Mose III, 2 - BAIBLO ALOO NGMAMI KLƆUKLƆU Ɔ

Niye ní bɔhi

¹ Ke nɔ ko ngɔ niye ní kɛ ma bɔ sami ha Yawɛ ɔ, é wɛɛ lɛ bukɔbukɔ kɛ pee mamu. E pue nɔ oliv nu, kɛ tsopa kɛ e he via,

² nɛ e ngɔ kɛ ba ha Aaron bimɛ ɔmɛ nɛ ji osɔfo ɔmɛ. Osɔfo ɔ nɛ piti mamu bukɔbukɔ kɛ e nɔ nu, kɛ tsopa kɛ e he via a tsuo e dɛ kɔkɔ kake, nɛ e sã ngɛ bɔ sami la tɛ ɔ nɔ. Enɛ ɔ daa si kaa okadi ngɛ bɔ ɔ nɛ nɔ ɔ kɛ ba a tsuo nane mi kɛ ha Yawɛ. Enɛ ɔ ji bɔ nɛ a kɛ la sãã, nɛ jee via ha Yawɛ.

³ Mamu nɛ piɛ ngɛ niye ní bɔ sami ɔ se ɔ, peeɔ osɔfo Aaron kɛ e bimɛ ɔmɛ a nɔ́; ejakaa bɔhi nɛ a kɛ la sãã ha Yawɛ ɔ mi nɔ́ klɔuklɔu pe kulaa ji lɔ ɔ nɛ.

⁴ Ke niye ní nɛ a sã ngɛ flɔɔnɔɔ mi nɔ ko ngɔ kɛ ma bɔ sami ɔ, é pee keeki nɛ a kɛ mamu bukɔbukɔ nɛ a wo mi nu sã, loo e pee akpɔɔnɔɔ nɛ a pɔ he nu.

⁵ Ke niye ní nɛ a sã ngɛ ngɛyu mi nɔ ko kɛ ma bɔ sami ɔ, é pee nɔ́ nɛ a kɛ kplolo mamu bukɔbukɔ nɛ a kɛ nu futu mi lɛ pee.

⁶ É ku niye ní ɔ mi tsɔwitsɔwi, nɛ́ e plɛ nu ngɔ pue nɔ; niye ní bɔ ji nɛ ɔ nɛ.

⁷ Jehanɛ, ke niye ní nɛ a hoo ngɛ buɛ mi nɔ ko ngɔ kɛ ma bɔ sami ɔ, e pee mamu bukɔbukɔ nɛ a wo mi nu.

⁸ A sã jio, a si jio, e ngɔ kɛ ba kaa niye ní bɔ nɛ a kɛ ma ha Yawɛ. É ngɔ kɛ ba ha osɔfo ɔ, konɛ osɔfo ɔ hu nɛ ngɔ kɛ ya bɔ sami la tɛ ɔ hɛ mi.

⁹ Osɔfo ɔ nɛ ngɔ bɔbɔyoo ko kɛkɛ kaa okadi ngɛ niye ní ɔ tsuo nane mi. É sã nɔ́ nɛ ɔ ngɛ bɔ sami la tɛ ɔ nɔ. Enɛ ɔ ji bɔ nɛ a kɛ la sãã, nɛ jee via ha Yawɛ.

¹⁰ Nɔ́ nɛ maa piɛ ngɛ se ɔ peeɔ osɔfo Aaron kɛ e bimɛ ɔmɛ a nɔ́; ejakaa bɔhi nɛ a kɛ la sãã ha Yawɛ ɔ mi nɔ́ klɔuklɔu pe kulaa ji lɔ ɔ nɛ.

¹¹ A kɛ masa nɔ́ ko kó pee niye ní bɔ ɔmɛ tsuo nɛ a kɛ ba haa Yawɛ ɔ eko; nyɛ ko sã masa nɔ́ ko loo hwo kaa bɔ nɛ a kɛ la sãã ha Yawɛ.

¹² Nyɛ ma nyɛ maa ngɔ masa, loo hwo kɛ ba ha Yawɛ kaa ngmɔ nɔ kekleekle niba ní, se nyɛ ko sã ngɛ bɔ sami la tɛ ɔ nɔ kaa bɔ nɛ jee via.

¹³ Nyɛɛ wo nyɛ niye ní bɔ ɔmɛ tsuo a mi ngo; ejakaa ngo ji somi nɛ ngɛ nyɛɛ kɛ Mawu nyɛ kpɛti; lɔ ɔ he ɔ, ngo nɛ piɛ niye ní bɔ ɔmɛ tsuo a he.

¹⁴ Ke nɔ ko ngɔ e ngmɔ nɔ kekleekle niba ní kɛ ma bɔ sami ha Yawɛ, nyɛ Mawu ɔ kaa niye ní bɔ ɔ, é pee kpokploku nɛ a hluɛ, nɛ a sĩ, loo blɛfo nɛ a wɛɛ kplolo.

¹⁵ A wo mi nu, nɛ a kɛ tsopa kɛ e he via nɛ pue nɔ. Niye ní bɔ ji nɛ ɔ nɛ.

¹⁶ Osɔfo ɔ nɛ ngɔ niye ní bɔ nɛ ɔ bɔbɔyoo kɛkɛ kaa okadi ngɛ niye ní bɔ ɔ tsuo nane mi. É sã nɔ́ nɛ ɔ, kɛ tsopa kɛ e he via a tsuo kaa bɔ nɛ a kɛ la sãã ha Yawɛ.