Mose II, 27 - BAIBLO ALOO NGMAMI KLƆUKLƆU Ɔ

Bɔ sami la tɛ ɔ

¹ “Ngɔɔ akasia tso kɛ pee bɔ sami la tɛ. E hi kɔ nya eywiɛ; e kami nɛ pee nine mi blimi nyɔngma, e blimi nine mi blimi nyɔngma, kɛ e si temi nine mi blimi ekpa.

² Moo pee kolihi ngɛ e kɔ nya eywiɛ ɔmɛ, nɛ a kɛ bɔ sami la tɛ ɔ nɛ tsa. A ngɔ akɔblee kɛ ha he.

³ Moo pee e he ngɛyuhi nɛ a kɛ muɔ la zu, sofihi, kahi, gbowehi, kɛ la jemi ngɛyuhi. Ngɔɔ akɔblee kɛ pee ní nɛ ɔmɛ tsuo.

⁴ Jehanɛ, ngɔɔ akɔblee nɛ o kɛ lo ya kɛ wo bɔ sami la tɛ ɔ he. Moo pee akɔblee ga eywiɛ kɛ wo ya a kɔ nya eywiɛ ɔmɛ.

⁵ Ngɔɔ ya a kɛ bɔle bɔ sami la tɛ ɔ ngɛ e sisi je, konɛ e hiɔwe yami nɛ ya ta bɔ sami la tɛ ɔ kpɛti tutuutu.

⁶ Moo hlɔ akasia tso komɛ nɛ o kɛ akɔblee nɛ ha a he.

⁷ Á kɛ tso ɔmɛ nɛ hɔɔ ga amɛ a mi ngɛ bɔ sami la tɛ ɔ kasa enyɔ ɔmɛ hiɛ kɛ hiɛ nɛ a kɛ hɛɛ lɛ.

⁸ Ngɔɔ gbegbeli kɛ kpɛ bɔ sami la tɛ ɔ; nɛ o ha blɔ nɛ hi mi kaa bɔ nɛ i tsɔɔ mo ngɛ yo ɔ nɔ ɔ pɛpɛɛpɛ.

Kpe he bo tsu ɔ he piɛ ɔ

⁹ “Jehanɛ moo po piɛ kɛ wo kpe he bo tsu ɔ he. Bo nɛ a kɛ kpa hiɔ kpakpa nɛ a tslɔ lo nɛ hi piɛ ɔ leneyi je; e kami nɛ pee nine mi blimi lafa enyɔ.

¹⁰ Akɔblee titima nyingmi enyɔ, kɛ nɔ dami nɔ́ nyingmi enyɔ nɛ hi piɛ ɔ he; se e he gbowe ɔmɛ, kɛ mani ɔmɛ lɛɛ a kɛ sika hiɔ nɛ pee mɛ.

¹¹ Ja nɔuu bo ɔmɛ nɛ ngɛ piɛ ɔ we omleyi je ɔ, a kami nɛ pee nine mi blimi lafa enyɔ. Mɛ hu a hi akɔblee titima nyingmi enyɔ, kɛ a nɔ dami nɔ́ nyingmi enyɔ; nɛ a he gbowe ɔmɛ, kɛ mani ɔmɛ hu a kɛ sika hiɔ nɛ pee mɛ.

¹² Bo ɔmɛ nɛ ngɛ piɛ ɔ bonyoku je ɔ, a blimi nɛ pee nine mi blimi lafa, kɛ a he titima nyɔngma, kɛ nɔ dami nɔ́ nyɔngma.

¹³ Ja nɔuu piɛ ɔ he nɛ kpee beleku je ɔ, e blimi nɛ pee nine mi blimi lafa.

¹⁴ Tsu nya bohi nɛ kplaa si ngɛ agbo ɔ nya kasa kake ɔ, a kami nɛ pee nine mi blimi nyingmi etɛ, kɛ a he titima etɛ, kɛ nɔ dami nɔ́ etɛ.

¹⁵ Kasa kake ɔ hu tsu nya bohi nɛ hi lejɛ ɔ. Mɛ hu a kami nɛ pee nine mi blimi nyingmi etɛ ɔ kɛ̃, kɛ a he titima etɛ, kɛ nɔ dami nɔ́ etɛ.

¹⁶ Piɛ ɔ nya nitsɛ nya bo ɔ lɛɛ e kami nɛ pee nine mi blimi nyingmi eywiɛ. Á ngɔ kpa bluu, kpa tsu, kɛ kpa nɛ hɛɛ alamua tu su kɛ lo; nɛ a kɛ abui nɛ kadi ní saminyayoo ngɔ wo mi. Titima eywiɛ, kɛ nɔ dami nɔ́ eywiɛ nɛ hi he.

¹⁷ Titima amɛ tsuo nɛ bɔle piɛ ɔ kɛ kpe ɔ, a pee akɔblee nɔ dami nɔ́ kɛ ha mɛ. Jehanɛ, a kɛ sika hiɔ nɛ pee a mani womi tso ɔmɛ, nɛ a pee sika hiɔ gbowehi kɛ wo a he.

¹⁸ Piɛ ɔ kami nɛ pee nine mi blimi lafa enyɔ, e blimi nine mi blimi lafa, kɛ e si temi nine mi blimi nyɔngma. Bo ɔmɛ nɛ a pee bo kpakpahi; nɔ dami ní ɔmɛ hu a kɛ akɔblee nɛ pee.

¹⁹ Ní ɔmɛ tsuo nɛ a kɛ ma sɔmɔ ngɛ kpe he bo tsu ɔ mi, kpe he bo tsu ɔ he plɛɛko ɔmɛ, kɛ piɛ ɔ hu he plɛɛko ɔmɛ tsuo pɛpɛɛpɛ ɔ, a ngɔ akɔblee kɛ pee.

Kane ɔ nɔ hyɛmi

²⁰ “Fa Israel bi ɔmɛ nɛ a ba ha mo oliv nu kpakpa nɛ mi tsɔ ngleinglei nɛ o kɛ wo kane ɔ mi, bɔ nɛ pee nɛ a su kane ɔ daa.

²¹ Aaron kɛ kane ɔ nɛ ma kpe he bo tsu ɔ mi, ngɛ tsu mi pomi bo ɔ nɛ haa somi daka a hɛ mi ɔ hɛ mi. Aaron kɛ e binyumu ɔmɛ nɛ a hyɛ kane ɔ nɔ ngɛ ye hɛ mi daa kɛ je gbɔkuɛ kɛ yaa si mɔtu. Enɛ ɔ maa pee mlaa nɛ fɔɔ si kɛ yaa neneene kɛ ha Israel bi ɔmɛ, kɛ a nina tsuo.