Mose II, 36 - BAIBLO ALOO NGMAMI KLƆUKLƆU Ɔ

¹ “Bezalel, Oholiab, kɛ nɔ tsuaa nɔ nɛ Yawɛ dloo lɛ ga ní tsumi he juɛmi, kɛ nile nɛ a kɛ ma tsu he klɔuklɔu ɔ mami ní tsumi ɔ, mɛ tsuo pɛpɛɛpɛ a ba nɛ a ba tsu ní ɔ kaa bɔ nɛ Yawɛ fa mɛ ɔ.”

Ma a kɛ nike ní babauu ba

² Mose tsɛ Bezalel, Oholiab, kɛ nɔ tsuaa nɔ nɛ Yawɛ dloo lɛ ga nile, nɛ jehanɛ e ngɛ ní tsumi ɔ he suɔmi ɔ kɛ ba ní tsumi ɔ he.

³ Mose ngɔ nike níhi nɛ Israel bi ɔmɛ je a tsui mi kɛ ba nɛ a kɛ tsu he klɔuklɔu ɔ he ní ɔ tsuo ngɔ wo a dɛ. Se loloolo ɔ, Israel ma a kɛ a nike ní ɔmɛ ngɛ bae ba ngɛ Mose hae daa mɔtu.

⁴ Kɛkɛ nɛ ga ní tsuli ɔmɛ nɛ ngɛ ní tsue ngɛ he klɔuklɔu ɔ tsuo je ní tsumi ɔ he kɛ ba

⁵ ba de Mose ke, “Ní ɔmɛ nɛ ma a kɛ ngɛ bae nɛ a kɛ tsu ní kaa bɔ nɛ Yawɛ fa wɔ ɔ hiɛ kulaa tsɔ pe ní tsumi ɔ.”

⁶ Enɛ ɔ he ɔ, Mose ha nɛ a fiɛ ngɛ ma a sito he ɔ tsuo ke, “Nyumu jio, yo jio, nɔ ko nɔ ko nɛ ko ngɔ nike ní ko kɛ ba kɛ ha he klɔuklɔu ɔ he ní tsumi ɔ hu!” Kɛkɛ nɛ ma a jɔɔ ní ɔmɛ kɛ bami.

⁷ Ní ɔmɛ nɛ a ngɔ kɛ ba momo ɔ hiɛ ha ní tsumi ɔ tsuo tsumi, nɛ tete po eko maa piɛ.

Kpe he bo tsu ɔ mami

⁸ Ní tsuli ɔmɛ a kpɛti ni nɛmɛ nɛ a hɛ mi ngɛ ga saminya a ngɔ bo popoe nyɔngma kɛ pee kpe he bo tsu ɔ. A ngɔ kpa bluu, kpa tsu, kɛ kpa nɛ hɛɛ alamua tu su kɛ lo bo ɔmɛ, nɛ a kadi kerub saminyawiiwi ngɔ wo a mi.

⁹ Bo ɔmɛ tsuo sɔ fiee; bo kake kami ji nine mi blimi nyingmi enuɔ kɛ ekpa, nɛ e blimi ji nine mi blimi kpaanyɔ.

¹⁰ A kpɛ bo enuɔ kɛ tsa a sibi a nya, nɛ a kpɛ enuɔ kpa amɛ hu ja nɔuu.

¹¹ A kɛ kpa bluu pee gahi kɛ wo bo kake nya ngɛ tsami he ɔ; bo kpa a hu ja nɔuu a pee lɛ.

¹² A pee bo ga nyingmi enuɔ kɛ wo bo kake nya, nɛ a pee bo ga nyingmi enuɔ kɛ wo bo kaketsɛ ɔ hu nya; ga amɛ tsuo nyɛɛ a sibi a hanɔ.

¹³ A pee sika tsu gbowe nyingmi enuɔ nɛ a kɛ gbowe ɔmɛ tsa bo ɔmɛ kɛ pee kpe he bo tsu mluku kake.

¹⁴ Jehanɛ a kɛ apletsi he bwɔmi kpɛ bo popoe nyɔngma kɛ kake nɛ a kɛ lɛ tsuo pee heha nɔ́ ha kpe he bo tsu ɔ.

¹⁵ Bo popoe kakaaka nyɔngma kɛ kake ɔmɛ tsuo sɔ; bo kake kami ji nine mi blimi kpaanyɔ.

¹⁶ A kpɛ bo enuɔ kɛ tsa a sibi a nya, nɛ a kpɛ ekpa hu kɛ tsa a sibi a nya.

¹⁷ Bo enuɔ ɔmɛ nɛ a tsa a, a pee ga nyingmi enuɔ kɛ wo nyagbe nɔ́ enyɔ ɔmɛ a ti kake he; ekpa nɔ́ ɔ hu a pee lɛ ja nɔuu.

¹⁸ Lɔ ɔ se ɔ, a pee akɔblee gbowe nyingmi enuɔ, nɛ a kɛ gbowe ɔmɛ la ga amɛ a mi; nɛ bo enyɔ ɔmɛ pee heha nɔ́ kake.

¹⁹ A kpɛ bo kpa enyɔ kɛ ha kpe he bo tsu ɔ he; a kɛ agbosu he womi nɛ a wo lɛ kɔbɛi kpɛ kekleekle nɔ́ ɔ, nɛ a kɛ apletsi he womi nɛ a je blɔ pee kpɛ enyɔne ɔ.

²⁰ Jehanɛ, a kɛ akasia tso pee sima tso ha kpe he bo tsu ɔ.

²¹ Sima tso kake kami ji nine mi blimi nyingmi enyɔ, nɛ e blimi ji nine mi blimi etɛ.

²² Sima tso tsuaa sima tso ngɛ nane enyɔ, nɛ a kɛ mɛ tsa a sibi a nya; bɔ nɛ a pee kpe he bo tsu ɔ he sima tso ɔmɛ tsuo ji nɛ ɔ nɛ.

²³ A pee sima tso nyingmi enyɔ ngɛ kpe he bo tsu ɔ leneyi je,

²⁴ nɛ a pee sika hiɔ nɔ dami nɔ́ nyingmi eywiɛ kɛ wo sima tso nyingmi enyɔ ɔmɛ a sisi; nɔ dami nɔ́ enyɔ ngɛ sima tso tsuaa sima tso sisi kɛ ha e nane enyɔ ɔmɛ.

²⁵ Kpe he bo tsu ɔ kasa kake ɔ hu nɛ ji omleyi je ɔ, a ma sima tso nyingmi enyɔ ngɛ lejɛ ɔ,

²⁶ kɛ mɛ hu a sika hiɔ nɔ dami nɔ́ nyingmi eywiɛ, nɔ dami nɔ́ enyɔ ngɛ sima tso tsuaa sima tso sisi.

²⁷ Kpe he bo tsu ɔ se ngɛ bonyoku je ɔ, a ma sima tso ekpa ngɛ lejɛ ɔ.

²⁸ A ma sima tso kpa enyɔ hu ha kpe he bo tsu ɔ kɔ nya enyɔ ɔmɛ nɛ ngɛ se ɔ.

²⁹ Kɔ nya sima tso nɛ ɔmɛ ɔ, a tsa mɛ ngɛ yi kpɛti ɔ ngɛ kekleekle ga a he, se sisi ɔ lɛɛ a tsa we; a pee kɔ nya sima tso enyɔ ɔmɛ tsuo kikɛ nɛ ɔ.

³⁰ Lɔ ɔ he ɔ, sima tso ɔmɛ tsuo a yibɔ ji kpaanyɔ, kɛ sika hiɔ nɔ dami nɔ́ nyɔngma kɛ ekpa; sika hiɔ nɔ dami nɔ́ enyɔ ngɛ sima tso tsuaa sima tso sisi.

³¹ A kɛ akasia tso pee mani womi tso nyɔngma kɛ enuɔ kɛ ha kpe he bo tsu ɔ: enuɔ ha sima tso ɔmɛ ngɛ kpe he bo tsu ɔ kasa hiɛ,

³² enuɔ ha sima tso ɔmɛ ngɛ kpe he bo tsu ɔ kasa hiɛ, kɛ enuɔ hu ha sima tso ɔmɛ ngɛ kpe he bo tsu ɔ se, ngɛ bonyoku je.

³³ Mani ɔ nɛ nyɛɛ sima tso ɔmɛ a kpɛti ɔ lɛɛ e fɔ si kɛ je kpe he bo tsu ɔ kasa kake kɛ ya si kasa kake.

³⁴ A ngɔ sika tsu kɛ ha sima tso ɔmɛ a he. Jehanɛ hu, a pee sika tsu gahi kɛ wo a he, nɛ a kɛ mani ɔmɛ hɔɔ a mi. Mani ɔmɛ nitsɛ hu a ngɔ sika tsu kɛ ha a he.

³⁵ A kɛ kpa nɛ hɛɛ alamua tu su, kɛ kpa tsu lo tsu mi pomi bo ɔ. A je blɔ kadi kerub saminyawiiwi kɛ wo mi.

³⁶ A kɛ akasia tso pee titima eywiɛ kɛ ha tsu mi pomi bo ɔ. A ngɔ sika tsu kɛ ha a he, nɛ a kɛ sika tsu gbowehi hɔ a nya. Jehanɛ, a pee sika hiɔ nɔ dami nɔ́ eywiɛ ha mɛ.

³⁷ A kɛ kpa bluu, kpa nɛ hɛɛ alamua tu su, kɛ kpa tsu lo kpe he bo tsu ɔ sinya a nya bo ɔ; nɛ a kadi ní kɛ wo mi.

³⁸ A pee titima enuɔ kɛ ha tsu nya bo nɛ ɔ, kɛ mɛ hu a he gbowehi. A kɛ sika tsu ha a yi mi, kɛ a kpɛti kla amɛ a he; se a nɔ dami nɔ́ enuɔ ɔmɛ lɛɛ akɔblee a kɛ pee.