Mose III, 17 - BAIBLO ALOO NGMAMI KLƆUKLƆU Ɔ

Mlaahi nɛ kɔɔ muɔ he

¹ Yawɛ de Mose ke

² e de Aaron, kɛ e binyumu ɔmɛ, kɛ Israel ma a tsuo ke mlaahi nɛ Yawɛ wo mɛ ji nɛ ɔmɛ nɛ.

^3-4 Ke Israel fɔfɔɛ ko gbe na, loo jijɔ, loo apletsi ngɛ he kpa ko nɛ pi kpe he bo tsu ɔ sinya a nya, nɛ e kɛ ba sã bɔ ha Yawɛ ɔ, e tɔ mlaa. Jamɛatsɛ ɔ pue muɔ si. Á je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

⁵ Mlaa nɛ ɔ tsɔɔ kaa jehanɛ lɛɛ Israel bi ɔmɛ nɛ a ngɔ lohwe ɔmɛ nɛ a gbee ngɛ nga nɔ ɔ kɛ ba ha osɔfo ɔ ngɛ kpe he bo tsu ɔ sinya a nya. Á gbe lohwe ɔ ngɛ lejɛ ɔ kɛ sã tue mi jɔmi bɔ ha Yawɛ.

⁶ Osɔfo ɔ nɛ fĩa muɔ ɔ kɛ pue Yawɛ bɔ sami la tɛ ɔ nɔ ngɛ kpe he bo tsu ɔ sinya a nya, konɛ é sã zɔ ɔ kaa bɔ nɛ jee via ngɛ Yawɛ hɛ mi.

⁷ Enɛ ɔ ma ha Israel bi ɔmɛ maa jɔɔ bɔ sami ha mumi yayamihi nɛ hɛɛ apletsi su nɛ a jee Mawu se nɛ a ya jaa a. Enɛ ɔ maa pee mlaa nɛ fɔɔ si ha mɛ, kɛ a nina kɛ yaa neneene.

⁸ Jehanɛ hu, de mɛ ke, ke Israel fɔfɔɛ, aloo nɔ ko nɛ ba to mɛ nubwɔ maa sã sami bɔ, loo bɔ kpa ko kɛ ha Yawɛ, nɛ e ngɔɛ kɛ bɛ kpe he bo tsu ɔ sinya a nya a,

⁹ jamɛ a nɔ ɔ, a je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

¹⁰ Ke Israel fɔfɔɛ ko, aloo nɔ ko nɛ ba to nyɛ nubwɔ ye muɔ ɔ, ye hɛ maa dɔ kɛ wo jamɛ a nɔ ɔ. Ma je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

¹¹ Muɔ ji nɔ́ nɛ haa he lo tsuaa he lo wami. Lɔ ɔ he nɛ Yawɛ fa ke a ngɔ muɔ kɛ pue bɔ sami la tɛ ɔ nɔ nɛ a kɛ kpa musu ɔ nɛ. Muɔ ji nɔ́ nɛ a kɛ kpaa musu, ejakaa wami ngɛ mi.

¹² Enɛ ɔ he je nɛ i de Israel bi ɔmɛ ke a ko ye muɔ ɔ nɛ; mɛ jio, nɔ ko nɛ ba to mɛ nubwɔ jio.

¹³ Ke Israel fɔfɔɛ, loo nɔ ko nɛ ba to mɛ nubwɔ ya da de nɛ e gbe lohwe nane eywiɛtsɛ, loo pɛlitsɛ nɛ a yeɔ ɔ, é dɛ muɔ ɔ kɛ pue si, nɛ e ngɔ zu ngɔ pue nɔ.

¹⁴ Ejakaa muɔ ji nɔ́ nɛ haa he lo tsuaa he lo wami. Lɔ ɔ he nɛ Yawɛ de Israel bi ɔmɛ ke a ko ye muɔ ɔ nɛ. Nɔ tsuaa nɔ nɛ maa pee ja a, á je lɛ we, nɛ a ko bu lɛ ngɔ si ye ma a mi bi ɔmɛ a nɔ hu.

¹⁵ Israel no tsuaa Israel no, loo nubwɔ kó ye lohwe ko nɛ lɛ nitsɛ e gbo, aloo nɔ́ nɛ nga mi lohwe tsɔtslɔɔ e mi. Ke e ba mi kaa nɔ ko tɔ mlaa nɛ ɔ nɔ ɔ, é fɔ e tade ɔmɛ a he, nɛ é du e he. E he be tsɔe kɛ yaa si du ma bu; lɔ ɔ se loko e he ma tsɔ.

¹⁶ Ke e fɔ we e tade ɔmɛ a he, nɛ́ e du e he ɔ, e musu maa tloo lɛ.