Mose III, 14 - BAIBLO ALOO NGMAMI KLƆUKLƆU Ɔ

He womi nɔ hiɔ yaya numi se he tsukɔmi

^1-2 Yawɛ wo Mose mlaa nɛ ɔmɛ nɛ tsɔɔ kusumi nɛ a pee kɛ tsukɔ nɔ ko nɛ nu he womi nɔ hiɔ yaya nɛ a tsa lɛ ɔ he. Ligbi nɛ a ma ha nɛ e le kaa e he tsɔ ɔ, a kɛ lɛ nɛ ba osɔfo ɔ ngɔ.

³ Osɔfo ɔ nɛ ngɔ lɛ kɛ je ma sito he ɔ, nɛ e ya hyɛ lɛ. Ke e na kaa hiɔ ɔ ta ngɛ nɔ ɔ he ɔ,

⁴ e fa nɛ a kɛ lohwe pɛlitsɛmɛ nɛ a he tsɔ enyɔ, seda tso, kɔjai, kɛ nga nɛ a fi kɛ bla kaa bɛ nɛ ba.

⁵ Osɔfo ɔ nɛ fa nɛ a gbe lohwe pɛlitsɛ ɔ kake ngɛ zu buɛ nɛ nyu mua ngɛ mi nɔ,

⁶ konɛ e ngɔ lohwe pɛlitsɛ hɛngmengmletsɛ ɔ, seda tso ɔ, kɔjai ɔ, kɛ nga nɛ a fi kɛ bla kaa bɛ ɔ, nɛ e kɛ sɔ lohwe pɛlitsɛ nɛ a gbe ɔ ngɛ nyu mua nɔ ɔ muɔ ɔ mi.

⁷ Jehanɛ, é fĩa muɔ ɔ si kpaago kɛ pue nɔ nɛ nu he womi nɔ hiɔ yaya nɛ ma e he tsukɔmi ɔ nɔ, nɛ é ha nɛ e le kaa e he tsɔ. Lɔ ɔ se ɔ, é ngmɛɛ lohwe hɛngmengmletsɛ ɔ he nɛ é te kɛ ho nga mi ya.

⁸ Enɛ ɔ se ɔ, nɔ nɛ ma e he tsukɔmi ɔ nɛ fɔ e tade ɔmɛ a he, nɛ é sɛ e he bwɔmi tsuo, nɛ é du e he; kɛkɛ e he ma tsɔ. E ma nyɛ maa ba ma sito he ɔ, se e be e bo tsu ɔ mi hwɔe; e maa hi e bo tsu ɔ se ligbi kpaago.

⁹ Ligbi kpaagone ɔ, nɔ ɔ nɛ sɛ e yi kpalokpalo; é sɛ e kpɛni kɛ e hɛngmɛ se bwɔmi, kɛ e he bwɔmi tsuo kulaa. Enɛ ɔ se ɔ, é fɔ e tade ɔmɛ a he, nɛ é du e he, kɛkɛ e he ma tsɔ.

¹⁰ Ligbi nɛ ji kpaanyɔ ɔ, é ngɔ agbosu enyɔ nɛ kpa ko be a he, kɛ jijɔ yo nɛ ye jeha kake, nɛ lɛ hu kpa ko be e he, kɛ níye ní bɔ mamu bukɔbukɔ kilo etɛ nɛ a kɛ nu futu mi, kɛ nu lita fa kɛ ba.

¹¹ Osɔfo ɔ nɛ maa tsukɔ nɔ ɔ he ha lɛ ɔ nɛ ngɔ lɛ, kɛ e ní ɔmɛ tsuo kɛ ba Yawɛ hɛ mi ngɛ kpe he bo tsu ɔ sinya a nya.

¹² Osɔfo ɔ nɛ ngɔ agbosu enyɔ ɔmɛ a ti kake kɛ piɛ nu lita fa a he kɛ ba kaa fɔ yemi bɔ, nɛ e ngɔ mɛ kɛ ba kaa bɔ nɛ a fɔɔ kɛ yaa kɛ baa ngɛ Yawɛ hɛ mi.

¹³ É gbe agbosu ɔ ngɛ he klɔuklɔu ɔ, he nɛ a gbee lohwe nɛ a kɛ sãã yayami pami bɔ, kɛ sami bɔ ngɛ ɔ. Ejakaa yayami pami bɔ ɔ, osɔfo ɔmɛ a nɔ́ kaa bɔ nɛ fɔ yemi bɔ ɔ ngɛ ɔ; e ngɛ klɔuklɔu saminya.

¹⁴ Osɔfo ɔ nɛ ngɔ lohwe nɛ a kɛ ba sã fɔ yemi bɔ ɔ e muɔ eko kɛ kpa nɔ nɛ ma e he tsukɔmi ɔ hiɔ nɔ tue nya lo, kɛ e hiɔ nine nguɛ gɔleku, kɛ e hiɔ nane nguɛ gɔleku he.

¹⁵ Jehanɛ, osɔfo ɔ nɛ plɛ nu ɔ eko kɛ wo lɛ nitsɛ e muɔ dɛ kɔkɔ mi.

¹⁶ É kɛ e hiɔ nine nguɛ kake nɛ sɔ nu ɔ mi, nɛ é fĩa si kpaago ngɛ Yawɛ hɛ mi.

¹⁷ É ngɔ nu ɔ nɛ ngɛ e dɛ mi ɔ eko nɛ e kɛ kpa nɔ nɛ ma e he tsukɔmi ɔ hiɔ nɔ tue nya lo, hiɔ nine nguɛ gɔleku, kɛ e hiɔ nane nguɛ gɔleku he. E ngɔ lohwe ɔ nɛ a kɛ ba sã fɔ yemi bɔ ɔ hu muɔ kɛ pee ja nɔuu.

¹⁸ Nu ɔ nɛ maa piɛ ngɛ osɔfo ɔ dɛ mi ɔ, e kɛ pue nɔ nɛ ma e he tsukɔmi ɔ yi mi. Ke nɔ ko nu he womi nɔ hiɔ yaya a, kusumi nɛ osɔfo ɔ maa pee kɛ kpata Yawɛ ha lɛ ji nɛ ɔ nɛ.

¹⁹ Jehanɛ, osɔfo ɔ nɛ sã yayami pami bɔ kɛ kpata Yawɛ ha nɔ nɛ ma e he tsukɔmi ɔ. Lɔ ɔ se ɔ, é gbe lohwe ɔ nɛ a kɛ maa sã sami bɔ ɔ.

²⁰ Osɔfo ɔ nɛ ngɔ sami bɔ ɔ, kɛ niye ní bɔ ɔ, nɛ e sã mɛ ngɛ bɔ sami la tɛ ɔ nɔ. Kusumi nɛ osɔfo ɔ maa pee kɛ kpata Yawɛ ha lɛ ji nɛ ɔ nɛ, kɛkɛ ɔ, e he ma tsɔ.

²¹ Ke ohiatsɛ ji nɔ ɔ, nɛ e be ní ɔmɛ tsuo nyɛe ma ha a, e ngɔ agbosu kake pɛ kɛ pee fɔ yemi bɔ, nɛ a fɔ kɛ ya kɛ ba ngɛ Yawɛ hɛ mi. Níhi nɛ e ngɔ kɛ piɛ he ji mamu bukɔbukɔ kilo kake, nɛ a kɛ nu futu mi ha niye ní bɔ, nu tɔ kake,

²² kɛ lahuɛ enyɔ, aloo beleku lahuɛ enyɔ. Kake maa pee yayami pami bɔ, nɛ kake hu maa pee sami bɔ.

²³ E he tsukɔmi be ɔ, ligbi kpaanyɔne ɔ nɔ ɔ, e ngɔ ní nɛ ɔmɛ kɛ ba ha osɔfo ɔ ngɛ Yawɛ hɛ mi ngɛ kpe he bo tsu ɔ sinya a nya.

²⁴ Osɔfo ɔ nɛ ngɔ agbosu ɔ nɛ a kɛ maa sã fɔ yemi bɔ ɔ, kɛ nu ɔ kɛ ba kaa bɔ nɛ a fɔɔ kɛ yaa kɛ baa ngɛ Yawɛ hɛ mi.

²⁵ Jehanɛ, é gbe agbosu ɔ, nɛ é ngɔ e muɔ ɔ eko kɛ kpa nɔ nɛ ma e he tsukɔmi ɔ hiɔ nɔ tue nya lo, kɛ e hiɔ nine nguɛ gɔleku, kɛ e hiɔ nane nguɛ gɔleku he.

²⁶ Enɛ ɔ se ɔ, osɔfo ɔ nɛ plɛ nu ɔ eko kɛ wo lɛ nitsɛ e muɔ nine dɛ kɔkɔ mi,

²⁷ nɛ e ngɔ e hiɔ nine nguɛ kake kɛ sɔ nu ɔ mi nɛ e fĩa si kpaago ngɛ Yawɛ hɛ mi.

²⁸ Osɔfo ɔ nɛ ngɔ nu nɛ ngɛ e dɛ mi ɔ eko kɛ kpa nɔ nɛ ma e he tsukɔmi ɔ hiɔ nɔ tue nya lo, e hiɔ nine nguɛ gɔleku, kɛ e hiɔ nane nguɛ gɔleku ɔmɛ a he kaa bɔ nɛ e kɛ muɔ ɔ pee ɔ.

²⁹ Nu nɛ maa piɛ ngɛ osɔfo ɔ dɛ mi ɔ, e kɛ pue nɔ ɔ nɛ a ngɛ e he tsukɔe ɔ yi mi. Kusumi nɛ osɔfo ɔ maa pee kɛ kpata Yawɛ ha lɛ ji nɛ ɔ nɛ.

³⁰ Jehanɛ e ngɔ lahuɛ ɔ kake, loo beleku lahuɛ ɔ kake

³¹ kɛ ba sã yayami pami bɔ, nɛ a kɛ kake ɔ hu nɛ sã sami bɔ kɛ piɛ niye ní bɔ ɔ he. Kusumi nɛ osɔfo ɔ maa pee kɛ kpata Yawɛ ha nɔ nɛ ma e he tsukɔmi ɔ ji nɛ ɔ nɛ.

³² Nɔ nɛ ngɛ he womi nɔ hiɔ yaya nue, nɛ be nyɛe ma ha ní ɔmɛ tsuo nɛ a kɛ maa pee kusumi kɛ tsukɔ e he ɔ, mlaa nɛ fɔɔ si ha lɛ ji nɛ ɔ nɛ.

Wehi nɛ a he fu ja

³³ Yawɛ ha Mose kɛ Aaron

³⁴ mlaa nɛ ɔmɛ nɛ kɔɔ wehi nɛ a he fu ja a he. Ke Israel bi ɔmɛ ya su zugba a nɛ Yawɛ ngɔ ha mɛ kaa a weto ní ɔ nɔ ɔ, mlaa nɛ sa kaa a ye nɔ ji nɛ ɔ nɛ.

³⁵ Nɔ tsuaa nɔ nɛ maa na nɔ́ ko nɛ fu ja ngɛ e we he ɔ, e ha nɛ osɔfo nɛ le.

³⁶ Osɔfo ɔ nɛ fa nɛ a je nɔ́ tsuaa nɔ́ kpo, loko e ya hyɛ he nɛ fu ja a, bɔ nɛ pee nɛ a ko bu nɔ́ tsuaa nɔ́ nɛ ngɛ we ɔ mi ɔ kaa e he tsɔ we. Ke a je ní ɔmɛ kpo ta a, osɔfo ɔ nɛ ya we ɔ mi

³⁷ nɛ e ya hyɛ he nɛ fu ja a. Ke e na nɔ́ tsu, loo nɔ́ nɛ hɛɛ ba mumu su nɛ ha si ngɛ gli ɔ he ɔ,

³⁸ osɔfo ɔ nɛ je lejɛ ɔ, nɛ e ha nɛ a nga we ɔ nya ligbi kpaago.

³⁹ Ligbi kpaagone ɔ, osɔfo ɔ nɛ kpale ya hyɛ ekohu. Ke e na kaa nɔ́ ɔ ha si ngɛ gli ɔ he ɔ,

⁴⁰ e fa nɛ a je tɛhi nɛ nɔ́ ɔ ngɛ a he ɔ kɛ je gli ɔ mi, nɛ a ya sake mɛ ngɔ pue kuku nɔ ngɛ ma a se.

⁴¹ Lɔ ɔ se ɔ, osɔfo ɔ nɛ ha nɛ a ngmla gli ɔ tsuo he ngɛ tsu ɔmɛ a mi, nɛ a bua zu ɔ nya kɛ ya pue he ngɛ kuku nɔ ngɛ ma a se.

⁴² Jehanɛ, á ngɔ tɛ kpahi kɛ tsi puɔ ɔmɛ, nɛ́ a ngɔ zu kpa kɛ kã gli ɔmɛ a he.

⁴³ Se ke a tsake tɛ ɔmɛ, nɛ a ngmla gli ɔ he, nɛ a kpale kã gli ɔmɛ a he, nɛ lɔ ɔ se a na kaa lejɛ ɔ fu ja ekohu ɔ,

⁴⁴ osɔfo ɔ nɛ kpale ya hyɛ ekohu. Ke e na kaa nɔ́ ɔ ha si ngɛ gli ɔ he ɔ, lɛɛ e ji nɔ́ yaya nɛ maa ye awi; we ɔ he tsɔ we.

⁴⁵ Osɔfo ɔ nɛ ha nɛ a ku we ɔ kɛ pue si nɛ a muɔ tɛ ɔmɛ, tso ɔmɛ, kɛ zu ɔ kɛ je ma a mi kɛ ya pue kuku nɔ.

⁴⁶ Nɔ tsuaa nɔ nɛ maa sɛ we ɔ mi, be mi nɛ a nga we ɔ nya a, e he be tsɔe kɛ yaa si du ma bu.

⁴⁷ Nɔ tsuaa nɔ nɛ maa hwɔ we ɔ mi, loo e maa ye ní ngɛ we ɔ mi ɔ, é fɔ e tade ɔmɛ a he.

⁴⁸ Se ke a kɛ zu kpa kã gli ɔ he, nɛ lɔ ɔ se osɔfo ɔ ba hyɛ, nɛ e nɛ nɔ́ ko ngɛ he ɔ, e ha nɛ a le kaa we ɔ he tsɔ; ejakaa a je nɔ́ nɛ fu ja a tsuo kɛ je gli ɔ mi.

⁴⁹ Osɔfo ɔ nɛ ngɔ lohwe pɛlitsɛ enyɔ, seda tso, kɔjai, kɛ nga nɛ a fi kɛ bla kaa bɛ kɛ ba, konɛ a kɛ julaa we ɔ.

⁵⁰ É gbe lohwe pɛlitsɛ ɔmɛ a ti kake ngɛ zu buɛ nɛ nyu mua ngɛ mi nɔ.

⁵¹ Jehanɛ, é ngɔ seda tso ɔ, nga nɛ a fi kɛ bla kaa bɛ ɔ, kɔjai ɔ, kɛ lohwe pɛlitsɛ hɛngmengmletsɛ ɔ, nɛ e kɛ sɔ lohwe pɛlitsɛ nɛ a gbe ɔ muɔ ɔ, kɛ nyu mua a mi, nɛ e kɛ fĩa we ɔ he si kpaago.

⁵² Bɔ nɛ e kɛ lohwe pɛlitsɛ ɔ muɔ, nyu mua a, lohwe pɛlitsɛ hɛngmengmletsɛ ɔ, seda tso ɔ, nga nɛ a fi kɛ bla kaa bɛ ɔ, kɛ kɔjai ɔ maa julaa we ɔ ji nɛ ɔ nɛ.

⁵³ Lɔ ɔ se ɔ, osɔfo ɔ nɛ ngmɛɛ lohwe pɛlitsɛ hɛngmengmletsɛ ɔ he nɛ e te kɛ ya nga mi. Kusumi nɛ e maa pee kɛ julaa we ɔ ji nɛ ɔ nɛ. Kɛkɛ ɔ, we ɔ he ma tsɔ.

⁵⁴ Mlaa nɛ ɔmɛ ngɛ kɛ ha he womi nɔ hiɔ yaya,

^55-56 sakpa, loo nɔfu nɔ́, loo tslɔɔ, he hami nɔ́ nɛ fu ja, loo we nɛ hiɔ yaya nɛ ɔ sɛ gli ɔ mi.

⁵⁷ Mlaa nɛ ɔmɛ tsɔɔ be mi nɛ nɔ́ ko he tsɔ we kɛ be mi nɛ nɔ́ ɔ he tsɔ.