Mose III, 23 - BAIBLO ALOO NGMAMI KLƆUKLƆU Ɔ

Jami mi nyami be ɔmɛ

^1-2 Yawɛ fa Mose ke e de Israel bi ɔmɛ ke, nyami behi nɛ a maa ye kɛ wo ye hɛ mi nyami ji nɛ ɔmɛ nɛ.

³ Nyɛ tsu ní ligbi ekpa, se ligbi kpaagone ɔ ji Hejɔɔmi ligbi. Jamɛ a ligbi ɔ, nyɛ maa jɔɔ nyɛ he. Nyɛ ma bua nyɛ he nya, nɛ nyɛ ma ja Mawu. Nɔ ko nɛ ko tsu ní jamɛ a ligbi ɔ; ejakaa e ji he jɔɔmi ligbi ha Yawɛ ngɛ nyɛ sihi he ɔmɛ tsuo kulaa.

⁴ Nyɛɛ fiɛ nyami ligbi nɛ ɔmɛ ngɛ a be ɔmɛ a mi pɛpɛɛpɛ kɛ ha ma a.

Hetsɔmi kɛ Abolokplolo nyami be ɔmɛ

⁵ Kekleekle nyɔhiɔ ɔ we ligbi nyɔngma kɛ eywiɛne ɔ gbɔkuɛ ji Hetsɔmi ɔ nɛ a kɛ woɔ Yawɛ hɛ mi nyami ɔ sisije.

⁶ Jamɛ a nyɔhiɔ ɔ nɔuu we ligbi nyɔngma kɛ enuɔne ɔ ji Abolokplolo nyami be ɔ sisije ɔ nɛ. Nyɛɛ ye abolo kplolo ligbi kpaago.

⁷ Nyɛ bua nyɛ he nya nɛ nyɛ ja Mawu nyɔhiɔ ɔ we kekleekle ligbi ɔ. Nyɛ ko tsu ní tsumi kpakpataa ko.

⁸ Nyɛɛ ngɔ niye ní bɔ nɛ a kɛ la sãã kɛ ba ha Yawɛ ligbi kpaago. Ligbi kpaagone ɔ, nyɛ bua nyɛ he nya ekohu nɛ nyɛ ja Mawu; nyɛ ko tsu ní tsumi kpakpataa ko.

^9-10 Ke nyɛ ba su zugba a nɛ Yawɛ ma ha nyɛ ɔ nɔ nɛ nyɛ kpa ní ɔ, nyɛɛ ngɔ niba ní ɔ kekleekle nɔ́ nɛ nyɛ bua nya kɛ ba ha osɔfo ɔ.

¹¹ Hejɔɔmi ligbi ɔ nɔ jena a, osɔfo ɔ nɛ ngɔ kɛ ba Yawɛ hɛ mi kaa bɔ nɛ a fɔɔ kɛ yaa kɛ baa, konɛ Mawu nɛ he nyɛ sina a.

¹² Ligbi ɔ nɛ nyɛ maa ngɔ nɔ́ nɛ nyɛ bua nya a kɛ ha Yawɛ kaa nike ní ɔ, nyɛɛ ngɔ jijɔ nɛ ye jeha kake, nɛ kpa ko be e he kɛ ba sã sami bɔ ha Yawɛ.

¹³ Nyɛɛ ngɔ mamu bukɔbukɔ nɛ a futu mi nu kilo enyɔ hu kɛ piɛ he kɛ ba sã niye ní bɔ. Enɛ ɔ ji bɔ nɛ jee via saminya, nɛ saa Yawɛ hɛ mi. Á ngɔ wai lita kake ngɔ piɛ he.

¹⁴ Nyɛ ko ye blɛfo kpokploku, loo blɛfo nɛ a sã, loo abolo kɛ yaa si be nɛ nyɛ maa ngɔ nyɛ Mawu ɔ bɔ kɛ ba ha lɛ. Enɛ ɔ ji mlaa nɛ maa fɔ si kɛ ha nyɛ yi nɔ ɔmɛ tsuo ngɛ nyɛ hi he ɔmɛ tsuo kɛ yaa neneene.

Ngmakpami nyami be ɔ

¹⁵ Hejɔɔmi ligbi ɔ we jena a nɛ nyɛ maa ngɔ bɔ nɛ a fɔɔ kɛ yaa kɛ baa a kɛ ba a we otsi kpaago,

¹⁶ aloo ligbi nyingmi enuɔne nɛ ji Hejɔɔjmi ligbi kpaagone ɔ we jena a, nyɛɛ ngɔ kpokploku kɛ ba sã niye ní bɔ ha Yawɛ.

¹⁷ We puɔ nya tsuaa we puɔ nya nɛ ngɔ abolo bɔbɔɛ enyɔ kɛ ba ha Yawɛ kaa bɔ nɛ a fɔɔ kɛ yaa kɛ baa. Abolo bɔbɔɛ tsuaa abolo bɔbɔɛ ɔ, a ngɔ mamu bukɔbukɔ kilo enyɔ nɛ a wo mi masa kɛ pee. A ngɔ enɛ ɔ kɛ sã bɔ ha Yawɛ kaa kekleekle niba ní bɔ.

¹⁸ Nyɛɛ ngɔ jijɔ ku kpaago nɛ a ye jeha kakaaka, kɛ na niheyo kake, kɛ agbosu enyɔ nɛ kpa ko be a he kɛ piɛ abolo ɔ he kɛ ba sã sami bɔ ha Yawɛ. Nyɛɛ ngɔ niye ní bɔ, kɛ e he wai bɔ hu kɛ piɛ he. Enɛ ɔ ji bɔ nɛ a kɛ la sãã nɛ jee via ha Yawɛ.

¹⁹ Jehanɛ, nyɛɛ ngɔ akpakpo kake kɛ ba sã yayami pami bɔ, kɛ jijɔ ku enyɔ nɛ a ye jeha kakaaka kɛ ba sã tue mi jɔmi bɔ.

²⁰ Osɔfo ɔ nɛ ngɔ abolo ɔ, kɛ jijɔ enyɔ ɔmɛ kɛ ba Yawɛ hɛ mi kaa bɔ nɛ a fɔɔ kɛ yaa kɛ baa. Bɔ nɛ ɔmɛ ngɛ klɔuklɔu ha Yawɛ kɛ ha osɔfo ɔmɛ.

²¹ Jamɛ a ligbi ɔ, nɔ ko nɔ ko kó tsu ní tsumi kpakpataa ko, se nyɛ bua nyɛ he nya, nɛ nyɛ ja Mawu. Enɛ ɔ ji mlaa nɛ maa fɔ si kɛ maa ya neneene ha nyɛ yi nɔ ɔmɛ tsuo pɛpɛɛpɛ ngɛ nyɛ sihi he ɔmɛ tsuo.

²² Ke nyɛ kpa nyɛ zugba a nɔ ní ɔ, nyɛ ko kpa ngmɔ ɔ mi kɛ ngmɔ ɔ nya ní ɔmɛ tsuo kɛ pi si; nɔ́ nɛ ma pue si, loo e maa piɛ ɔ hu, nyɛ ko kpale nyɛ se kɛ ya kpɛte. Nyɛ si ha ohiatsɛmɛ kɛ nibwɔhi. Imi ji Yawɛ, nyɛ Mawu ɔ nɛ.

Jehahe nyami be

^23-24 Nyɔhiɔ kpaagone ɔ we kekleekle ligbi ɔ, nyɛɛ pee kpoo, nɛ nyɛɛ jɔɔ nyɛ he. Ke nyɛ nu nɛ titimati ɔmɛ pɛ ɔ, nyɛ bua nya he nya, nɛ nyɛ ja Mawu.

²⁵ Nyɛ ko tsu ní tsumi kpakpataa ko. Nyɛɛ ngɔ niye ní bɔ nɛ a kɛ la sãã kɛ ba ha Yawɛ.

Kpatami ligbi ɔ

²⁶ Yawɛ de Mose ke,

²⁷ nyɔhiɔ kpaagone ɔ we ligbi nɛ ji nyɔngma a ji kpatami ligbi ɔ nɛ. Jamɛ a ligbi ɔ, nyɛɛ bua nyɛ he nya nɛ nyɛ ja Mawu. Nyɛɛ ha hwɔ, nɛ nyɛɛ sã bɔ nɛ a kɛ la sãã ha Yawɛ.

²⁸ Nyɛ ko tsu nɔ́ ko ngɛ ligbi nɛ ɔ nɔ, ejakaa e ji ligbi nɛ a maa pee kusumi kɛ kpata Yawɛ, nyɛ Mawu ɔ ha nyɛ.

²⁹ Nɔ nɛ be hwɔ hae ngɛ ligbi nɛ ɔ nɔ ɔ, a je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

³⁰ Nɔ tsuaa nɔ nɛ ma tsu nɔ́ ko ngɛ ligbi nɛ ɔ nɔ ɔ, imi nitsɛ ma kpata e hɛ mi.

³¹ Nyɛ ko tsu nɔ́ ko ngɛ ligbi nɛ ɔ nɔ. Enɛ ɔ ji mlaa nɛ fɔɔ si kɛ ha nyɛɛ kɛ nyɛ nina ngɛ nyɛ hi he ɔmɛ tsuo kɛ yaa neneene.

³² Kɛ je nyɔhiɔ ɔ we ligbi nɛ ji nɛɛ ɔ we gbɔkuɛ ke pu nɔ si, kɛ yaa si ligbi nyɔngmane ɔ we gbɔkuɛ ke pu nɔ si ekohu ɔ nɛ pee he jɔɔmi be pɔtɛɛ kɛ ha nyɛ; jamɛ a be ɔ mi ɔ, nyɛɛ ha hwɔ.

Gbasisihimi nyami be

^33-34 Nyɛɛ ye Gbasisihimi nyami be ɔ ligbi kpaago. Nyɛɛ je sisi ngɛ nyɔhiɔ kpaagone ɔ we ligbi nyɔngma kɛ enuɔne ɔ nɔ.

³⁵ Kekleekle ligbi ɔ, nyɛ bua nyɛ he nya, nɛ nyɛ ja Mawu. Nyɛ ko tsu ní tsumi kpakpataa ko jamɛ a ligbi ɔ.

³⁶ Daa ligbi ɔ, nyɛɛ sã niye ní bɔ nɛ a kɛ la sãã. Nyɛɛ pee enɛ ɔ ligbi kpaago. Ligbi nɛ ji kpaanyɔ ɔ, nyɛ bua nyɛ he nya ekohu nɛ nyɛ ja Mawu, nɛ nyɛɛ ngɔ niye ní bɔ nɛ a kɛ la sãã kɛ ba ha Yawɛ. E ji jami ligbi; nyɛ ko tsu ní tsumi kpakpataa ko jamɛ a ligbi ɔ.

³⁷ Nyami behi nɛ a kɛ jaa Yawɛ ji nɛ ɔmɛ nɛ. Níhi nɛ nyɛɛ pee ji nɛ ɔmɛ: nyɛ bua nyɛ he nya nɛ nyɛ ja Mawu. Nyɛɛ ngɔ nyɛ niye ní bɔ ɔmɛ nɛ a kɛ la sãã a, sami bɔ ɔmɛ, ngma bɔ ɔmɛ, kɛ a he wai bɔ ɔmɛ kɛ ba ha Yawɛ kaa bɔ nɛ a to ha ligbi slɔɔtoslɔɔto ɔmɛ.

³⁸ Nyami be nɛ ɔmɛ piɛ Yawɛ daa Hejɔɔmi ligbi ɔ he. Nike ní, kɛ bɔhi nɛ a maa sã kɛ piɛ nyɛ bɔhi nɛ nyɛ wo he si ɔ, kɛ bɔhi nɛ je tsui mi faa a a he ɔ, nyɛɛ sã mɛ tsuo pɛpɛɛpɛ kɛ ha Yawɛ.

³⁹ Ke nyɛ kpa nyɛ ngmɔ ní ɔmɛ gbe nya a, nyɛɛ ye nyami be ha Yawɛ ligbi kpaago, kɛ je nyɔhiɔ kpaagone ɔ we ligbi nyɔngma kɛ enuɔne ɔ. Kekleekle ligbi ɔ, kɛ ligbi kpaanyɔne ɔ nɛ a pee he jɔɔmi ligbihi ha nyɛ.

⁴⁰ Kekleekle ligbi ɔ, nyɛɛ ngɔ tso yiblii kpakpahi, tã bahi, kɛ tso kusuuhi a kɔnihi kɛ a he ba nɛ nyɛ kɛ nya ligbi kpaago kɛ wo Yawɛ, nyɛ Mawu ɔ hɛ mi nyami.

⁴¹ Nyɛ nya ligbi kpaago ngɛ nyɔhiɔ kpaagone ɔ mi; enɛ ɔ ji mlaa nɛ fɔɔ si kɛ ha nyɛ nina kɛ yaa neneene.

⁴² Israel fɔfɔɛ tsuo nɛ hi gbahi a sisi ligbi kpaago,

⁴³ konɛ nyɛ nina nɛ na nɛ a le kaa gbahi a sisi nɛ Yawɛ ha nyɛ nɛmɛ Israel bi ɔmɛ hi, benɛ i kpaka mɛ kɛ je Egipt ɔ. Imi ji Yawɛ, nyɛ Mawu ɔ nɛ.

⁴⁴ Bɔ nɛ Mose wo Israel ma a mlaa kaa a ye nyami behi kɛ wo Yawɛ hɛ mi nyami ji nɛ ɔ nɛ.