Mose II, 35 - BAIBLO ALOO NGMAMI KLƆUKLƆU Ɔ

Hejɔɔmi ligbi ɔ he mlaahi

¹ Mose bua Israel ma a tsuo nya nɛ e de mɛ ke, “Mlaahi nɛ Yawɛ wo nɛ nyɛɛ ye nɔ ji nɛ ɔmɛ nɛ.

² Ligbi ekpa nyɛ kɛ tsu ní, se ligbi nɛ ji kpaago ɔ lɛɛ nyɛɛ ye lɛ kaa Hejɔɔmi ligbi klɔuklɔu ha imi Yawɛ. Nɔ tsuaa nɔ nɛ ma tsu ní jamɛ a ligbi ɔ, a gbe lɛ.

³ Nyɛ ko slɛ la po ngɛ nyɛ we ɔmɛ a mi ngɛ Hejɔɔmi ligbi ɔ nɔ.”

Bɔ sami ngɛ bo tsu ɔ mi

⁴ Mose de Israel ma a tsuo ke, “Bɔ nɛ Yawɛ fa ji nɛ ɔ nɛ.

⁵ Nyɛ ba ke imi Yawɛ ní. Nɔ tsuaa nɔ nɛ ngɛ he tsui kaa e maa ke nɔ́ ko ɔ, nɔ́ nɛ e ngɔ kɛ ba ji sika tsu, sika hiɔ, kɛ akɔblee;

⁶ kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ; apletsi he bwɔmi,

⁷ agbosu he womi nɛ a wo lɛ kɔbɛi; apletsi he womi nɛ a je blɔ pee; akasia tso;

⁸ kane mi nu; tsopa nɛ a kɛ peeɔ nɔ pɔmi nu, kɛ tsopa kɛ e he via;

⁹ tɛ nɛ a tsɛɛ shoham, kɛ tɛhi nɛ a he jua wa nɛ a maa ma kɛ wo efɔd ɔ kɛ gugue nya nɔ́ ɔ mi ɔ.

Níhi nɛ a kɛ maa pee kpe he bo tsu ɔ

¹⁰ “Ga ní tsuli ɔmɛ nɛ ngɛ nyɛ kpɛti ɔ, mɛ tsuo a ba nɛ a ba tsu ní tsumi nɛ Yawɛ fa nyɛ ke nyɛ tsu ɔ.

¹¹ Kpe he bo tsu ɔ, e he hami ní ɔmɛ, kɛ e nɔ hami ní ɔmɛ, e gbowe ɔmɛ kɛ e sima tso ɔmɛ, e mani tso ɔmɛ, e titima amɛ kɛ e nɔ dami ní ɔmɛ;

¹² somi daka a, e he tso ɔmɛ, nya nɔ́ ɔ, kɛ tsu mi pomi bo ɔ nɛ a kɛ tsiɔ somi daka a hɛ mi ɔ;

¹³ okplɔɔ ɔ, e he tso ɔmɛ, kɛ e he níhi tsuo, kɛ abolo klɛdɛɛ ɔ nɛ a kɛ maa Yawɛ hɛ mi ɔ;

¹⁴ kane tso ɔ hu nɛ a suɔ la kɛ maa nɔ ɔ, kɛ e he níhi; kane ɔmɛ kɛ nu nɛ a kɛ woɔ a mi ɔ;

¹⁵ bɔ sami la tɛ ɔ nɛ a sãã tsopa kɛ e he via ngɛ nɔ ɔ, kɛ e tso ɔmɛ; nɔ pɔmi nu ɔ, tsopa kɛ e he via a; kpe he bo tsu ɔ sinya a nya bo ɔ,

¹⁶ bɔ sami la tɛ ɔ nɛ a sãã sami bɔ ngɛ nɔ ɔ, e he akɔblee piɛ ɔ, e tso ɔmɛ, kɛ e he níhi tsuo; nyu kã a kɛ e he kla a;

¹⁷ bo ɔmɛ nɛ kplaa si ngɛ kpe he bo tsu ɔ piɛ ɔ he ɔ, e titima amɛ kɛ a nɔ dami ní ɔmɛ; piɛ ɔ nya bo ɔ;

¹⁸ kpe he bo tsu ɔ he plɛɛko ɔmɛ, piɛ ɔ he plɛɛko ɔmɛ, kɛ a tangme ɔmɛ;

¹⁹ kɛ tade saminyawiiwi ɔmɛ nɛ osɔfo Aaron kɛ e binyumu ɔmɛ maa wo kɛ sɔmɔ ngɛ he klɔuklɔu ɔ.”

Ma a kɛ bɔ sami ní ɔmɛ ba

²⁰ Kɛkɛ nɛ Israel ma a tsuo je Mose he kɛ ho.

²¹ Nɔ tsuaa nɔ ngɔ e nike ní ba ha Yawɛ, konɛ a kɛ ma kpe he bo tsu ɔ kɛ e mi sɔmɔmi ní ɔmɛ tsuo, kɛ tade klɔuklɔu ɔmɛ. Nɔ tsuaa nɔ ha kɛ je e tsui mi kaa bɔ nɛ mumi ɔ fa lɛ ɔ.

²² Nyumuhi kɛ yihi tsuo nɛ ngɛ he tsui ɔ ngɔ gugue nya gahi, tue nya ní, nguɛ ní, kuɛ ní, kɛ sika tsu june ní kpakpa babauu ba ke Yawɛ.

²³ Nɔ tsuaa nɔ nɛ ngɛ kpa bluu, aloo kpa nɛ hɛɛ alamua tu su, aloo kpa tsu, aloo kpa hiɔ kpakpa, aloo apletsi he bwɔmi, aloo agbosu he womi nɛ a wo lɛ kɔbɛi, aloo apletsi he womi nɛ a je blɔ pee ɔ ngɔ kɛ ba.

²⁴ Nɔ tsuaa nɔ nɛ ma nyɛ ha sika hiɔ, loo akɔblee ɔ ngɔ kɛ ba ha Yawɛ; nɛ ni nɛmɛ nɛ ngɛ akasia tsohi nɛ hi kɛ ha ní tsumi ɔ, mɛ hu a ngɔ kɛ ba.

²⁵ Yihi tsuo nɛ ga ngɛ a hɛ mi ɔ tslɔ kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa kɛ ba.

²⁶ Mɛ kɛ̃ a ngɔ apletsi he bwɔmi kɛ tslɔ kpa kɛ ba.

²⁷ Nikɔtɔma amɛ ngɔ shoham tɛhi, kɛ tɛ kpahi nɛ a he jua wa nɛ a maa ma kɛ wo efɔd ɔ, kɛ gugue nya nɔ́ ɔ mi ɔ kɛ ba;

²⁸ kɛ tsopa kɛ e he via, kane mi nu, nɔ pɔmi nu, kɛ nu nɛ a kɛ peeɔ tsopa kɛ e he via.

²⁹ Israel ma a tsuo, nyumuhi kɛ yihi, kɛ nɔ tsuaa nɔ nɛ e ta e tsui mi kaa e ha nɔ́ ko nɛ a kɛ tsu ní tsumi slɔɔtohi nɛ Yawɛ fa Mose ke a tsu ɔ je a tsui mi faa ngɔ a nike ní ɔmɛ kɛ ba ba ha Yawɛ.

Ga ní tsuli ɔmɛ

³⁰ Mose de Israel bi ɔmɛ ke, “Nyɛ na, Yawɛ je blɔ hla Uri binyumu Bezalel, Hur bibi ɔ kɛ je Yuda wɛtso ɔ mi,

³¹ nɛ e ngɔ mumi mi nike ní babauu ngɔ ha lɛ. Yawɛ dloo lɛ ga ní tsumi he juɛmi, kɛ nile ha ga ní tsumi slɔɔtohi tsuo.

³² E nyɛɔ nɛ e ngɔɔ sika tsu, sika hiɔ, kɛ akɔblee kɛ peeɔ ga níhi.

³³ E nine nya da kɛ tɛhi nɛ a he jua wa a he ní tsumi, kɛ tso hlɔmi, kɛ ga ní tsumi slɔɔtohi tsuo pɛpɛɛpɛ a tsumi.

³⁴ Yawɛ ha e kɛ Oholiab, Ahisamak binyumu ɔ nɛ je Dan wɛtso ɔ mi ɔ ga ní tsumi he juɛmi nɛ a kɛ tsɔɔ ni kpahi ga ní tsumi slɔɔto ɔmɛ.

³⁵ E dloo mɛ ga ní tsumi tsuaa ga ní tsumi he juɛmi, kɛ nile babauu kɛ ha tso, aloo tɛ, aloo dade mi kpɛmi, kɛ ga ní tɛnimi kɛ ní kadimi nɛ a ngɔɔ kpa bluu, kpa nɛ hɛɛ alamua tu su, kpa tsu, kɛ kpa hiɔ kpakpa nɛ a tslɔ kɛ peeɔ ɔ. A nyɛɔ nɛ a tsuɔ ga ní tsumi tsuaa ga ní tsumi, nɛ a peeɔ ga ní tɛnimi hulɔ.