Mose II, 30 - BAIBLO ALOO NGMAMI KLƆUKLƆU Ɔ

Tsopa kɛ e he via sami la tɛ ɔ

¹ “Ngɔɔ akasia tso kɛ pee bɔ sami la tɛ, nɛ a sã tsopa kɛ e he via ngɛ nɔ.

² A pee la tɛ ɔ nɛ e hi kɔ nya eywiɛ; e kami nɛ pee nine mi blimi enyɔ, e blimi hu nine mi blimi enyɔ, kɛ e si temi nine mi blimi eywiɛ. E kɛ e koli ɔmɛ ngɛ kɔ nya eywiɛ ɔmɛ nɛ tsa.

³ Ngɔɔ sika tsu ngmingmiingmi kɛ ha e he tsuo: e yi mi, e kasa nya amɛ, kɛ e koli ɔmɛ, nɛ o kɛ sika tsu ɔ kɛ̃ nɛ wo zã dɛɛ kɛ bɔle lɛ kɛ kpe.

⁴ Moo pee sika tsu ga enyɔ kɛ wo he ngɛ sika tsu zã a sisi. Tsohi nɛ a kɛ maa hɛɛ la tɛ ɔ, a kɛ hɔɔ ga nɛ ɔmɛ a mi. Ga enyɔ nɛ hi kasa hiɛ, nɛ enyɔ hu nɛ hi kasa hiɛ ngɛ a sibi a hanɔ.

⁵ Ngɔɔ akasia tso kɛ hlɔ tso nɛ ɔmɛ, konɛ o ngɔ sika tsu kɛ ha a he.

⁶ Ngɔɔ bɔ sami la tɛ nɛ ɔ kɛ ma tsu mi pomi bo ɔ se ngɛ daka a nɛ somi womi ɔ ngɛ mi ɔ hɛ mi. Lejɛ ɔ ji he nɛ i kɛ nyɛ maa kpe ngɛ.

⁷ Daa mɔtu ke Aaron ma kane ɔmɛ a he ní tsumi ɔ, e sã tsopa kɛ e he via ngɛ nɔ.

⁸ Daa gbɔkuɛ hu ke e ma kane ɔmɛ sumi ɔ, e pee ja nɔuu. A sã tsopa kɛ e he via nɛ ɔ daa ngɛ imi Yawɛ, ye hɛ mi. A pee nɔ́ nɛ ɔ yi nɔ tsuaa yi nɔ.

⁹ Nyɛ ko sã tsopa kɛ e he via kpa ko, aloo sami bɔ, aloo niye ní bɔ ngɛ bɔ sami la tɛ nɛ ɔ nɔ; nyɛ ko sã wai bɔ ngɛ lejɛ ɔ hulɔ.

¹⁰ Daa jeha a, Aaron nɛ pee kusumi kɛ tsukɔ bɔ sami la tɛ ɔ he. Lohwe ɔ nɛ a kɛ ba sã yayami pami bɔ ɔ, e ngɔ e muɔ ɔ ngɔ pue bɔ sami la tɛ ɔ koli eywiɛ ɔmɛ a nɔ. A pee nɔ́ nɛ ɔ daa jeha, yi nɔ tsuaa yi nɔ. Bɔ sami la tɛ nɛ ɔ maa pee klɔuklɔu nitsɛnitsɛ kɛ ha imi Yawɛ.”

Kpe he bo tsu ɔ he tó tsumi

¹¹ Yawɛ de Mose ke,

¹² “Ke o kane Israel bi ɔmɛ nɛ o na a hiɛmi ɔ, a ti nɔ tsuaa nɔ maa ngɔ nɔ́ nɛ e kɛ ma kpɔ e klaa kɛ ba ha mi, bɔ nɛ pee nɛ gbenɔ hiɔ kó ba sɛ a kpɛti be mi nɛ a ngɛ ni ɔmɛ kanee.

¹³ Nɔ tsuaa nɔ nɛ a maa kane lɛ ɔ, e maa wo hiɔ nɛ ɔ kaa bɔ nɛ a po fɔ si ngɛ kpe he bo tsu ɔ mi. Nɔ tsuaa nɔ maa wo hiɔ nɛ ɔ kaa nike ní ko nɛ e ngɔ kɛ ba ha imi Yawɛ.

¹⁴ Nɔ tsuaa nɔ nɛ ye kɛ je jeha nyingmi enyɔ kɛ yaa a, ke a kane lɛ pɛ e ngɔ nike ní nɛ ɔ ba ha mi.

¹⁵ Ke nyɛ ngɔ nyɛ klaa kpɔmi hiɔwo nike ní nɛ ɔ kɛ ma imi Yawɛ, ye hɛ mi ɔ, ohiatsɛ kɛ niatsɛ tsuo nɛ a wo kaa bɔ nɛ a po fɔ si ɔ; ohiatsɛ nɛ ko ha fa, nɛ niatsɛ hu nɛ ko ha kɛ be nɔ.

¹⁶ Mo he sika nɛ ɔ ngɛ Israel bi ɔmɛ a dɛ, nɛ o kɛ wo kpe he bo tsu ɔ sɔmɔmi kpɛɛ ɔ mi. Tó nɛ ɔ maa pee nɔ́ nɛ a kɛ ma kpɔ a klaa, konɛ imi Yawɛ, ma kai nɛ ma bu a he.”

Akɔblee kã a

¹⁷ Yawɛ de Mose ke,

¹⁸ “Moo pee akɔblee kã kɛ e sisi akɔblee kla. Ngɔɔ kɛ ma kpe he bo tsu ɔ kɛ bɔ sami la tɛ ɔ a kpɛti, nɛ o yɛ nyu kɛ wo mi.

^19-21 Ke Aaron kɛ e binyumu ɔmɛ maa sɛ kpe he bo tsu ɔ mi ɔ, a ngɔ nyu ɔ kɛ fɔ a dɛ kɛ a nane he, konɛ a ko gbo. Ja nɔuu a fɔ a dɛ kɛ a nane he loko a ya bɔ sami la tɛ ɔ he nɛ a ya sã bɔ ha imi Yawɛ bɔ nɛ pee nɛ a ko gbo. Nɔ́ nɛ ɔ maa pee mlaa nɛ fɔɔ si kɛ ha Aaron kɛ e nina kɛ yaa neneene.”

Nɔ pɔmi nu ɔ

²² Yawɛ de Mose ekohu ke,

²³ “Yaa nɛ o ya hla tsopa kɛ e he via kpakpa nɛ ɔmɛ: mire nyu kilo ekpa, sinamon nɛ jeɔ via ja hiɛmi fa, nɛ ji kilo etɛ, kalamo nɛ jeɔ via kilo etɛ,

²⁴ kasia kilo ekpa, kaa bɔ nɛ a ngmɛɛ ní ngɛ kpe he ɔ, kɛ oliv nu lita eywiɛ.

²⁵ Ngɔɔ tsopa nɛ ɔmɛ kɛ pee nɔ pɔmi nu klɔuklɔu, nɛ e hi kaa nɔ́ nɛ tsopa kɛ e he via he ní tsulɔ nitsɛ pee. E maa pee nɔ pɔmi nu klɔuklɔu.

²⁶ Ngɔɔ nu nɛ ɔ kɛ pɔ kpe he bo tsu ɔ, daka a nɛ somi womi ɔ ngɛ mi ɔ,

²⁷ okplɔɔ ɔ kɛ e he ní ɔmɛ tsuo, kane tso ɔ kɛ e he ní ɔmɛ, la tɛ ɔ nɛ a sãã tsopa kɛ e he via ngɛ nɔ ɔ,

²⁸ la tɛ ɔ nɛ a sãã sami bɔ ngɛ nɔ ɔ kɛ e he ní ɔmɛ tsuo, kɛ nyu kã a kɛ e sisi kla a.

²⁹ Moo tsukɔ ní nɛ ɔmɛ a he, kɛkɛ ɔ, a maa pee klɔuklɔu nitsɛnitsɛ; nɔ tsuaa nɔ, aloo nɔ́ tsuaa nɔ́ nɛ he maa sa a he ɔ hu maa pee klɔuklɔu.

³⁰ Jehanɛ moo pɔ Aaron kɛ e binyumu ɔmɛ nu, nɛ o tsukɔ a he, konɛ a sɔmɔ mi kaa osɔfohi.

³¹ Mo de Israel bi ɔmɛ ke, ‘Enɛ ɔ maa pee ye nɔ pɔmi nu klɔuklɔu nɛ a kɛ ma tsu kusumi ní yi nɔ tsuaa yi nɔ.

³² A ko ngɔ kɛ pɔ nɔ saisaa, nɛ a ko pee nu ɔ ekpa ko nɛ ngɛ kaa jã kɛ̃. E ji nɔ klɔuklɔu, lɔ ɔ he ɔ, nyɛ ha nɛ e hi klɔuklɔu.

³³ Nɔ tsuaa nɔ nɛ maa pee nu ɔ eko nɛ ngɛ kaa lɔ ɔ, aloo nɔ tsuaa nɔ nɛ maa ngɔ nu nɛ ɔ eko kɛ pɔ nɔ ko nɛ pi osɔfo ji lɛ ɔ, á je lɛ we, nɛ a ko bu lɛ ngɔ si ye ma mi bi ɔmɛ a nɔ hu.’ ”

Tsopa kɛ e he via a

³⁴ Yawɛ de Mose ke, “Moo ngmɛ tsopa kɛ e he via nɛ ɔmɛ nɛ a jiimi nɛ pee fiee: stakte, onitsa, galbanum, kɛ mimɛ ngmingmiingmi.

³⁵ Ngɔɔ ní nɛ ɔmɛ kɛ pee tsopa kɛ e he via kpakpa. E hi kaa nɔ́ nɛ tsopa kɛ e he via he ní tsulɔ nitsɛ pee, nɛ o ngɔ ngo kɛ wo mi, konɛ e mi nɛ tsɔ, nɛ e pee klɔuklɔu.

³⁶ Moo wɛɛ eko nɛ e pee bukɔbukɔ kaa mamu, nɛ o ngɔ eko kɛ ya ma daka a nɛ somi womi ɔ ngɛ mi ɔ hɛ mi ngɛ kpe he bo tsu ɔ mi he nɛ i kɛ nyɛ maa kpe ngɛ ɔ. Nyɛɛ hɛɛ tsopa kɛ e he via nɛ ɔ kaa nɔ́ ko klɔuklɔu nitsɛnitsɛ.

³⁷ Tsopa kɛ e he via nɛ nyɛ maa pee nɛ ɔ, nyɛ ko hyɛ bɔ nɛ a futu ní ɔmɛ nɛ nyɛ kɛ pee eko ha nyɛ nitsɛmɛ nyɛ he. Nyɛɛ ngɔ lɛ kaa e ji nɔ́ klɔuklɔu nitsɛnitsɛ kɛ ha imi Yawɛ.

³⁸ Nɔ tsuaa nɔ nɛ maa pee nu nɛ ɔ eko nɛ e ma kpa a, a je lɛ we, nɛ a ko bu lɛ ngɔ si ye ma mi bi ɔmɛ a nɔ hu.”