Mose III, 25 - BAIBLO ALOO NGMAMI KLƆUKLƆU Ɔ

Jeha kpaagone ɔ

¹ Yawɛ kɛ Mose tu munyu ngɛ Sinai yo ɔ nɔ nɛ e fa lɛ

² ke e wo Israel bi ɔmɛ mlaa nɛ ɔmɛ. Ke nyɛ su zugba nɛ Yawɛ ma ha nyɛ ɔ nɔ ɔ, nyɛ ha nɛ zugba a nɛ jɔɔ e he kɛ wo Yawɛ hɛ mi nyami.

³ Jeha ekpa nyɛ du ní nɛ nyɛ sua wai tso ɔmɛ nɛ ngɛ nyɛ wai ngmɔ ɔmɛ a mi ɔ a he, nɛ nyɛ bua wai yiblii ɔmɛ a nya.

⁴ Se jeha kpaagone ɔ lɛɛ nyɛ ha nɛ zugba a nɛ jɔɔ e he kulaa; e pee jeha nɛ a kɛ maa wo Yawɛ hɛ mi nyami. Jamɛ a be ɔ mi ɔ, nyɛ ko du ní; nɛ nyɛ ko sua nyɛ wai tso ɔmɛ a he.

⁵ Blɛfo nɛ lɛ nitsɛ e puɛ ngɛ ní kpami se po, nyɛ ko kpɔ; nɛ wai yiblii nɛ wo ngɛ wai tso nɛ a sua we e he ɔ nɔ ɔ hu nyɛ ko bua nya; jamɛ a jeha kulaa a, zugba a maa jɔɔ e he.

⁶ E ngɛ mi kaa jamɛ a jeha a, a hu we zugba a lɛɛ, se kɛ̃ e maa ba ní ha nyɛ, nyɛ nyɔguɛ nyumuhi, nyɛ nyɔguɛ yihi, apaa yeli nɛ tsuɔ ní ha nyɛ, nibwɔhi nɛ ba to nyɛ ɔ,

⁷ nyɛ we mi lohwehi kɛ pu mi lohwehi tsuo. Zugba a mi niba ní tsuo maa pee niye ní ha nyɛ.

Ngwɔhe tomi jeha

⁸ Nyɛɛ kane jeha kpaago totoe kpaago; lɛ tsuo peeɔ jeha nyingmi eywiɛ kɛ nɛɛ.

⁹ Jehanɛ, nyɔhiɔ kpaago ɔ nɔ ligbi nyɔngma a nɛ ji kpatami ligbi ɔ, nyɛɛ tsɔ nɛ a ya kpa titimati wawɛɛ kɛ kpa zugba a tsuo nɔ.

¹⁰ Bɔ nɛ nyɛ maa pee jeha nɛ ji nyingmi enuɔ ɔ klɔuklɔu ji nɛ ɔ nɛ. Nyɛɛ fiɛ kɛ ha zugba a nɔ bi ɔmɛ tsuo ke Heyemi be ɔ su oo. E maa pee nyami jeha ha nyɛ. Jamɛ a jeha a, weto ní tsuaa weto ní nɛ nɔ ko kɛ to awaba a, a kpale kɛ ha nɔtsɛ ɔ, loo e nina. Nɔ tsuaa nɔ nɛ a kɛ lɛ ya to awaba a, e kpale e se kɛ ya e nɔ́ mi, kɛ e weku li a ngɔ ekohu.

¹¹ Nyɛ ko du ní, nɛ nyɛ ko kpa ní; nɔ́ nɛ lɛ nitsɛ e puɛ hu nyɛ ko kpa. Jã kɛ̃ wai yiblii nɛ wo ngɛ wai tso nɛ nyɛ sua we e he ɔ nɔ ɔ, nyɛ ko bua nya.

¹² Jeha a tsuo maa pee klɔuklɔu ha nyɛ. Nyɛɛ ye niba ní nɛ nyɛ ma na ngɛ zugba a nɔ ɔ pɛ.

¹³ Heyemi jeha nɛ ɔ mi ɔ, weto ní tsuo nɛ a jua a, a kpale kɛ ha nɔtsɛ.

¹⁴ Lɔ ɔ he ɔ, ke o jua zugba ko kɛ ha o nyɛmi Israel fɔfɔɛ, loo o he zugba ngɛ e dɛ ɔ, nyɛ ko sisi nyɛ sibi.

¹⁵ Ke o maa wo zugba ko he jua ha o nyɛmi ɔ, moo kane jeha abɔ nɛ piɛ nɛ a ma du ní ngɛ zugba a nɔ loko a maa ye Heyemi jeha a.

¹⁶ Ke jeha nɛ piɛ ɔ hiɛ fuu ɔ, lɛɛ jua a maa ya hiɔwe, se ke jeha nɛ piɛ ɔ pi ɔ, lɛɛ jua a maa ba si; ejakaa niba ní nɛ a ma na kɛ maa je ngmɔ ɔ mi ɔ, lɔ ɔ a ngɛ juae ɔ nɛ.

¹⁷ Nyɛ ko sisi nyɛ sibi Israel fɔfɔɛhi, se mohu nyɛɛ ye Yawɛ, nyɛ Mawu ɔ gbeye.

Jeha kpaagone ɔ mi haomi komɛ

¹⁸ Enɛ ɔ he ɔ, nyɛ hɛ nɛ hi Yawɛ mlaa amɛ, kɛ e blɔ nya tomi ɔmɛ a nɔ, nɛ nyɛɛ ye a nɔ, konɛ nyɛɛ hi zugba a nɔ ngɛ he jɔmi mi.

¹⁹ Zugba a maa ba ní, nɛ nyɛ maa ye ní nɛ nyɛ maa tɔ; nɛ nyɛ maa hi zugba a nɔ ngɛ he jɔmi mi.

²⁰ Nɔ ko ma bi ke, “Jeha kpaagone ɔ nɛ wa du we ní, nɛ wa kpa we ní hulɔ ɔ, mɛni wa maa ye mɔ.”

²¹ Yawɛ maa gbaa zugba a, nɛ niye ní babauu maa ba ngɛ jeha ekpane ɔ mi, nɛ nyɛ ma na jeha etɛ nya niye ní jamɛ a jeha a.

²² Be nɛ nyɛ ngɛ ní due ngɛ jeha kpaanyɔne ɔ mi ɔ, nyɛ maa hi ngmɔ niba ní momo ɔ yee kɛ yaa si nyɛ ma kpa ní nɛ nyɛ du jamɛ a jeha a.

Weto ní se kpalemi

²³ Zugba a, nyɛ ko jua nɛ e ba plɛ pee nɔ ko nɔ́ kulaa. Zugba a, Mawu nɔ́, pi nyɛ nɔ́. Nyɛɛ lɛɛ Mawu nibwɔhi nɛ ba ngɛ ní tsue ngɛ zugba a nɔ kɛkɛ ji nyɛ.

²⁴ Zugba a nɔ he tsuaa he nɛ nyɛ maa hi ɔ, ke a jua zugba a, a to blɔ nya kɛ ha zugba a kpɔmi hwɔɔ se.

²⁵ Ke e fi Israel fɔfɔɛ ko nɛ e jua e zugba ko ɔ, e nyɛmi tutuutu nɛ yeɔ e ní ɔ nɛ kpɔ zugba a.

²⁶ Ke e be nɔ ko nɛ ma kpɔ zugba nɛ a jua nɛ ɔ, lɛɛ ke pee se nɛ níhi a mi hi ha lɛ ekohu ɔ, e ma nyɛ nɛ lɛ nitsɛ e kpɔ e ní.

²⁷ Ke e ba mi ja a, e bu akɔtaa; jeha abɔ nɛ e jua zugba a, kɛ jeha nɛ piɛ loko jeha a nɛ a maa kpale weto ní se kɛ ha nɔtsɛmɛ ɔ maa su, konɛ e wo jeha abɔ nɛ piɛ ɔ he hiɔ nɛ e ya ngɔ e ní.

²⁸ Se ke nɔ nɛ jua zugba a be nɔ́ ko nɛ e kɛ ma kpɔ e weto ní nɛ ɔ, lɛɛ nɔ nɛ he zugba a maa pee nɔtsɛ kɛ yaa si weto ní se kpalemi jeha kpa maa su. Jamɛ a jeha a loko a maa kpale zugba a kɛ ha zugbatsɛ ɔ.

²⁹ Ke nɔ ko jua e we ngɛ ma ko nɛ a fia gbogbo kɛ wo he mi ɔ, e ma nyɛ ma kpɔ we ɔ nɛ e jua a ngɛ kekleekle jeha a mi; e ngɛ jeha kake sɔuu nɛ e kɛ ma kpɔ e we nɛ e jua nɛ ɔ.

³⁰ Ke e nyɛ we nɛ e kpɔ ngɛ jeha kake mi ɔ, we ɔ maa pee nɔ nɛ he ɔ, kɛ e nina a nɔ́ kulaa. Weto ní se kpalemi jeha a mi ɔ, nɔ nɛ he we ɔ be he ngmɛɛe.

³¹ Se wehi nɛ ngɛ kɔpehi nɛ gbogbo be a he ɔ a mi ɔ lɛɛ a bu mɛ kaa ngmɔ kɛkɛ. A ma nyɛ ma kpɔ mɛ; ke weto ní se kpalemi jeha a su ɔ, nyɛɛ ngmɛɛ a he ha nitsɛmɛ ɔmɛ.

³² Levi bi ɔmɛ lɛɛ a wehi nɛ ngɛ a ma amɛ a mi ɔ, a ngɛ he blɔ nɛ a kpɔɔ mɛ be tsuaa be.

³³ Ke Levi no ko jua e we ngɛ ma ko mi, nɛ e kpɔ we e we ɔ kɛ ya su weto ní se kpalemi jeha a mi po ɔ, a kpale e we ɔ kɛ ha lɛ; ejakaa Levi bi ɔmɛ a we ɔmɛ peeɔ mɛ nitsɛmɛ a weto ní kulaa ngɛ Israel bi ɔmɛ a kpɛti.

³⁴ Lohwe lɛmi zugbahi nɛ bɔle Levi bi ɔmɛ a ma amɛ hu peeɔ Levi bi ɔmɛ a weto ní; a ko jua eko.

Sika nɛ a paa ha ohiatsɛmɛ

³⁵ Ke e fi o nyɛmi Israel fɔfɔɛ, nɛ e dɛ mi ta, nɛ e nyɛ we nɛ e hyɛ e he nɔ hu ɔ, moo hyɛ e nɔ. O kɛ lɛ nɛ hi si kaa nubwɔ nɛ ba to mo, konɛ e nyɛ nɛ e hi o ngɔ.

³⁶ Ke o pa nɔ́ ko ha o nyɛmi ɔ, ko he nɔ́ ko kɛ bɔ he; ye o Mawu ɔ gbeye, konɛ o ha nɛ o nyɛmi ɔ nɛ hi o kasa nya.

³⁷ Ke o pa lɛ sika a, ko he hekpa. Ke niye ní nɛ o jua ha lɛ ɔ, jua a nɛ ko pe niye ní ɔ jua.

³⁸ Mlaa nɛ Yawɛ, nyɛ Mawu ɔ ngɛ nyɛ woe ji nɛ ɔ nɛ. Yawɛ, nyɛ Mawu ɔ je nyɛ kɛ je Egipt zugba a nɔ, konɛ e ngɔ Kanaan zugba a ngɔ ha nyɛ, nɛ e pee nyɛ Mawu.

Nyɔguɛhi a he ngmɛɛmi

³⁹ Ke e fi o nyɛmi Israel fɔfɔɛ ko nɛ o kɛ lɛ ngɛ, nɛ e jua e he ha mo ɔ, ko ha nɛ e sɔmɔ mo kaa nyɔguɛ.

⁴⁰ Ha nɛ e hi o ngɔ kaa apaa yelɔ, loo nubwɔ, nɛ e tsu ní ha mo kɛ yaa si Heyemi jeha a maa su.

⁴¹ Ke Heyemi jeha a su ɔ, lɛ, kɛ e bimɛ tsuo nɛ a ngɛ o ngɔ ɔ ma nyɛ ma si mo kɛ ho mɛ nitsɛmɛ a weku li a ngɔ ya ngɛ a nɛmɛ a nɔ́ mi.

⁴² Israel bi ɔmɛ ɔ, Yawɛ tsɔli ji mɛ. Lɛ nitsɛ nɛ e je mɛ kɛ je Egipt zugba a nɔ. Enɛ ɔ he je ɔ, a ko jua mɛ kaa nyɔguɛhi.

⁴³ Nyɛ ko wa mɛ yi mi, se mohu nyɛɛ ye nyɛ Mawu ɔ gbeye.

⁴⁴ Ke nyɛ ngɛ nyɔguɛ nyumuhi kɛ nyɔguɛ yihi hlae ɔ, nyɛ ma nyɛ ma he mɛ kɛ je mahi nɛ bɔle nyɛ ɔ a mi.

⁴⁵ Jehanɛ hu, nyɛ ma nyɛ ma he nibwɔhi nɛ ba to nyɛ ngɛ zugba a nɔ ɔ a bimɛ nɛ a fɔ ngɔ wo nyɛ kpɛti ɔ, nɛ a maa pee nyɛ weto ní.

⁴⁶ Nyɛ ma nyɛ ma si mɛ kaa gbosi ní ha nyɛ bimɛ, nɛ a ma sɔmɔ mɛ a wami be ɔ tsuo. Se nyɛ sɔuu nyɛ kpɛti kaa Israel fɔfɔɛhi ɔ, nyɛ ko wa nyɛ sibi yi mi.

⁴⁷ Waa ngɔ lɛ kaa nubwɔ ko nɛ ba to mo ɔ ná ní, be mi nɛ o nyɛmi Israel no ko nɛ ngɛ o kasa nya a pee ohiatsɛ, nɛ e jua e he kɛ ha jamɛ a nubwɔ niatsɛ ɔ, aloo e nyɛmi ko.

⁴⁸ Ke e jua e he se ɔ, he blɔ ngɛ kaa e kpɔ e he ekohu. E nyɛminyumu ko,

⁴⁹ loo e tsɛ nyɛminyumu, loo e tsɛ nyɛminyumu bi, loo e weku no pɔtɛɛ ko ma nyɛ ma kpɔ lɛ. Ke lɛ nitsɛ po e he ba hi ekohu ɔ, e ma nyɛ ma kpɔ e he.

⁵⁰ E kɛ nɔ nɛ he lɛ ɔ nɛ bu akɔtaa kɛ je be nɛ e jua e he ngɔ ha lɛ ɔ, kɛ ya si be nɛ Heyemi jeha a maa su, konɛ e na jeha abɔ nɛ ngɛ mi, nɛ e da nɔ nɛ e kɛ na sika nɛ e kɛ ma kpɔ e he ɔ. Á bu nɔ́ nɛ ɔ kaa bɔ nɛ a buu apaa yelɔ hiɔwo.

⁵¹ Ke jeha nɛ piɛ loko Heyemi jeha a maa su ɔ hiɛ ɔ, sika nɛ a kɛ ma kpɔ lɛ ɔ maa hiɛ jã kɛ̃,

⁵² se ke jeha nɛ piɛ loko Heyemi jeha maa su ɔ pi ɔ, e kɛ nɔ nɛ he lɛ ɔ nɛ bu akɔtaa. Á hyɛ jeha abɔ nɛ e kɛ ma tsu ní ha e nyɔmtsɛ ɔ, konɛ a je hiɔwo ɔ kɛ je sika nɛ a ma ha lɛ ɔ mi, nɛ e wo hiɔ nɛ maa piɛ ɔ.

⁵³ E kɛ hiɔ̃tsɛ ɔ si himi ɔ nɛ pee kaa nyɔmtsɛ kɛ apaa yelɔ si himi; nɛ e wo lɛ hiɔ daa jeha. Nyɔmtsɛ ɔ nɛ ko wa lɛ yi mi.

⁵⁴ Ke a nyɛ we nɛ a kpɔ lɛ kɛ gu blɔ nɛ ɔmɛ eko nɔ ɔ, lɛɛ ja Heyemi jeha kpa su loko a maa ngmɛɛ e kɛ e bimɛ ɔmɛ a he.

⁵⁵ Israel fɔfɔɛ be nyɛe maa pee nɔ ko nyɔguɛ daa, ejakaa Israel bi ɔmɛ ɔ, Yawɛ nitsɛ nyɔguɛhi ji mɛ. Lɛ nitsɛ nɛ e je mɛ kɛ je Egipt zugba a nɔ. Lɛ ji Yawɛ, a Mawu ɔ nɛ.