Mose III, 13 - BAIBLO ALOO NGMAMI KLƆUKLƆU Ɔ

He womi nɔ hiɔ yaya he mlaahi

¹ Yawɛ wo Mose kɛ Aaron mlaa nɛ ɔmɛ.

² Ke nɔfu nɔ́ ko, aloo pa, loo loholoho ba nɔ ko he, nɛ́ ma nyɛ maa pee he womi nɔ hiɔ yaya a, a ngɔ hiɔtsɛ ɔ kɛ ba osɔfo ɔ, nɛ ji Aaron nina a ngɔ.

³ Osɔfo ɔ nɛ hyɛ e he womi ɔ he nɛ hiɔ ɔ ngɛ ɔ. Ke bwɔmi nɛ ngɛ lejɛ ɔ tsake pee futaa, nɛ lejɛ ɔ lo ɔ hu nɔ mi ɔ, lɛɛ e ji he womi nɔ hiɔ yaya. Ke osɔfo ɔ hyɛ lɛ ta a, e ma ha nɛ a le kaa nɔ ɔ he tsɔ we.

⁴ Se ke he womi ɔ nɔ he nɛ hiɔ ɔ ngɛ ɔ ngɛ futaa, nɛ ke a hyɛ ɔ, e nɔɛ lo mi, nɛ pohu bwɔmi ɔ be futaa hulɔ ɔ, osɔfo ɔ nɛ tsi hiɔtsɛ ɔ nya ligbi kpaago.

⁵ Ligbi kpaagone ɔ nɔ ɔ, osɔfo ɔ nɛ hyɛ lɛ ekohu. Ke osɔfo ɔ hyɛ nɛ e na kaa hiɔ ɔ hɛ́ si, se he kake ɔ kɛ̃ nɛ e ngɛ ɔ, e tsi e nya ligbi kpaago ekohu.

⁶ Ligbi nɛ ji kpaago ɔ, e hyɛ lɛ ekohu. Ke e na kaa he nɛ hiɔ ɔ ngɛ ɔ yu, nɛ hiɔ ɔ hɛ́ si ngɛ hiɔtsɛ ɔ he womi nɔ ɔ, osɔfo ɔ nɛ ha nɛ a le kaa hiɔtsɛ ɔ he tsɔ; ejakaa e ji nɔfu nɔ́ kɛkɛ. Hiɔtsɛ ɔ nɛ fɔ e tade ɔmɛ a he, kɛkɛ e he ma tsɔ.

⁷ Se ke osɔfo ɔ hyɛ lɛ nɛ e ha a le kaa e he tsɔ, nɛ pee se ɔ, nɔfu nɔ́ ɔ bɔni si hami ɔ, hiɔtsɛ ɔ nɛ ngɔ e he ba tsɔɔ osɔfo ɔ ekohu.

⁸ Ke osɔfo ɔ hyɛ lɛ, nɛ e na kaa nɔfu nɔ́ ɔ ha si ɔ, e ha nɛ a le kaa e he tsɔ we; he womi nɔ hiɔ yaya e ngɛ nue ɔ nɛ.

⁹ Ke nɔ ko ngɛ he womi nɔ hiɔ yaya nue ɔ, a ngɔ lɛ kɛ ba ha osɔfo ɔ,

¹⁰ nɛ e hyɛ lɛ. Ke e na nɔfu nɔ́ ko ngɛ e he womi nɔ, nɛ bwɔmi nɛ ngɛ lejɛ ɔ pee futaa, nɛ bua ba nɔfu nɔ́ ɔ mi ɔ,

¹¹ lɛɛ he womi nɔ hiɔ yaya nɛ se kɛ nɔ ɔ ngɛ nue ɔ nɛ. Osɔfo ɔ nɛ ha nɛ a nu sisi kaa e he tsɔ we. A ko tsi e nya; ejakaa e fɔɔ si paa kaa e he tsɔ we.

¹² Ke osɔfo ɔ na kaa hiɔ ɔ je kpo ngɛ e he womi nɔ, nɛ e ha hiɔtsɛ ɔ he womi nɔ kulaa kɛ je e yi je kɛ ya pue e nanewɛɛ ɔ,

¹³ e hyɛ lɛ ekohu. Ke e na nɔ́ ɔ kaa e ha e nɔmlɔ tso ɔ tsuo he ɔ, e ha nɛ hiɔtsɛ ɔ nɛ le kaa e he tsɔ. Ke e he womi ɔ tsuo pee futaa a, e he tsɔ ji lɔ ɔ nɛ.

¹⁴ Se ke pa he je kpo ngɛ e he womi ɔ nɔ ɔ, lɛɛ e he tsɔ we.

¹⁵ Osɔfo ɔ nɛ hyɛ nɔ ɔ pa he ɔ, e ha nɛ nɔ ɔ nɛ le kaa e he tsɔ we. Pa he ɔ nɛ je kpo ɔ tsɔɔ kaa he womi nɔ hiɔ yaya e ngɛ nue ɔ nɛ; nɔ ɔ he tsɔ we.

¹⁶ Ke pa a gbo, nɛ e he womi lo ɔ pee futaa ekohu ɔ, hiɔtsɛ ɔ nɛ kpale ba na osɔfo ɔ.

¹⁷ Osɔfo ɔ nɛ hyɛ lɛ ekohu. Ke e na kaa hiɔtsɛ ɔ he womi ɔ pee futaa a, e ha nɛ e le kaa e he tsɔ. E he tsɔ niinɛ.

¹⁸ Ke tslɔɔ pa doku ngɛ nɔ ko he womi nɔ,

¹⁹ nɛ nɔfu nɔ́ futaa, loo nɔ́ futaa nɛ tsutsuu su bɔɔ ngɛ mi je kpo ngɛ pa doku ɔ mi ɔ, e kɛ ya tsɔɔ osɔfo ɔ.

²⁰ Ke osɔfo ɔ hyɛ, nɛ e na kaa lejɛ ɔ nɔ lo mi, nɛ bwɔmi nɛ ngɛ lejɛ ɔ pee futaa a, e ha nɛ e le kaa e he tsɔ we; he womi nɔ hiɔ yaya nɛ́ je kpo ngɛ tslɔɔ mi nɔ ɔ ngɛ nue ɔ nɛ.

²¹ Se ke osɔfo ɔ hyɛ lɛ, nɛ e na kaa bwɔmi nɛ ngɛ lejɛ ɔ pee we futaa, nɛ e nɔɛ lo mi hulɔ, se nɔ́ ɔ fani ɔ, lɛɛ e tsi hiɔtsɛ ɔ nya ligbi kpaago.

²² Ke nɔfu nɔ́ ɔ ha si ngɛ e he womi ɔ nɔ ɔ, lɛɛ hiɔ ɔ e ngɛ nue ɔ nɛ; osɔfo ɔ nɛ ha nɛ e le kaa e he tsɔ we.

²³ Se ke nɔfu nɔ́ ɔ ngɛ he kake, nɛ e hɛ́ si ɔ, lɛɛ e ji tslɔɔ pa doku kɛkɛ; osɔfo ɔ nɛ ha nɛ nɔ ɔ nɛ le kaa e he tsɔ.

²⁴ Ke la sã nɔ ko nɛ e pee pa, nɛ pa a pee loholoho futaa, loo futaa nɛ tsutsuu bɔɔ ngɛ mi ɔ,

²⁵ osɔfo ɔ nɛ hyɛ lɛ. Ke e na kaa lejɛ ɔ nɔ lo mi, nɛ bwɔmi nɛ ngɛ loholoho ɔ mi ɔ pee futaa a, lɛɛ he womi nɔ hiɔ yaya lɛ je e he kpo ngɛ la pa a mi ɔ nɛ; osɔfo ɔ nɛ ha nɛ e le kaa e he tsɔ we.

²⁶ Ke osɔfo ɔ hyɛ nɔ ɔ, nɛ e na kaa bwɔmi nɛ ngɛ lejɛ ɔ pee we futaa, nɛ lejɛ ɔ nɔɛ lo mi hulɔ, se e fani ɔ, osɔfo ɔ nɛ tsi e nya ligbi kpaago.

²⁷ Osɔfo ɔ nɛ hyɛ lɛ ekohu ligbi kpaagone ɔ, nɛ ke e na kaa nɔ́ ɔ ngɛ si hae ngɛ e he womi ɔ nɔ ɔ, lɛɛ e ha nɛ e le kaa e he tsɔ we; ejakaa he womi nɔ hiɔ yaya e ngɛ nue ɔ nɛ.

²⁸ Ke nɔ́ ɔ ngɛ he kake, nɛ e hɛ́ si ngɛ e he womi ɔ nɔ, se e fani mohu ɔ, lɛɛ nɔfu nɔ́ nɛ je kpo ngɛ pa a mi ji lɔ ɔ nɛ. Osɔfo ɔ nɛ ha nɛ e le kaa e he tsɔ, ejakaa e ji la pa doku kɛkɛ.

²⁹ Ke nɔ́ ko pue nyumu ko, loo yo ko yi mi, loo e kpɛni he ɔ,

³⁰ osɔfo ɔ nɛ hyɛ. Ke he nɛ hiɔ ɔ ngɛ ɔ nɔ lo mi, nɛ bwɔmi nɛ ngɛ lejɛ ɔ hɛɛ kungwɔ zɔ su, nɛ e pee dleledlele ɔ, osɔfo ɔ nɛ ha nɛ e le kaa yi mi, loo kpɛni mi he womi nɔ hiɔ yaya nɛ plɛɛ nɔ e ngɛ nue ɔ nɛ; e he tsɔ we.

³¹ Se ke osɔfo ɔ hyɛ hiɔ ɔ, nɛ e na kaa lejɛ ɔ nɔɛ lo mi, nɛ bwɔmi yumu hu be mi ɔ, lɛɛ osɔfo ɔ nɛ tsi hiɔtsɛ ɔ nya ligbi kpaago.

³² Ligbi nɛ ji kpaago ɔ, e hyɛ hiɔtsɛ ɔ ekohu. Ke hiɔ ɔ hɛ́ si, nɛ bwɔmi nɛ hɛɛ kungwɔ zɔ su be mi, nɛ lejɛ ɔ hu nɔɛ lo mi ɔ,

³³ lɛɛ hiɔtsɛ ɔ nɛ sɛ lejɛ ɔ bwɔmi ɔ pɛ kɛ bɔle nɔ́ ɔ nɛ ngɛ lɛ plɛe ɔ. Osɔfo ɔ nɛ tsi hiɔtsɛ ɔ nya ligbi kpaago ekohu.

³⁴ Ligbi nɛ ji kpaago ɔ, osɔfo ɔ nɛ hyɛ hiɔ ɔ ekohu. Ke hiɔ ɔ hɛ́ si, nɛ e nɔɛ lo mi hulɔ ɔ, osɔfo ɔ nɛ ha nɛ hiɔtsɛ ɔ nɛ le kaa e he tsɔ. Hiɔtsɛ ɔ nɛ fɔ e tade ɔmɛ a he, kɛkɛ ɔ, e he ma tsɔ.

³⁵ Ke benɛ a ha nɛ e le kaa e he tsɔ se nɛ hiɔ ɔ bɔni si hami ɔ,

³⁶ osɔfo ɔ nɛ hyɛ lɛ ekohu. Ke e na kaa hiɔ ɔ ha si ɔ, osɔfo ɔ ko hao e he kaa e ma pa hla bwɔmi nɛ hɛɛ kungwɔ zɔ su nɛ e na; e fɔɔ si paa kaa hiɔtsɛ ɔ he tsɔ we.

³⁷ Se ke osɔfo ɔ ma nɔ mi kaa hiɔ ɔ ta, nɛ bwɔmi yumu puɛ ngɛ mi ɔ, lɛɛ hiɔ ɔ jɔ niinɛ, nɛ hiɔtsɛ ɔ he tsɔ. Osɔfo ɔ nɛ ha nɛ hiɔtsɛ ɔ nɛ le kaa e he tsɔ.

³⁸ Ke ngmo pue nyumu ko, loo yo ko he, nɛ e he womi ɔ pee huataa a,

³⁹ osɔfo ɔ nɛ hyɛ lɛ. Ke ngmo ɔ su ngɛ kaa la zu huataa a, lɛɛ e ji kó kɛkɛ nɛ je kpo ngɛ e he womi nɔ; nɔ ɔ he tsɔ.

⁴⁰ Ke bwɔmi ta nyumu yi mi ɔ, e yi mi kɛkɛ lɛ kpa; se e he tsɔ.

⁴¹ Ke bwɔmi ta nyumu hɛ nya a, e hɛ nya kɛkɛ lɛ kpa; se e he tsɔ. Ke nɔ́ ɔ tsuɔ, loo e hɛɛ ba mumu su ɔ, lɛɛ he womi nɔ hiɔ yaya lɛ pue e yi ɔ he nɛ kpa a nɛ.

⁴² Se ke nɔ́ ko futaa nɛ tsutsuu bɔɔ fia mi pue nɔ ɔ yi mi, loo e hɛ nya he nɛ kpa a, lɛɛ he womi nɔ hiɔ yaya lɛ je kpo ngɛ e yi ɔ mi, kɛ e hɛ nya he nɛ kpa a nɛ.

⁴³ Osɔfo ɔ nɛ hyɛ lɛ. Ke e na kaa nɔ́ nɛ pue nɔ ɔ yi mi, loo e hɛ nya a ngɛ futaa nɛ tsutsuu bɔɔ fia mi ɔ,

⁴⁴ osɔfo ɔ nɛ ha nɛ e le kaa e he tsɔ we; ejakaa he womi nɔ hiɔ yaya lɛ ngɛ e yi mi ɔ nɛ.

⁴⁵ Ke nɔ ko ngɛ he womi nɔ hiɔ yaya nue ɔ, é wo tade gbagbɛ, é ngmɛɛ e yi bwɔmi he kɛ pue e nɔ, e ha e nya nɔ, nɛ e hi ngmlaa kpae ke, “Ye he tsɔ we oo, ye he tsɔ we!”

⁴⁶ E he be tsɔe kɛ yaa si be nɛ e hiɔ ɔ maa ta; nɛ lɛ nɔ kake nɛ e maa hi si ngɛ ma sito he ɔ se.

Mlaahi nɛ kɔɔ nɔ́ nɛ fu ja he

⁴⁷ Ke he hami nɔ́ ko fu ja a, kuutu jio, kploba jio,

⁴⁸ bo nɛ a kɛ kuutu kpa, loo kploba kpa lo jio, lohwe he womi, loo nɔ́ ko nɛ a kɛ lohwe he womi pee jio,

⁴⁹ ke nɔ́ fu ja a tsuɔ, loo e hɛɛ ba mumu su ɔ, e maa pee kaa nɔ́ yaya lɛ ngɛ ja fue ngɛ he hami nɔ́ ɔ mi ɔ nɛ; a ngɔ kɛ ya tsɔɔ osɔfo ɔ.

⁵⁰ Osɔfo ɔ nɛ hyɛ nɔ́ ɔ, nɛ e tsi heha nɔ́ ɔ nya ligbi kpaago.

⁵¹ Ligbi kpaagone ɔ, osɔfo ɔ nɛ hyɛ nɔ́ ɔ ekohu. Ke nɔ́ fu ja a ha si ngɛ he hami nɔ́ ɔ mi ɔ lɛɛ e ji nɔ fu ja yaya, e he tsɔ we.

⁵² Osɔfo ɔ nɛ sã he hami nɔ́ ɔ. Hiɔ yaya ji nɔ́ nɛ sɛ nɔ́ ɔ mi ɔ nɛ; e hia kaa a sã.

⁵³ Se ke osɔfo ɔ hyɛ nɔ́ ɔ, nɛ e na kaa nɔ́ fu ja a hɛ́ si ngɛ he hami nɔ́ ɔ mi ɔ,

⁵⁴ e ha nɛ a fɔ he, nɛ e tsi nya ligbi kpaago ekohu.

⁵⁵ Osɔfo ɔ nɛ hyɛ nɔ́ ɔ; ke nɔ́ fu ja a su tsakee we, nɛ e hɛ́ si hulɔ ɔ, nɔ́ ɔ he tsɔ we; nyɛɛ sã. Nɔ́ ɔ hɛ mi nɛ fu ja a jio, e se mi jio, á sã.

⁵⁶ Se ke a fɔ nɔ́ ɔ he se, nɛ osɔfo ɔ hyɛ ekohu nɛ e na kaa nɔ́ nɛ sɛ mi ɔ ngɛ laae ɔ, e hia he nɛ fu ja a kɛ je nɔ́ ɔ he, he hami nɔ́ jio, lohwe he womi jio.

⁵⁷ Jehanɛ, ke nɔtsɛ ɔ na kaa nɔ́ ɔ ngɛ ja fue kɛ ngɛ si hae ngɛ he hami nɔ́, loo lohwe he womi ɔ mi kɛ mwɔɔ ɔ, a sã nɔ́ ɔ.

⁵⁸ Ke e fɔ nɔ́ ɔ he, nɛ e na kaa nɔ́ yaya a je mi pɛsɛɛ ɔ, e fɔ he ekohu si enyɔne, kɛkɛ ɔ, nɔ́ ɔ he ma tsɔ kulaa.

⁵⁹ Mlaa nɛ ɔ ngɛ kɛ ha nɔ́ fu ja ngɛ he hami ní nɛ ɔmɛ a mi: he hami nɔ́ nɛ a kɛ kuutu, loo kploba pee jio, bo nɛ a kɛ kuutu, loo kploba kpa lo jio, lohwe he womi, loo nɔ́ ko nɛ a kɛ lohwe he womi pee jio. Enɛ ɔ nɛ maa tsɔɔ kaa nɔ́ ɔ he tsɔ, loo e he tsɔ we.