Mose II, 38 - BAIBLO ALOO NGMAMI KLƆUKLƆU Ɔ

Bɔ sami la tɛ ɔ peemi

¹ E kɛ akasia tso pee bɔ sami la tɛ; e ngɛ kɔ nya eywiɛ. E kami ji nine mi blimi nyɔngma, e blimi ji nine mi blimi nyɔngma, nɛ e si temi ji nine mi blimi ekpa.

² E pee kolihi ngɛ kɔ nya eywiɛ ɔmɛ, nɛ e kɛ akɔblee ha a he; koli ɔmɛ kɛ bɔ sami la tɛ ɔ tsa.

³ E pee bɔ sami la tɛ ɔ he ní ɔmɛ tsuo: ngɛyuhi, sofihi, kahi, gbowehi, kɛ la jemi ngɛyuhi. E ngɔ akɔblee kɛ pee ní nɛ ɔmɛ tsuo.

⁴ Jehanɛ, e ngɔ akɔblee kɛ lo ya ngɔ wo bɔ sami la tɛ ɔ he kɛ je e sisi blɔ kɛ ya ta e kpɛti tutuutu.

⁵ E sɔ̃ ga eywiɛ kɛ wo akɔblee ya a kɔ nya eywiɛ ɔmɛ a he, konɛ a kɛ tsohi nɛ wo a mi.

⁶ Akasia tsohi ji tso ɔmɛ nɛ e hlɔ ɔ nɛ, nɛ e ngɔ akɔblee kɛ ha a he.

⁷ E kɛ tso ɔmɛ hɔɔ ga amɛ a mi ngɛ bɔ sami la tɛ ɔ kɔ nya eywiɛ ɔmɛ nɛ a kɛ hɛɛ lɛ. E kɛ gbegbeli kpɛ bɔ sami la tɛ ɔ, nɛ blɔ ngɛ mi.

Akɔblee kã a

⁸ E pee akɔblee kã kɛ e sisi kla; e ná akɔblee ahuhuɛ ɔmɛ nɛ e kɛ pee ɔ kɛ je yi ɔmɛ nɛ sɔmɔɔ ngɛ kpe he bo tsu ɔ sinya a nya a a dɛ.

Kpe he bo tsu ɔ he piɛ ɔ

⁹ Jehanɛ, e po piɛ kɛ wo kpe he bo tsu ɔ he. Bo nɛ ngɛ piɛ ɔ leneyi je ɔ, a lo kɛ kpa hiɔ kpakpa nɛ a tslɔ; e kami ji nine mi blimi lafa enyɔ.

¹⁰ E kɛ akɔblee pee titima nyingmi enyɔ ɔmɛ, kɛ nɔ dami nɔ́ nyingmi enyɔ ɔmɛ; se titima amɛ a he gbowe ɔmɛ, kɛ mani ɔmɛ lɛɛ sika hiɔ a kɛ pee.

¹¹ Bo ɔmɛ nɛ ngɛ omleyi je ɔ hu a kami ji nine mi blimi lafa enyɔ. Mɛ hu akɔblee a ngɔ kɛ pee a titima nyingmi enyɔ ɔmɛ, kɛ nɔ dami nɔ́ nyingmi enyɔ ɔmɛ; se titima amɛ a he gbowe ɔmɛ, kɛ mani ɔmɛ lɛɛ sika hiɔ a kɛ pee.

¹² Bo ɔmɛ nɛ ngɛ piɛ ɔ bonyoku je ɔ, a kami ji nine mi blimi lafa. A ngɛ titima nyɔngma, kɛ nɔ dami nɔ́ hu nyɔngma; titima amɛ a he gbowe ɔmɛ, kɛ mani ɔmɛ ɔ, sika hiɔ a kɛ pee.

¹³ Bo ɔmɛ nɛ kpee beleku je ɔ, a kami ji nine mi blimi lafa.

¹⁴ Tsu nya bohi nɛ kplaa si ngɛ sinya a nya kasa kake ɔ, a kami ji nine mi blimi nyingmi etɛ, kɛ a he titima etɛ, kɛ nɔ dami nɔ́ etɛ.

¹⁵ Kasa kaketsɛ ɔ hu ja nɔuu; tsu nya bohi nɛ kplaa si ngɛ lejɛ ɔ, a kami ji nine mi blimi nyingmi etɛ, kɛ mɛ hu a he titima etɛ, kɛ nɔ dami nɔ́ etɛ.

¹⁶ Bo ɔmɛ tsuo nɛ kplaa si ngɛ piɛ ɔ he ɔ, a lo mɛ kɛ kpa hiɔ kpakpa nɛ a tslɔ.

¹⁷ A kɛ akɔblee pee titima amɛ a nɔ dami ní ɔmɛ; se a he gbowe ɔmɛ, kɛ mani ɔmɛ lɛɛ sika hiɔ a kɛ pee. A ngɔ sika hiɔ kɛ ha titima amɛ a yi mi. Titima amɛ tsuo nɛ ngɛ piɛ ɔ he ɔ, a kɛ sika hiɔ tsa mɛ ngɛ a kpɛti.

¹⁸ Piɛ ɔ nya bo ɔ, a ngɔ kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ kɛ kadi ní saminyayoo ngɔ wo mi. E kami ji nine mi blimi nyingmi eywiɛ, nɛ e blimi ji nine mi blimi nyɔngma, kaa piɛ ɔ he bo ɔmɛ pɛpɛɛpɛ.

¹⁹ Titima eywiɛ hɛɛ piɛ ɔ nya bo ɔ, kɛ a nɔ dami nɔ́ eywiɛ nɛ a kɛ akɔblee pee ɔ, se a he gbowe ɔmɛ lɛɛ sika hiɔ a kɛ pee. A kɛ sika hiɔ ha a yi mi, nɛ a kɛ sika hiɔ nɔuu poo a kpɛti.

²⁰ Kpe he bo tsu ɔ he plɛɛko ɔmɛ, kɛ piɛ nɛ bɔle lɛ ɔ he ní ɔmɛ tsuo akɔblee a kɛ pee.

Níhi nɛ a kɛ pee kpe he bo tsu ɔ

²¹ Ní slɔɔtohi nɛ a kɛ pee kpe he bo tsu ɔ, he nɛ a ngɔ tɛ tɛtlɛɛ enyɔ ɔmɛ nɛ a ngma mlaa amɛ ngɛ a nɔ ɔ ngɔ to ɔ ji nɛ ɔmɛ nɛ. Mose ji nɔ nɛ fa kaa a bua ní nɛ ɔmɛ a nya, nɛ osɔfo Aaron binyumu Itamar ji nɔ nɛ to blɔ nya ha Levi bi ɔmɛ nɛ a kɛ tsu ní ɔ.

²² Uri bi Bezalel, nɛ peeɔ Hur nɛ je Yuda wɛtso ɔ mi ɔ bibi ɔ, ji nɔ nɛ pee nɔ́ tsuaa nɔ́ nɛ Yawɛ fa Mose ke e pee ɔ nɛ.

²³ E he piɛlɔ ji Ahisamak nɛ je Dan wɛtso ɔ mi ɔ bi Oholiab. Oholiab nɛ ɔ, nɔ́ mi kpɛ́lɔ, galɔ, kɛ bo lolɔ ji lɛ; nɛ e ngɔɔ kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ kɛ loɔ bo.

²⁴ Sika tsu tsuo pɛpɛɛpɛ nɛ a kɛ tsu ní ngɛ he klɔuklɔu ɔ, nɛ ji sika tsu nɛ a ngɔ kɛ ba sã bɔ ɔ, e jiimi ji kilo akpe ngɛ he klɔuklɔu ɔ susumi nɔ́ ɔ nya.

²⁵ Sika hiɔ nɛ a ná kɛ je ma a dɛ mi benɛ a ngɛ ni ɔmɛ kanee ɔ, e jiimi ji ngɛ kilo 3,430 he klɔuklɔu ɔauaumi nɔ́ ɔ nya.

²⁶ Nɔ tsuaa nɔ ha ngɛ he klɔuklɔu ɔ susumi nɔ́ ɔ nya. Nyumu tsuaa nyumu nɛ ye kɛ je jeha nyingmi enyɔ kɛ yaa, nɛ a kane lɛ ɔ, ha kikɛmɛ a sika nɛ ɔ. Nyumuhi abɔ nɛ a ngma a biɛ benɛ a ngɛ ni ɔmɛ kanee ɔ, a yibɔ ji nimli akpe lafa ekpa kɛ etɛ, kɛ e nya lafa enuɔ kɛ nyingmi enuɔ.

²⁷ A ngɔ sika hiɔ nɛ ɔ mi kilo 3,400 kɛ sɔ̃ nɔ dami nɔ́ lafa kɛ ha he klɔuklɔu ɔ, kɛ tsu mi pomi bo ɔ; kilo 34 kɛ ha nɔ dami nɔ́ kake.

²⁸ Sika hiɔ kilo nyingmi etɛ nɛ piɛ ɔ, Bezalel ngɔ eko kɛ pee titima a he gbowehi. E ngɔ eko hu kɛ ha titima amɛ a yi mi, nɛ e kɛ eko poo a mi.

²⁹ Akɔblee ɔ nɛ a ngɔ kɛ ba ke Yawɛ ɔ, e nya ji kilo 2,425.

³⁰ Lɔ ɔ ji nɔ nɛ e ngɔ kɛ pee kpe he bo tsu ɔ nya sinya a nɔ dami ní ɔmɛ, akɔblee bɔ sami la tɛ ɔ kɛ e he akɔblee ya a, bɔ sami la tɛ ɔ he ní ɔmɛ tsuo,

³¹ nɔ dami ní ɔmɛ nɛ bɔle piɛ ɔ kɛ piɛ ɔ we agbo ɔ nɔ dami ní ɔmɛ, kpe he bo tsu ɔ he plɛɛko ɔmɛ tsuo, kɛ piɛ nɛ bɔle kpe he bo tsu ɔ hu he plɛɛko ɔmɛ tsuo.