Mose II, 24 - BAIBLO ALOO NGMAMI KLƆUKLƆU Ɔ

Somi ɔ nya sɔumi

¹ Yawɛ de Mose ke, “O kɛ Aaron, Nadab, Abihu, kɛ Israel ma nimeli ɔmɛ a kpɛti ni nyingmi kpaago nɛ kuɔ kɛ ba ye ngɔ. Be nɛ nyɛ ngɛ tsitsaa lokoo kɛ ma a, nyɛ kpla si nɛ nyɛ ja mi.

² Mo Mose nɔ kake pɛ lɛ o hɛ mo kɛ su ye he; ni nɛmɛ nɛ piɛ ɔ, mɛɛ lɛɛ a ko su ye he tsɔ. Ma a hu nɛ ko kuɔ yo ɔ.”

³ Mose ba nɛ e ba bɔ ma a nɔ́ tsuaa nɔ́ nɛ Yawɛ de lɛ ɔ, kɛ mlaa amɛ tsuo nɛ e wo ɔ. Ma a tsuo nya sɔ nɛ a de ke, “Nɔ́ tsuaa nɔ́ nɛ Yawɛ de wɔ ke waa pee ɔ, wa maa pee.”

⁴ Mose ngma níhi tsuo nɛ Yawɛ de lɛ ɔ. E nɔ jena makɛ ɔ, e ya puɛ bɔ sami la tɛ ngɛ yo ɔ sisi, nɛ e ma titima nyɔngma kɛ enyɔ ngɛ Israel wɛtso nyɔngma kɛ enyɔ ɔmɛ a nya.

⁵ Lɔ ɔ se ɔ, e tsɔ nihewi ɔmɛ ekomɛ nɛ a kɛ nahi ya sã sami bɔ, kɛ tue mi jɔmi bɔ kɛ ha Yawɛ.

⁶ Mose kɛ muɔ ɔ fa wo kahi a mi; nɛ fa a nɛ piɛ ɔ, e tsɛ̃ ngɔ pue bɔ sami la tɛ ɔ nɔ.

⁷ Kɛkɛ nɛ e ngɔ somi womi ɔ, nɛ e kane kɛ ha ma a tsuo. Ma a he nɔ nɛ a de ke, “Wa maa bu Yawɛ tue; nɛ nɔ́ tsuaa nɔ́ nɛ e fa wɔ ke wa pee ɔ, wa maa pee.”

⁸ Jehanɛ Mose ngɔ muɔ ɔ kɛ fĩa ma a nɔ, nɛ e de ke, “Somi nɛ Yawɛ kɛ nyɛ so ɔ, e nya sɔumi muɔ ji nɛ ɔ nɛ, kaa bɔ nɛ a ngma ngɛ womi nɛ ɔ mi ɔ.”

⁹ Kɛkɛ nɛ Mose, Aaron, Nadab, Abihu, kɛ Israel ma nimeli nyingmi kpaago ɔmɛ kuɔ yo ɔ,

¹⁰ nɛ a na Israel Mawu ɔ. Ngɛ e nane si ɔ, a na nɔ́ ko kaa kpoku nɛ e mi tɛ̃ heii kaa hiɔwe, kaa nɔ́ nɛ tɛ nɛ a tsɛɛ safiro ɔ nɛ a kɛ pee lɛ.

¹¹ Israel ma nimeli nɛ ɔmɛ na Mawu, se mohu Mawu kpataa we a hɛ mi. Nɛ a bla kɛ ye ní nɛ a nu ní.

Mose ngɛ Sinai yo ɔ nɔ

¹² Yawɛ de Mose ke, “Moo kuɔ yo ɔ kɛ ba ye ngɔ nɛ o ba mlɛ, nɛ ma ngɔ tɛ tɛtlɛɛ enyɔ ɔmɛ kɛ a nɔ mlaa amɛ nɛ i ngma nɛ a kɛ tsɔse ma a ngɔ ha mo.”

¹³ Mose kɛ e tsɔlɔ Yoshua dla a he, konɛ a kuɔ Mawu yo ɔ.

¹⁴ Mose de nikɔtɔma amɛ ke, “Nyɛɛ mlɛ wɔ ngɛ hiɛ ɔ kɛ yaa si wa maa kpale kɛ ba nyɛ ngɔ ekohu. Aaron kɛ Hur kɛ nyɛ maa hi hiɛ ɔ; lɔ ɔ he ɔ, ke nɔ ko ngɛ sane ko ɔ, e ya na mɛ.”

¹⁵ Kɛkɛ nɛ Mose kuɔ yo ɔ, nɛ bɔku ko ba ha yo ɔ nɔ.

^16-18 Yawɛ hɛ mi nyami ɔ kple Sinai yo ɔ nɔ, nɛ bɔku ɔ ha yo ɔ nɔ ligbi ekpa. Ligbi nɛ ji kpaago ɔ, Yawɛ tsɛ Mose kɛ je bɔku ɔ mi. Benɛ Israel bi ɔmɛ na Yawɛ hɛ mi nyami ɔ, e pee mɛ kaa la nɛ ngɛ tsoe ngɛ yo ɔ yi mi. Mose hi lejɛ ɔ nyɔ kɛ pia nyɔ kɛ pia ligbi nyingmi eywiɛ.