Mose II, 22 - BAIBLO ALOO NGMAMI KLƆUKLƆU Ɔ

Mlaahi nɛ kɔɔ nane mi tomi he

^1-4 “Ke nɔ ko ya ju na nɛ e gbe, loo e jua a, a ma he lɛ na enuɔ kɛ to na kake ɔ nya; ke to ɔ, lɛɛ a ma he lɛ to eywiɛ kɛ to to kake ɔ nya. Ke a na lohwe ɔ nɛ e ju ɔ ngɛ e dɛ hɛ ngmengmle ɔ, na jio, teji jio, to jio, lohwe kake he ɔ, e wo lohwe enyɔ nya hiɔ. Ke nɔ́ ko be e dɛ ɔ, a jua lɛ kaa nyɔguɛ nɛ a kɛ wo nɔ́ nɛ e ju ɔ he hiɔ. “Nyɔ mi ke a nu julɔ nɛ ngɛ we ko mi sɛe, nɛ a fia lɛ nɔ́ nɛ a gbe ɔ, nɔ nɛ gbe lɛ ɔ yi fɔ kaa e gbe nɔmlɔ. Se ke piani nɛ e ba mi ja a, lɛɛ nɔ nɛ gbe julɔ ɔ yeɔ fɔ kaa e gbe nɔmlɔ.

⁵ “Ke nɔ ko ngmɛɛ e lohwe he nɛ e ya ye ní ngɛ nɔ kpa e ngmɔ nɔ, aloo e wai abɔɔ mi ɔ, lohwetsɛ ɔ maa ngɔ e ngmɔ, loo abɔɔ mi ní nɛ hi pe kulaa kɛ to nane mi.

⁶ “Ke nɔ ko tsɔ la nɛ la a sã pú kɛ ya sɛ nɔ kpa ngmɔ mi, nɛ e sã níhi nɛ a du ɔ, kɛ ngmɔ gba a kɛ e mi níhi, kɛ ngmɔ ɔ tsuo ɔ, a maa bu ní abɔ nɛ la a puɛ ɔ nya ha nɔ nɛ tsɔ la a nɛ e wo.

⁷ “Ke nɔ ko ha e nyɛmi sika, loo ní titli komɛ si tomi nɛ a ba ju ɔ, ke a nu julɔ ɔ, hiɔ nɛ ba a, a ku kɛ bɔ he si enyɔ nɛ e wo.

⁸ Se ke a nɛ julɔ ɔ, lɛɛ a ngɔ nɔ nɛ a ha nɔ́ si tomi ɔ kɛ ba Mawu hɛ mi, loo kojoli ɔmɛ a hɛ mi, nɛ e ba ka kita kaa e nine tɛ e nyɛmi ɔ ní ɔmɛ a he.

⁹ “Ke na, loo teji, loo to, loo heha ní, loo nɔ́ kpa ko laa, nɛ nihi enyɔ ngɛ he plee ɔ, a ngɔ mɛ kɛ ba Mawu hɛ mi. A ti nɔ nɛ Mawu maa bu fɔ ɔ maa wo nɔ́ nɛ a ngɛ he plee ɔ he hiɔ ngwɔhe enyɔ kɛ ha nɔtsɛ ɔ.

¹⁰ “Ke nɔ ko ngɔ e teji, loo na, loo to, loo lohwe kpa ko ngɔ ha e nyɛmi si tomi, nɛ lohwe ɔ gbo, aloo a plaa lɛ, aloo nihi ba po lohwe ɔ kɛ je nɛ nɔ ko nɛ ɔ,

¹¹ nɔ nɛ a ha lɛ nɔ́ si tomi ɔ nɛ ya ka Yawɛ kita ha e nyɛmi ɔ kaa e nine tɛ lohwe ɔ he. Ke e pee ja a, kɛkɛ lɛɛ e sa nɛ lohwetsɛ ɔ nɛ kplɛɛ nɔ kaa e nyɛmi ɔ be nane mi ko nɛ e toɔ.

¹² Se ke jumi a ju ngɛ e dɛ ɔ, lɛɛ é to nɔtsɛ ɔ nane mi.

¹³ Jehanɛ hu, ke nga mi lohwehi nɛ tsɔtslɔɔ e mi ɔ, e ngɔ nɔ́ nɛ piɛ ɔ kɛ ba ye odase. Ke e ba ja a, kɛkɛ lɛɛ nane mi tomi ko be nɛ e maa to ha nɔtsɛ ɔ hu.

¹⁴ “Ke nɔ ko ya ba lohwe ngɛ e nyɛmi dɛ nɛ lohwe ɔ plaa, aloo e gbo, be mi nɛ nɔtsɛ ɔ be lejɛ ɔ, é to nɔtsɛ ɔ nane mi sisiisi.

¹⁵ Ke nɔtsɛ ɔ ngɛ lejɛ ɔ jamɛ a be ɔ, lɛɛ e ko to lɛ nane mi. Ke apaa yemi lohwe ɔ, apaa hiɔwo ɔ woɔ lohwe ɔ he hiɔ.

Ní komɛ nɛ a hiɔ ɔ a he mlaahi

¹⁶ “Ke nɔ ko mlɔɔ yomiyo ko nɛ e kɛ lɛ hwɔ ɔ, e ya pee e he ní nɛ e ngɔ lɛ.

¹⁷ Se ke yomiyo ɔ tsɛ kua ke e kɛ lɛ be nyumu ɔ hae ɔ, lɛɛ bitsɛ ɔ nɛ he yo he ní peemi nya sika ngɛ nyumu ɔ nɛ puɛ e biyo ɔ dɛ.

¹⁸ “Yo tsuaa yo nɛ tsuɔ kunya a, a gbe lɛ.

¹⁹ “Nɔmlɔ nɛ e kɛ lohwe ma na yo kɛ nyumu bɔmi ɔ, a gbe lɛ.

²⁰ “Nɔ tsuaa nɔ nɛ maa sã bɔ kɛ ha mawu kpa ko, se pi imi Yawɛ ɔ, a kpata e hɛ mi.

²¹ “Koo pee nubwɔ yayami, nɛ koo wa lɛ yi mi; ejakaa nyɛ hu nyɛ ya to nubwɔ ngɛ Egipt zugba a nɔ.

²² Nyɛ ko wa yalɔyo, aloo awusa yi mi.

²³ Ke nyɛ wa mɛ yi mi, nɛ a fo ya kɛ tsɛ mi ɔ, niinɛ, ma bu a ya fomi ɔ tue,

²⁴ nɛ ye mi mi ma fu wawɛɛ, nɛ ma gbe nyɛ ngɛ ta mi. Nyɛ yi ɔmɛ maa pee yalɔyihi, nɛ nyɛ bimɛ ɔmɛ maa pee awusahi.

²⁵ “Ke o pa sika ha ye ma mi bi ɔmɛ a ti ohiatsɛ ko nɛ kɛ mo ngɛ ɔ, mo ko he lɛ hekpa kaa sika palɔ peeɔ.

²⁶ Ke nɔ ko ngɔ e bo kɛ ba to mo awaba a, kpale ya ha lɛ loko pu nɛ nɔ si,

²⁷ ejakaa lɔ ɔ pɛ ji e heha nɔ́ nɛ e kɛ maa tsi fĩɛ; mɛni hu ngɛ e dɛ nɛ e maa ha kɛ hwɔ si? Ke nyɛ pee we ja, nɛ e fo ya kɛ tsɛ mi ɔ, ma bu lɛ tue; ejakaa mɔbɔ nalɔ ji mi.

²⁸ “Ko jɛ Mawu; nɛ koo gbiɛ o matsɛ.

²⁹ “Ngɔɔ ngma, wai, kɛ oliv nu nɛ je o ngmɔ ɔmɛ a mi ɔ kɛ ba sã bɔ ha mi ngɛ be nɛ sa mi. “Ngɔɔ o bitɛte ɔmɛ kɛ ba ha mi.

³⁰ Ngɔɔ o na amɛ, kɛ o to ɔmɛ a kekleekle bi ku ɔmɛ hu ba ha mi. Ke a fɔ mɛ se ɔ, ha nɛ a hi a nyɛmɛ a kasa nya ligbi kpaago; ligbi nɛ ji kpaanyɔ ɔ, ngɔɔ mɛ kɛ ba sã bɔ ha mi.

³¹ “Ye ni klɔuklɔuhi ji nyɛ; lɔ ɔ he ɔ, lohwe ko nɛ nga mi lohwehi tsɔtslɔɔ mi ɔ, nyɛ ko ye; nyɛ sake ngɔ fɔ he ha gbehi.