Mose III, 19 - BAIBLO ALOO NGMAMI KLƆUKLƆU Ɔ

Mlaahi nɛ kɔɔ klɔuklɔu peemi kɛ dami sane yemi he

¹ Yawɛ de Mose ke

² e de Israel ma kpekpemi ɔ tsuo ke, “Nyɛɛ pee nyɛ he klɔuklɔu, ejakaa imi Yawɛ, nyɛ Mawu ɔ, i ngɛ klɔuklɔu.

³ Nyɛ ti nɔ tsuaa nɔ nɛ bu e nyɛ kɛ e tsɛ; nɛ e ye Hejɔɔmi ligbi ɔ kaa bɔ nɛ i fa nyɛ ɔ. Imi ji Yawɛ, nyɛ Mawu ɔ nɛ.

⁴ “Nyɛ ko je ye se nɛ nyɛ ya ja amagahi; nɛ nyɛ ko pee dade mawuhi ha nyɛ he. Imi ji Yawɛ, nyɛ Mawu ɔ nɛ.

⁵ “Ke nyɛ gbe lohwe nɛ a kɛ maa sã tue mi jɔmi bɔ ha imi Yawɛ, nyɛ Mawu ɔ, mlaahi nɛ i wo nyɛ ɔ, nyɛɛ ye a nɔ, konɛ e sa ye hɛ mi.

⁶ Á ye lo ɔ ligbi nɛ a maa gbe lohwe ɔ, aloo e nɔ jena. Ke eko piɛ nɛ ye ligbi etɛ ɔ, á sã,

⁷ Ke kaa nɔ ko ye eko ligbi etɛne ɔ, i be e bɔ ngɔe, ejakaa a hĩɔ.

⁸ Nɔ tsuaa nɔ nɛ maa ye eko ɔ, a gbla e tue, ejakaa e ble Yawɛ nɔ́ klɔuklɔu ɔ. A ma je lɛ we, nɛ a be lɛ bue ngɔ si ye ma a mi bi ɔmɛ a nɔ hu.

⁹ “Ke nyɛ ngɛ nyɛ ngmɔ ní kpae ɔ, nyɛ ko kpa ní ɔ kɛ ya su ngmɔ ɔ tue haa. Nyɛ ko muɔ nɔ́ nɛ ma pue si ngɛ ní kpami ɔ se hulɔ.

¹⁰ Wai ngmɔtsɛ kó kpa wai yiblii ɔmɛ tsuo ngɛ e wai tso ɔmɛ a nɔ. Wai yiblii nɛ maa nɔɔ si ngɛ wai ngmɔ ɔ mi ɔ hu e ko ya kukuɔ. E si ha ohiatsɛmɛ, kɛ nibwɔhi. Imi ji Yawɛ, nyɛ Mawu ɔ nɛ.

¹¹ “Nyɛ ko ju; nyɛ ko sisi nɔ, nɛ nyɛ ko ye nyɛ sibi lakpa.

¹² “Nyɛ ko ngɔ ye biɛ kɛ ka lakpa kita kɛ wo ye biɛ he mu. Imi ji Yawɛ, nyɛ Mawu ɔ nɛ.

¹³ “Koo fia o nyɛmi ojo, nɛ koo ju e nɔ́ ko hulɔ. Ke o ya bɔ nɔ ko apaa ke e ba tsu ní ha mo ɔ, wo lɛ hiɔ loko je nɛ na nɔ.

¹⁴ Koo gbiɛ tue kpokutsɛ, nɛ koo fɔ hɛ yuyuilɔ blɔ mi tso. Ye o Mawu ɔ gbeye. Imi ji Yawɛ.

¹⁵ “Nyɛɛ ye dami sane ngɛ kojomi mi; nyɛ ko hyɛ nɔ ko hɛ mi, ohiatsɛ ji lɛ jio, niatsɛ ji lɛ jio.

¹⁶ Koo pee o he sieku yelɔ kɛ hi yae kɛ hi bae ngɛ o ma mi bi ɔmɛ a kpɛti. Koo ye lakpa odase kɛ si o nyɛmi, nɛ́ a pue e muɔ si yaka gu. Imi ji Yawɛ.

¹⁷ “Koo nyɛ o nyɛmi ngɛ o tsui mi. Ke sane ko ba a, o kɛ lɛ nɛ hla mi, konɛ e he ɔ, mo mohu o ko ba pee yayami.

¹⁸ Koo ye mo nitsɛ o he lue, nɛ koo nyɛ o ma a mi bi ɔmɛ a ti nɔ ko nɔ ko; se mohu, moo suɔ o nyɛmi nɔmlɔ kaa bɔ nɛ o suɔ mo nitsɛ o he ɔ. Imi ji Yawɛ.

¹⁹ “Nyɛɛ ye ye mlaa amɛ a nɔ. Nyɛ ko ha nɛ nyɛ we mi lohwehi nɛ kuɔ henɔ kpahi nɛ a kɛ mɛ nɛ fɔ. Nyɛ ko du wu munomuno enyɔ ngɛ ngmɔ kake mi; nɛ nyɛ ko wo tade nɛ a kɛ nɔ́ slɔɔto enyɔ lo bo ɔ.

²⁰ “Ke nyumu ko kɛ nyɔguɛ yo ko nɛ a bi e si ha nyumu kpa na bɔmi be mi nɛ a kpɔ̃ we lɛ, loo e yi e he lolo ɔ, a hla munyu ɔ mi. A ko gbe mɛ, ejakaa nyɔguɛ ɔ yi e he lolo.

²¹ Se nyumu ɔ lɛɛ lɛ nitsɛ e ngɔ agbosu kɛ ba ha Yawɛ ngɛ kpe he bo tsu ɔ sinya a nya, nɛ a kɛ ba sã fɔ yemi bɔ.

²² Osɔfo ɔ nɛ ngɔ agbosu ɔ nɛ a kɛ ma fɔ yemi bɔ ɔ sami ɔ kɛ ya Yawɛ hɛ mi, nɛ e kɛ ya pee kusumi kɛ kpata Yawɛ ngɛ yayami nɛ nɔ ɔ pee ɔ he, nɛ Mawu kɛ maa pa lɛ.

²³ “Ke nyɛ ya su Kanaan zugba a nɔ, nɛ nyɛ du tso slɔɔtoslɔɔtohi nɛ woɔ yiblii slɔɔtoslɔɔtohi nɛ a yeɔ ɔ, nyɛɛ bu a yiblii ɔmɛ kaa níhi nɛ a tsi nya kekleekle jeha etɛ ɔmɛ; jamɛ a be ɔ mi ɔ, nyɛ ko ye eko.

²⁴ Jeha eywiɛne ɔ mi ɔ, nyɛɛ ngɔ yiblii ɔmɛ tsuo ngɔ pee sina bɔ klɛdɛɛ ha imi Yawɛ.

²⁵ Jeha enuɔne ɔ mi lɛɛ nyɛ ma nyɛ maa ye a yiblii ɔmɛ. Ke nyɛ pee ní nɛ ɔmɛ ɔ, tso ɔmɛ maa wo yiblii babauu ha nyɛ. Imi ji Yawɛ, nyɛ Mawu ɔ nɛ.

²⁶ “Nyɛ ko ye lo nɛ muɔ ngɛ mi kɛ mwɔɔ. Nyɛ ko klaa, nɛ nyɛ ko ye kunya hulɔ.

²⁷ Nyɛ ko po huɛ ngɛ nyɛ yi kpɛti, nɛ nyɛ ko sua nyɛ kpɛni hulɔ.

²⁸ Ke nɔ ko gbo ɔ, nyɛ ko po nyɛ he ha, nɛ nyɛ ko ngmaangmaa nyɛ he kɛ ye kɔmɔ. Imi ji Yawɛ.

²⁹ “Ko ha nɛ o biyo nɛ pee e he yaholɔ, nɛ e ba puɛ. Ke e pee ja a, yahomi kɛ musu bɔmi ma ba hiɛ ngɛ zugba a nɔ.

³⁰ Nyɛɛ ye ye Hejɔɔmi ligbi ɔmɛ, nɛ nyɛɛ ngɔ bu kɛ ha ye he klɔuklɔu ɔ; imi ji Yawɛ.

³¹ “Nyɛ ko ya bi ní ngɛ klaali, kɛ kunya yeli a ngɔ; ke nyɛ pee ja a, nyɛ ma ble nyɛ he. Imi ji Yawɛ, nyɛ Mawu ɔ nɛ.

³² “Buu nɔkɔtɔma, nɛ o wo e hɛ mi nyami. Ye mi gbeye. Imi ji Yawɛ, o Mawu ɔ nɛ.

³³ “Ke nɔ ko ba to nyɛ nubwɔ ngɛ zugba a nɔ ɔ, nyɛ ko pee lɛ yayami.

³⁴ Ke nɔ ko ba to nyɛ nubwɔ ɔ, nyɛɛ bu lɛ kaa ma a mi no nɔuu. Moo suɔ lɛ kaa bɔ nɛ o suɔ mo nitsɛ o he ɔ; ejakaa nyɛ hu nyɛ ya to nubwɔ hyɛ ngɛ Egipt zugba a nɔ. Imi ji Yawɛ, nyɛ Mawu ɔ nɛ.

³⁵ “Nyɛ ko sisi nɔ ngɛ nɔ́ ko kami, e jiimi, loo e hiɛmi kalemi mi.

³⁶ Nyɛɛ ngɔ sɛnihi, sɛni tɛhi, kɛ susumi níhi nɛ da kɛ tsu ní. Imi ji Yawɛ, nyɛ Mawu ɔ nɛ je nyɛ kɛ je Egipt zugba a nɔ ɔ nɛ.

³⁷ Nyɛ hɛ nɛ hi ye mlaa amɛ, kɛ ye blɔ nya tomi ɔmɛ tsuo nɔ, konɛ nyɛɛ ye a nɔ. Imi ji Yawɛ.”