Mose II, 39 - BAIBLO ALOO NGMAMI KLƆUKLƆU Ɔ

Osɔfo ɔmɛ a tade ɔmɛ a kpɛmi

¹ A ngɔ kpa bluu, kpa nɛ hɛɛ alamua tu su, kɛ kpa tsu kɛ kpɛ tade saminyawiiwi nɛ osɔfo ɔmɛ maa wo kɛ sɔmɔ ngɛ he klɔuklɔu ɔ. A kpɛ tade klɔuklɔu ɔmɛ kɛ ha Aaron kaa bɔ nɛ Yawɛ fa Mose ɔ.

Efɔd ɔ peemi

² A ngɔ sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa hiɔ kpakpa nɛ a tslɔ kɛ pee efɔd ɔ.

³ A si sika tsu ɔ nɔ tɛtlɛɛ, nɛ a poo lɛ dlɛɛdlɛɛ kaa kpa loko a ngɔ kɛ futu kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ ɔ.

⁴ A pee konɔ kpa enyɔ kɛ wo efɔd ɔ he, nɛ a kɛ fi lɛ ngɛ hɛ mi kɛ se tsuo.

⁵ Mi mi fimi nɔ́ ɔ nɛ a je blɔ lo kɛ wo efɔd ɔ he nɛ a kɛ fi lɛ ɔ, lɛ hu jamɛ a ga a, kɛ jamɛ a ní ɔmɛ nɔuu a ngɔ kɛ pee mɛ kaa bɔ nɛ Yawɛ fa Mose ɔ. Mɛ ji sika tsu kpa, kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ.

⁶ A pee shoham tɛ ɔmɛ, nɛ a ngɔ mɛ kɛ hɔɔ sika tsu gahi a mi; nɛ a kpɛ́ Yakob binyumu ɔmɛ a biɛhi ngɛ a nɔ kaa bɔ nɛ june he ní tsulɔ ngmaa ní ngɛ nguɛ ga nɔ ɔ.

⁷ Kaa bɔ nɛ Yawɛ fa Mose ɔ, a fi mɛ kɛ wo efɔd konɔ kpa amɛ a he kaa kaimi tɛhi nɛ daa si kɛ ha Yakob binyumu ɔmɛ.

Gugue nya nɔ́ ɔ peemi

⁸ Gugue nya nɔ́ ɔ, a pee lɛ kɛ ya; bɔ nɛ a pee efɔd ɔ, ja nɔuu a pee lɛ. Níhi nɛ a ngɔ kɛ pee lɛ ji sika tsu kpa, kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ.

⁹ A dɔ gugue nya nɔ́ ɔ mi enyɔ, nɛ a pee lɛ kɔ nya eywiɛ; e kami ji nine mi blimi kake, nɛ e blimi hu nine mi blimi kake.

¹⁰ A ma tɛhi nɛ a he jua wa kɛ wo zã eywiɛ mi. Kekleekle zã a mi tɛ ɔmɛ ji sardio, topasion, kɛ smaragdo.

¹¹ Zã nɛ ji enyɔ ɔ mi ní ɔmɛ ji karfungkle, safiro, kɛ sardoniki.

¹² Zã etɛne ɔ mi ní ɔmɛ ji hiakinto, agate, kɛ ametisto.

¹³ Zã eywiɛne ɔ mi ní ɔmɛ ji krisolito, shoham, kɛ yaspi. A sile sika tsu kɛ bɔle tɛ ɔmɛ.

¹⁴ Tɛ ɔmɛ tsuo a hiɛmi ji nyɔngma kɛ enyɔ, nɛ a kpɛ́ Yakob binyumu ɔmɛ a biɛhi ngɛ a nɔ kakaaka. Wɛtso nyɔngma kɛ enyɔ ɔmɛ ɔ, a kpɛ́ eko tsuaa eko biɛ ngɛ tɛ kake nɔ kaa bɔ nɛ a ngmaa ní ngɛ nguɛ ga nɔ ɔ.

¹⁵ A kɛ sika tsu ngmingmiingmi pee kɔsɔkɔsɔ nɛ a tslɔ kaa kpa kɛ wo gugue nya nɔ́ ɔ he.

¹⁶ A pee sika tsu nɔ́ mi hɔmi nɔ enyɔ, kɛ sika tsu ga hu enyɔ, nɛ a kɛ ga enyɔ ɔmɛ wo gugue nya nɔ́ ɔ hiɔwe kɔ nya enyɔ ɔmɛ a he.

¹⁷ A kɛ sika tsu kɔsɔkɔsɔ enyɔ ɔmɛ hɔɔ ga enyɔ ɔmɛ nɛ ngɛ gugue nya nɔ́ ɔ hiɔwe kɔ nya enyɔ ɔmɛ a mi.

¹⁸ A ngɔ kɔsɔkɔsɔ enyɔ ɔmɛ a nya enyɔ ɔmɛ kɛ la nɔ́ mi hɔmi nɔ́ enyɔ ɔmɛ a mi, nɛ a fi kɛ wo efɔd ɔ konɔ kpa amɛ a he ngɛ hɛ mi.

¹⁹ Lɔ ɔ se ɔ, a pee sika tsu ga enyɔ kɛ wo gugue nya nɔ́ ɔ kɔ nya enyɔ ɔmɛ a mi mi je ngɛ efɔd ɔ kasa nya.

²⁰ Jehanɛ, a pee sika tsu ga kpa enyɔ kɛ wo efɔd ɔ kɔni enyɔ kpa amɛ a nya, ngɛ sisi blɔ kɛ yaa e hɛ mi, ngɛ tsami he kake ɔ hanɔ, ngɛ efɔd ɔ mi mi fimi nɔ́ ɔ nɛ a lo saminyayoo ɔ yi mi.

²¹ Nɛ kaa bɔ nɛ Yawɛ fa Mose ɔ, a ngɔ kpa bluu kɛ fi gugue nya nɔ́ ɔ he ga amɛ kɛ wo efɔd ɔ he ga amɛ a he ngɛ mi mi fimi nɔ́ ɔ hiɔwe je, bɔ nɛ pee nɛ gugue nya nɔ́ ɔ nɛ kó kpɔ kɛ je efɔd ɔ he.

Osɔfo ɔmɛ a tade kpa amɛ a kpɛmi

²² Bo ɔ nɛ a ngɔ kɛ kpɛ efɔd ɔ he tade klɔii ɔ, kpa bluu sɔuu a kɛ lo.

²³ A je kuɛ mi puɔ ngɛ he, nɛ a fia nya nɛ e ti kɛ kpe konɛ e ko hía.

^24-26 A ngɔ kpa hiɔ kpakpa, kpa bluu, kpa nɛ hɛɛ alamua tu su, kɛ kpa tsu kɛ lo ní kokloohi kaa tso yiblii nɛ a ma kɛ wo tade ɔ nya fiami ɔ mi, nɛ sika tsu ngmlɛhi hɔɔ tso yiblii ɔmɛ a mi kɛ kpe. Ke sika tsu ngmlɛ kake ba, kɛkɛ nɔ́ kokloo kaa tso yiblii ɔ hu kake ba ja sɔuu kɛ bɔle tade klɔii ɔ nya fiami ɔ mi kaa bɔ nɛ Yawɛ fa Mose ɔ.

²⁷ A ngɔ kpa hiɔ kpakpa kɛ lo hiɔwe tadehi ha Aaron, kɛ e binyumu ɔmɛ;

²⁸ a kɛ kpa hiɔ kpakpa nɛ ɔ kɛ̃ kpɛ osɔfo pɛɛ nguaa a kɛ pɛɛ wawi ɔmɛ. A kɛ kpa hiɔ kpakpa nɛ a tslɔ kpɛ fiɔ mi tade ɔmɛ.

²⁹ Mi mi fimi nɔ́ ɔ hu, a ngɔ kpa hiɔ kpakpa nɛ a tslɔ, kpa bluu, kpa nɛ hɛɛ alamua tu su, kɛ kpa tsu kɛ pee, nɛ a kadi ní wo mi kaa bɔ nɛ Yawɛ fa Mose ɔ.

³⁰ A kɛ sika tsu ngmingmiingmi pee jlasi klɔuklɔu ɔ hɛ mi plɛɛte pɛtɛpɛtɛ ɔ, nɛ a ngma ní ngɛ nɔ kaa bɔ nɛ june he ní tsulɔ ngmaa ní ngɛ nguɛ ga nɔ́ ɔ ke, “Klɔuklɔu ha Yawɛ.”

³¹ Nɛ a kɛ kpa bluu fi lɛ kɛ wo pɛɛ nguaa a he kaa bɔ nɛ Yawɛ fa Mose ɔ.

A gbe ní tsumi ɔ nya

³² Jehanɛ ɔ, a gbe kpe he bo tsu ɔ he ní tsumi ɔ tsuo pɛpɛɛpɛ nya. Israel bi ɔmɛ tsu ní ɔ pɛpɛɛpɛ kaa bɔ nɛ Yawɛ fa Mose ɔ.

³³ Nɛ a ngɔ kpe he bo tsu ɔ, kɛ e he ní ɔmɛ tsuo kɛ ba Mose ngɔ; e he gbowe ɔmɛ, sima tso ɔmɛ, mani tso ɔmɛ, titima amɛ, kɛ nɔ dami ní ɔmɛ;

³⁴ he hami bo ɔ nɛ a kɛ agbosu he womi nɛ a wo lɛ kɔbɛi kpɛ ɔ; he hami bo ɔ nɛ a kɛ apletsi he womi nɛ a je blɔ pee kpɛ ɔ; tsu mi pomi bo ɔ nɛ a kɛ tsiɔ somi daka a hɛ mi ɔ;

³⁵ somi daka a nɛ mlaa amɛ ngɛ mi ɔ, e he tso ɔmɛ kɛ e nya nɔ́ ɔ;

³⁶ okplɔɔ ɔ, e he ní ɔmɛ tsuo, kɛ abolo klɛdɛɛ ɔ nɛ a kɛ maa Yawɛ hɛ mi ɔ;

³⁷ kane tso ɔ nɛ a ngɔ sika tsu ngmingmiingmi kɛ pee ɔ, kane ɔmɛ nɛ a kɛ ma nɔ ɔ, e he ní ɔmɛ tsuo, kɛ kane mi nu ɔ;

³⁸ sika tsu bɔ sami la tɛ ɔ; nɔ pɔmi nu ɔ; tsopa kɛ e he via a; kpe he bo tsu ɔ nya bo ɔ;

³⁹ akɔblee bɔ sami la tɛ ɔ, e he akɔblee ya a, e he tso ɔmɛ, kɛ e he ní ɔmɛ tsuo; nyu kã a kɛ e he kla a;

⁴⁰ bo ɔmɛ nɛ kplaa si ngɛ kpe he bo tsu ɔ piɛ ɔ he ɔ, e titima amɛ kɛ e nɔ dami ní ɔmɛ, piɛ ɔ nya bo ɔ, e he tangme ɔmɛ kɛ e he plɛɛko ɔmɛ, kɛ níhi tsuo nɛ a ngɔ kɛ tsu ní ngɛ kpe he bo tsu ɔ mi ɔ;

⁴¹ tade saminyawiiwi ɔmɛ nɛ osɔfo ɔmɛ maa wo kɛ sɔmɔ ngɛ he klɔuklɔu ɔ, nɛ ji osɔfo Aaron kɛ e binyumu ɔmɛ a tade klɔuklɔu ɔmɛ.

⁴² Israel bi ɔmɛ tsu ní tsumi ɔ tsuo kaa bɔ nɛ Yawɛ fa Mose ɔ pɛpɛɛpɛ.

⁴³ Mose ya nɛ e ya hyɛ nɔ́ tsuaa nɔ́, nɛ e na kaa a tsu ní ɔ pɛpɛɛpɛ kaa bɔ nɛ Yawɛ fa lɛ ɔ. Nɛ Mose gbaa mɛ.