Mose II, 9 - BAIBLO ALOO NGMAMI KLƆUKLƆU Ɔ

Aja ba

¹ Yawɛ de Mose ke, “Yaa Farao ɔ ngɔ nɛ o ya de lɛ ke bɔ nɛ Yawɛ, Hebri bi ɔmɛ a Mawu ɔ de ji nɛ ɔ nɛ: ‘Ha ye ma a nɛ ho nɛ a ya ja mi.

² Ke o kplɛɛ we nɛ a ho, nɛ o tsi a nya kɛ mwɔɔ ɔ,

³ lɛɛ imi Yawɛ, i kɛ ye he wami maa ta o lohwe ɔmɛ a he ngɛ a hi he ɔmɛ, nɛ ma ha nɛ aja nɛ nya wa maa sɛ okpɔngɔ ɔmɛ, teji ɔmɛ, afukpɔngɔ ɔmɛ, na amɛ, kɛ to ɔmɛ a kpɛti.

⁴ Ma gba Israel bi ɔmɛ kɛ Egipt bi ɔmɛ a lohwe ɔmɛ a mi, nɛ Israel bi ɔmɛ a ní ɔmɛ lɛɛ ekoeko be gboe.

⁵ Nɛ imi, Yawɛ, be nɛ i to nɛ ma kɛ tsu nɔ́ nɛ ɔ ngɛ zugba a nɔ ji hwɔɔmɛ a je hwɔɔ.’ ”

⁶ E nɔ jena a, Yawɛ pee kaa bɔ nɛ e de ɔ. Egipt bi ɔmɛ a lohwe ɔmɛ tsuo gbo; se Israel bi ɔmɛ a ní ɔmɛ lɛɛ kake ngmelu po gbo we.

⁷ Nɛ benɛ Farao ɔ tsɔ nɛ a ya hyɛ ɔ, a na kaa Israel bi ɔmɛ a lohwe kake po gbo we. Se Farao ɔ kplii e tsui, nɛ e ha we nɛ Israel bi ɔmɛ nɛ a ya.

Tslɔɔ fuu ni ɔmɛ

⁸ Yawɛ de Mose kɛ Aaron ke, “Nyɛɛ ya nɛ nyɛ ya je la zu dɛ mamɛ kakaaka ngɛ flɔɔnɔɔ mi, nɛ Mose nɛ fɔ kɛ ya hiɔwe ngɛ Farao ɔ hɛ mi;

⁹ nɛ e maa pee kaa ahlabata bunyuku ngɛ Egipt kɔɔhiɔ mi tsuo. Nɛ enɛ ɔ ma plɛ tslɔɔ nɛ sa, nɛ e ngɛ pãe ngɛ nimli, kɛ we mi lohwehi tsuo a he.”

¹⁰ Kɛkɛ nɛ a ya je flɔɔnɔɔ mi la zu nɛ a kɛ ba Farao ɔ ngɔ. Mose fia la zu ɔ kɛ mane hiɔwe, nɛ e plɛ pee tslɔɔ nɛ pã ngɛ nimli, kɛ we mi lohwehi a he.

¹¹ Tslɔɔ ɔ he je ɔ, wɔnɔ ɔmɛ nyɛ we Mose hɛ mi nɛ a da; ejakaa tslɔɔ ɔ fuu wɔnɔ ɔmɛ kɛ Egipt bi ɔmɛ tsuo kulaa.

¹² Se Yawɛ ha nɛ Farao ɔ kplii e tsui, nɛ kaa bɔ nɛ e de Mose ɔ, Farao ɔ bui mɛ tue fɛɛ.

Gbiɛ ngo ngu

¹³ Kɛkɛ nɛ Yawɛ de Mose ke, “Hwɔɔ mɔtu mla a, yaa Farao ɔ ngɔ nɛ o ya de lɛ ke bɔ nɛ Yawɛ, Hebri bi ɔmɛ a Mawu ɔ de ji nɛ ɔ nɛ: ‘Ha ye ma a nɛ ho konɛ a ya ja mi.

¹⁴ Jehanɛ ɔ lɛɛ i be o tsɔli ɔmɛ, kɛ o ma a kɛkɛ tue gblae; se mohu ma ha nɛ nɔ́ nami ɔ maa sa mo nitsɛ hu o he, konɛ o le kaa nɔ ko nɔ ko be nɛ e kɛ mi sɔ ngɛ je ɔ mi tsuo.

¹⁵ Jinɛ be nɛ ɔ mi ɔ, i kɛ gbenɔ hiɔ sa o kɛ o ma a he momo; nɛ jinɛ a je mo kɛ je je ɔ mi momo.

¹⁶ Se i ha nɛ o ngɛ je mi, bɔ nɛ pee nɛ ma je ye he wami kpo ngɔ tsɔɔ mo, konɛ a wo ye biɛ ta ngɛ je ɔ mi tsuo.

¹⁷ Akɛnɛ o ngɛ o he nɔ woe ngɛ ye ma a nɔ kɛ mwɔɔ, nɛ o ngmɛɛ we a he nɛ a ya he je ɔ,

¹⁸ hwɔɔ maa pee be nɛ ɔ mi ɔ, ma ha gbiɛ ngo ngu maa nɛ bɔ nɛ a nɛ eko ngɛ Egipt hyɛ kɛ je be nɛ a to ma a sisi kɛ ba si mwɔnɛ ɔ.

¹⁹ Lɔ ɔ he ɔ, moo tsɔ nɛ a ya tsɔ̃ o lohwehi tsuo ngɛ a lɛmi he ɔmɛ kɛ wo tsu mi; ejakaa gbiɛ ngo ngu ɔ maa nɛ ngɔ pue nɔmlɔ tsuaa nɔmlɔ, kɛ lohwe tsuaa lohwe nɛ ngɛ nga nɔ ɔ a nɔ, nɛ a ma gbo.’ ”

²⁰ Farao ɔ tsɔli ɔmɛ a ti ni nɛmɛ nɛ ya ye Yawɛ munyu ɔ gbeye ɔ ha nɛ a nyɔguɛ ɔmɛ, kɛ a lohwe ɔmɛ tu fo kɛ ba we mi.

²¹ Se ni nɛmɛ nɛ bui Yawɛ munyu ɔ, mɛɛ lɛɛ a si a nyɔguɛ ɔmɛ, kɛ a lohwe ɔmɛ ngɛ nga nɔ.

²² Kɛkɛ nɛ Yawɛ de Mose ke, “Mo wo o nine kɛ tsɔɔ hiɔwe, nɛ gbiɛ ngo ngu nɛ́ nɛ kɛ pue zugba a tsuo nɔ, kɛ pue nimli, lohwehi, kɛ nga nɔ tsohi a nɔ.”

²³ Kɛkɛ nɛ Mose wo e tso ɔ nɔ ngɔ tsɔɔ hiɔwe, nɛ Yawɛ ha nɛ hiɔwe si, nɛ gbiɛ ngo ngu nɛ, nɛ oslabai gba kɛ ba na zugba a. Bɔ nɛ Yawɛ ha gbiɛ ngo ngu nɛ kɛ pue Egipt zugba a nɔ ji nɛ ɔ nɛ.

²⁴ Benɛ gbiɛ ngo ngu ɔ ngɛ nɛe ɔ, oslabai hu ngɛ la pãe plamplam. Gbiɛ ngo ngu nɛ́ nɛ ɔ, a nɛ e nya wami ɔ eko hyɛ ngɛ Egipt zugba a nɔ tsuo kɛ je be nɛ a to ma a sisi.

²⁵ Nɔ́ tsuaa nɔ́ nɛ ngɛ nga a nɔ ɔ, nimli jio, tsohi jio, gbiɛ ngo ngu ɔ kpata kulaa hɛ mi pɛsɛpɛsɛ. Zugba a nɔ bahi kulaa gbo, nɛ tso ɔmɛ kulaa ku pue si.

²⁶ Se Goshen zugba a nɔ he nɛ Israel bi ɔmɛ ngɛ ɔ lɛɛ gbiɛ ngo ngu kake po nɔɛ lejɛ ɔ.

²⁷ Kɛkɛ nɛ Farao ɔ tsɔ nɛ a ya tsɛ Mose kɛ Aaron kɛ ba, nɛ e de mɛ ke, “Jehanɛ lɛɛ i pee yayami; Yawɛ nɔ́ da, se i kɛ ye ma a, wa tɔ̃.

²⁸ Nyɛ kpa Yawɛ pɛɛ! Hiɔwe simi kɛ gbiɛ ngo ngu nɛmi nɛ ɔ ba hiɛ. Ma ngmɛɛ nyɛ he nɛ nyɛɛ ho; i be nyɛ nya tsie hu.”

²⁹ Mose de lɛ ke, “Ke i je ma a mi pɛ ma wo ye nine nɔ ngɔ tsɔɔ Yawɛ. Hiɔwe simi ɔ se maa po, nɛ gbiɛ ngo ngu ɔ be nɛe hu, konɛ o na nɛ o le kaa Yawɛ nɔ́ ji je ɔ nɛ.

³⁰ Se i le kaa o kɛ o tsɔli ɔmɛ ɔ, nyɛ na we nɛ nyɛɛ ye Yawɛ Mawu ɔ gbeye lolo.”

³¹ Nɛ́ pee ja a, doti, kɛ ngma nɛ a du kɛ sɛ hlami ɔ kulaa hɛ mi kpata; ejakaa jamɛ a ngma a je deke, nɛ doti ɔ hu gba mɔmɔ.

³² Se ngma kpa a lɛɛ nɔ́ ko nɔ́ ko pee we lɛ; ejakaa a kpɛ se kɛ du lɔ ɔ.

³³ Jehanɛ ɔ, Mose si Farao ɔ, nɛ e je ma a mi, nɛ e wo e nine nɔ, nɛ e fa kue ha Yawɛ. Kɛkɛ nɛ hiɔwe simi ɔ, kɛ gbiɛ ngo ngu nɛmi ɔ se po, nɛ hiɔmi ɔ hu kpa.

³⁴ Se benɛ Farao ɔ na kaa hiɔmi ɔ, gbiɛ ngo ngu ɔ, kɛ hiɔwe simi ɔ se po ɔ, e ya nɔ nɛ e pee yayami; nɛ e kɛ e tsɔli ɔmɛ kplii a tsui.

³⁵ Farao ɔ kplii e tsui, nɛ kaa bɔ nɛ Yawɛ gu Mose nɔ de to ɔ, e ha we nɛ Israel bi ɔmɛ nɛ a ya.