Mose II, 34 - BAIBLO ALOO NGMAMI KLƆUKLƆU Ɔ

Mlaa tɛ tɛtlɛɛ enyɔne ɔmɛ

¹ Yawɛ de Mose ke, “Mo kó tɛ tɛtlɛɛ enyɔ kaa kekle ní ɔmɛ, konɛ ma ngma munyuhi nɛ ngɛ kekle tɛ ɔmɛ nɛ o ywia a a nɔ ɔ kɛ fɔ nɔ.

² Dla o he nɛ hwɔɔ mɔtu ɔ o kuɔ Sinai yo ɔ kɛ ba, nɛ o kɛ mi ba kpe ngɛ yo ɔ yi mi.

³ “Nɔ ko nɔ ko nɛ ko piɛ o he kɛ ba; a ko na nɔ ko ngɛ yo ɔ nɔ he ko, nɛ to, loo na kó ba ye ní ngɛ yo ɔ sisi.”

⁴ Kɛkɛ nɛ Mose kó tɛ tɛtlɛɛ enyɔ kaa kekle ní ɔmɛ. E te si mɔtu mla, nɛ e ngɔ tɛ tɛtlɛɛ enyɔ ɔmɛ ngɔ ma e dɛ, nɛ e kuɔ kɛ ho Sinai yo ɔ nɔ ya kaa bɔ nɛ Yawɛ fa lɛ ɔ. Benɛ e yaa a, e hɛɛ tɛ tɛtlɛɛ enyɔ ɔmɛ ngɛ e dɛ mi.

⁵ Yawɛ kple si kɛ ba ngɛ bɔku mi nɛ e ba da si ngɛ Mose kasa nya, nɛ e pale lɛ nitsɛ e biɛ nɛ ji Yawɛ ɔ.

⁶ Lɔ ɔ se ɔ, Yawɛ ba be ngɛ Mose hɛ mi, nɛ e de kɛ gbi wawɛɛ ke, “Imi Yawɛ ɔ, Mawu mɔbɔ nalɔ, kɛ dloolɔ ji mi; ye mi mi fu we mla, nɛ ye suɔmi kɛ anɔkuale yemi hiɛ babauu.

⁷ I yeɔ ye si womi nɔ kɛ haa nimli akpeakpe, nɛ i ngɔɔ a he yayami kɛ tɔmi ngɔ paa mɛ. Se kɛ̃ i gblaa bimɛ kɛ bibimɛ a tue hluu kɛ ya siɔ yi nɔ etɛne kɛ eywiɛne bimɛ ngɛ a tsɛmɛ kɛ a nɛmɛ a yayamihi a he.”

⁸ Mose kɛ he sɔmi kpla si nɛ e ja Mawu.

⁹ E de ke, “Yawɛ, ke niinɛ nɛ o ngɛ ye he bua jɔmi ɔ, lɛɛ i kpa mo pɛɛ nɛ o kɛ wɔ nɛ ya. E ngɛ mi kaa ma nɛ ɔ kuɛ wa mohu, se moo ngɔ wa tɔmi ɔmɛ, kɛ wa he yayami ɔmɛ kɛ pa wɔ, nɛ o ngɔ wɔ kɛ pee mo nitsɛ o ma.”

A pee somi ɔ ehe ekohu

¹⁰ Yawɛ de Mose ke “Hyɛ i kɛ Israel ma a ngɛ soe. Ma pee nyakpɛ níhi ngɛ a kpɛti nɛ eko bɛ hyɛ ngɛ je nɛ ɔ mi he ko he ko, aloo ngɛ ma ko ma ko mi. Je ma amɛ tsuo nɛ bɔle mo ɔ maa na ní nguahi nɛ imi Yawɛ, i ngɛ tsue; ejakaa nɔ́ nɛ i yaa pee ha mo ɔ he ngɛ gbeye.

¹¹ Mlaa nɛ i ngɛ mo woe mwɔnɛ ɔ, moo ye nɔ. Ma fie Amor bi, Kanaan bi, Hit bi, Periz bi, Hiv bi, kɛ Yebus bi ɔmɛ kɛ je blɔ mi ha mo.

¹² Hyɛ saminya nɛ o kɛ ma he nɛ nyɛ yaa a mi bi ɔmɛ kó so somi ko, nɛ lɔ ɔ ba plɛ klama nɛ a tsɔ mo.

¹³ Dɛbi, nyɛɛ hule a bɔ sami la tɛ ɔmɛ; nyɛɛ gbɛ a wɔ piɛ ɔmɛ, nɛ nyɛɛ ywia a yo wɔ ɔ nɛ a tsɛɛ lɛ Ashera a we amaga amɛ.

¹⁴ “Mo ko ja mawu kpa ko, ejakaa imi Yawɛ Mawu ɔ, a kɛ mi plee we nɔ́ he.

¹⁵ O kɛ nihi nɛ ngɛ zugba a nɔ ɔ kó so somi ko. Ke pi ja a, ke a ngɛ a mawu ɔmɛ jae nɛ a ngɛ bɔ sãe kɛ ngɛ mɛ hae ɔ, a ti nɔ ko kɛ̃ ma tsɛ mo ní yemi, nɛ o ma ya ye ní nɛ a kɛ sã bɔ ha a mawu ɔmɛ ɔ eko.

¹⁶ Jehanɛ hu, nyɛ ma ya ngɔ a biyi ɔmɛ ekomɛ ba ha nyɛ binyumu ɔmɛ. Nɛ ke a biyi ɔmɛ ngɛ a mawu ɔmɛ jae ɔ, a maa gbla nyɛ binyumu ɔmɛ kɛ ya piɛ a he kɛ ja a mawu ɔmɛ.

¹⁷ “Mo ko ngɔ nɔ́ ko nɛ a sile kɛ pee mawu nɛ o ja.

¹⁸ “Moo ye Abolokplolo nyami be ɔ. Kaa bɔ nɛ i fa mo ɔ, moo ye abolo kplolo ligbi kpaago ngɛ Abib nyɔhiɔ ɔ mi be nɛ a to ɔ pɛpɛɛpɛ; ejakaa Abib nyɔhiɔ ɔ mi o je Egipt kɛ ba a nɛ.

¹⁹ “Bitɛte tsuaa bitɛte, kɛ o we mi lohwehi a kpɛti kekleekle eku tsuaa eku ɔ, ye nɔ ji lɛ; na jio, to jio.

²⁰ O teji kekleekle bi ɔ, o maa ngɔ jijɔ kɛ dani lɛ. Ke o be suɔe nɛ o dani lɛ ɔ, lɛɛ o maa ku e kuɛ. O ma dani o bitɛte tsuaa bitɛte. Nɔ ko nɔ ko nɛ ko ba ye hɛ mi kɛ e dɛ gu.

²¹ “Mo tsu ní ligbi ekpa, se ligbi nɛ ji kpaago ɔ lɛɛ moo jɔɔ o he; ní gbami be tete jio, ní kpami be tete jio.

²² “Moo ye Ngmakpami be ɔ be mi nɛ a ngɛ kpokploku kpɔe; nɛ o ye Gbasisihimi nyami be ɔ jeha a nyagbe.

²³ “Daa jeha a, o ma a mi nyumu ɔmɛ tsuo nɛ a ba bua si etɛ ngɛ imi Yawɛ, Israel Mawu ɔ, ye hɛ mi.

²⁴ Ma fie je ma amɛ kɛ je o blɔ ɔ nɔ, nɛ ma bli o huzu ɔmɛ a mi. Nɛ ke o ba Yawɛ, o Mawu ɔ hɛ mi si etɛ ngɛ jeha mi ɔ, nɔ ko hɛ be o zugba a nɔ kɔe.

²⁵ “Koo ngɔ abolo nɛ a kɛ masa sã a ngɔ piɛ lohwe nɛ o kɛ ngɛ bɔ sãe ha mi ɔ he. Lohwe nɛ a gbe Hetsɔmi nyami be ɔ hu, je nɛ ko na yi.

²⁶ “Daa jeha a, ngɔɔ o zugba a nɔ kekleekle yiblii kɛ ba imi Yawɛ, o Mawu ɔ, ye we ɔ. Koo hoo apletsi bi ngɛ e nyɛ nyɔ nyu mi.”

²⁷ Yawɛ de Mose ke, “Ngmaa munyu nɛ ɔmɛ kɛ fɔ si; ejakaa somi nɛ i kɛ mo, kɛ Israel ngɛ soe ɔ daa si ngɛ kikɛmɛ a munyu nɛ ɔmɛ a nɔ.”

²⁸ Mose kɛ Yawɛ hi lejɛ ɔ nyɔ kɛ pia ligbi nyingmi eywiɛ; e yi nɔ́ ko ɔ, nyu hu e nui. Nɛ e ngma somi munyu ɔmɛ nɛ ji mlaa nyɔngma amɛ ngɔ fɔ tɛ tɛtlɛɛ ɔmɛ a nɔ.

Mose kple si kɛ je Sinai yo ɔ nɔ

²⁹ Benɛ Mose kple si kɛ je Sinai yo ɔ nɔ kɛ ma a, e hɛɛ tɛ tɛtlɛɛ enyɔ ɔmɛ nɛ mlaa amɛ ngɛ a nɔ ɔ ngɛ e dɛ mi. E hɛ mi ngɛ kpɛe, ejakaa e kɛ Yawɛ ya tu munyu; se mohu lɛ nitsɛ e li enɛ ɔ.

³⁰ Aaron kɛ Israel bi ɔmɛ tsuo na kaa Mose hɛ mi ngɛ kpɛe, nɛ a ye gbeye kaa a maa su e he.

³¹ Se Mose tsɛ mɛ, nɛ Aaron kɛ ma nikɔtɔma amɛ tsuo ba e ngɔ, nɛ Mose kɛ mɛ tu munyu.

³² Lɔ ɔ se ɔ, Israel ma mluku ɔ tsuo hɛ mɛ kɛ ba e ngɔ, nɛ e wo mɛ mlaa amɛ tsuo nɛ Yawɛ ha lɛ ngɛ Sinai yo ɔ nɔ ɔ.

³³ Benɛ Mose kɛ mɛ tu munyu gbe nya a, e ngɔ nɔ́ kɛ ha e hɛ mi.

³⁴ Be tsuaa be nɛ Mose ma ya sɛ kpe he bo tsu ɔ mi nɛ e kɛ Yawɛ ma ya tu munyu ɔ, e jeɔ hɛ mi hami nɔ́ ɔ ngɛ e hɛ mi kɛ ya siɔ be nɛ e miɔ nɛ e maa je kpo. Ke e je kpo kɛ ba nɛ e ba de Israel bi ɔmɛ nɔ́ tsuaa nɔ́ nɛ Yawɛ fa lɛ ke e de ɔ,

³⁵ a naa kaa e hɛ mi ngɛ kpɛe. Lɔ ɔ se ɔ, Mose kpaleɔ ngɔɔ nɔ́ kɛ haa e hɛ mi kɛ ya siɔ be nɛ e maa ya nɛ e kɛ Yawɛ ma ya tu munyu ekohu.