Mose II, 37 - BAIBLO ALOO NGMAMI KLƆUKLƆU Ɔ

Somi daka a

¹ Bezalel ngɔ akasia tso kɛ kpɛ somi daka a. E kami ji nine mi blimi enuɔ, e blimi ji nine mi blimi etɛ, nɛ e mi kuɔmi hu nine mi blimi etɛ.

² E kɛ sika tsu ngmingmiingmi ha daka a mi kɛ e he tsuo, nɛ e kɛ sika tsu ɔ eko kɛ̃ wo zã kɛ bɔle e he ɔ kulaa.

³ E pee sika tsu ga eywiɛ, nɛ e ka mɛ kɛ wo daka a nane eywiɛ ɔmɛ a he; ga enyɔ ngɛ kasa hiɛ, nɛ enyɔ hu ngɛ kasa hiɛ.

⁴ E hlɔ akasia tsohi, nɛ e kɛ sika tsu ha a he.

⁵ E kɛ tso ɔmɛ hɔɔ ga amɛ nɛ ngɛ daka a he ɔ a mi, nɛ́ a pɛtɛ a he kɛ hɛɛ daka a.

⁶ Lɔ ɔ se ɔ, e ngɔ sika tsu ngmingmiingmi kɛ pee daka a nya nɔ́; e kami ji nine mi blimi enuɔ, nɛ e blimi ji nine mi blimi etɛ.

⁷ E ngɔ sika tsu nɛ a si nɔ tɛtlɛɛ kɛ pee kerub enyɔ kɛ ma nya nɔ́ ɔ nɔ ngɛ daka a kami mi hiɛ kɛ hiɛ.

⁸ Kerub kake ngɛ hiɛ, nɛ kerub kake hu ngɛ hiɛ. E pee kerub enyɔ ɔmɛ nɛ a kɛ daka a nya nɔ́ ɔ tsa.

⁹ Kerub ɔmɛ gbɛ a pɛlihi a mi kɛ ya hiɔwe nɛ a kɛ ha nya nɔ́ ɔ he. A plɛ a hɛ mi ngɔ kpee a sibi, nɛ a ngɛ nya nɔ́ ɔ nɔ hyɛe.

Okplɔɔ ɔ kpɛmi

¹⁰ Lɔ ɔ se ɔ, e kɛ akasia tso kpɛ okplɔɔ ɔ; e kami ji nine mi blimi eywiɛ, e blimi ji nine mi blimi enyɔ, nɛ e si temi ji nine mi blimi etɛ.

¹¹ E ngɔ sika tsu ngmingmiingmi kɛ ha he, nɛ e kɛ sika tsu ɔ eko wo zã kɛ bɔle e he ɔ kulaa.

¹² E hlɔ tso maa pee dɛ mi blimi, nɛ e kɛ pee kla kɛ wo okplɔɔ ɔ he kɛ kpe. E kɛ sika tsu wo zã dɛɛ kɛ bɔle kla a.

¹³ E pee sika tsu ga eywiɛ kɛ mɛtɛ okplɔɔ ɔ nane eywiɛ ɔmɛ a he ngɛ kɔ nya eywiɛ ɔmɛ.

¹⁴ Ga amɛ nɛ a maa ngɔ tso ɔmɛ nɛ a kɛ maa hɛɛ okplɔɔ ɔ kɛ hɔɔ a mi ɔ ngɛ tso kla a kasa nya tutuutu.

¹⁵ E ngɔ akasia tso kɛ hlɔ tso ɔmɛ nɛ a kɛ maa hɛɛ okplɔɔ ɔ; nɛ e kɛ sika tsu ha a he.

¹⁶ E ngɔ sika tsu ngmingmiingmi kɛ pee ní nɛ ɔmɛ nɛ a kɛ maa ma okplɔɔ ɔ nɔ ɔ: plɛɛtehi, kahi nɛ a kɛ tsopa kɛ e he via maa wo a mi, kpluhi, kɛ likɔkɔhi nɛ a kɛ maa sã wai bɔ.

Kane tso ɔ peemi

¹⁷ Jehanɛ, e kɛ sika tsu ngmingmiingmi pee kane tso ɔ. Kane tso ɔ sisi je, kɛ e kpɛti tso ɔ lɛɛ e kɛ sika tsu nɛ a si nɔ tɛtlɛɛ pee. E pee mɔmɔhi: ní nɛmɛ nɛ blɛkee we lolo, kɛ ní nɛmɛ nɛ blɛke, nɛ a kɛ kane tso ɔ tsa mluguduu kake.

¹⁸ Kɔni ekpa ngɛ kane tso ɔ he; etɛ ngɛ kasa hiɛ, nɛ etɛ hu ngɛ kasa hiɛ.

¹⁹ Kane tso ɔ he kɔni ekpa amɛ ɔ, mɔmɔ etɛ kɛ a yi pɛɛ ngɛ eko tsuaa eko nɔ.

²⁰ Kpɛti kane tso ɔ lɛɛ mɔmɔ eywiɛ kɛ a yi pɛɛ ngɛ nɔ.

²¹ Kane tso ɔ tso gblaa etɛ ɔmɛ ɔ, mɔmɔ kpɔ ngɛ kɔni enyɔɔnyɔ ɔmɛ a kpe he ɔmɛ a sisi tutuutu.

²² Kpɔ ɔmɛ, tso gblaa amɛ, kɛ kpɛti kane tso ɔ tsuo tsa; a ngɔ sika tsu ngmingmiingmi nɛ a si nɔ tɛtlɛɛ kɛ pee lɛ tsuo.

²³ Jehanɛ, e pee kane kpaago kɛ ma kane tso ɔ nɔ; nɛ e kɛ sika tsu ngmingmiingmi pee kane ɔ sumi kɛ e gbemi nɔ́ ɔ, kɛ nɔ́ nɛ a kɛ maa muɔ la zu.

²⁴ E ngɔ sika tsu ngmingmiingmi kilo nyingmi etɛ kɛ enuɔ kɛ pee kane tso ɔ kɛ e he ní ɔmɛ tsuo.

Tsopa kɛ e he via sami la tɛ ɔ peemi

²⁵ Tsopa kɛ e he via sami la tɛ ɔ, e ngɔ akasia tso kɛ pee. E pee lɛ kɔ nya eywiɛ; e kami ji nine mi blimi enyɔ, e blimi ji nine mi blimi enyɔ, nɛ e si temi ji nine mi blimi eywiɛ. E kɛ e koli ɔmɛ ngɛ kɔ nya eywiɛ ɔmɛ tsa.

²⁶ E ngɔ sika tsu ngmingmiingmi kɛ ha e he tsuo: e yi mi, e kasa nya amɛ, kɛ e koli ɔmɛ; nɛ e kɛ sika tsu ɔ eko wo zã dɛɛ kɛ bɔle lɛ kɛ kpe.

²⁷ E pee sika tsu ga enyɔ kɛ mɛtɛ la tɛ ɔ he ngɛ zã a sisi ngɛ kɔ nya enyɔ ɔmɛ, konɛ a ngɔ tsohi nɛ a kɛ maa hɛɛ la tɛ ɔ kɛ hɔɔ a mi.

²⁸ Akasia tsohi ji tso ɔmɛ nɛ e hlɔ ɔ nɛ, nɛ e kɛ sika tsu ha a he.

Nɔ pɔmi nu ɔ kɛ tsopa kɛ e he via a

²⁹ Jehanɛ, e pee nɔ pɔmi nu klɔuklɔu, ɔ kɛ tsopa kɛ e he via ngmingmiingmi ɔ hulɔ. E futu tsopa amɛ pɛpɛɛpɛ kaa nɔ́ nɛ tsopa kɛ e he via he ní tsulɔ nitsɛ lɛ pee.