Mose III, 22 - BAIBLO ALOO NGMAMI KLƆUKLƆU Ɔ

Bɔ ɔmɛ a he tsɔmi

¹ Yawɛ fa Mose ke

² e de Aaron kɛ e binyumu ɔmɛ ke, “Ní klɔuklɔuhi nɛ Israel bi ɔmɛ tsukɔ he kɛ ha mi ɔ, nyɛɛ hyɛ a nɔ saminya, konɛ nyɛ ko pue ye biɛ klɔuklɔu ɔ hɛ mi si. Imi ji Yawɛ.

³ Nɔ tsuaa nɔ nɛ e he tsɔ we, nɛ e maa hɛ lɛ kɛ su ní klɔuklɔu ɔmɛ nɛ Israel ma a tsukɔ he kɛ ha imi Yawɛ ɔ a he ɔ, a je lɛ we; e ko sɔmɔ ngɛ bɔ sami la tɛ ɔ he ngɛ ye hɛ mi hu. Mlaa nɛ ɔ fɔɔ si kɛ ha yi nɔhi tsuo nɛ maa ba a. Imi ji Yawɛ.

⁴ “Aaron nina ko nɛ ngɛ he womi nɔ hiɔ yaya nue, aloo nɔ ko nɛ nyu yaya ngɛ bee ngɛ e he ɔ, e ko ye ní klɔuklɔu ɔ eko kɛ yaa si be nɛ e he ma tsɔ. Osɔfo tsuaa osɔfo nɛ maa ta nɔ́ ko nɛ he tsɔ we he ɔ, nɔ gbogboe he jio, nyumu nɛ nyu yaya ngɛ bee ngɛ e he he jio,

⁵ nɔ́ ko nɛ sãã si nɛ he tsɔ we he jio, loo nɔmlɔ nɛ he tsɔ we he jio, e he be tsɔe.

⁶ Osɔfo tsuaa osɔfo nɛ maa ta ní nɛ ɔmɛ a he ɔ, e he be tsɔe kɛ yaa si du ma bu. E ko ye ní klɔuklɔu ɔ eko, ja e du e he.

⁷ Ke pu nɔ si kɛkɛ e he tsɔ, kɛkɛ ɔ, e ma nyɛ maa ye ní klɔuklɔu ɔ eko, ejakaa enɛ ɔ ji nɔ́ nɛ e yeɔ.

⁸ E ko ye lohwe ko nɛ lɛ nitsɛ e gbo, loo lohwe ko nɛ lohwe kpa ko tsɔtslɔɔ e mi; ke e ye ɔ, e ble e he. Imi ji Yawɛ.

⁹ “Osɔfo ɔmɛ tsuo nɛ a ye ye blɔ nya tomi ɔmɛ a nɔ. A ko ble a he. Ke a pee ja a, a pee yayami, nɛ a ma gbo. Imi ji Yawɛ nɛ tsukɔɔ a he ɔ nɛ.

¹⁰ “Nɔ ko nɛ ji osɔfo weku mi ɔ, e ko ye ní klɔuklɔu ɔ eko. Osɔfo we nubwɔ, loo e we apaatsɛ po e ko ye ní klɔuklɔu ɔ eko.

¹¹ Se nyɔguɛ nɛ osɔfo ɔ he kɛ lɛ nitsɛ e sika a ma nyɛ maa ye ní klɔuklɔu ɔ eko. Nyɔguɛhi a bimɛ nɛ a fɔ ngɛ osɔfo ɔ we mi hu ma nyɛ maa ye ní klɔuklɔu ɔ eko.

¹² Ke osɔfo biyo ya gba nɔ ko nɛ pi osɔfo ji lɛ ɔ, biyo nɛ ɔ ko ye bɔ sami ní klɔuklɔu ɔ eko.

¹³ Se ke osɔfo ɔ biyo ya pee yalɔyo, loo e gba puɛ nɛ e be bi, nɛ e kpale kɛ ba e tsɛ we mi, nɛ e tsɛ ɔ ngɛ e nɔ hyɛe kaa sa a, e ma nyɛ maa ye e tsɛ ní ɔ eko. Nɔ ko nɛ ji osɔfo weku mi be he blɔ nɛ e yeɔ eko.

¹⁴ “Ke nɔ ko li e he be nɛ e ye ní klɔuklɔu ɔ eko ɔ, é wo nɔ́ ɔ he hiɔ sisiisi, nɛ e ngɔ nɔ́ ɔ jua a mi dlami enuɔ mi kake ngɔ piɛ he kɛ to nane mi kɛ ha osɔfo ɔ.

¹⁵ Nɔ ko nɔ ko ko ble ní klɔuklɔu ɔmɛ nɛ Israel bi ɔmɛ ngɔ kɛ ba ha Yawɛ ɔ;

¹⁶ a ko ha nɔ ko nɛ sɛ́ nɛ ye eko. Ke a pee ja a, nɔ ɔ tɔ, nɛ a maa gbla e tue. Imi ji Yawɛ nɛ tsukɔɔ bɔ ɔmɛ a he ɔ nɛ.”

¹⁷ Jehanɛ, Yawɛ fa Mose ke,

¹⁸ e de Aaron, kɛ e binyumu ɔmɛ, kɛ Israel ma a tsuo ke, “Ke Israel fɔfɔɛ, loo nubwɔ ko nɛ ngɛ nyɛ kpɛti maa sã sami bɔ ha imi Yawɛ ɔ, bɔ nɛ e wo he si jio, bɔ nɛ je tsui mi faa jio,

¹⁹ lohwe nɛ a kɛ maa sã bɔ ɔ nɛ pee lohwe ku nɛ kpa ko be e he, na ku, loo agbosu, loo akpakpo.

²⁰ A ko ngɔ lohwe ko nɛ kpa ngɛ e he kɛ ba, ejakaa imi Yawɛ, i be ngɔe.

²¹ Ke nɔ ko maa sã tue mi jɔmi bɔ ha imi Yawɛ ɔ, bɔ nɛ e wo he si jio, bɔ nɛ je tsui mi faa jio, lohwe nɛ a kɛ maa sã bɔ ɔ, e pee lohwe nɛ kpa ko be e he, na jio, to jio.

²² Nyɛ ko ngɔ lohwehi kaa enɛ ɔmɛ kɛ ba sã bɔ ngɛ bɔ sami la tɛ ɔ nɔ ha Yawɛ: nɔ́ nɛ hɛngmɛ yu, nɔ́ nɛ nane ku, nɔ́ nɛ plaa, nɔ́ nɛ pa nyu ngɛ fofoe ngɛ e he, loo nɔ́ nɛ je sakpa.

²³ Na ku, loo jijɔ bi nɛ e nine, loo e nane ka tsɔ ɔ, a ma nyɛ kɛ ba kaa bɔ nɛ je tsui mi faa. Se ke a kɛ ba kaa bɔ nɛ a wo he si ɔ, lɛɛ a be ngɔe.

²⁴ Lohwe tsuaa lohwe nɛ e sungmɛ plaa, loo e sungmɛ mi wu ywia, loo a ta lɛ ɔ, a ko ngɔ kɛ ba sã bɔ ha Yawɛ; a ko pee ja ngɛ nyɛ zugba a nɔ.

²⁵ “Nyɛ ko he kikɛmɛ a lohwe nɛ ɔmɛ eko kɛ je nibwɔhi a dɛ kɛ ba sã niye ní bɔ ha nyɛ Mawu ɔ; akɛnɛ kpa ngɛ a he ɔ, a be mɛ ngɔe.

^26-27 “Ke a fɔ na, loo jijɔ, loo apletsi ɔ, e hi e nyɛ ɔ ngɔ ligbi kpaago. Kɛ je ligbi kpaanyɔne ɔ kɛ yaa a, a ma nyɛ kɛ ba sã niye ní bɔ ha Yawɛ.

²⁸ Nyɛ ko gbe na kɛ e bi, loo to kɛ e bi tsuo ligbi kake.

²⁹ Nyɛɛ sã sina bɔ ha Yawɛ ngɛ mlaa a nya, bɔ nɛ pee nɛ a he nyɛ bɔ ɔ.

³⁰ Nyɛɛ ye ní ɔ ligbi ɔ kɛ̃; je nɛ ko na yi. Imi ji Yawɛ.

³¹ “Nyɛ hɛ nɛ hi ye mlaa amɛ a nɔ, nɛ nyɛɛ ye a nɔ. Imi ji Yawɛ.

³² Nyɛ ko ble ye biɛ klɔuklɔu ɔ, se mohu Israel ma a tsuo nɛ yɔse kaa i ngɛ klɔuklɔu. Imi ji Yawɛ nɛ tsukɔɔ nyɛ he ɔ nɛ.

³³ I je nyɛ kɛ je Egipt zugba a nɔ, konɛ ma pee nyɛ Mawu. Imi ji Yawɛ.”