Mose II, 20 - BAIBLO ALOO NGMAMI KLƆUKLƆU Ɔ

Mlaa nyɔngma amɛ

¹ Mawu tu munyu, nɛ e de ke,

² “Imi ji Yawɛ, o Mawu ɔ nɛ je mo kɛ je Egipt zugba a nɔ kɛ je nyɔguɛ yemi mi ɔ nɛ.

³ “Ko ja mawu ko kɛ piɛ ye he.

⁴ “Koo puɛ amaga, loo nɔ́ ko nɛ ngɛ kaa nɔ́ ko nɛ ngɛ hiɔwe, loo nɔ́ ko nɛ ngɛ zugba a nɔ, loo nɔ́ ko nɛ ngɛ nyu mi ngɛ zugba a sisi.

⁵ Ko kpla si ha mɛ, nɛ ko ja mɛ hulɔ; ejakaa imi Yawɛ, o Mawu ɔ, a kɛ mi plee we nɔ́ he. I gblaa ni nɛmɛ nɛ nyɛɛ mi ɔ, kɛ a bimɛ, kɛ a bibimɛ a tue hluu kɛ yaa si yi nɔ etɛne kɛ eywiɛne bimɛ a nɔ.

⁶ Se nihi akpe abɔ nɛ suɔ mi, nɛ a yeɔ ye mlaa amɛ a nɔ ɔ, mɛɛ i naa mɛ mɔbɔ.

⁷ “Ko tsɛ Yawɛ, o Mawu ɔ biɛ yaka gu; ejakaa nɔ tsuaa nɔ nɛ peeɔ ja a, Yawɛ kɛ e he be lɛ kee.

⁸ “Mo kai Hejɔɔmi ligbi ɔ, nɛ o ye lɛ ngɛ mumi mi he tsɔmi mi.

⁹ Ngɔɔ ligbi ekpa kɛ tsu nɔ́ tsuaa nɔ́ nɛ o ngɛ tsumi.

¹⁰ Ligbi nɛ ji kpaago ɔ ji Yawɛ, o Mawu ɔ Hejɔɔmi ligbi. Jamɛ a ligbi ɔ, ko tsu nɔ́ ko kulaa; mo nitsɛ jio, o binyumu jio, o biyo jio, o tsɔlɔ nyumu jio, o mawayo jio, o lohwe jio, nubwɔ nɛ ngɛ o ma a mi jio;

¹¹ ejakaa ligbi ekpa Yawɛ ngɔ kɛ pee hiɔwe, zugba, kɛ wo kɛ a mi nɔ́ tsuaa nɔ́, nɛ ligbi nɛ ji kpaago ɔ, e jɔɔ e he. Enɛ ɔ he je nɛ e gbaa Hejɔɔmi ligbi ɔ, nɛ e pee lɛ klɔuklɔu ɔ nɛ.

¹² “Moo bu o tsɛ kɛ o nyɛ, konɛ o se nɛ kɛ ngɛ zugba nɛ Yawɛ, o Mawu ɔ ngɔ ha mo ɔ nɔ.

¹³ “Koo gbe nɔmlɔ.

¹⁴ “Ko puɛ gba.

¹⁵ “Koo ju.

¹⁶ “Koo ye lakpa odase kɛ si o nyɛmi.

¹⁷ “O hɛ ko kɔ o nyɛmi we nɔ; o hɛ ko kɔ o nyɛmi e yo, aloo e tsɔlɔ nyumu, aloo e mawayo, aloo e na, aloo e teji, aloo e nɔ́ kpa ko nɔ.”

Ma a ye gbeye

¹⁸ Benɛ ma a tsuo nu hiɔwe simi ɔ, kɛ titimati pɛmi ɔ, nɛ a na oslabai la a, kɛ la su ku nɛ je ngɛ yo ɔ mi ɔ, a ye gbeye, nɛ a je ya da si ngɛ se banee.

¹⁹ Nɛ a de Mose ke, “Mo nitsɛ o kɛ wɔ nɛ tu munyu nɛ waa nu; ko ha nɛ Mawu kɛ wɔ nɛ tu munyu nɛ wa ba gbo.”

²⁰ Mose de ma a ke, “Nyɛ ko ye gbeye; kami kɛkɛ Mawu ma nyɛ kami konɛ nyɛɛ ye lɛ gbeye nɛ nyɛ ko pee yayami.”

²¹ Se ma a daa si ngɛ se lokoo, nɛ Mose pɛ nɛ e hɛ lɛ kɛ su diblii kpii ɔ he ngɛ he nɛ Mawu ngɛ ɔ.

Bɔ sami la tɛhi a he mlaahi

²² Yawɛ fa Mose ke e ya de Israel bi ɔmɛ ke, “Nyɛ nitsɛmɛ nyɛ na kaa hiɔwe nɛ i kɛ nyɛ tu munyu kɛ je ɔ nɛ.

²³ Nyɛ ko ngɔ sika hiɔ, loo sika tsu kɛ pee mawuhi ha nyɛ he nɛ nyɛ ja kɛ piɛ ye he.

²⁴ Nyɛɛ ngɔ zu kɛ puɛ bɔ sami la tɛ ha mi, nɛ nyɛɛ ngɔ jijɔ, kɛ na kɛ pee sami bɔ, kɛ tue mi jɔmi bɔ ngɛ nɔ. He tsuaa he nɛ i fa nyɛ ke nyɛ ja mi ngɛ ɔ, ma ba lejɛ ɔ nɛ ma ba gbaa nyɛ.

²⁵ Ke nyɛ maa puɛ bɔ sami la tɛ ha mi kɛ tɛ ɔ, nyɛ ko ngɔ tɛ nɛ a gba kɛ pee; ejakaa ke nyɛ ngɔ ní tsumi dade kɛ ta tɛ ɔ he pɛ nyɛ ble tɛ ɔ.

²⁶ Nyɛ ko pee kpoku kɛ kuɔ kɛ ya ye bɔ sami la tɛ ɔ he, konɛ a ko na nyɛ he nɛ fɔɔ si.”