Mose III, 3 - BAIBLO ALOO NGMAMI KLƆUKLƆU Ɔ

Tue mi jɔmi bɔ sami

¹ Ke nɔ ko ngɔ na kɛ ma tue mi jɔmi bɔ sami ha Yawɛ ɔ, eku jio, eyo jio, e pee na nɛ kpa ko be e he.

² Nɔ ɔ nɛ ngɔ e nine kɛ fɔ lohwe ɔ yi mi, nɛ e gbe lɛ ngɛ kpe he bo tsu ɔ sinya a nya, konɛ Aaron bimɛ ɔmɛ nɛ ji osɔfo ɔmɛ nɛ a tsɛ̃ muɔ ɔ kɛ pue bɔ sami la tɛ ɔ he kɛ kpe.

³ Á je lohwe ɔ nɛ a kɛ maa sã tue mi jɔmi bɔ ɔ he ní nɛ ɔmɛ kɛ sã bɔ nɛ a kɛ la sãã ha Yawɛ: zɔ ɔ tsuo nɛ ha mi ní ɔmɛ a he ɔ,

⁴ lohwe ɔ se tso mi ngmɛ enyɔ ɔmɛ kɛ a he zɔ ɔ, kɛ fafali ɔ he nɛ hi pe kulaa a.

⁵ Osɔfo ɔmɛ nɛ a sã ní nɛ ɔmɛ tsuo kɛ sami bɔ ɔ ngɛ bɔ sami la tɛ ɔ nɔ. Enɛ ɔ ji bɔ nɛ a kɛ la sãã, nɛ jee via ha Yawɛ.

⁶ Ke nɔ ko ngɔ jijɔ, loo apletsi kɛ ma tue mi jɔmi bɔ sami ha Yawɛ ɔ, eku jio, eyo jio, e pee lohwe nɛ kpa ko be e he.

⁷ Ke jijɔ nɔ ɔ kɛ ba a,

⁸ é ngɔ e nine kɛ fɔ lohwe ɔ yi mi, nɛ e gbe lɛ ngɛ kpe he bo tsu ɔ hɛ mi. Osɔfo ɔmɛ nɛ a tsɛ̃ muɔ ɔ kɛ pue bɔ sami la tɛ ɔ he kɛ kpe.

⁹ Jehanɛ, lohwe ɔ nɛ a kɛ maa sã tue mi jɔmi bɔ ɔ, a ngɔ e he ní nɛ ɔmɛ kɛ sã bɔ nɛ a kɛ la sãã ha Yawɛ: zɔ ɔ kɛ e hlemi ɔ kulaa nɛ a je kɛ je e se tso ɔ he ɔ, zɔ ɔ tsuo nɛ ha e mi ní ɔmɛ a he ɔ,

¹⁰ e se tso mi ngmɛ ɔmɛ kɛ a he zɔ ɔ, kɛ fafali ɔ he nɛ hi pe kulaa a.

¹¹ Osɔfo nɛ ngɛ ní tsue jamɛ a be ɔ mi ɔ nɛ sã enɛ ɔmɛ tsuo ngɛ bɔ sami la tɛ ɔ nɔ kaa niye ní bɔ nɛ a kɛ la sãã ha Yawɛ.

¹² Ke nɔ ko kɛ apletsi ba bɔ sami ɔ,

¹³ é ngɔ e nine kɛ fɔ lohwe ɔ yi mi, nɛ e gbe lɛ ngɛ kpe he bo tsu ɔ hɛ mi. Osɔfo ɔmɛ nɛ a tsɛ̃ muɔ ɔ ngɔ pue bɔ sami la tɛ ɔ he kɛ kpe.

¹⁴ Jehanɛ, á je lohwe ɔ he ní nɛ ɔmɛ, nɛ á ngɔ kɛ sã bɔ nɛ a kɛ la sãã ha Yawɛ: zɔ ɔ tsuo nɛ ha mi ní ɔmɛ a he ɔ,

¹⁵ se tso mi ngmɛ enyɔ ɔmɛ kɛ a he zɔ ɔ, kɛ fafali ɔ he nɛ hi pe kulaa a.

¹⁶ Osɔfo ɔmɛ nɛ a sã enɛ ɔmɛ tsuo ngɛ bɔ sami la tɛ ɔ nɔ, kaa niye ní bɔ nɛ a kɛ la sãã nɛ jee via. Zɔ ɔ tsuo pɛpɛɛpɛ ɔ, Yawɛ nɔ́.

¹⁷ Israel fɔfɔɛ ko nɛ kó ye zɔ, loo muɔ. Enɛ ɔ ji mlaa nɛ fɔɔ si kɛ yaa neneene ha nyɛ yi nɔhi tsuo ngɛ nyɛ hi he ɔmɛ.