Mose III, 10 - BAIBLO ALOO NGMAMI KLƆUKLƆU Ɔ

Nadab kɛ Abihu pee yayami

¹ Aaron binyumuhi, Nadab kɛ Abihu a ti nɔ tsuaa nɔ ngɔ e ngɛyu, nɛ e je la ngɔ wo mi, nɛ e ngɔ tsopa kɛ e he via ngɔ pue nɔ, nɛ e kɛ ba Yawɛ hɛ mi; se la nɛ ɔ he tsɔ we, ejakaa Yawɛ fa we mɛ ke a pee ja.

² Tlukaa a, la je Yawɛ ngɔ ba sã mɛ, nɛ a gbo ngɛ lejɛ ɔ.

³ Kɛkɛ nɛ Mose de Aaron ke, “Enɛ ɔ ji nɔ́ nɛ Yawɛ de ɔ nɛ. E ke, ‘Nihi nɛ hɛ mɛ kɛ su ye he ɔ, ma tsɔɔ mɛ bɔ nɛ i ngɛ klɔuklɔu ha, nɛ a maa wo ye hɛ mi nyami ngɛ ma a tsuo hɛ mi.’ ” Se Aaron de we nɔ́ ko.

⁴ Mose tsɛ Aaron tsɛ nyɛminyumu Uziel bimɛ, Mishael kɛ Elzafan kɛ ba, nɛ e de mɛ ke, “Nyɛɛ ba hiɛ ɔ nɛ nyɛ ba muɔ nyɛ nyɛmimɛ ɔmɛ kɛ je he klɔuklɔu ɔ kɛ ho ma a sito he ɔ se ya.”

⁵ A ba muɔ mɛ kɛ a he tade ɔmɛ kɛ ho ma sito he ɔ se ya kaa bɔ nɛ Mose de mɛ ɔ.

⁶ Lɔ ɔ se ɔ, Mose de Aaron kɛ e binyumu ɔmɛ, Eleazar kɛ Itamar ke, “Nyɛ ko ngmɛɛ nyɛ yi bwɔmi he kɛ pue nyɛ nɔ, nɛ nyɛ ko hía nyɛ tadehi ngɛ nyɛ he hulɔ kɛ tsɔɔ kaa nyɛ ngɛ kɔmɔ yee. Ke nyɛ pee ja a, nyɛ ma gbo, nɛ Yawɛ mi mi ma fu ma a tsuo. Se nyɛ nyɛmimɛ ɔmɛ, kɛ Israel we ɔ tsuo kulaa ma nyɛ maa ye kɔmɔ nɛ a nyɛ ya ha gbogboe ɔmɛ nɛ Yawɛ la sã a.

⁷ Nyɛ ko je kpe he bo tsu ɔ sinya a nya kɛ ya he ko. Ke nyɛ pee ja a, nyɛ ma gbo; ejakaa a kɛ Yawɛ nu pɔ nyɛ.” Lɔ ɔ he ɔ, a pee kaa bɔ nɛ Mose de ɔ.

Mlaa nɛ a wo osɔfo ɔmɛ

⁸ Yawɛ kɛ Aaron tu munyu, nɛ e de lɛ ke,

⁹ “O kɛ o binyumu ɔmɛ nyɛ ti nɔ ko nɔ ko kó nu wai, loo dã nɛ nya wa kɛ ya kpe he bo tsu ɔ mi. Ke nyɛ pee ja a, nyɛ ma gbo. Enɛ ɔ maa pee mlaa nɛ fɔɔ si ha nyɛ kɛ yaa neneene.

¹⁰ Nyɛɛ le slɔɔto nɛ ngɛ nɔ́ klɔuklɔu, kɛ nɔ́ gu a kpɛti, nɔ́ nɛ he tsɔ, kɛ nɔ́ nɛ he tsɔ we.

¹¹ Nyɛɛ tsɔɔ Israel bi ɔmɛ mlaa amɛ tsuo kulaa nɛ́ imi Yawɛ, i wo mɛ kɛ gu Mose nɔ ɔ.”

¹² Jehanɛ, Mose de Aaron kɛ e binyumuhi enyɔ ɔmɛ nɛ piɛ, nɛ ji Eleazar kɛ Itamar ke, “Niye ní bɔhi nɛ a kɛ la sãã ha Yawɛ ɔ, nyɛɛ ngɔ nɔ́ nɛ piɛ ɔ; nyɛ ko wo mi masa nɛ nyɛɛ ye ngɛ bɔ sami la tɛ ɔ kasa nya, ejakaa e he tsɔ saminya.

¹³ Nyɛɛ ye ngɛ he ko nɛ ngɛ klɔuklɔu, ejakaa bɔhi nɛ a kɛ la sãã kɛ haa Yawɛ ɔ, nyɛɛ nyɛ blɔ fami nɔ́ nɛ Yawɛ to ji lɔ ɔ nɛ.

¹⁴ Se lohwe ɔ gugue nɛ a fɔɔ, kɛ fiɔ ɔ nɛ a woɔ nɔ́ ɔ, o kɛ o binyumu ɔmɛ, kɛ o biyi ɔmɛ nɛ ye ngɛ he ko nɛ tsɔ; ejakaa tue mi jɔmi bɔ ɔmɛ nɛ Israel bi ɔmɛ ba sãã a, o kɛ o bimɛ ɔmɛ nyɛ blɔ fa mi nɔ́ ji lɔ ɔ nɛ.

¹⁵ Fiɔ ɔ, kɛ gugue ɔ nɛ a fɔɔ kɛ yaa kɛ baa ngɛ Yawɛ hɛ mi ɔ, á ngɔ kɛ piɛ zɔ ɔ nɛ a kɛ la sãã a he kɛ ba kaa bɔ nɛ a fɔɔ kɛ yaa kɛ baa ngɛ Yawɛ hɛ mi. Fiɔ ɔ, kɛ gugue ɔ maa pee o kɛ o binyumu ɔmɛ nyɛ nɔ́ kɛ yaa neneene kaa bɔ nɛ Yawɛ fa a.”

¹⁶ Enɛ ɔmɛ tsuo a se ɔ, Mose hla mi fitsofitso konɛ e le nɔ́ ko ngɛ apletsi ɔ nɛ a kɛ maa sã yayami pami bɔ ɔ he. Benɛ e na le kaa a sã lɛ momo ɔ, e mi mi fu Eleazar kɛ Itamar, Aaron bimɛ ɔmɛ nɛ piɛ ɔ, nɛ e bi mɛ ke,

¹⁷ “Mɛni he je nɛ nyɛ yi yayami pami bɔ ɔ ngɛ he klɔuklɔu ɔ? Nyɛ li kaa e ji nɔ́ ko nɛ ngɛ klɔuklɔu, nɛ Mawu kɛ ha nyɛ nɛ nyɛ kɛ je ma a he yayami kɛ kpata Yawɛ kɛ ha mɛ lo?

¹⁸ Nɛ nyɛ ngɔɛ e muɔ ɔ kɛ yɛ he klɔuklɔu ɔ, jinɛ e sa kaa nyɛɛ ye bɔ sami ní ɔ ngɛ he klɔuklɔu ɔ kɛkɛ kaa bɔ nɛ i fa nyɛ ɔ.”

¹⁹ Aaron he nɔ ke, “O nɛ, mwɔnɛ ɔ, ma a ngɔ a he yayami pami bɔ ɔ, kɛ a sami bɔ ɔ ba ha Yawɛ, nɛ nɔ́ nɛ ba ye nɔ ji nɛ ɔ nɛ! Kaa i ye yayami pami bɔ nɛ ɔ eko mwɔnɛ ɔ, e ko sa Yawɛ hɛ mi lo?”

²⁰ Benɛ Mose nu munyu nɛ ɔ, munyu ɔ da ha lɛ.