Mose II, 6 - BAIBLO ALOO NGMAMI KLƆUKLƆU Ɔ

¹ Kɛkɛ nɛ Yawɛ de Mose ke, “Kpaako loko o maa na nɔ́ nɛ ma pee Farao ɔ, ejakaa lɛ nitsɛ e kɛ e he wami maa fie Israel bi ɔmɛ kɛ maa je e zugba a nɔ.”

Mawu tsɛ Mose

² Mawu kɛ Mose tu munyu nɛ e de lɛ ke, “Imi ji Yawɛ ɔ nɛ.

³ I je ye he kpo tsɔɔ Abraham, Isak, kɛ Yakob kaa Mawu Ope; se ye biɛ Yawɛ ɔ lɛɛ i ha we nɛ a le.

⁴ Jehanɛ se hu, i kɛ mɛ so kaa Kanaan zugba a nɛ a ya to nubwɔ ngɛ nɔ ɔ, ma ngɔ kɛ ha mɛ.

⁵ Jehanɛ hu, bɔ nɛ Israel bi ɔmɛ ngɛ awe nyae ɔ, i nu, nɛ i kai ye somi ɔ.

⁶ Lɔ ɔ he ɔ, yaa nɛ o ya de Israel bi ɔmɛ ke, ‘Imi ji Yawɛ; ma je Egipt bi ɔmɛ a tlomi ɔmɛ kɛ je nyɛ nɔ, nɛ ma kpɔ nyɛ kɛ je a nyɔguɛ yemi ɔ sisi. Ma kpã ye nine mi kɛ he wami, nɛ ma ye dami sane ha nyɛ, nɛ ma kɛ kpɔ nyɛ.

⁷ Ma ngɔ nyɛ kɛ pee imi nitsɛ ye ma, nɛ ma pee nyɛ Mawu; nɛ nyɛ maa le kaa imi ji Yawɛ Mawu, nɔ nɛ je Egipt bi ɔmɛ a tlomi ɔmɛ kɛ je nyɛ nɔ ɔ.

⁸ Ma ngɔ nyɛ kɛ ya zugba nɛ i wo si kaa i kɛ ma ha Abraham, Isak, kɛ Yakob ɔ nɔ; ma ngɔ kɛ ha nyɛ, nɛ e maa pee nyɛ nitsɛmɛ nyɛ nɔ. Imi Yawɛ nɛ i de.’ ”

⁹ Mose ngɔ sɛ gbi nɛ ɔ ya ha Israel bi ɔmɛ, se a nyɔguɛ si himi ɔ, a nɔ yemi gbegbelii ɔ, kɛ a kɔmɔ yemi ɔ ha we nɛ a bu lɛ tue.

¹⁰ Yawɛ de Mose ke,

¹¹ “Yaa nɛ o ya de Egipt matsɛ ɔ ke e ha nɛ Israel bi ɔmɛ nɛ a je e zugba a nɔ nɛ a ho.”

¹² Se Mose de Yawɛ ke, “O nɛ, Israel bi ɔmɛ po bui mi tue; kɛ maa pee kɛɛ nɛ Farao ɔ lɛɛ e maa bu mi tue; imi nɛ ye nya mi tsɔ we nɛ ɔ?”

¹³ Yawɛ de Mose kɛ Aaron ke, “Nyɛ ya de Israel ma a, kɛ Egipt matsɛ ɔ ke i fa nyɛ ke nyɛ ba kpaka Israel bi ɔmɛ kɛ je Egipt zugba a nɔ.”

Mose kɛ Aaron a weku he sane

¹⁴ Mose kɛ Aaron a weku he sane ji nɛ ɔ nɛ: Ruben, Israel bitɛte ɔ bimɛ ji Hanok, Palu, Hezron, kɛ Karmi. Ruben weku ɔmɛ ji nɛ ɔmɛ nɛ.

¹⁵ Simeon bimɛ ji Yemuel, Yamin, Ohad, Yakin, Zohar, kɛ Shaul, Kanaan yo ɔ bi ɔ. Simeon weku ɔmɛ ji nɛ ɔmɛ nɛ.

¹⁶ Levi binyumu ɔmɛ a biɛhi ngɛ a fɔmi nya ji nɛ ɔmɛ nɛ: Gershon, Kohat, kɛ Merari. Levi ye jeha 137.

¹⁷ Gershon binyumu ɔmɛ ji Libni kɛ Shimei, nɛ a nina hiɛ babauu.

¹⁸ Kohat binyumu ɔmɛ ji Amram, Izhar, Hebron, kɛ Uziel. Kohat wami ligbi tsuo ji jeha 133.

¹⁹ Merari binyumu ɔmɛ ji Mahli kɛ Mushi. Levi weku ɔmɛ ji nɛ ɔmɛ nɛ.

²⁰ Amram ngɔ e tsɛ nyɛmiyo Yokebed, nɛ e kɛ lɛ fɔ Aaron kɛ Mose. Amram ye jeha 137.

²¹ Izhar binyumu ɔmɛ ji Kora, Nefeg, kɛ Zikri.

²² Uziel binyumu ɔmɛ ji Mishael, Elzafan, kɛ Sitri.

²³ Aaron ngɔ Aminadab biyo Elisheba, Nahshon nyɛmiyo ɔ; nɛ e kɛ lɛ fɔ Nadab, Abihu, Eleazar, kɛ Itamar.

²⁴ Kora binyumu ɔmɛ ji Asir, Elkana, kɛ Abiasaf. Kora weku ɔmɛ ji nɛ ɔmɛ nɛ.

²⁵ Aaron bi Eleazar ngɔ Putiel biyi ɔmɛ a ti nɔ kake, nɛ e kɛ lɛ fɔ Finehas. Levi weku ɔmɛ ji nɛ ɔmɛ nɛ.

²⁶ Aaron kɛ Mose nɛ ɔ ji nihi nɛ Yawɛ de mɛ ke a ya nɛ a ya kpaka Israel ma kpekpemi ɔ kɛ je Egipt zugba a nɔ kɛ ba a nɛ.

²⁷ Mɛ ji ni nɛmɛ nɛ a kɛ Egipt matsɛ ɔ ya tu Israel bi ɔmɛ a jemi kɛ je Egipt zugba a nɔ ɔ he munyu ɔ nɛ. Jamɛ a Mose kɛ Aaron ɔ ji nɛ ɔmɛ nɛ.

Yawɛ fa Mose kɛ Aaron

²⁸ Ligbi ɔ nɛ Yawɛ kɛ Mose tu munyu ngɛ Egipt zugba a nɔ ɔ,

²⁹ Yawɛ de Mose ke, “Imi ji Yawɛ. Yaa nɛ o ya bɔ Egipt matsɛ ɔ nɔ́ tsuaa nɔ́ nɛ i de mo ɔ.”

³⁰ Se Mose de Yawɛ ke, “Tse o le kaa ye nya mi tsɔ we. Kɛ ma pee kɛɛ nɛ Farao ɔ maa bu mi tue?”