Mose II, 4 - BAIBLO ALOO NGMAMI KLƆUKLƆU Ɔ

Mawu ha Mose nyakpɛ he wami

¹ Mose de Mawu ke, “Se o na, a be mi hee maa ye, nɛ a be ye gbi hu tue bue; nɔ́ nɛ a ma de ji, ‘Yawɛ je we e he si ha mo.’ ”

² Kɛkɛ nɛ Yawɛ bi lɛ ke, “Mɛni lɛ ngɛ o dɛ mi ɔ?” Mose he nɔ ke, “Tso.”

³ Yawɛ de lɛ ke, “Sake ngɔ fɔ zugba!” Mose sake tso ɔ ngɔ fɔ zugba, nɛ tso ɔ plɛ pee sinɔ, nɛ Mose tu fo kɛ je he.

⁴ Yawɛ de Mose ke, “Hɛɛ mo kɛ ya nɛ o nu e hlemi. Se benɛ Mose hɛ lɛ kɛ ya, nɛ e nu sinɔ ɔ, e plɛ pee tso ngɛ e dɛ mi.”

⁵ Yawɛ de ke, “Enɛ ɔ maa tsɔɔ Israel bi ɔmɛ kaa Mawu ɔ nɛ a nɛmɛ Abraham, Isak, kɛ Yakob ja lɛ ɔ je e he kpo tsɔɔ mo.”

⁶ Yawɛ de lɛ ekohu ke, “Ngɔɔ o nine kɛ hɔ o tade ɔ mi ngɛ o tsui nya.” Nɛ e pee jã. Se benɛ e je e nine ɔ, tsaoo, e nine ɔ he pee patapata kɛ hiɔ tsu, nɛ e hiɛ kaa snoo.

⁷ Yawɛ de lɛ ke, “Ngɔɔ o nine ɔ kɛ hɔ o tade ɔ mi ngɛ o tsui nya ekohu.” Nɛ e pee jã. Se benɛ e je e nine ɔ, e tsake pee kaa bɔ nɛ e ngɛ sa a.

⁸ Mawu tsɔɔ nya nɛ e de lɛ ke, “Ke e ba mi kaa a he we mo yi, loo a yi mi tɛ̃ mɛ ngɛ kekleekle okadi ɔ he ɔ, a ma he sekpɛ okadi ɔ ye.

⁹ Nɛ ke a he we okadi enyɔ ɔmɛ yi, nɛ jehanɛ hu a bui mo tue ɔ, lɛɛ o ma ya yɛ nyu ngɛ Nilo pa a mi, nɛ o ma plɛ pue zugba gbigbli nɔ, nɛ Nilo pa a mi nyu ɔ ma plɛ pee muɔ ngɛ zugba a.”

¹⁰ Se Mose de Yawɛ ke, “Ye Nyɔmtsɛ, ye nya mi tsɔ we kɛ je sá, nɛ kɛ je be nɛ o kɛ imi, o tsɔlɔ ɔ bɔni munyu tumi nɛ ɔ hu tsakemi ko bɛ; ye munyu tumi ngɛ blɛuu, nɛ ye lilɛ hu jiɔ.”

¹¹ Kɛkɛ nɛ Yawɛ de lɛ ke, “Mɛnɔ nɛ haa nɔmlɔ tuɔ munyu, loo e tui munyu? Mɛnɔ nɛ haa nɔmlɔ hyɛɛ nɔ́, loo e hyɛ we nɔ́? Mɛnɔ nɛ haa nɔmlɔ nuɔ nɔ, loo e nui nɔ́? Anɛ pi imi, Yawɛ lo?

¹² Lɔ ɔ he ɔ, moo ya. Ma ha o nya mi ma tsɔ, nɛ ma tsɔɔ mo nɔ́ nɛ o de.”

¹³ Se Mose ke, “Ye Nyɔmtsɛ, i kpa mo pɛɛ nɛ o tsɔ nɔ kpa.”

¹⁴ Jehanɛ lɛɛ Yawɛ mi mi fu Mose, nɛ e de lɛ ke, “Anɛ o susu kaa i li kaa o nyɛmi Aaron, Levi no ɔ nya mi tsɔ lo? Hyɛ, e ngɛ blɔ nɔ kɛ ma nɛ e kɛ mo ba kpe, nɛ ke e na mo ɔ, e bua maa jɔ e he saminya.

¹⁵ O kɛ lɛ nɛ tu munyu, nɛ́ o tsɔɔ lɛ nɔ́ nɛ e de. Ma piɛ o kɛ lɛ tsuo nyɛ he, nɛ ma tsɔɔ nyɛ nɔ́ nɛ nyɛɛ pee.

¹⁶ Moo o maa pee kaa Mawu, nɛ o maa tsɔɔ lɛ nɔ́ nɛ e de, nɛ lɛɛ e maa pee o we otsiamɛ, nɛ e ma je o munyu ɔ nya ha ni ɔmɛ.

¹⁷ Moo hɛɛ o tso ɔ, nɛ lɔ ɔ ji nɔ́ nɛ o kɛ maa pee nyakpɛ ní ɔmɛ ɔ nɛ.”

Mose kpale e se kɛ ho Egipt ya

¹⁸ Mose kpale kɛ ho e ngatsɛ Yetro ngɔ ya nɛ e ya de lɛ ke, “I kpa mo pɛɛ, ha mi blɔ nɛ ma kpale kɛ ya Egipt, nɛ ma ya hyɛ kaa ye nyɛmimɛ ɔmɛ ngɛ je mi kɛ mwɔɔ lo.” Yetro de Mose ke, “Blɔ ngɛ faa; blɔ ɔ nɔ nɛ jɔ ha mo.”

¹⁹ Yawɛ kɛ Mose tu munyu ngɛ Midian, nɛ e de lɛ ke, “Moo kpale o se kɛ ho Egipt ya, ejakaa nihi nɛ ngɛ hlae nɛ a tane o yi ɔ, mɛ tsuo a gbo.”

²⁰ Lɔ ɔ he ɔ, Mose ngɔ e yo ɔ, kɛ e binyumu ɔmɛ ngɔ hi teji nɔ, nɛ e kɛ mɛ pue nɔ kɛ ho Egipt zugba a nɔ ya. Mose kɛ̃ tso ɔ nɛ Mawu de lɛ ke e hɛɛ ɔ ngɔ ma e dɛ kɛ ho.

²¹ Yawɛ de Mose ke, “Ke o kpale kɛ ya Egipt ɔ, nyakpɛ níhi tsuo kulaa nɛ i ngɔ kɛ wo o dɛ ɔ, hyɛ nɛ o pee lɛ tsuo ngɛ Farao ɔ hɛ mi; se imi lɛɛ ma kplii Farao ɔ tsui, nɛ e be hae nɛ Israel bi ɔmɛ nɛ je.

²² Bɔ nɛ o ma de Farao ɔ ji, Yawɛ ke, ‘Israel ɔ, ye binyumu ji lɛ; ee ye bitɛte ji lɛ!

²³ I de mo ke o ha nɛ ye bi ɔ nɛ ya nɛ e ya ja mi, se o kplɛɛ we. Lɔ ɔ he ɔ, ma gbe o binyumu ɔ, o bitɛte ɔ!’ ”

²⁴ Benɛ Mose yaa a, Yawɛ ya je e he si ha lɛ ngɛ nibwɔhi a to he ko, nɛ e piɛ nguɛ nya nɛ e tane e yi.

^25-26 Kɛkɛ nɛ Zipora ngɔ ha nɛ a kɛ tɛ pee, nɛ e kɛ po e binyumu ɔ, nɛ e ngɔ mɔmlɔtɔ ɔ kɛ sa Mose nanehi a he, nɛ e de ke, “Niinɛ, ye muɔ huno ji mo!” Nɛ Yawɛ ha Mose yi na wami. Blɔɔ nɔ pomi kusumi ɔ he nɛ Zipora de ke, “Ye muɔ huno ji mo” ɔ nɛ.

²⁷ Yawɛ de Aaron ke, “Mose ma ngɛ nga a nɔ; yaa nɛ o ya kpee lɛ.” Kɛkɛ nɛ e ho nɛ e kɛ lɛ ya kpe ngɛ Mawu yo ɔ he; nɛ e fua lɛ atuu.

²⁸ Mose bɔ Aaron munyu ɔmɛ tsuo nɛ Yawɛ kɛ tsɔ lɛ ɔ, kɛ okadihi nɛ e fa lɛ ke e pee ɔ.

²⁹ Enɛ ɔ se ɔ, Mose kɛ Aaron ho nɛ a ya bua Israel ma nimeli ɔmɛ tsuo a nya.

³⁰ Nɛ Aaron bɔ mɛ níhi tsuo nɛ Yawɛ de Mose ɔ, nɛ Mose pee okadi ɔmɛ kɛ tsɔɔ ma nimeli ɔmɛ.

³¹ Ma a he ye. Benɛ a nu kaa Yawɛ ba na Israel bi ɔmɛ a nɔ́ nami ɔ, nɛ e ma nɛ e ba pee he nɔ́ ko ha mɛ ɔ, a kpla si nɛ a ja Mawu.