Mose II, 21 - BAIBLO ALOO NGMAMI KLƆUKLƆU Ɔ

Bɔ nɛ á hɛɛ nyɔguɛhi ha

¹ “Jehanɛ, mlaahi nɛ o maa wo Israel bi ɔmɛ ji nɛ ɔmɛ nɛ.

² Ke mo nɔ ko o he Hebri no nyɔguɛ ɔ, e ma sɔmɔ mo jeha ekpa. Jeha nɛ ji kpaago ɔ, e ye e he nɛ o ko he nɔ́ ko ngɛ e dɛ.

³ Ke lɛ nɔ kake nɛ ba a, lɛ nɔ kake ɔ nɔuu nɛ kpale kɛ ho. Se ke e kɛ e yo ba a, lɛɛ e kɛ e yo ɔ nɛ ho.

⁴ Ke e nyɔmtsɛ ɔ ha lɛ yo, nɛ e fɔ binyumuhi, loo biyihi ha lɛ ɔ, yo ɔ kɛ e bimɛ ɔmɛ maa pee e nyɔmtsɛ ɔ níhi; nɛ lɛ nɔ kake too e maa ho.

⁵ Se ke nyɔguɛ ɔ ha a nu sisi kaa e suɔ e nyɔmtsɛ ɔ, kɛ yo nɛ a ha lɛ ɔ, kɛ e bimɛ ɔmɛ, nɛ lɔ ɔ he ɔ, e be suɔe nɛ e ye e he ɔ,

⁶ lɛɛ e nyɔmtsɛ ɔ maa ngɔ lɛ kɛ ba Mawu hɛ mi. E kɛ lɛ ma ba da sinya a nya, loo sinya tso ɔ he ngɛ lejɛ ɔ, nɛ e maa ngɔ tue gbumi nɔ́ kɛ gbu e tue ha lɛ. Kɛkɛ e ma tsa nɔ ma sɔmɔ kɛ yaa si lɛ, nyɔguɛ ɔ ma gbo.

⁷ “Ke nyumu ko jua e biyo kaa nyɔguɛ, nɛ he yemi be ɔ su ɔ, a ko ngmɛɛ e he kaa bɔ nɛ a peeɔ nyumu nyɔguɛhi.

⁸ Ke e nyɔmtsɛ ɔ nɛ to kaa e maa ngɔ lɛ ɔ sume lɛ ɔ, lɛɛ e ha nɛ yo ɔ tsɛ nɛ fɔ lɛ ɔ ba kpɔ lɛ. E be he blɔ nɛ e juaa yo ɔ kɛ haa ma se no, ejakaa e sisi lɛ.

⁹ Ke nyɔguɛtsɛ ɔ ngɔ lɛ ngɔ ha e binyumu ɔ, lɛɛ e hɛɛ lɛ kaa lɛ nitsɛ e biyo.

¹⁰ Ke e binyumu nɛ ɔ ya ngɔ yo kpa kɛ piɛ nɔ kaketsɛ ɔ he ɔ, e ha kekle yo ɔ e tsu nya yo blɔ nya nɔ́ tsuaa nɔ́ pɛpɛɛpɛ; eko nɛ ko je nɔ. E he bo, e nya mi ngma, kɛ e yogbayo blɔ nya nɛ ko bɔ lɛ.

¹¹ Ke e pee we ní etɛ nɛ ɔmɛ ha lɛ ɔ, lɛɛ yo ɔ ngɛ he blɔ nɛ e jee faa nɛ hiɔ wowoe ko be mi.

Mlaahi nɛ kɔɔ awi yemi he

¹² “Nɔ tsuaa nɔ nɛ maa fia nɔ ko nɔ́ nɛ nɔ ɔ ma gbo ɔ, a gbe lɛ.

¹³ Ke e nine ya kpa ngɛ nɔ ɔ nɔ tlukaa, se pi kaa e je blɔ pee ɔ, lɛɛ ma tsɔɔ mo he nɛ e tu fo kɛ ya.

¹⁴ Se ke nɔ ko mi mi fu nɛ e dɔ ya tua e nyɛmi nɛ e gbe lɛ ɔ, lɛɛ ke e tu fo ya sa we ngɛ ye bɔ sami la tɛ ɔ he po, a nu lɛ nɛ a gbe lɛ.

¹⁵ “Nɔ tsuaa nɔ nɛ maa fia e tsɛ, aloo e nyɛ nɔ́ ɔ, a gbe lɛ.

¹⁶ “Nɔ tsuaa nɔ nɛ maa ju nɔmlɔ nɛ e maa jua, loo a maa na lɛ ngɛ e dɛ ɔ, a gbe lɛ.

¹⁷ “Nɔ tsuaa nɔ nɛ maa gbiɛ e tsɛ, loo e nyɛ ɔ, a gbe lɛ.

¹⁸ “Ke ni enyɔ pɛ, nɛ nɔ kake fia e nyɛmi tɛ, loo kɔ, nɛ nɔ ɔ tlɔ sa mi, se e gbo we ɔ,

¹⁹ nɔ nɛ fia tɛ ɔ maa ye e he. Ke nɔ ɔ na he wami nɛ e je kpo, nɛ e hɛɛ tso kɛ ngɛ nyɛɛe ɔ, nɔ nɛ fia lɛ tɛ ɔ nɛ wo nɔ ɔ be nɛ e puɛ ha lɛ ɔ kɛkɛ he hiɔ, nɛ e hyɛ nɛ e tsa lɛ kɛ pi si.

²⁰ “Ke nɔ ko ngɔ tso kɛ fia e nyɔguɛ nyumu, loo yo, nɛ e gbo ngɛ e dɛ mi ɔ, a gbla e tue.

²¹ Se ke e gbo we amlɔ, nɛ ligbi kake, loo ligbi enyɔ be loko e gbo ɔ, a ko gbla nyɔmtsɛ ɔ tue; ejakaa nyɔguɛ ɔ gbenɔ ɔ ngɛ kaa nyɔguɛtsɛ ɔ sika nɛ laa.

²² “Ke nyumuhi ngɛ kunɔ nɔe nɛ a ya fia yohɔyo ko nɔ́ nɛ e muklii ɔ sane, se nɔ́ yobu kpa ko nyɛɛ we se ɔ, a bɔ nɔ nɛ plaa lɛ ɔ hiɔ. Yo ɔ huno ɔ nɛ tsɔɔ hiɔ ɔ, konɛ kojoli ɔmɛ nɛ a buá he.

²³ Se ke yo ɔ plaa a, tue gblami ɔ ji a plaa nɔ nɛ plaa lɛ ɔ kɛ to nane mi. Ke e gbo,

²⁴ loo e hɛngmɛ pɛ, loo e lungu hia, loo e nine, loo e nane plaa,

²⁵ loo e he ko sã, loo pa ba e he, loo e he ko kpɔ ɔ, a pee nɔ ɔ ja nɔuu kɛ to nane mi.

²⁶ “Ke nyumu ko fia e nyɔguɛ nyumu, loo nyɔguɛ yo hɛngmɛ nɔ́ nɛ hɛngmɛ ɔ pɛ ɔ, hɛngmɛ ɔ he je ɔ, e ngmɛɛ nyɔguɛ ɔ he nɛ e ho.

²⁷ Ke e fia e nyɔguɛ nyumu, loo nyɔguɛ yo nɔ́, nɛ e lungu hia a, lungu ɔ he je ɔ, e ngmɛɛ nyɔguɛ ɔ he nɛ e ho.

Nɔtsɛmɛ a níhi a nɔ hyɛmi

²⁸ “Ke na si nɔ ko koli, nyumu jio, yo jio, nɛ nɔ ɔ gbo ɔ, a fia na a tɛ nɛ e gbo, se a ko ye lo ɔ; natsɛ ɔ nitsɛ lɛɛ e yi fɔ.

²⁹ Se ke na a pɔɔ nihi koli simi, nɛ a tu munyu tsɔɔ natsɛ ɔ, se kɛ̃ e hyɛ we nɛ a wo na a tsu mi, nɛ e ba mi kaa e ya si nɔ ko koli nɛ e gbe nɔ ɔ, nyumu jio, yo jio, a fia na a tɛ nɛ e gbo, nɛ natsɛ ɔ hu a gbe lɛ.

³⁰ Se ke a ngmɛ natsɛ ɔ blɔ kaa e kpɔ e he ɔ, lɛɛ e sa kaa e wo hiɔ tsuaa hiɔ nɛ a maa bu ha lɛ ɔ, konɛ e kɛ he e yi wami.

³¹ Ke na a ya gbe nɔ ko binyumu, loo biyo ɔ, a kɛ lɛ nɛ ye ngɛ kikɛmɛ a mlaa nɛ ɔ nɔuu nya.

³² Ke na a ya gbe nyɔguɛ nyumu, loo nyɔguɛ yo ko ɔ, natsɛ ɔ nɛ wo nyɔguɛtsɛ ɔ hiɔ sika hiɔ yi nyingmi etɛ; na a nitsɛ lɛɛ a fia lɛ tɛ nɛ e gbo.

³³ “Ke nɔ ko si muɔ ngɔ fɔ si nɛ e hɛ́ nya, aloo e ya tsua muɔ nɛ e bu we nya, nɛ na, loo teji ya nɔ mi ɔ,

³⁴ nɔ nɛ tsua muɔ ɔ nɛ wo lohwetsɛ ɔ hiɔ, konɛ e ngɔ lohwe gbogboe ɔ.

³⁵ Ke nɔ ko na ku ya gbe e nyɛmi na a, natsɛmɛ enyɔ ɔmɛ nɛ a jua na hɛngmengmletsɛ ɔ, nɛ a gba sika a fiee; lohwe gbogboe ɔ hu a dla lɛ fiee.

³⁶ Se ke a ná le kaa na a pɔɔ nɔ koli simi, se natsɛ ɔ hyɛ we nɛ a wo na a tsu mi ɔ, lɛɛ nɔ nɛ e na nɛ ya si na koli ɔ nɛ ngɔ na hɛngmengmletsɛ ɔ kɛ to na gbogboe ɔ nane mi ha e nyɛmi ɔ, konɛ lohwe gbogboe ɔ nɛ pee e nɔ.