Mose III, 11 - BAIBLO ALOO NGMAMI KLƆUKLƆU Ɔ

Lohwehi nɛ á ye

¹ Yawɛ wo mlaa nɛ ɔmɛ kɛ gu Mose kɛ Aaron nɔ kɛ ha

² Israel bi ɔmɛ. Lohwe nane eywiɛɛywiɛtsɛmɛ nɛ nyɛ ma nyɛ maa ye ji nɛ ɔmɛ nɛ.

³ Lohwe tsuaa lohwe nɛ a gba e nane koklotohi a mi, nɛ e gɔleɔ nɔ́ nɛ e ye ɔ nɛ e kpaleɔ taa ekohu ɔ, nyɛ ma nyɛ maa ye.

^4-6 Se nyɛ ko ye enɛ ɔmɛ: afukpɔngɔ, tɛ sa nɔ kpi, kɛ alɔngɔ, ejakaa a gɔleɔ nɔ́ nɛ a ye ɔ nɛ a kpaleɔ taa ekohu lɛɛ, se a gba we a nane kokloto mi, lɔ ɔ he ɔ, a he tsɔ we.

⁷ Nyɛ ko ye kpotoo, e he tsɔ we, ejakaa a gba e nane kokloto mi lɛɛ, se e gɔle we nɔ́ nɛ e ye ɔ nɛ e ta ekohu.

⁸ Nyɛ ko ye lohwe nɛ ɔmɛ, nɛ nyɛ ko ta a gbogboe he hulɔ; a he tsɔ we.

⁹ Nyɛ ma nyɛ maa ye lo nɛ ɔmɛ: lo tsuaa lo nɛ ngɛ se ngmo kɛ toto.

¹⁰ Se nɔ́ tsuaa nɔ́ nɛ wami ngɛ e mi ngɛ wo loo pa mi, nɛ e be se ngmo kɛ toto ɔ, nyɛ ko ye.

¹¹ A he tsɔ we; lɔ ɔ he ɔ, nyɛ ko ye, nɛ nyɛ ko ta a gbogboe he hulɔ.

¹² Nɔ́ tsuaa nɔ́ nɛ ngɛ nyu mi nɛ wami ngɛ e mi, se e be se ngmo kɛ toto ɔ, nyɛ ko ye; a he tsɔ we.

^13-19 Nyɛ ko ye lohwe pɛlitsɛmɛ kɛ a henɔ nɛ ɔmɛ: kɔle, okpoku, pa nɔ kɔle, kayo, kɔɔkɔmite, duguma, anuma, nyɔ mi kayo, klomi, nga mi kpakpahe, pa nɔ kayo, omiɔhɔɔ, kpokukpoku, godo, kɔne, loo apani.

²⁰ Nyɛ ko ye lohwe tsɔwi nane eywiɛtsɛmɛ nɛ tee,

²¹ ja ní nɛmɛ nɛ tuu ɔ.

²² Nyɛ ma nyɛ maa ye baalɛ, apã, adodo, kɛ a henɔ ɔmɛ.

²³ Se lohwe tsɔwi nane eywiɛtsɛmɛ nɛ tee kpahi ɔ, nyɛ ko ye; a he tsɔ we.

^24-28 Nɔ tsuaa nɔ nɛ maa ta lohwe nɛ ɔmɛ eko gbogboe he ɔ, e he be tsɔe kɛ yaa si du ma bu: lohwehi tsuo nɛ a gba we a nane kokloto mi, nɛ a gɔle we nɔ́ nɛ a ye ɔ nɛ a ta ekohu, kɛ lohwe nane eywiɛɛywiɛtsɛmɛ nɛ be kokloto, se a nyɛɛ ngɛ a nine a nɔ ɔ, mɛ tsuo a he tsɔ we. Nɔ tsuaa nɔ nɛ maa ta eko gbogboe he ɔ bleɔ e he. Ke nɔ ko ble e he ja a, é fɔ e tade ɔmɛ a he; se kɛ ɔ, e he be tsɔe kɛ yaa si du ma bu.

²⁹ Lohwehi nɛ sãã si ngɛ zugba a nɔ nɛ a he tsɔ we ha nyɛ ji kɔkɔbo, kɔkue, ve, kɛ e henɔ ɔmɛ,

³⁰ tsunyɛ, nyaka, akɔtɔku, angmlɔ, kɛ akpasi.

³¹ A he tsɔ we, lɔ ɔ he ɔ, nɔ tsuaa nɔ nɛ maa ta eko gbogboe he ɔ, e he be tsɔe kɛ yaa si du ma bu.

³² Nɔ́ tsuaa nɔ́ nɛ lohwe nɛ ɔmɛ eko gbogboe maa sa he ɔ, e he be tsɔe; tso a kɛ pee nɔ ɔ jio, bo jio, lohwe he womi jio, kotoku jio, nɔ́ saisaa jio. Á kɛ nyu nɛ fɔ he, se nɔ́ ɔ he be tsɔe kɛ yaa si du ma bu.

³³ Ke lohwe nɛ ɔmɛ eko gbogboe ko ya nɔ buɛ mi ɔ, e bleɔ nɔ́ tsuaa nɔ́ nɛ ngɛ buɛ ɔ mi ɔ; lɔ ɔ he ɔ, á ywia buɛ ɔ.

³⁴ Ke buɛ nɛ ɔ mi nyu ɔ eko pue niye ní ko nɔ ɔ, niye ní ɔ he be tsɔe. Nɔ́ tsuaa nɔ́ nɛ a nuu nɛ ngɛ kikɛmɛ a buɛ ɔ mi ɔ he be tsɔe.

³⁵ Jehanɛ, nɔ́ tsuaa nɔ́ nɛ kikɛmɛ a lohwe nɛ ɔmɛ eko gbogboe maa nɔ nɔ ɔ, nɔ́ ɔ he be tsɔe, la tɛ jio, flɔɔnɔɔ jio, á ywia nɔ́ ɔ wɔtsɔwɔtsɔ.

³⁶ Ke lohwe nɛ ɔmɛ eko gbogboe ya nɔ nyu hɛngmɛ, loo nyu nɔ́ ko mi ɔ, nyu ɔ he tsɔ; se nɔ́ tsuaa nɔ́ nɛ maa sa a gbogboe he ɔ he tsɔ we.

³⁷ Ke lohwe gbogboe ɔ he ko nɔ wu nɛ a yaa du nɔ ɔ, e be wu ɔ blee,

³⁸ se ke a wo wu ɔ nyu nɛ lohwe gbogboe nɔ nɔ ɔ, e bleɔ lɛ.

³⁹ Jehanɛ, ke lohwehi nɛ a yeɔ ɔ eko gbo ɔ, nɔ nɛ maa ta e gbogboe ɔ he ɔ, e he be tsɔe kɛ yaa si du ma bu.

⁴⁰ Ke nɔ ko ye lo nɛ ɔ eko ɔ, é fɔ e tade ɔmɛ a he. Se lɛ nitsɛ lɛɛ e he be tsɔe kɛ yaa si du ma bu. Nɔ tsuaa nɔ nɛ maa kɛ̃ e gbogboe ɔ bleɔ e he; ke nɔ ko ble e he ja a, nɔ ɔ nɛ fɔ e tade ɔmɛ a he, se e he be tsɔe kɛ yaa si du ma bu.

⁴¹ Lohwehi nɛ sãã si ɔ, a he tsɔ we; nyɛ ko ye.

⁴² Ke a sãã si ngɛ a mi nɔ jio, a nane eywiɛ nɔ jio, a nane babauu nɔ jio, nyɛ ko ye; a he tsɔ we.

⁴³ Nyɛ ko ta lohwehi nɛ sãã si ɔ eko he. Ke nyɛ pee ja a, nyɛ bleɔ nyɛ he, nɛ nyɛ he tsɔ we.

⁴⁴ Imi ji Yawɛ, nyɛ Mawu ɔ nɛ. Nyɛɛ pee nyɛ he klɔuklɔu; ejakaa Nɔ Klɔuklɔu ji mi. Lɔ ɔ he ɔ, lohwehi nɛ sãã si ɔ, nyɛ ko ngɔ ekoeko kɛ ble nyɛ he.

⁴⁵ Imi ji Yawɛ. Imi nɛ I je nyɛ kɛ je Egipt zugba a nɔ, konɛ ma ba pee nyɛ Mawu. Lɔ ɔ he ɔ, nyɛɛ pee nyɛ he klɔuklɔu; ejakaa Nɔ Klɔuklɔu ji mi.

⁴⁶ Lɔ ɔ he ɔ, lohwe nane eywiɛɛywiɛtsɛmɛ, lohwe pɛlitsɛmɛ, kɛ adebɔ níhi tsuo nɛ ngɛ nyu mi, kɛ adebɔ níhi tsuo nɛ sãã si ngɛ zugba a nɔ ɔ, mlaa nɛ kɔɔ a he ji nɛ ɔmɛ nɛ.

⁴⁷ Mlaa nɛ ɔ tsɔɔ slɔɔto nɛ ngɛ lohwehi nɛ a he tsɔ, kɛ lohwehi nɛ a he tsɔ we a kpɛti, kɛ slɔɔto nɛ ngɛ lohwehi nɛ a yeɔ, kɛ lohwehi nɛ a yi a kpɛti.