Mose II, 26 - BAIBLO ALOO NGMAMI KLƆUKLƆU Ɔ

Yawɛ kpe he bo tsu ɔ

¹ “Jehanɛ, kpe he bo tsu ɔ, ngɔɔ bo popoe nyɔngma kɛ pee; a ngɔ kpa bluu, kpa tsu, kɛ kpa nɛ hɛɛ alamua tu su kɛ lo bo nɛ ɔ, nɛ a kadi kerub saminyawiiwi kɛ wo mi.

² Bo ɔmɛ tsuo nɛ a sɔ fiee; bo kake kami nɛ pee nine mi blimi nyingmi enuɔ kɛ ekpa, nɛ e blimi nɛ pee nine mi blimi kpaanyɔ.

³ Moo kpɛ bo ɔ enuɔ kɛ tsa a sibi a nya, nɛ o kpɛ enuɔ kpa amɛ hu ja nɔuu.

⁴ Bo enuɔ ɔmɛ nɛ a tsa a; ngɔɔ kpa bluu kɛ pee gahi kɛ wo a nyagbe nɔ́ enyɔ ɔmɛ a ti kake he; bo kaketsɛ ɔ hu o pee lɛ ja nɔuu.

⁵ Bo ga nyingmi enuɔ nɛ hi bo kake nɛ ɔ nya, nɛ nyingmi enuɔ nɛ hi bo kaketsɛ ɔ hu nya; ga amɛ tsuo nɛ a nyɛɛ a sibi a hanɔ.

⁶ Moo pee sika tsu gbowe nyingmi enuɔ, nɛ o kɛ gbowe ɔmɛ nɛ hɔɔ ga amɛ a mi, konɛ bo ɔ tsuo nɛ pee bo tsu mluku kake.

⁷ “Jehanɛ, ngɔɔ apletsi he bwɔmi kɛ lo bo nyɔngma kɛ kake, nɛ o kɛ lɛ tsuo nɛ pee heha nɔ́ ha kpe he bo tsu ɔ.

⁸ Bo ɔ kake kami nɛ pee nine mi blimi nyingmi ekpa; e blimi nɛ pee nine mi blimi kpaanyɔ. Bo nyɔngma kɛ kake ɔmɛ ɔ, eko tsuaa eko kɛ e nyɛmi nɛ sɔ fiee.

⁹ Moo kpɛ bo ɔ enuɔ kɛ tsa a sibi a nya, nɛ o kpɛ ekpa nɛ piɛ ɔ hu kɛ tsa a sibi a nya. Bo ekpane ɔ nɛ maa ha bo tsu ɔ nya a lɛɛ dɔɔ mi enyɔ.

¹⁰ Bo enuɔ ɔmɛ nɛ a tsa a, moo pee ga nyingmi enuɔ kɛ wo nyagbe nɔ́ enyɔ ɔmɛ a ti kake he; ekpane ɔ hu o pee lɛ ja nɔuu.

¹¹ Moo pee akɔblee gbowe nyingmi enuɔ, nɛ o ngɔ mɛ kɛ la ga amɛ a mi, konɛ bo enyɔ ɔmɛ nɛ a pee heha nɔ́ kake.

¹² Kpe he bo tsu ɔ he hami bo fa a nɛ piɛ ngɛ se ɔ, ha nɛ e kpla si ngɛ bo tsu ɔ se je.

¹³ Jehanɛ, kpe he bo tsu ɔ he bo ɔ nine mi blimi enyɔ nɛ piɛ ngɛ e kami mi kasa kake nɛ ɔ, kɛ nine mi blimi enyɔ hu nɛ piɛ ngɛ kasa kpa a, e kpla si ngɛ kpe he bo tsu ɔ nya hiɛ kɛ hiɛ nɛ e kɛ ha tsu ɔ nya.

¹⁴ “Jehanɛ, o maa kpɛ bo kpa enyɔ kɛ ha kpe he bo tsu ɔ he; ngɔɔ agbosu he womi nɛ a wo lɛ kɔbɛi kɛ pee kekleekle nɔ́ ɔ, nɛ o ngɔ apletsi he womi nɛ a je blɔ pee kɛ pee enyɔne ɔ.

¹⁵ “Ngɔɔ akasia tso kɛ pee sima tso ha kpe he bo tsu ɔ.

¹⁶ Sima tso kake kami nɛ pee nine mi blimi nyingmi enyɔ, e blimi hu nɛ pee nine mi blimi etɛ.

¹⁷ Bɔ nɛ o maa pee kpe he bo tsu ɔ he sima tso ɔmɛ tsuo ji nɛ ɔ nɛ: a pee nane enyɔ kɛ wo sima tso tsuaa sima tso he, konɛ a nyɛ nɛ a kɛ sima tso ɔmɛ nɛ tsa a sibi a nya.

¹⁸ Moo ma sima tso nyingmi enyɔ ngɛ leneyi je,

¹⁹ nɛ o pee sika hiɔ nɔ dami nɔ́ nyingmi eywiɛ kɛ wo sima tso nyingmi enyɔ ɔmɛ a sisi; nɔ dami nɔ enyɔ nɛ hi sima tso tsuaa sima tso sisi kɛ ha nane enyɔ ɔmɛ.

²⁰ Kpe he bo tsu ɔ we omleyi je ɔ, sima tso nyingmi enyɔ nɛ hi lejɛ ɔ,

²¹ kɛ mɛ hu a sika hiɔ nɔ dami nɔ́ nyingmi eywiɛ; nɔ dami nɔ́ enyɔ ngɛ sima tso tsuaa sima tso sisi.

²² Kpe he bo tsu ɔ se ngɛ bonyoku je ɔ, sima tso ekpa nɛ hi lejɛ ɔ,

²³ konɛ o ma sima tso kpa enyɔ ha kpe he bo tsu ɔ kɔ nya amɛ nɛ ngɛ se je ɔ.

²⁴ Kɔ nya sima tso nɛ ɔmɛ ɔ, a tsa mɛ ngɛ yi kpɛti ɔ ngɛ kekleekle ga a he; sisi ɔ lɛɛ a ko ngɔ kɛ tsa. A pee kɔ nya sima tso ɔmɛ tsuo kikɛ nɛ ɔ.

²⁵ Lɔ ɔ he ɔ, o maa pee sima tso kpaanyɔ kɛ sika hiɔ nɔ dami nɔ́ nyɔngma kɛ ekpa: sika hiɔ nɔ dami nɔ́ enyɔ maa hi sima tso tsuaa sima tso sisi.

²⁶ “Ngɔɔ akasia tso kɛ pee mani womi tso nyɔngma kɛ enuɔ ha kpe he bo tsu ɔ: enuɔ ha sima tso ɔmɛ ngɛ kpe he bo tsu ɔ kasa hiɛ,

²⁷ enuɔ ha sima tso ɔmɛ ngɛ kpe he bo tsu ɔ kasa hiɛ, kɛ enuɔ hu ha sima tso ɔmɛ ngɛ kpe he bo tsu ɔ se, ngɛ bonyoku je.

²⁸ Mani ɔ nɛ nyɛɛ sima tso ɔmɛ a kpɛti ɔ lɛɛ e fɔ si kɛ je kpe he bo tsu ɔ kasa kake kɛ ya si kasa kake.

²⁹ Ngɔɔ sika tsu kɛ ha sima tso ɔmɛ a he, nɛ o pee sika tsu gahi kɛ wo a he, konɛ a kɛ mani ɔmɛ nɛ hɔɔ a mi. Mani ɔmɛ nitsɛ hu, ngɔɔ sika tsu kɛ ha a he.

³⁰ O pee kpe he bo tsu nɛ ɔ pɛpɛɛpɛ kaa henɔ nɛ i tsɔɔ mo ngɛ yo ɔ nɔ ɔ.

³¹ “Tsu mi pomi bo ɔ, moo gbɔ kpa bluu, kpa tsu, kɛ kpa nɛ hɛɛ alamua tu su, nɛ a kɛ lo, nɛ á je blɔ nɛ a kadi kerub saminyawiiwi kɛ wo mi.

³² Ngɔɔ kɛ kpla akasia tso eywiɛ a he; tso nɛ ɔmɛ ɔ, ngɔɔ sika tsu kɛ ha a he, nɛ a kɛ sika tsu gbowe nɛ kɔ a nya loko a ngɔ mɛ kɛ ma sika hiɔ nɔ dami nɔ́ eywiɛ ɔmɛ a nɔ.

³³ Ngɔɔ tsu mi pomi bo ɔ kɛ bɛ gbowe ɔmɛ a nya kɛ kpla si, nɛ o ngɔ daka a nɛ somi womi ɔ ngɛ mi ɔ kɛ ba ma e se blɔ, konɛ tsu mi pomi bo ɔ nɛ po he klɔuklɔu ɔ, kɛ he klɔuklɔu pe kulaa a kpɛti ha nyɛ.

³⁴ Daka a nɛ somi womi ɔ ngɛ mi ɔ, ngɔɔ e nya nɔ́ ɔ kɛ bu daka a nya ngɛ he klɔuklɔu pe kulaa a.

³⁵ Ngɔɔ okplɔɔ ɔ kɛ ma tsu mi pomi bo ɔ hɛ mi ngɛ kpe he bo tsu ɔ we omleyi je, konɛ kane tso ɔ lɛɛ e ya je leneyi je, ngɛ okplɔɔ ɔ hanɔ tutuutu.

³⁶ “Kpe he bo tsu ɔ sinya a nya bo ɔ, ngɔɔ kpa bluu, kpa tsu, kɛ kpa nɛ hɛɛ alamua tu su kɛ lo; nɛ a kɛ abui nɛ kadi ní kɛ wo mi.

³⁷ Ngɔɔ akasia tso enuɔ nɛ a kɛ sika tsu ha a he, kɛ a nya sika tsu gbowehi, nɛ o kɛ pee titimahi ha tsu nya bo ɔ. Jehanɛ hu, moo sɔ̃ akɔblee nɔ dami nɔ́ enuɔ ha tso ɔmɛ.