Mose II, 25 - BAIBLO ALOO NGMAMI KLƆUKLƆU Ɔ

Níhi a nya buami kɛ ha he klɔuklɔu ɔ

¹ Yawɛ de Mose ke,

² “De Israel bi ɔmɛ ke a ba ke mi ní. Nɔ tsuaa nɔ nɛ e tsui ma gbo nɔ kaa e maa ke nɔ́ ko ɔ, nyɛ he.

³ Nike ní ɔmɛ nɛ a pee sika tsu, sika hiɔ kɛ akɔblee;

⁴ kpa bluu, kpa tsu, kpa nɛ hɛɛ alamua tu su, kpa hiɔ kpakpa nɛ a tslɔ, apletsi he bwɔmi,

⁵ agbosu he womi nɛ a wo lɛ kɔbɛi, lohwe he womi nɛ a je blɔ pee, tso nɛ a tsɛɛ ke akasia,

⁶ nu nɛ a kɛ woɔ kane mi, tsopa nɛ a kɛ peeɔ nɔ pɔmi nu kɛ tsopa kɛ e he via,

⁷ tɛ nɛ a tsɛɛ shoham, kɛ tɛhi nɛ a he jua wa nɛ a kɛ maa wo tade nɛ a tsɛɛ efɔd ɔ kɛ gugue tade ɔ a he.

⁸ Ha nɛ a ma he klɔuklɔu ko ha mi, konɛ ma hi a kpɛti.

⁹ A pee sihi he nɛ ɔ kɛ e mi dlami ní ɔmɛ ngɛ henɔhi a nya pɛpɛɛpɛ kaa bɔ nɛ ma tsɔɔ mo ɔ.

Somi daka a

¹⁰ “Ha nɛ a ngɔ akasia tso kɛ kpɛ daka mimi pɔtɛɛ ko nɛ e kami ji nine mi blimi enuɔ, e blimi ji nine mi blimi etɛ, nɛ e mi kuɔmi ji nine mi blimi etɛ.

¹¹ Ngɔɔ sika tsu ngmingmiingmi kɛ ha daka a mi, kɛ e he tsuo, nɛ o kɛ sika tsu ɔ eko nɛ wo zã kɛ bɔle e he ɔ kulaa.

¹² Moo pee sika tsu ga eywiɛ, nɛ o ka kɛ wo daka a nane eywiɛ ɔmɛ a he; ga enyɔ nɛ hi kasa hiɛ, nɛ enyɔ hu nɛ hi kasa hiɛ.

¹³ Moo hlɔ akasia tsohi nɛ o ngɔ sika tsu kɛ ha a he.

¹⁴ Ngɔɔ tso ɔmɛ kɛ hɔ ga amɛ a mi ngɛ daka a he, nɛ́ a pɛtɛ a he kɛ hɛɛ daka a.

¹⁵ Tso ɔmɛ nɛ a hi ga amɛ a mi daa; a ko je mɛ ngɛ a mi.

¹⁶ Somi womi ɔ nɛ ma ngɔ ha mo ɔ, ngɔɔ kɛ wo daka a mi.

¹⁷ “Ngɔɔ sika tsu ngmingmiingmi kɛ pee daka a nya nɔ́ nɛ e kami ji nine mi blimi enuɔ, nɛ e mi blimi ji nine mi blimi etɛ.

¹⁸ Ngɔɔ sika tsu nɛ a si nɔ tɛtlɛɛ kɛ pee bɔfohi nɛ a tsɛɛ kerub ɔ enyɔ kɛ ma nya nɔ́ ɔ nɔ ngɛ daka a kami mi hiɛ kɛ hiɛ.

¹⁹ Kerub kake nɛ hi hiɛ, nɛ kake hu nɛ hi hiɛ. Moo pee kerub enyɔ ɔmɛ nɛ a kɛ daka a nya nɔ́ ɔ nɛ tsa.

²⁰ Kerub ɔmɛ nɛ a gbɛ a pɛlihi a mi kɛ ya hiɔwe nɛ a kɛ ha daka a nya nɔ́ ɔ he. A plɛ a hɛ mi ngɔ kpee a sibi, nɛ a hi nya nɔ́ ɔ nɔ hyɛe.

²¹ Ngɔɔ somi womi ɔ nɛ ma ha mo ɔ kɛ wo daka a mi, nɛ o ngɔ nya nɔ́ ɔ ngɔ bu nya.

²² Lejɛ ɔ ji he nɛ i kɛ mo maa kpe ngɛ; nɛ mlaahi tsuo nɛ ma wo Israel ma a kɛ gu o nɔ ɔ, ma da kerub enyɔ ɔmɛ a kpɛ kɛ de mo.

Okplɔɔ ɔ nɛ Mawu we abolo klɛdɛɛ ɔ maa ma nɔ ɔ

²³ “Ngɔɔ akasia tso nɛ o kɛ kpɛ okplɔɔ; e kami nɛ pee nine mi blimi eywiɛ, e blimi nɛ pee nine mi blimi enyɔ, nɛ e si temi nɛ pee nine mi blimi etɛ.

²⁴ Ngɔɔ sika tsu ngmingmiingmi kɛ ha he, nɛ o ngɔ sika tsu ɔ eko kɛ wo e nya amɛ kɛ kpe.

²⁵ Moo pee kla maa pee dɛ mi blimi kake kɛ wo okplɔɔ ɔ he kɛ kpe. Ngɔɔ sika tsu kɛ wo zã dɛɛ kɛ bɔle kla a.

²⁶ Moo pee sika tsu ga eywiɛ ngɔ mɛtɛ okplɔɔ ɔ nane eywiɛ ɔmɛ a he ngɛ kɔ nya eywiɛ ɔmɛ.

²⁷ Ga amɛ nɛ a maa ngɔ tso ɔmɛ nɛ a kɛ maa hɛɛ okplɔɔ ɔ ngɔ hɔ a mi ɔ, a hi tso kla a kasa nya tutuutu.

²⁸ Moo hlɔ akasia tsohi nɛ a kɛ maa hɛɛ okplɔɔ ɔ, nɛ o ngɔ sika tsu kɛ ha a he.

²⁹ Ngɔɔ sika tsu ngmingmiingmi kɛ pee plɛɛtehi kɛ kahi nɛ a kɛ maa sã tsopa kɛ e he via, kɛ kpluhi, kɛ likɔkɔhi nɛ a kɛ maa sã wai bɔ.

³⁰ Nɛ o ngɔ abolo klɛdɛɛ ɔ nɛ a kɛ maa ma ye hɛ mi daa a kɛ ma okplɔɔ ɔ nɔ.

Kane tso ɔ

³¹ “Ngɔɔ sika tsu ngmingmiingmi kɛ pee kane tso. Kane tso ɔ sisi je kɛ e kpɛti tso ɔ lɛɛ ngɔɔ sika tsu nɛ a si nɔ tɛtlɛɛ kɛ pee. Moo pee mɔmɔhi: ní nɛmɛ nɛ blɛkee we lolo, kɛ ní nɛmɛ nɛ blɛke, nɛ a kɛ kane tso ɔ nɛ tsa mluguduu kake.

³² Kɔni ekpa nɛ hi kane tso ɔ he; etɛ ngɛ kasa hiɛ, kɛ etɛ hu ngɛ kasa hiɛ.

³³ Kane tso ɔ he kɔni ekpa amɛ ɔ, mɔmɔ etɛ kɛ a yi pɛɛ nɛ hi eko tsuaa eko nɔ.

³⁴ Kpɛti kane tso ɔ lɛɛ mɔmɔ eywiɛ kɛ a yi pɛɛ nɛ hi nɔ.

³⁵ Kane tso tso gblaa etɛ ɔmɛ ɔ, mɔmɔ kpɔ nɛ hi kɔni enyɔɔnyɔ ɔmɛ a kpe he ɔmɛ a sisi tutuutu.

³⁶ Kpɔ ɔmɛ, tso gblaa amɛ, kɛ kpɛti kane tso ɔ tsuo nɛ tsa; a ngɔ sika tsu ngmingmiingmi nɛ a si nɔ tɛtlɛɛ kɛ pee lɛ tsuo.

³⁷ Jehanɛ, moo pee kane kpaago kɛ ma kane tso ɔ nɔ, konɛ a la a nɛ kpɛ kɛ ya hlami.

³⁸ Kane ɔ sumi kɛ e gbemi nɔ́ ɔ, kɛ nɔ́ nɛ a kɛ maa muɔ la zu ɔ hu a ngɔ sika tsu ngmingmiingmi kɛ pee.

³⁹ A ngɔ sika tsu ngmingmiingmi nɛ e jiimi peeɔ kilo nyingmi etɛ kɛ enuɔ kɛ pee kane tso ɔ kɛ e he ní ɔmɛ tsuo.

⁴⁰ Hyɛ nɛ o pee mɛ pɛpɛɛpɛ kaa henɔhi nɛ i ngɛ mo tsɔɔe ngɛ yo ɔ nɔ ɔ.