Mose III, 21 - BAIBLO ALOO NGMAMI KLƆUKLƆU Ɔ

Osɔfo ɔmɛ a he tsɔmi

¹ Yawɛ fa Mose ke e de Aaron bimɛ ɔmɛ nɛ ji osɔfo ɔmɛ ke, “Ke nyɛ ma a mi bi ko gbo ɔ, nyɛ ti nɔ ko nɔ ko kó ya gbogboe ɔ he nɛ́ e ba ble e he,

² ja e he nɔ kɔklɔɔ kaa e nyɛ, e tsɛ, e binyumu, e biyo, loo e nyɛminyumu,

³ loo e nyɛmiyo nɛ li nyumu. Akɛnɛ e nyɛmiyo ɔ be huno ɔ, e ma nyɛ ble e he ngɛ e he.

⁴ Osɔfo ko kó ble e he ngɛ e yo weku no ko nɛ gbo ɔ he.

⁵ “Osɔfo ko po huɛ ngɛ e yi kpɛti, loo e sua e kpɛni he. E ko po e he ha, loo e ngmaa e he kɛ tsɔɔ kaa e ngɛ kɔmɔ yee.

⁶ Osɔfo tsuaa osɔfo nɛ pee e he klɔuklɔu, nɛ e ko pue ye hɛ mi si; ejakaa lɛ nɛ sãã niye ní bɔ ɔ haa imi Yawɛ, lɔ ɔ he ɔ, e sa nɛ e pee e he klɔuklɔu.

⁷ Osɔfo ko kó ngɔ yo yaholɔ, aloo yo nɛ nɔ ko puɛ lɛ. E ko ngɔ yo nɛ e kɛ e huno be hu, ejakaa lɛ osɔfo ɔ, nɔ klɔuklɔu ji lɛ.

⁸ Ma a nɛ bu osɔfo kaa nɔ klɔuklɔu, ejakaa lɛ nɛ e ngɔɔ niye ní bɔ ɔmɛ kɛ ba haa mi ɔ nɛ. Imi ji Yawɛ; i ngɛ klɔuklɔu, nɛ i peeɔ ye ma a klɔuklɔu.

⁹ Ke osɔfo ko biyo pee e he yaholɔ ɔ, e pue e tsɛ hɛ mi si. A sã lɛ nɛ e gbo.

¹⁰ “Nɔ nɛ ji osɔfo nɔkɔtɔma pe kulaa ngɛ e nyɛmimɛ ɔmɛ a kpɛti, nɛ a pɔ lɛ nu, nɛ a pee lɛ klɔuklɔu ɔ, ke e wo osɔfo tade ɔ, e ko ha nɛ e yi bwɔmi nɛ gbɛ kɛ pue e yi nɔ, nɛ e ko hía e he tade ɔmɛ kɛ tsɔɔ kaa e ngɛ kɔmɔ yee.

^11-12 Osɔfo nɛ a pɔ lɛ nu ɔ, e ngɛ klɔuklɔu ha mi. E ko si ye bo tsu he klɔuklɔu ɔ kɛ ya he nɛ gbogboe ko ngɛ, nɛ e ba ble e he, kɛ he klɔuklɔu ɔ tsuo. Lɔ ɔ he ɔ, e ko ya gbogboe ko he, e tsɛ nɛ gbo jio, e nyɛ nɛ gbo jio. Imi ji Yawɛ.

¹³ Osɔfo nɛ ngɔ yo nɛ li nyumu.

¹⁴ E ko ngɔ yalɔyo, aloo yo nɛ e kɛ e huno be hu, loo yo nɛ nɔ ko puɛ lɛ, loo yaholɔ. É ngɔ yo nɛ li nyumu kɛ je lɛ nitsɛ e weku mi.

¹⁵ Ke pi ja a, e bimɛ nɛ sa kaa a peeɔ klɔuklɔu ɔ, a he be tsɔe. Imi ji Yawɛ; imi nɛ i hla lɛ ngɔ to kaa osɔfo nɔkɔtɔma a nɛ.”

¹⁶ Yawɛ ya nɔ nɛ e fa Mose ke

¹⁷ e de Aaron ke, “Ngɛ yi nɔ ɔmɛ tsuo a mi ɔ, o nina ko nɛ kpa ngɛ e he ko hla kaa e maa ngɔ Yawɛ niye ní bɔ kɛ ba ha mi.

¹⁸ Nɔ ko nɛ kpa ngɛ e he be he blɔ kaa e baa e Mawu ɔ hɛ mi haa, hɛ yuyuilɔ ji lɛ jio, libɔɔ ji lɛ jio, nɔ nɛ hɛ mi plaa hyɛ jio, nɔ nɛ kpa ko ngɛ e nane he jio,

¹⁹ nɔ ko nɛ e nine, loo e nane ku jio,

²⁰ kpotsɛ jio, akɔtia jio, nɔ nɛ hɛngmɛ hiɔ ngɛ e he jio, nɔ nɛ he womi nɔ hiɔ yaya ngɛ e he jio, nɔ nɛ sungmɛ mi wu ywia jio.

²¹ Osɔfo Aaron nina ko nɛ kpa ngɛ e he be he blɔ kaa e ngɔɔ niye ní bɔ kɛ ba haa Yawɛ.

²² E ma nyɛ maa ye bɔ sami nike ní nɛ a kɛ ba haa mi ɔ eko, niye ní klɔuklɔu ɔ jio, klɔuklɔu pe kulaa a eko jio.

²³ Se akɛnɛ kpa ngɛ e he he je ɔ, e ko hɛ lɛ kɛ su tsu mi pomi bo ɔ, loo bɔ sami la tɛ ɔ he. E ko ba ble ní klɔuklɔu nɛ ɔmɛ. Imi ji Yawɛ; imi nɛ i peeɔ mɛ klɔuklɔu ɔ nɛ.”

²⁴ Níhi nɛ Mose de Aaron, kɛ e binyumu ɔmɛ, kɛ Israel ma a tsuo ji nɛ ɔmɛ nɛ.