Mose III, 18 - BAIBLO ALOO NGMAMI KLƆUKLƆU Ɔ

Nyumu kɛ yo bɔmi nɛ a hĩɔ

¹ Yawɛ de Mose ke

² e de Israel bi ɔmɛ ke, “Imi ji, Yawɛ nyɛ Mawu ɔ nɛ.

³ Egipt bi ɔmɛ nɛ nyɛ hi a zugba a nɔ ɔ, kɛ Kanaan bi ɔmɛ nɛ i ngɔ nyɛ kɛ yaa a zugba a a nɔ ɔ, nyɛ ko pee a kusumi níhi.

⁴ Nyɛɛ pee ye suɔmi nya ní, nɛ nyɛɛ ye ye mlaa amɛ a nɔ. Imi ji Yawɛ, nyɛ Mawu ɔ nɛ.

⁵ Mlaahi nɛ i wo nyɛ, kɛ blɔ nyahi nɛ i to ha nyɛ ɔ, nyɛɛ ye a nɔ pɛpɛɛpɛ. Ke nyɛ pee ja a, nyɛ yi ma na wami. Imi ji Yawɛ.”

⁶ Yawɛ wo mlaa nɛ ɔmɛ. Nyɛ ti nɔ ko nɔ ko kɛ lɛ nitsɛ e nyɛmi tutuutu kó na nyumu kɛ yo bɔmi. Imi ji Yawɛ.

⁷ Nɔ ko kɛ e nyɛ kó na nyumu kɛ yo bɔmi nɛ e ba pue e tsɛ hɛ mi si. Kó pue mo nitsɛ o nyɛ hɛ mi si.

⁸ O kɛ o tsɛ e yo kpa ko kó na nyumu kɛ yo bɔmi nɛ o ba pue o tsɛ hɛ mi si.

⁹ O kɛ o nyɛmiyo kó na nyumu kɛ yo bɔmi, o nyɛbi ji lɛ jio, o tsɛbi ji lɛ jio, nɔ nɛ a fɔ lɛ ngɛ we jio, nɔ nɛ a fɔ lɛ ngɛ ma se jio.

¹⁰ O kɛ o bibi kó na nyumu kɛ yo bɔmi, o binyumu bi ji lɛ jio, o biyo bi ji lɛ jio; e ji hɛ mi si puemi nɔ́ kɛ ha nyɛ tsuo.

¹¹ O kɛ o tsɛ yo e biyo kó na nyumu kɛ yo bɔmi, ejakaa lɛ hu o nyɛmi ji lɛ.

¹² O kɛ o nyɛko kó na nyumu kɛ yo bɔmi, ejakaa o tsɛ nitsɛ nyɛmiyo ji lɛ.

¹³ O kɛ o nyɛwayo, loo o nyɛngua kó na nyumu kɛ yo bɔmi, ejakaa lɛ hu e ngɛ kaa o nyɛ kɛ̃.

¹⁴ O kɛ o tsɛngua, loo o tsɛwayo e yo kó na nyumu kɛ yo bɔmi, ejakaa o nyɛnyua, loo o nyɛwayo ji lɛ.

¹⁵ O kɛ o binyumu e yo kó na nyumu kɛ yo bɔmi, ejakaa o nganyɛ ji lɛ.

¹⁶ O kɛ o nyɛminyumu e yo kó na nyumu kɛ yo bɔmi, ejakaa e ji hɛ mi si puemi ha o nyɛminyumu ɔ.

¹⁷ O kɛ yo kɛ e biyo tsuo kó na nyumu kɛ yo bɔmi. O kɛ yo ɔ e bibi hu kó na nyumu kɛ yo bɔmi, e binyumu biyo jio, e biyo ɔ biyo jio. Ke o pee ja a, o bɔ musu, ejakaa nyɛmimɛ tutuutu ji mɛ.

¹⁸ Koo ngɔ nɔ kɛ e nyɛmi nɛ a ba pee huno yihi, be mi nɛ e nyɛmi ɔ ngɛ je mi kɛ mwɔɔ.

¹⁹ “O kɛ yo nɛ ku nine kó na nyumu kɛ yo bɔmi, ejakaa e he tsɔ we.

²⁰ O kɛ o nyɛmi e yo kó na nyumu kɛ yo bɔmi nɛ o kó ba ble o he.

²¹ Koo ngɔ o bimɛ ɔmɛ eko kɛ ha nɛ a sã ha mawu ɔ nɛ a tsɛɛ lɛ Molek ɔ. Ke o pee ja a, o gbe Yawɛ, o Mawu ɔ he guɛ.

²² Nyumu kɛ nyumu kó na bɔmi kaa yo kɛ nyumu; a hĩɔ.

²³ O kɛ lohwe kó na bɔmi nɛ o ba ble o he. Yo hu kɛ lohwe kó hwɔ nɛ e ba ble e he ja nɔuu. A hĩɔ.

²⁴ “Je ma amɛ nɛ i ngɛ fiee kɛ ngɛ nyɛ blɔ mi jee ɔ, níhi nɛ a pee nɛ a kɛ ble a he,

²⁵ nɛ a kɛ ble zugba a hulɔ ɔ ji nɛ ɔmɛ nɛ. Lɔ ɔ he je nɛ i ngɛ zugba a tue gblae, nɛ zugba a hu ngɛ ni ɔmɛ fiee ɔ nɛ.

²⁶ Se nyɛ nitsɛmɛ, kɛ nibwɔhi nɛ ba to nyɛ ɔ lɛɛ nyɛɛ ye ye mlaa amɛ, kɛ ye blɔ nya tomi ɔmɛ a nɔ, nɛ nyɛ ko pee níhi nɛ a hĩɔ nɛ ɔ eko.

²⁷ Nihi nɛ hi hiɛmɛ nɛ ɔ loko nyɛ ba a bɔ musu nɛ ɔmɛ tsuo kɛ ble zugba a.

²⁸ Ke nyɛ hu nyɛ pee ní nɛ ɔmɛ kɛ ble zugba a, zugba a maa fie nyɛ kaa bɔ nɛ e fie nihi nɛ hi lejɛ ɔ loko nyɛ ba a.

²⁹ Nɔ tsuaa nɔ nɛ maa pee níhi nɛ a hĩɔ nɛ ɔ eko ɔ, a je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.”

³⁰ Yawɛ de kɛ gbe nya ke, “Lɔ ɔ he ɔ, nyɛɛ ye ye mlaa amɛ a nɔ. Musu bɔmi níhi nɛ ni nɛmɛ nɛ hi zugba a nɔ kekle ɔ pee ɔ, nyɛ ko pee nɛ nyɛ ba ble nyɛ he. Imi ji Yawɛ, nyɛ Mawu ɔ nɛ.”