Mose II, 28 - BAIBLO ALOO NGMAMI KLƆUKLƆU Ɔ

Osɔfo ɔmɛ a tadehi

¹ “Moo tsɔ ya ngɔ o nyɛminyumu Aaron kɛ e binyumu ɔmɛ nɛ ji Nadab, Abihu, Eleazar, kɛ Itamar kɛ ba. Mo ha nɛ a tsɔ a he kɛ je Israel bi kpa amɛ a he, bɔ nɛ pee nɛ a ba sɔmɔ mi kaa osɔfohi.

² Moo kpɛ osɔfo tadehi ha o nyɛminyumu Aaron nɛ sa lɛ saminyayoo, nɛ bu nɛ ba e he.

³ Mo tsɛ nihi tsuo nɛ i kɛ ga ní tsumi he juɛmi dloo mɛ ɔ, nɛ o ha a kpɛ Aaron tade ɔmɛ kɛ pee lɛ klɔuklɔu, bɔ nɛ pee nɛ e ye osɔfo kɛ sɔmɔ mi.

⁴ Tadehi nɛ á kpɛ ɔ ji nɛ ɔmɛ nɛ: gugue tade, efɔd, tade klɔii, hiɔwe tade nɛ a lo, pɛɛ, kɛ mi mi fimi nɔ́. Á kpɛ tade klɔuklɔu nɛ ɔmɛ kɛ ha o nyɛminyumu Aaron, kɛ e binyumu ɔmɛ, konɛ a sɔmɔ mi kaa osɔfohi.

⁵ Níhi nɛ a maa ngɔ kɛ kpɛ tade ɔmɛ ji sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa hiɔ kpakpa nɛ a tslɔ.

⁶ “Efɔd ɔ lɛɛ níhi nɛ a maa ngɔ kɛ pee lɛ ji nɛ ɔmɛ nɛ: sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa kpakpa nɛ a tslɔ, nɛ a kadi ní wo mi.

⁷ A pee konɔ kpa enyɔ kɛ wo he, nɛ́ a nyɛ kɛ muɔ lɛ ngɛ hɛ mi kɛ se tsuo.

⁸ Mi mi fimi nɔ́ ɔ hu, a je blɔ nɛ a lo lɛ kɛ tsa efɔd ɔ, kɛ jamɛ a ga a, kɛ jamɛ a ní ɔmɛ nɔuu nɛ ji sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa hiɔ kpakpa nɛ a tslɔ ɔ.

⁹ Yaa hla shoham tɛ enyɔ, nɛ o ngma Yakob binyumu ɔmɛ a biɛhi ngɛ a nɔ

¹⁰ ngɛ a fɔmi nya; biɛ ekpa ngɛ tɛ kake nɔ, kɛ ekpa nɛ piɛ ɔ hu ngɛ tɛ kpa nɔ.

¹¹ Mo kpɛ́ Yakob bimɛ ɔmɛ a biɛhi ngɛ tɛ ɔmɛ a nɔ kaa bɔ nɛ june he ní tsulɔ peeɔ ɔ, nɛ o sile sika tsu kɛ bɔle tɛ ɔmɛ kɛ kpe.

¹² Jehanɛ, moo fi tɛ ɔmɛ kɛ wo efɔd ɔ konɔ kpa amɛ a he, konɛ a pee tɛhi nɛ a kɛ ma kai Yakob binyumu ɔmɛ; Aaron ma kpla biɛ ɔmɛ ngɛ e konɔ enyɔ ɔmɛ, bɔ nɛ pee nɛ imi Yawɛ, ma kai ye ma a daa.

¹³ Moo pee sika tsu he bɔlemi nɔ́ enyɔ,

¹⁴ kɛ sika tsu ngmingmiingmi kɔsɔkɔsɔ enyɔ nɛ a tslɔ mɛ kaa kpa. Ngɔɔ kɔsɔkɔsɔ kpa amɛ kɛ la he bɔlemi ní ɔmɛ a mi.

Gugue tade ɔ

¹⁵ “Gugue tade ɔ nɛ a kɛ leɔ ye yi mi ɔ, moo pee lɛ ngɛ ga mi; bɔ nɛ o pee efɔd ɔ, ja nɔuu o pee lɛ. Níhi nɛ ó ngɔ kɛ pee enɛ ɔ hu ji nɛ ɔmɛ nɛ: sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa kpakpa nɛ a tslɔ.

¹⁶ A dɔ gugue tade ɔ mi enyɔ, nɛ a pee lɛ kɔ nya eywiɛ; e kami nɛ pee nine mi blimi kake, nɛ e blimi hu nɛ pee nine mi blimi kake.

¹⁷ Moo ma tɛhi nɛ a he jua wa kɛ wo zã eywiɛ mi; zã tsuaa zã a, tɛ etɛ nɛ hi mi. Kekleekle zã a mi tɛ ɔmɛ ji sardio, topasion, kɛ smaragdo.

¹⁸ Zã nɛ ji enyɔ ɔ mi ní ɔmɛ ji karfungkle, safiro, kɛ sardoniki.

¹⁹ Zã etɛne ɔ mi ní ɔmɛ ji hiakinto, agate, kɛ ametisto.

²⁰ Zã eywiɛne ɔ mi ní ɔmɛ ji krisolito, shoham, kɛ yaspi. A sile sika tsu kɛ bɔle tɛ ɔmɛ.

²¹ Tɛ ɔmɛ tsuo nɛ a pee nyɔngma kɛ enyɔ; nɛ Yakob binyumu ɔmɛ a biɛhi nɛ hi a nɔ kakaaka. Wɛtso nyɔngma kɛ enyɔ ɔmɛ ɔ, a kpɛ́ eko tsuaa eko biɛ ngɛ tɛ kake nɔ kaa bɔ nɛ a ngmaa ní ngɛ nguɛ ga nɔ ɔ.

²² Ngɔɔ sika tsu ngmingmiingmi kɛ pee kɔsɔkɔsɔ nɛ a tslɔ kaa kpa kɛ wo gugue tade ɔ he.

²³ Moo pee sika tsu ga enyɔ kɛ wo gugue tade ɔ hiɔwe kɔ nya enyɔ ɔmɛ a he,

²⁴ konɛ o ngɔ sika tsu kɔsɔkɔsɔ enyɔ ɔmɛ kɛ hɔɔ sika tsu ga enyɔ ɔmɛ a mi.

²⁵ Kɔsɔkɔsɔ enyɔ ɔmɛ nɛ a tslɔ kaa kpa a, mɛ hu a nya enyɔ ɔmɛ nɛ piɛ ɔ, ngɔɔ kɛ la nɔ́ mi hɔmi nɔ́ enyɔ ɔmɛ a mi, nɛ o fi kɛ wo efɔd ɔ konɔ kpa amɛ a he ngɛ hɛ mi.

²⁶ Moo pee sika tsu ga enyɔ kɛ wo gugue tade ɔ kɔ nya enyɔ ɔmɛ a mi mi je ngɛ efɔd ɔ kasa nya.

²⁷ Jehanɛ, moo pee sika tsu ga kpa enyɔ kɛ wo efɔd ɔ kɔni enyɔ kpa amɛ a nya ngɛ sisi blɔ, kɛ yaa e hɛ mi ngɛ tsami he kake ɔ hanɔ, ngɛ efɔd mi mi fimi nɔ́ ɔ nɛ a lo saminyayoo ɔ yi mi.

²⁸ Ngɔɔ kpa bluu kɛ fi gugue tade ɔ he ga amɛ kɛ wo efɔd ɔ he ga amɛ a he ngɛ mi mi fimi nɔ́ ɔ hiɔwe je, bɔ nɛ pee nɛ gugue tade ɔ nɛ ko kpɔ kɛ je efɔd ɔ he.

²⁹ “Be tsuaa be nɛ Aaron ma ya sɛ he klɔuklɔu ɔ, e hɛɛ Yakob bimɛ ɔmɛ a biɛhi ngɛ kojomi gugue tade ɔ mi ngɛ e tsui nya; konɛ imi Yawɛ, ma kɛ kai ye ma a daa.

³⁰ Ngɔɔ ní ɔmɛ nɛ a kɛ leɔ ye yi mi, nɛ a tsɛɛ Urim kɛ Tumim ɔ kɛ wo gugue tade ɔ mi, nɛ Aaron nɛ hɛɛ mɛ ngɛ e gugue nya be tsuaa be nɛ e ma ye hɛ mi. Kɛkɛ ɔ, daa be tsuaa be ke Aaron ma he klɔuklɔu ɔ, níhi nɛ ma gu nɔ kɛ je ye yi mi tomi kpo kɛ tsɔɔ Israel bi ɔmɛ ɔ, e hɛɛ mɛ momo ngɛ e gugue nya.

Osɔfo ɔmɛ a tade kpahi

³¹ “Tade klɔii ɔ nɛ a woɔ ngɛ efɔd ɔ sisi ɔ, a lo lɛ kɛ kpa bluu sɔuu.

³² A je kuɛ mi puɔ ngɛ he, nɛ a fia nya nɛ e ti kɛ kpe, konɛ e ko hía.

^33-34 A ngɔ kpa bluu, kpa tsu, kɛ kpa nɛ hɛɛ alamua tu su kɛ lo ní kloohi kaa tso yiblii nɛ a ma kɛ wo tade ɔ nya fiami ɔ mi, konɛ sika tsu ngmlɛhi nɛ hɔɔ tso yiblii ɔmɛ a mi kɛ kpe. Ke sika tsu ngmlɛ kake ba, kɛkɛ nɔ́ kokloo kaa tso yiblii ɔ hu kake ba, ja sɔuu kɛ bɔle tade klɔii ɔ nya fiami ɔ mi.

³⁵ Ke Aaron ngɛ sɔmɔe ɔ, e wo tade nɛ ɔ, konɛ a nu ngmlɛ ɔmɛ a pɛmi be mi nɛ e ngɛ he klɔuklɔu ɔ sɛe kɛ ba ye hɛ mi, kɛ be mi nɛ e ngɛ lejɛ ɔ sie konɛ e ko gbo.

³⁶ “Jehanɛ, ngɔɔ sika tsu ngmingmiingmi kɛ pee dade pɛtɛpɛtɛ, nɛ o ngma ngɛ nɔ kaa bɔ nɛ june he ní tsulɔ ngmaa ní ngɛ nguɛ ga nɔ ɔ ke, ‘Klɔuklɔu ha Yawɛ.’

³⁷ Ngɔɔ kpa bluu kɛ fi lɛ kɛ wo pɛɛ ɔ hɛ mi.

³⁸ E hi Aaron hɛ nya daa, kɛkɛ ɔ, ke Israel bi ɔmɛ ngɔ a nike ní klɔuklɔu ɔmɛ kɛ ba ha mi, nɛ tɔmi ko ba ngɛ nɔ́ nɛ ɔ peemi mi po ɔ, imi Yawɛ, i be nike ní ɔmɛ kuae, se mohu ma ngɔ.

³⁹ “Hiɔwe tade ɔ, a ngɔ kpa hiɔ kpakpa kɛ lo, nɛ a kadi ní kɛ wo mi. Pɛɛ ɔ hu ngɔɔ kpa hiɔ kpakpa a nɔuu kɛ kpɛ, konɛ a lo ní kɛ wo mi mi fimi nɔ́ ɔ mi.

⁴⁰ “Jehanɛ, Aaron bimɛ ɔmɛ hu o kpɛ hiɔwe tadehi, kɛ mi mi fimi níhi, kɛ pɛɛhi ha mɛ nɛ e sa mɛ, nɛ bu nɛ hi a he.

⁴¹ Ngɔɔ tade nɛ ɔmɛ kɛ wo o nyɛminyumu Aaron kɛ e binyumu ɔmɛ, nɛ o pɔ mɛ nu, nɛ o wo mɛ osɔfo, nɛ o tsukɔ a he, konɛ a sɔmɔ mi kaa osɔfohi.

⁴² Ngɔɔ bo nɛ a ngɔ kpa hiɔ kpakpa kɛ lo kɛ kpɛ fiɔ mi tade ha mɛ, nɛ a wo kɛ ha a he kɛ je a mlɛ mi kɛ yaa si a fiɔ mi.

⁴³ Aaron kɛ e binyumu ɔmɛ nɛ a wo fiɔ mi tade nɛ ɔmɛ be tsuaa be nɛ a ma kpe he bo tsu ɔ mi ɔ, aloo ke a ma sɔmɔmi ngɛ bɔ sami la tɛ ɔ he ngɛ he klɔuklɔu ɔ. Ke pi ja a, musu maa tloo mɛ nɛ a ma gbo. Enɛ ɔ nɛ pee mlaa nɛ fɔɔ si kɛ yaa neneene kɛ ha Aaron kɛ e weku kɛ nina.