Mose III, 27 - BAIBLO ALOO NGMAMI KLƆUKLƆU Ɔ

Níhi nɛ a kɛ maa ke Yawɛ a he mlaahi

¹ Yawɛ de Mose ke

² e de Israel bi ɔmɛ ke, ke nɔ ko wo si kaa e maa ngɔ nɔ ko ngɔ ha Yawɛ ɔ, blɔ nɔ nɛ a maa gu kɛ kpɔ nɔ ɔ ji nɛ ɔ nɛ.

^3-7 Kaa bɔ nɛ jua a ngɛ ɔ, nyumu nɛ ye kɛ je jeha nyingmi enyɔ kɛ yaa si nyingmi ekpa a, e he jua ji sika hiɔ yi nyingmi enuɔ. Yo hu nɔ́ ji sika hiɔ yi nyingmi etɛ. Niheyo nɛ ye kɛ je jeha enuɔ kɛ ya si nyingmi enyɔ ɔ, e he jua ji sika hiɔ yi nyingmi enyɔ. Yiheyo he jua ji sika hiɔ yi nyɔngma. Bimwɔyo nɛ ye kɛ je nyɔhiɔ kake kɛ yaa si jeha enuɔ ɔ, nyumuyo jua ji sika hiɔ yi enuɔ, yoyo nɔ́ ji sika hiɔ yi etɛ. Nɔ nɛ ye jeha nyingmi ekpa kɛ se ɔ, nyumu he jua ji sika hiɔ yi nyɔngma kɛ enuɔ, nɛ yo nɔ ji sika hiɔ yi nyɔngma.

⁸ Ke nɔ nɛ wo si ɔ ya pee ohiatsɛ nɛ be nyɛe nɛ e ma ha sika a kaa bɔ nɛ a tsɔɔ ɔ, lɛɛ e ngɔ nɔ ɔ kɛ ba ha osɔfo ɔ, nɛ osɔfo ɔ nɛ wo jua bɔ nɛ nɔ nɛ wo si ɔ ma nyɛ ma ha.

⁹ Ke lohwe nɛ a kɛ sãã bɔ ji nɔ́ nɛ nɔ ɔ wo si kaa e ma ha Yawɛ ɔ, lɛɛ lohwe tsuaa lohwe kaa kikɛ nɛ ɔ nɛ a wo si ɔ peeɔ klɔuklɔu.

¹⁰ Nɔ nɛ wo si ɔ kó kpale e nya se. Jehanɛ se hu, e ko tsake lɛ kɛ lohwe kpa. E ko ngɔ lohwe kpakpa kɛ tsake lohwe yaya, nɛ e ko ngɔ lohwe yaya hu kɛ tsake lohwe kpakpa. Ke e pee ja a, kekle lohwe ɔ, kɛ nɔ́ nɛ ji enyɔ ɔ tsuo maa pee Yawɛ níhi.

¹¹ Ke lohwe ɔ he tsɔ we kaa lohwe nɛ a ngmɛ blɔ kaa a kɛ sã bɔ ha Yawɛ ɔ, lɛɛ nɔ nɛ wo si ɔ kɛ lohwe ɔ nɛ ba osɔfo ɔ ngɔ.

¹² Osɔfo ɔ nɛ hyɛ lohwe ɔ kaa e hi, loo e hí, konɛ e wo e he jua; bɔ nɛ osɔfo ɔ ma de ɔ, ja a maa ngɔ lɛ.

¹³ Se ke nɔ ɔ ngɛ hlae nɛ e kpɔ lohwe ɔ, lɛɛ e wo hiɔ sisiisi nɛ e ngɔ e he jua a mi dlami enuɔ mi kake kɛ piɛ sika a he.

¹⁴ Ke nɔ ko gbaa e we nɔ kɛ ha Yawɛ ɔ, osɔfo ɔ nɛ hyɛ kaa we ɔ hi, loo e hí, konɛ e wo he jua. Jua nɛ osɔfo ɔ maa tsɔɔ ɔ, lɔ ɔ ji nɔ́ nɛ a maa ngɔ.

¹⁵ Jehanɛ, ke nɔ ɔ ngɛ hlae nɛ e kpɔ e we ɔ, e ngɔ e we ɔ he jua a mi dlami enuɔ mi kake kɛ piɛ jua a he, kɛkɛ ɔ, we ɔ maa pee e nɔ́ ekohu.

¹⁶ Ke nɔ ko gbaa e zugba mi fa ko nɛ ji e weto ní nɔ kɛ ha Yawɛ ɔ, a da ní abɔ nɛ a duɔ ngɛ zugba a mi ɔ hiɛmi nɔ, konɛ a kɛ wo he jua. Ngma nɛ maa su kilo nyingmi enyɔ ɔ, a he sika hiɔ yi nyɔngma ngɛ he.

¹⁷ Ke Heyemi jeha a se pɛ nɛ nɔ ko gbaa e zugba nɔ kɛ ha Yawɛ ɔ e wo jua nɛ a tsɔɔ ɔ sisiisi.

¹⁸ Se ke e ngɔ e zugba a kɛ ha pee se ɔ, lɛɛ osɔfo ɔ nɛ bu be nɛ piɛ loko Heyemi jeha kpa a maa su, konɛ e je nɔ.

¹⁹ Ke nɔ nɛ ngɔ e zugba ngɔ ha a suɔ kaa e ma kpɔ e zugba a, lɛɛ e ngɔ zugba a he jua a mi dlami enuɔ mi kake kɛ piɛ jua a he, kɛkɛ zugba a maa pee e nɔ ekohu.

²⁰ Ke e kpɔ we zugba a kɛ ji Yawɛ dɛ, nɛ e jua zugba a kɛ ha nɔ kpa a, lɛɛ e be nyɛe ma kpɔ hu.

²¹ Se ke a ngmɛɛ zugba a he ngɛ Heyemi jeha kpa a mi ɔ, e peeɔ klɔuklɔu ha Yawɛ kaa zugba nɛ a gbaa nɔ kɛ ke; zugba nɛ ɔ maa pee osɔfo ɔmɛ a nɔ́ kulaa.

²² Ke nɔ ko he zugba, se pi lɛ nitsɛ e weto ní, nɛ e gbaa nɔ kɛ ha Yawɛ ɔ,

²³ osɔfo ɔ nɛ bu e he jua a kɛ ya si Heyemi jeha a, konɛ nɔ ɔ nɛ wo hiɔ ɔ jamɛ a ligbi ɔ nɔuu; sika a peeɔ Yawɛ nɔ́.

²⁴ Ke Heyemi jeha a su ɔ, a kpale zugba a ngɔ ha nɔtsɛ ɔ, loo e nina.

²⁵ Jua amɛ tsuo pɛpɛɛpɛ nɛ a maa wo ɔ, a pee kaa bɔ nɛ he klɔuklɔu ɔ mlaa a tsɔɔ ɔ.

²⁶ Lohwe tsuaa lohwe ɔ, e kekleekle bi ɔ, e ji Yawɛ nɔ́ momo, lɔ ɔ he ɔ, nɔ ko kó ngɔ kɛ ba ha Yawɛ kaa bɔ nɛ je nɔ tsui mi faa, na jio, jijɔ jio.

²⁷ Se ke lohwe ɔ he tsɔ we lɛɛ; a wo he jua ha nɔtsɛ ɔ, nɛ e kɛ e jua a mi dlami enuɔ mi kake nɛ piɛ he. Ke a be lohwe ɔ kpɔe ɔ, lɛɛ e jua lɛ kaa bɔ nɛ a wo he jua a.

²⁸ Nɔ́ tsuaa nɔ́ nɛ ngɛ nɔ ko dɛ, nɛ a je he gbi kaa a kpata e hɛ mi kɛ ha Yawɛ ɔ, nɔmlɔ jio, lohwe nane eywiɛtsɛ jio, aloo gbosi ní kaa zugba a peeɔ klɔuklɔu kɛ ha Yawɛ; a ko jua, nɛ a ko kpɔ hulɔ.

²⁹ Ke a je nɔmlɔ adesa he gbi kaa á kpata e hɛ mi ɔ, á ko kpɔ lɛ, á gbe lɛ.

³⁰ Zugba a nɔ nɔ́ tsuaa nɔ́ mi dlami nyɔngma mi kake, wu nɛ a ma du jio, tso yiblii jio, peeɔ Yawɛ nɔ́; e ngɛ klɔuklɔu kɛ ha Yawɛ.

³¹ Ke nɔ ko suɔ kaa e ma kpɔ eko ɔ, é wo hiɔ ɔ kaa bɔ nɛ a tsɔɔ ɔ, nɛ é ngɔ jua a mi dlami enuɔ mi kake ngɔ piɛ he.

³² Na amɛ, kɛ to ɔmɛ a mi dlami nyɔngmanyɔngma mi kakaaka a peeɔ Yawɛ níhi. Ke a ngɛ lohwe ɔmɛ kanee ɔ, kake ngɛ nyɔngma tsuaa nyɔngma mi peeɔ Yawɛ nɔ́.

³³ Nɔ ko kó bi kaa lohwe ɔ hi, loo e hí; nɛ a ko tsake eko hulɔ. Ke a ma tsake eko ɔ, lohwe nɛ a tsake ɔ, kɛ nɔ́ nɛ a kɛ ngɛ tsakee ɔ tsuo maa pee klɔuklɔu; a be kpɔe.

³⁴ Mlaahi nɛ Yawɛ ngɔ ha Mose ngɛ Sinai yo ɔ nɔ nɛ e kɛ ha Israel ma a ji nɛ ɔmɛ nɛ.