Mose III, 16 - BAIBLO ALOO NGMAMI KLƆUKLƆU Ɔ

Kpatami ligbi ɔ

¹ Benɛ Aaron binyumu enyɔ ɔmɛ ngɔ la nɛ he tsɔ we kɛ ya Yawɛ hɛ mi nɛ a gbo se ɔ, Yawɛ kɛ Mose tu munyu.

² E de lɛ ke, “De o nyɛminyumu Aaron ke e ko ya he klɔuklɔu pe kulaa a ngɛ tsu mi pomi bo ɔ se be saisaa, konɛ e ko gbo. Ejakaa lejɛ ɔ ji he nɛ i jeɔ ye he kpo ngɛ ngɛ bɔku mi, ngɛ somi daka a nya nɔ́ ɔ nɔ.

³ E ma nyɛ maa ya he klɔuklɔu pe kulaa a ke e hɛɛ na niheyo kɛ ha yayami pami bɔ sami, nɛ e hɛɛ agbosu hu kɛ ha sami bɔ.”

⁴ Jehanɛ Yawɛ wo mlaa nɛ ɔmɛ. Be tsuaa be nɛ Aaron maa sɛ he klɔuklɔu pe kulaa a, é du e he, nɛ é wo osɔfo tade klɔuklɔu nɛ ɔmɛ: kploba yi nɔ tade klɔuklɔu ɔ, sisi tade ɔmɛ, kɛ kploba mlɛ mi fimi nɔ́ ɔ, nɛ é bu kploba pɛɛ ɔ.

⁵ Aaron nɛ he akpakpo enyɔ nɛ a kɛ maa sã yayami pami bɔ, kɛ agbosu kake nɛ a kɛ maa sã sami bɔ ngɛ Israel ma a tsuo dɛ.

⁶ É sã na ku ɔ kaa yayami pami bɔ kɛ ha lɛ nitsɛ e he, nɛ é kpata Yawɛ ha lɛ nitsɛ kɛ e we ɔ.

⁷ Jehanɛ, é ngɔ akpakpo enyɔ ɔmɛ kɛ ba Yawɛ hɛ mi ngɛ kpe he bo tsu ɔ sinya a nya.

⁸ É fɔ a nɔ sɔ. Yawɛ nɔ́ kake, kɛ Azazel nɔ́ kake.

⁹ Nɔ́ nɛ Yawɛ sɔ ɔ je ɔ, a kɛ sã yayami pami bɔ.

¹⁰ Nɔ́ nɛ Azazel nɔ́ ɔ je ɔ, a kɛ ba Yawɛ hɛ mi hɛ ngmengmle, nɛ a kɛ ba kpata Yawɛ ha ma a. Lɔ ɔ se ɔ, a je lɛ we kɛ ho nga a nɔ ya kɛ ya ha Azazel.

¹¹ Ke Aaron maa sã na ku ɔ kaa yayami pami bɔ kɛ ha lɛ nitsɛ e he kɛ e we ɔ,

¹² e ngɔ ngɛyu kɛ je la ngɛ bɔ sami la tɛ ɔ nɔ, nɛ e piti tsopa kɛ e he via nɛ a wɛɛ lɛ bukɔbukɔ dɛ kɔkɔ enyɔ, nɛ e kɛ sɛ he klɔuklɔu pe kulaa a.

¹³ E ngɔ tsopa kɛ e he via a ngɔ pue la a mi ngɛ Yawɛ hɛ mi, nɛ e wo la su ku nɛ mi ti kɛ tsi somi daka nya nɔ́ ɔ nɔ, bɔ nɛ pee nɛ Aaron ko na somi daka nya nɔ́ ɔ, nɛ e ba gbo.

¹⁴ É ngɔ na ku ɔ muɔ eko, nɛ e kɛ e nine nguɛ nɛ sɔ mi nɛ e kɛ fĩa somi daka nya nɔ ɔ hɛ mi. É kɛ muɔ ɔ nɛ fĩa somi daka nitsɛ hu hɛ mi si kpaago.

¹⁵ Jehanɛ, é gbe akpakpo ɔ nɛ a kɛ ma yayami pami bɔ sami ha ma a. É ngɔ muɔ ɔ kɛ ba he klɔuklɔu pe kulaa a, nɛ e ya fĩa kɛ pue somi daka a nya nɔ́ ɔ nɔ, kɛ somi daka a he kɛ kpe kaa bɔ nɛ a kɛ na ku ɔ muɔ ɔ pee ɔ pɛpɛɛpɛ.

¹⁶ É pee kusumi nɛ ɔ kɛ kpata Yawɛ ngɛ he klɔuklɔu pe kulaa a ngɛ Israel bi ɔmɛ a musuhi nɛ a bɔ, mlaahi a nɔ nɛ a tɔ, kɛ yayamihi nɛ a pee ɔ tsuo kulaa he. É pee kusumi nɛ ɔ kɛ ha kpe he bo tsu ɔ hulɔ; ejakaa e ngɛ ma sito he ɔ he nɛ a ble ɔ.

¹⁷ Kɛ je be nɛ Aaron maa sɛ he klɔuklɔu pe kulaa a nɛ e ya pee kusumi nɛ ɔ, kɛ yaa si e maa je kpo ɔ, nɔ ko nɔ ko nɛ ko ya bo tsu ɔ mi. Ke e pee kusumi nɛ e kɛ kpata Yawɛ kɛ ha lɛ nitsɛ e he kɛ e we ɔ, kɛ ma a tsuo gbe nya a,

¹⁸ é je kpo kɛ ya bɔ sami la tɛ nɛ ngɛ Yawɛ hɛ mi ɔ he, nɛ e ya kpata Yawɛ kɛ ha la tɛ ɔ. É ngɔ na ku ɔ muɔ ɔ eko, kɛ akpakpo ɔ hu muɔ ɔ eko kɛ kpa bɔ sami la tɛ ɔ koli ɔmɛ a he.

¹⁹ É ngɔ e nine nguɛ kɛ fĩa muɔ ɔ eko kɛ pue bɔ sami la tɛ ɔ nɔ si kpaago. É tsukɔ he, nɛ é pee lɛ klɔuklɔu ngɛ yayamihi nɛ Israel bi ɔmɛ pee kɛ ble la tɛ ɔ he.

Musu kpami to

²⁰ Ke Aaron pee kusumi ɔ kɛ tsukɔ he klɔuklɔu pe kulaa a, kpe he bo tsu ɔ, kɛ bɔ sami la tɛ ɔ he gbe nya a, é ngɔ akpakpo hɛngmengmletsɛ ɔ kɛ ba Yawɛ hɛ mi.

²¹ É ngɔ e nine enyɔ ɔmɛ tsuo ngɔ pue akpakpo ɔ yi mi, nɛ e jaje kaa Israel bi ɔmɛ pee yayami, a tɔ mlaa, nɛ a gbo tue. Aaron nɛ ngɔ yayami nɛ ɔmɛ ngɔ pue akpakpo ɔ nɔ. Lɔ ɔ se ɔ, e ngɔ akpakpo ɔ kɛ ha nɔ ko nɛ a hla kɛ to, nɛ e fie lɛ kɛ ho nga nɔ ya, nɛ e ya ngmɛɛ e he ngɛ lejɛ ɔ.

²² Akpakpo ɔ maa tloo Israel bi ɔmɛ a he musu tsuo kɛ maa ho zugba nɛ nɔ ko nɔ ko be nɔ ɔ nɔ ya.

²³ Jehanɛ, Aaron nɛ sɛ kpe he bo tsu ɔ mi, nɛ é je e we osɔfo tade ɔmɛ nɛ e wo kɛ ya sɛ he klɔuklɔu pe kulaa kɛ pue lejɛ ɔ.

²⁴ É du e he ngɛ he ko nɛ tsɔ, nɛ é wo lɛ nitsɛ e tade ɔmɛ. Jehanɛ, é je kpo nɛ e ya sã sami bɔ kɛ kpata Yawɛ ha lɛ nitsɛ e he, kɛ ma a hulɔ.

²⁵ Lohwe ɔ nɛ a kɛ ma yayami pami bɔ ɔ sami ɔ, e sã e zɔ ɔ ngɛ bɔ sami la tɛ ɔ nɔ.

²⁶ Nɔ ɔ nɛ fie to ɔ kɛ ya ha Azazel ngɛ nga a nɔ ɔ nɛ fɔ e tade ɔmɛ nɛ e wo ɔ a he, nɛ e du e he loko e ba ma sito he ɔ.

²⁷ Na ku ɔ, kɛ akpakpo ɔ nɛ a kɛ ba sã yayami pami bɔ, nɛ a kɛ a muɔ ɔ ba kpata Yawɛ ngɛ he klɔuklɔu pe kulaa a, a ngɔ mɛ kɛ je ma sito he ɔ, nɛ a ya sã mɛ. A sã lohwe he womi ɔmɛ, lo ɔ, kɛ a fĩ ɔ tsuo.

²⁸ Nɔ nɛ maa sã ní nɛ ɔmɛ ɔ, é fɔ e tade ɔmɛ a he, nɛ é du e he loko é ba ma sito he ɔ.

Kpatami ligbi ɔ yemi

²⁹ Enɛ ɔ maa pee mlaa nɛ fɔɔ si kɛ yaa neneene. Nyɔhiɔ kpaagone ɔ we ligbi nɛ ji nyɔngma a, Israel fɔfɔɛ, kɛ nibwɔhi nɛ ngɛ a kpɛti tsuo maa ha hwɔ, nɛ a be nɔ́ ko nɔ́ ko tsue.

³⁰ Jamɛ a ligbi ɔ, a maa pee kusumi kɛ kpata Yawɛ ha mɛ kɛ tsukɔ a he kɛ je a he yayami ɔmɛ tsuo kulaa mi, konɛ a he nɛ tsɔ.

³¹ Jamɛ a ligbi ɔ maa pee Hejɔɔmi ligbi nɛ a be nɔ́ ko nɔ́ ko tsue; nɔ tsuaa nɔ maa ha hwɔ. Mlaa nɛ ɔmɛ fɔɔ si ha mɛ kɛ yaa neneene.

³² Osɔfo nɔkɔtɔma pe kulaa nɛ a pɔ lɛ nu, nɛ a tsukɔ e he, nɛ a wo lɛ osɔfo ngɛ e tsɛ nane mi ɔ nɛ wo osɔfo tade ɔmɛ, nɛ é pee kpatami kusumi ɔmɛ.

³³ E maa tsukɔ he klɔuklɔu pe kulaa a, kpe he bo tsu ɔ, bɔ sami la tɛ ɔ, osɔfo ɔmɛ, kɛ ma kpekpemi ɔ tsuo a he.

³⁴ Á ye mlaa nɛ ɔmɛ a nɔ kɛ ya neneene. Daa jeha a, a maa pee kusumi nɛ ɔ si kake kɛ kpata Mawu ha Israel bi ɔmɛ ngɛ a he yayami ɔmɛ a he. Mose pee kaa bɔ nɛ Yawɛ fa lɛ ɔ.