Mose III, 26 - BAIBLO ALOO NGMAMI KLƆUKLƆU Ɔ

Gbaamihi nɛ tue bumi kɛ maa ba

¹ Yawɛ de ke, “Nyɛ ko puɛ amagahi, nɛ nyɛ ko pee tɛ amagahi, loo titimahi kɛ ma si; nyɛ ko ja mɛ hulɔ; ejakaa imi ji Yawɛ, nyɛ Mawu ɔ nɛ.

² Nyɛ hɛ nɛ hi Hejɔɔmi ligbi ɔmɛ a nɔ, nɛ nyɛɛ bu ye he klɔuklɔu ɔ, he nɛ a jaa mi ngɛ ɔ; imi ji Yawɛ.

³ “Ke nyɛ bu ye gbi tue nɛ nyɛ ye ye blɔ nya tomi ɔmɛ, kɛ ye mlaa amɛ a nɔ ɔ,

⁴ ma ha hiɔmi maa nɛ ngɛ e be mi; zugba a maa ba ní babauu, nɛ tso ɔmɛ maa wo yiblii.

⁵ Nyɛ ngmɔ ɔmɛ maa ba ní saminya; nyɛ maa hi blɛfo kpɔe hluu kɛ yaa si wai yiblii nya buami be; nɛ nyɛ maa hi wai yiblii nya buae hluu kɛ maa su blɛfo dumi be ekohu. Nyɛ maa ye ní, nɛ nyɛ maa tɔ; nyɛ maa hi si ngɛ tue mi jɔmi mi ngɛ zugba a nɔ.

⁶ “Ma ha nyɛ tue mi maa jɔ nyɛ ngɛ nyɛ zugba a nɔ. Nyɛ maa hwɔ mahe fuaa, nɛ nyɛ be nɔ ko gbeye yee. Ma je lohwe dikali kɛ je zugba a nɔ, nɛ a be ta hwue ngɛ zugba a nɔ hu.

⁷ Nyɛ maa fie nyɛ he nyɛli ɔmɛ, nɛ nyɛ maa gbe mɛ.

⁸ Nyɛ ti ni enuɔ maa fie nyɛ he nyɛli lafa, nɛ nihi lafa maa fie nyɛ he nyɛli akpe nyɔngma; nyɛ maa ye mɛ tsuo a nɔ kunimi.

⁹ Ma gbaa nyɛ, nɛ ma ha nyɛ ma fɔ bimɛ babauu. Somi nɛ i kɛ nyɛ so ɔ, ma ye nɔ.

¹⁰ Nyɛ ma kpa ní babauu nɛ́ maa hi si hluu kɛ yaa su ní kpami be ekohu; nyɛ ma je niba ní momo nɛ piɛ ɔ ngɔ pue he, konɛ nyɛ na blɔ ha ehe nɛ nyɛ ma kpa a.

¹¹ Ma pee ye sihi he ngɛ nyɛ kpɛti; i be nyɛ siee.

¹² I kɛ nyɛ maa hi si. Ma pee nyɛ Mawu, nɛ nyɛ hu nyɛ maa pee ye ma.

¹³ Imi ji Yawɛ, nyɛ Mawu nɛ je nyɛ kɛ je Egipt zugba a nɔ, konɛ nyɛ ko pee nyɔguɛhi hu ɔ nɛ. I je nyɛ kɛ je yi mi wami sisi, nɛ i ha nyɛ ye nyɛ he.”

Tue gbomi he tue gblami

¹⁴ Yawɛ ke, “Ke nyɛ be mi tue bue, nɛ nyɛ be ye mlaa amɛ tsuo a nɔ yee,

¹⁵ ke nyɛ be ye mlaa amɛ, blɔ nya tomi ɔmɛ, kɛ somi nɛ i kɛ nyɛ so ɔ a nɔ yee ɔ,

¹⁶ lɛɛ ma ngɔ amanehlu gbeyegbeye nɛ ɔmɛ kɛ gbla nyɛ tue: hiɔ nɛ be tsa ba, kɛ asla nɛ puɛɔ nɔ hɛngmɛ, nɛ haa nɔ peeɔ hiɔtsɛ kulaa. Nyɛ ma du ní, se nɔ́ kpakpa ko be mi jee; ejakaa nyɛ he nyɛli maa ye nyɛ nɔ, nɛ mɛ mohu a ma ba ye ní ɔmɛ nɛ nyɛ du ɔ.

¹⁷ Ye hɛ maa dɔ kɛ wo nyɛ, nɛ nyɛ he nyɛli ɔmɛ maa fia nyɛ ní nɛ a gbe; a maa ye nyɛ nɔ wawɛɛ, nɛ ke nɔ ko nyɛɛ we nyɛ se po nyɛ maa hi fo nɔ pulɛpulɛ.

¹⁸ “Ke ní nɛ ɔmɛ tsuo na ba mi, se nyɛ bui ye munyu ɔ kɛ sa a, ma gbla nyɛ tue kɛ bɔ he si kpaago ngɛ nyɛ yayami ɔmɛ a he.

¹⁹ Ma ku nyɛ he nɔ womi, kɛ kuɛ mi timi ɔ nya; hiɔmi be nɛe; nyɛ zugba a ma gbli, nɛ e he maa wa kaa dade.

²⁰ Nyɛ ma gbo yaka dengme; ejakaa nyɛ zugba a be ní bae, nɛ e nɔ tso ɔmɛ hu be yiblii woe.

²¹ “Ke nyɛ tsɔ ye hɛ mi atuã, nɛ nyɛ bui mi kɛ mwɔɔ ɔ, ma kpale gbla nyɛ tue totoe kpaago ekohu.

²² Ma ngmɛɛ pu mi lohwe dikali a he ngɔ pue nyɛ nɔ, nɛ a maa gbe nyɛ bimɛ; a ma kpata nyɛ we mi lohwehi a hɛ mi, nɛ ma ha nyɛ nɔ ma gbɔ, nɛ nimli be hiɛe ngɛ blɔ ɔmɛ a nɔ hu.

²³ “Ke tue gblami nɛ ɔmɛ tsuo a se ɔ, nyɛ bui mi tue, se mohu nyɛ ya nɔ tsɔ atuã kɛ mwɔɔ ɔ,

²⁴ lɛɛ imi Yawɛ hu i kɛ nyɛ maa to ní; imi nitsɛ ma gbla nyɛ tue kɛ bɔ he totoe kpaago ngɛ nyɛ he yayami ɔmɛ a he.

²⁵ Ma ha ta ma ba tua nyɛ; ma ngɔ ta a kɛ gbla nyɛ tue. Ke nyɛ bua nyɛ he nya kɛ laa nyɛ he ngɛ ma amɛ a mi ɔ, ma ha hiɔ nɛ be tsa ba maa sɛ nyɛ kpɛti; ma ngɔ nyɛ ngɔ wo nyɛ he nyɛli ɔmɛ a dɛ mi.

²⁶ Ma ha nɛ nyɛ niye ní se maa po kulaa. Niye ní he maa hia bɔ nɛ abolo tsuo nɛ nyɛ maa ye ɔ, yihi nyɔngma pɛ maa sã ngɛ flɔɔnɔɔ kake mi. A maa ngmɛ abolo ɔ ngɛ sɛni tɛ nɔ ha nyɛ, nɛ ke nyɛ ye ɔ nyɛ be tɔe.

²⁷ “Ke ní nɛ ɔmɛ tsuo a se, nɛ nyɛ be mi tue bue, se nyɛ maa ya nɔ ma tsɔ ye hɛ mi atuã a,

²⁸ lɛɛ ye mi mi ma fu nyɛ, nɛ ma je nyɛ se. Imi nitsɛ ma gbla nyɛ tue kɛ bɔ he totoe kpaago ngɛ nyɛ he yayami ɔmɛ a he.

²⁹ Hwɔ maa ye nyɛ wawɛɛ nitsɛ; nɛ e maa ba mi kaa nyɛ maa ye nyɛ nitsɛmɛ nyɛ bimɛ.

³⁰ Ma puɛ nyɛ jami he ɔmɛ ngɛ yo ɔmɛ a nɔ, nɛ ma ywia nyɛ tsopa kɛ e he via bɔ sami la tɛ ɔmɛ; ma ngɔ nyɛ gbogboe ɔmɛ ngɔ pue nyɛ we amaga amɛ nɛ i ywia a a nɔ. Nyɛ maa pee nɔ́ nɛ a hiee ha mi.

³¹ Ma kpata nyɛ ma nguangua amɛ a hɛ mi kɛ yaa si a ma plɛ pee ma dokuhi. Nyɛ jami he ɔmɛ hu ma puɛ mɛ, nɛ i be nyɛ bɔ ɔmɛ hee hu.

³² Ma kpata nyɛ zugba a hɛ mi bɔ nɛ ke nyɛ he nyɛli ɔmɛ nɛ ngɛ zugba a nɔ na a, a he mi maa po.

³³ Ma ha ta maa nyɛɛ nyɛ se, nɛ ma gbɛ nyɛ ngɔ fĩa je ma amɛ tsuo a mi. Nyɛ maa je zugba a nɔ, nɛ ma amɛ ma plɛ ma dokuhi.

³⁴ Kɛkɛ ɔ, jeha abɔ nɛ sa kaa zugba a nɛ jɔɔ e he nɛ nyɛ ngmɛ́ blɔ ɔ, jehanɛ lɛɛ e ma na.

³⁵ Zugba a maa fɔ si gu, nɛ e maa jɔɔ e he, be mi nɛ nyɛ lɛɛ nyɛ ya je nyɛ he nyɛli a zugba nɔ.

³⁶ “Nyɛ nihi nɛ maa piɛ, nɛ a maa nuu kɛ ya ma se ɔ, ma ha sawale maa nu nyɛ ngɛ lejɛ ɔ. Ke kɔɔhiɔ sɛ ba mi huu nɛ nyɛ nu ɔ, lɔ ɔ po maa wo nyɛ fo. Nyɛ maa tu fo pulɛpulɛ kaa nɔ́ nɛ ta nyɛɛ nyɛ se. Nyɛ maa hi si nɔe, be mi nɛ nɔ ko nyɛɛ we nyɛ se.

³⁷ Nyɛ maa nɔɔ nyɛ sibi a nɔ kaa nɔ́ nɛ ta nya fo nyɛ ngɛ tue, pohu nɔ ko nyɛɛ we nyɛ se. Nyɛ be nyɛe maa da nyɛ he nyɛli ɔmɛ a nya.

³⁸ Nyɛ hɛ mi ma kpata ngɛ je ma amɛ a kpɛti, nɛ nyɛ he nyɛli ɔmɛ a zugba a maa mii nyɛ.

³⁹ Nyɛ nihi bɔɔ nɛ maa piɛ ngɛ nyɛ he nyɛli ɔmɛ a zugba a nɔ ɔ maa ta he lo ngɛ nyɛɛ kɛ nyɛ nɛmɛ ɔmɛ a he yayami ɔmɛ a he.

⁴⁰ “Se nyɛ nina maa jaje a he yayami ɔmɛ, kɛ a nɛmɛ a he yayami kaa a pee yi wu tso níhi kɛ si mi, nɛ jehanɛ a ya nɔ tsɔ ye hɛ mi atuã;

⁴¹ nɛ lɔ ɔ he nɛ imi hu i je a se, nɛ i ngmɛɛ a he kɛ ha a he nyɛli, nɛ a kɛ mɛ ho ma se ya a nɛ. Se ke jehanɛ lɛɛ nyɛ nina tsake a tsui, nɛ a ba a he si, nɛ a kpa yayami peemi ɔ,

⁴² lɛɛ imi hu ma kai somi ɔmɛ nɛ i kɛ Yakob, Isak, kɛ Abraham so ɔ. Kɛkɛ ɔ, si nɛ i wo kaa ma ngɔ zugba a ngɔ ha ye ma a, ma ti mi ekohu.

⁴³ Kekleekle ɔ, ja a je zugba a nɔ, nɛ zugba a jɔɔ e he kulaa. Lɔ ɔ se ɔ, ja a kplɛ, nɛ a gbla a tue saminya kaa a kua ye mlaa amɛ, kɛ ye blɔ nya tomi ɔmɛ.

⁴⁴ Se kɛ̃ ɔ, be mi nɛ a ngɛ a he nyɛli ɔmɛ a zugba nɔ kɛ mwɔɔ ɔ po, i be mɛ kuae, nɛ i be a hɛ mi kpatae pɛsɛpɛsɛ, bɔ nɛ pee nɛ somi nɛ i kɛ mɛ so ɔ se ko po. Imi ji Yawɛ, a Mawu ɔ nɛ.

⁴⁵ A he ɔ, ma kai somi nɛ i kɛ a nɛmɛ ɔmɛ so, benɛ i je ye he wami kpo kɛ tsɔɔ je ma amɛ, benɛ i je mɛ kɛ je Egipt zugba a nɔ, konɛ ma pee a Mawu ɔ. Imi ji Yawɛ.”

⁴⁶ Mlaahi, kɛ blɔ nya tomihi nɛ Yawɛ ngɔ ha Mose ngɛ Sinai yo ɔ nɔ nɛ e kɛ ha Israel ma a ji nɛ ɔmɛ nɛ.