ɔ nɛ ngɔ na ku nɛ ɔ muɔ ɔ eko kɛ ya kpe he bo tsu ɔ mi.

¹⁷ É ngɔ e nine nguɛ kɛ sɔ muɔ ɔ mi, nɛ e fĩa si kpaago ngɛ Yawɛ hɛ mi ngɛ tsu mi pomi bo ɔ hɛ mi.

¹⁸ Jehanɛ, é ngɔ muɔ ɔ eko kɛ kpa la tɛ ɔ nɛ a sãã tsopa kɛ e he via ngɛ nɔ ɔ koli ɔmɛ a he ngɛ kpe he bo tsu ɔ mi. Muɔ nɛ maa piɛ ɔ, é tsɛ̃ kɛ pue bɔ sami la tɛ ɔ nɛ ngɛ kpe he bo tsu ɔ sinya a nya a sisi.

¹⁹ É je na ku ɔ mi zɔ ɔ tsuo, nɛ é sã lɛ tsuo ngɛ bɔ sami la tɛ ɔ nɔ.

²⁰ É pee na ku nɛ ɔ kaa bɔ nɛ e pee nɔ́ nɛ a kɛ ba sã yayami pami bɔ ɔ pɛpɛɛpɛ. Bɔ nɛ osɔfo ɔ maa pee nɛ e kɛ kpata Mawu ha ma a, nɛ a kɛ a he yayami maa pa mɛ ji nɛ ɔ nɛ.

²¹ Lɔ ɔ se ɔ, é ngɔ na ku nɛ ɔ hu kɛ je ma sito he ɔ, nɛ é ya sã lɛ kaa bɔ nɛ a tsɔɔ kaa a pee kaketsɛ ɔ. Enɛ ɔ ji yayami pami bɔ kɛ ha ma a tsuo.

²² Ke nɔ yelɔ ko li e he be nɛ e tɔ̃ Yawɛ, e Mawu ɔ mlaa amɛ eko nɔ,

²³ nɛ a ha nɛ e na e tɔmi ɔ, é ngɔ akpakpo nɛ kpa ko be e he kɛ ba sã bɔ.

²⁴ É ngɔ e nine kɛ fɔ akpakpo ɔ yi mi, nɛ e gbe lɛ ngɛ he nɛ a gbee lohwe nɛ a kɛ ba sãã sami bɔ ngɛ ɔ, ngɛ Yawɛ hɛ mi. E ji yayami pami bɔ.

²⁵ Jehanɛ, osɔfo ɔ nɛ ngɔ e nine nguɛ kɛ sɔ muɔ ɔ mi, nɛ e kɛ kpa la tɛ ɔ nɛ a sãã sami bɔ ngɛ nɔ ɔ koli ɔmɛ a he. É tsɛ̃ muɔ nɛ piɛ ɔ ngɔ pue bɔ sami la tɛ ɔ sisi.

²⁶ Se e zɔ ɔ tsuo lɛɛ, é sã ngɛ bɔ sami la tɛ ɔ nɔ. Lohwehi nɛ a gbee nɛ a kɛ sãã tue mi jɔmi bɔ ɔ, kikɛ nɛ ɔ nɔuu nɛ a sãã a zɔ ɔ nɛ. Bɔ nɛ osɔfo ɔ maa pee kɛ kpata Mawu ha nɔ yelɔ ɔ, konɛ a kɛ e he yayami nɛ pa lɛ ji nɛ ɔ nɛ.

²⁷ Ke nyɛ kpɛti nɔ gu ko tɔ̃ Yawɛ mlaa amɛ eko nɔ, nɛ pi e yi mi nɛ e to kɛ pee yayami ɔ,

²⁸ ke a ha e na kaa e tɔ̃ ɔ, é ngɔ apletsi yo nɛ kpa ko be e he kɛ ba sã yayami pami bɔ.

²⁹ É ngɔ e nine ngɔ fɔ lohwe ɔ yi mi, nɛ é gbe lɛ ngɛ he nɛ a gbee lohwehi nɛ a kɛ ba sãã sami bɔ ngɛ ɔ.

³⁰ Osɔfo ɔ nɛ́ ngɔ e nine nguɛ kɛ sɔ muɔ ɔ mi, nɛ e kɛ kpa la tɛ ɔ nɛ a sãã sami bɔ ngɛ nɔ ɔ koli ɔmɛ a he, nɛ e tsɛ̃ muɔ nɛ piɛ ɔ kɛ pue bɔ sami la tɛ ɔ sisi.

³¹ É je zɔ ɔ tsuo kaa bɔ nɛ a jeɔ zɔ ngɛ lohwe nɛ a gbe kɛ ha tue mi jɔmi bɔ sami ɔ mi pɛpɛɛpɛ. Osɔfo ɔ nɛ sã lɛ tsuo ngɛ bɔ sami la tɛ ɔ nɔ, nɛ́ é je via ha Yawɛ. Bɔ nɛ osɔfo ɔ maa pee kɛ sã bɔ, nɛ e kɛ ma kpata Mawu ha nɔ ɔ, konɛ a kɛ e he yayami nɛ pa lɛ ji nɛ ɔ nɛ.

³² Ke jijɔ nɔ ko kɛ ma yayami pami bɔ sami ɔ, e ngɔ jijɔ yo nɛ kpa ko be e he kɛ ba.

³³ É ngɔ e nine ngɔ fɔ lohwe ɔ yi mi, nɛ é gbe lɛ ngɛ he nɛ a gbee lohwehi nɛ a kɛ ba sãã sami bɔ ngɛ ɔ.

³⁴ Jehanɛ, osɔfo ɔ nɛ ngɔ e nine nguɛ kɛ sɔ muɔ ɔ mi, nɛ e kɛ kpa la tɛ ɔ nɛ a sãã sami bɔ ngɛ nɔ ɔ koli ɔmɛ a he, nɛ e tsɛ̃ muɔ nɛ piɛ ɔ ngɔ pue bɔ sami la tɛ ɔ sisi.

³⁵ É je e zɔ ɔ tsuo kaa bɔ nɛ a jeɔ zɔ ngɛ jijɔ nɛ a gbee kɛ sãã tue mi jɔmi bɔ he ɔ. Lɔ ɔ se ɔ, osɔfo ɔ nɛ sã zɔ ɔ kɛ piɛ bɔ nɛ a kɛ la sãã ha Yawɛ ngɛ bɔ sami la tɛ ɔ nɔ ɔ he. Bɔ nɛ osɔfo ɔ maa pee kɛ kpata Mawu ha nɔ ɔ, konɛ a kɛ e he yayami nɛ pa lɛ ji nɛ ɔ nɛ.