Mose II, 32 - BAIBLO ALOO NGMAMI KLƆUKLƆU Ɔ

Sika tsu na bi ɔ

¹ Benɛ ma a na kaa Mose se ya fia si ngɛ yo ɔ nɔ, nɛ e kple we si kɛ bɛ ɔ, ma a bua a he nya kɛ ba na Aaron, nɛ a ba de lɛ ke, “Kikɛmɛ a Mose nɛ ɔ nɛ je wɔ kɛ je Egipt zugba a nɔ ɔ, wa li sane nɛ ya ba e nɔ. Lɔ ɔ he ɔ, moo pee mawu ha wɔ nɛ e nyɛɛ wa hɛ mi.”

² Aaron de mɛ ke, “Nyɛ je sika tsu tue nya ní ɔmɛ ngɛ nyɛ yi ɔmɛ, kɛ nyɛ binyumu ɔmɛ, kɛ nyɛ biyi ɔmɛ a tue mi kɛ ba ha mi.”

³ Kɛkɛ nɛ ma a tsuo je sika tsu tue nya ní ɔmɛ ngɛ a tue mi, nɛ a ngɔ kɛ ba ha Aaron.

⁴ E he tue nya ní ɔmɛ ngɛ a dɛ nɛ e sile, nɛ e plɛ sika tsu nyu ɔ kɛ wo tso nɛ a kpɛ́ mi, nɛ e kɛ pee sika tsu na bi. Kɛkɛ nɛ ma a de ke, “Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!”

⁵ Benɛ Aaron na nɔ́ nɛ ɔ, e puɛ bɔ sami la tɛ ngɛ sika tsu na bi ɔ hɛ mi, nɛ e fiɛ ke, “Hwɔɔ ɔ, a maa ye nyami ligbi ha Yawɛ.”

⁶ E nɔ jena makɛ mla a, ma a te si nɛ a sã sami bɔhi, nɛ a kɛ tue mi jɔmi bɔhi hu ba. Ma a pue si, nɛ a ye ní, nɛ a nu ní; nɛ lɔ ɔ se ɔ, a fiɛ yo kɛ nyumu yakayaka fiɛmihi.

⁷ Yawɛ de Mose ke, “Mo kple si esɔesɔ; ejakaa o ma nɛ ji ni ɔmɛ nɛ o kpaka kɛ je Egipt zugba a nɔ kɛ ba a, a ble a he.

⁸ Blɔ nɛ i fa mɛ ke a nyɛɛ nɔ ɔ, a gba kɛ je nɔ momo; a puɛ na bi amaga nɛ a ja lɛ, nɛ a sã bɔ ha lɛ nɛ a de ke, ‘Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!’ ”

⁹ Yawɛ ya nɔ nɛ e de Mose ke, “I kpa si nɛ i na kaa ma nɛ ɔ ji nimli komɛ nɛ a kuɛ wa saminya!

¹⁰ Lɔ ɔ he ɔ, moo hɛ mo kɛ ya se; i kɛ mɛ maa to ní nɛ ma kpata a hɛ mi; se moo lɛɛ ma ha o kɛ o weku kɛ nina maa bɔ kɛ pee ma kpetekpleenyɛ.”

¹¹ Se Mose kpa Yawɛ, e Mawu ɔ pɛɛ, nɛ e de ke, “Yawɛ, mɛni he je o mi mi fu o ma a nɛ o kɛ he wami kpetekpleenyɛ, kɛ kɔni si wami kpaka mɛ kɛ je Egipt zugba a nɔ ɔ?

¹² Mɛni he je nɛ o ma ha nɛ Egipt bi ɔmɛ ma de ke, ‘E to yi mi yaya kaa e ma kpata e ma a hɛ mi ngɛ yo ɔmɛ a nɔ; lɔ ɔ he je nɛ e ya je mɛ kɛ je Egipt ɔ nɛ.’ Ha nɛ o mi mi fumi ɔ nya nɛ ba si, nɛ o kpale o nya se ngɛ yayami nɛ jinɛ o to kaa o maa pee o ma a he.

¹³ Mo kai o tsɔli Abraham, Isak, kɛ Yakob. Mo kai mo nitsɛ o kita nɛ o ka ke, ‘Ma ha nɛ nyɛ nina maa hiɛ babauu kaa hiɔwe dodoehi, nɛ ma ngɔ zugba nɛ ɔ tsuo nɛ i wo nyɛ e he si ɔ kɛ ha mɛ, nɛ e maa pee a nɔ kɛ ya neneene ɔ.’ ”

¹⁴ Kɛkɛ nɛ Yawɛ kpale e nya se, nɛ yayami nɛ jinɛ e to kaa e maa ba ma a nɔ ɔ bɛ a nɔ hu.

¹⁵ Kɛkɛ nɛ Mose plɛ e he nɛ e kple si kɛ je yo ɔ nɔ kɛ ma, nɛ e hɛɛ tɛ tɛtlɛɛ enyɔ ɔmɛ nɛ a ngma mlaa amɛ ngɔ fɔ a nɔ ɔ ngɛ e dɛ mi; a ngma mlaa amɛ ngɛ hɛ mi kɛ se tsuo.

¹⁶ Mawu nitsɛ nɛ kpɛ́ tɛ tɛtlɛɛ ɔmɛ; nɛ mlaa amɛ nɛ a ngma ngɛ a nɔ ɔ hu, Mawu nitsɛ nɛ ngma.

¹⁷ Benɛ ma a hwɔ lele nɛ Yoshua nu he ɔ, e de Mose ke, “Moo bu tue! A ngɛ ta hwue ngɛ ma a sito he ɔ.”

¹⁸ Se Mose he nɔ nɛ e de ke, “Dɛbi, pi ni nɛmɛ nɛ ye manye ngɛ ta mi a lele hwɔmi, nɛ pohu pi ni nɛmɛ nɛ a ye a nɔ a bubuubui, kɛ ngmlaa ji nɛ ɔ; se mohu lali a gbi i ngɛ nue nɛ ɔ nɛ.”

¹⁹ Benɛ Mose miɔ nɛ e maa su ma a sito he ɔ, nɛ́ e na na bi ɔ, kɛ ni ɔmɛ nɛ a ngɛ doe ɔ, e mi mi fu; nɛ e kɛ tɛ tɛtlɛɛ ɔmɛ nɛ e hɛɛ ngɛ e dɛ mi ɔ fia si ngɛ yo ɔ sisi, nɛ e ywia mɛ.

²⁰ E wo na bi ɔ nɛ a pee ɔ, nɛ e mɛ he la, nɛ e sile. Lɔ ɔ se ɔ, e wɛɛ lɛ nɛ e pee mamu bukɔbukɔ, nɛ e ngɔ fĩa nyu hɛ mi, nɛ e ngɔ ha Israel bi ɔmɛ nɛ a nu.

²¹ Mose bi Aaron ke, “Mɛni ma nɛ ɔ pee mo loko o ha nɛ a pee yayami agbo kaa kikɛ nɛ ɔ?”

²² Aaron he nɔ ke, “Ye nyɔmtsɛ, o mi mi nɛ ko fu mi. Mo nitsɛ o le nimli nɛ ɔmɛ kaa nɔ́ yaya peemi he a nyaa.

²³ Mɛ nitsɛmɛ nɛ a ba de mi ke, ‘Moo pee mawu ha wɔ nɛ e nyɛɛ wa hɛ mi; ejakaa kikɛmɛ a Mose nɛ ɔ nɛ je wɔ kɛ je Egipt zugba a nɔ ɔ, wa li nɔ́ nɛ ya ba e nɔ.’

²⁴ I de mɛ ke, ‘Nɔ tsuaa nɔ nɛ ngɛ sika tsu ɔ, e ngɔ kɛ ba.’ A ngɔ kɛ ba, nɛ i sake kɛ fɔ la mi, nɛ nɔ́ nɛ je mi kɛ ba ji kikɛmɛ a na bi nɛ ɔ nɛ!”

²⁵ Benɛ Mose na kaa Aaron nine kpi ma a he, nɛ ma a ngɛ basabasa pee kɛ ngɛ a hɛ mi si puee ngɛ a he nyɛli ɔmɛ a hɛ mi ɔ,

²⁶ e ho nɛ e ya da si ngɛ ma a sito he ɔ agbo ɔ nya, nɛ e de ke, “Nɔ tsuaa nɔ nɛ ngɛ Yawɛ se ɔ, nɔ ɔ nɛ ba ye ngɔ!” Kɛkɛ nɛ Levi bi ɔmɛ tsuo bua a he nya ngɛ he kake, nɛ a bu kɛ ba e ngɔ.

²⁷ Nɛ e de mɛ ke, “Bɔ nɛ Yawɛ, Israel Mawu ɔ de ji nɛ ɔ nɛ: ‘Nyɛ ti nɔ tsuaa nɔ nɛ mia kɛ klaate, nɛ nyɛɛ kpa ma a sito he ɔ tsuo kɛ ya kɛ ba; kɛ je agbo kake nya kɛ yaa si agbo kpa nya, nɛ nyɛɛ gbe nɔ tsuaa nɔ nɛ nyɛ maa na; nyɛmi jio, huɛ jio, nɔ lele jio!’ ”

²⁸ Levi bi ɔmɛ pee kaa bɔ nɛ Mose fa mɛ ɔ pɛpɛɛpɛ; nɛ jamɛ a ligbi ɔ, a gbe nimli maa pee akpe etɛ.

²⁹ Mose de mɛ ke, “Mwɔnɛ ligbi nɛ ɔ, nyɛ je nyɛ he ngɔ to kaa Yawɛ sɔmɔli, ejakaa nyɛ ti nɔ tsuaa nɔ gbe lɛ nitsɛ e binyumu, kɛ lɛ nitsɛ e nyɛminyumu. Lɔ ɔ he ɔ, Yawɛ hu maa gbaa nyɛ.”

He piami

³⁰ E nɔ jena a, Mose de ma a ke, “Nyɛ pee yayami agbo. Se kɛ̃, ma kuɔ yo ɔ kɛ ya Yawɛ ngɔ, kaa alini e maa nu ye gbi, nɛ e maa ngɔ nyɛ he yayami ɔ ngɔ pa nyɛ lo.”

³¹ Lɔ ɔ he ɔ, Mose kpale e se kɛ ho Yawɛ ngɔ ya nɛ e ya de lɛ ke, “Anɔkuale, ma nɛ ɔ pee yayami agbo kaa a ngɔ sika tsu kɛ pee mawu kɛ ha a he.

³² Ke e maa hi ɔ, moo ngɔ a he yayami ɔ ngɔ pa mɛ. Se ke o kɛ a he yayami ɔ be mɛ pae ɔ, lɛɛ i kpa mo pɛɛ nɛ o gbe ye biɛ ngɛ womi ɔ nɛ o ngmaa o ni ɔmɛ a biɛ ngɛ mi ɔ mi mɔ.”

³³ Yawɛ he nɔ ke, “Nihi nɛ pee yayami kɛ si mi ɔ, mɛ pɛ a biɛ ma gbe ngɛ ye womi ɔ mi ɔ nɛ.

³⁴ Moo lɛɛ yaa nɛ o ya kpaka ye ma a kɛ ya he nɛ i de mo ɔ. Ye bɔfo ɔ maa nyɛɛ o hɛ mi. Se be ma nɛ ma wo ma a hiɔ ngɛ a he yayami ɔ he.”

³⁵ Lɔ ɔ he ɔ, Yawɛ kɛ gbenɔ hiɔ gbla ma a tue; ejakaa a nyɛ Aaron nɔ nɛ e pee sika tsu na bi ha mɛ.