Mose II, 2 - BAIBLO ALOO NGMAMI KLƆUKLƆU Ɔ

Mose fɔmi

¹ Jamɛ a be ɔ mi ɔ, nyumu ko nɛ je Levi weku ɔ mi ɔ ya ngɔ yo ko nɛ je jamɛ a weku ɔ nɔuu mi.

² Yo ɔ ba na mi, nɛ e fɔ binyumu. Benɛ e na kaa jokuɛ ɔ he ngɛ fɛu ɔ, e ngɔ lɛ ngɔ laa nyɔhiɔ etɛ.

³ Se benɛ e nyɛ we nɛ e kɛ lɛ nɛ laa hu ɔ, e ngɔ kusii ko nɛ a kɛ ngɔwu lo, nɛ e kpa he amã. Lɔ ɔ se ɔ, e ngɔ bimwɔyo ɔ kɛ wo kusii ɔ mi, nɛ e kɛ lɛ ya ma ngɔwu ɔmɛ a mi ngɛ pa a tue.

⁴ Bimwɔyo ɔ nyɛmiyo daa si ngɛ se banee ngɛ hyɛe kaa mɛni lɛ maa pee bimwɔyo ɔ lo.

⁵ E ba mi kaa Farao ɔ biyo ɔ ba nɛ e ba du ngɛ pa a mi, nɛ e mawa amɛ ngɛ si poe ngɛ pa a nya. E na kusii ɔ ngɛ ngɔwu a mi, nɛ e tsɔ e mawa kake ke e ya wo kɛ ba.

⁶ Benɛ e bli nya a, e na bimwɔyo ɔ; kɛkɛ nɛ bimwɔyo ɔ hia ya. E ní pee lɛ mɔbɔ, nɛ e de ke, “Hebri bi ɔmɛ a ti nɔ ko bi ji nɛ ɔ nɛ.”

⁷ Kɛkɛ nɛ bimwɔyo ɔ nyɛmiyo ɔ de Farao ɔ biyo ɔ ke, “Ma ya nɛ ma ya tsɛ bimɛanyɛ ko ngɛ Hebri yi ɔmɛ a kpɛti kɛ ba nɛ e ba hyɛ jokuɛyo ɔ nɔ ha mo lo?”

⁸ Farao ɔ biyo ɔ de lɛ ke, “Ee, moo ya!” Kɛkɛ nɛ yiheyo ɔ ho nɛ e ya tsɛ bimwɔyo ɔ nyɛ nitsɛ kɛ ba.

⁹ Farao ɔ biyo ɔ de lɛ ke, “Ngɔɔ jokuɛ nɛ ɔ kɛ ho nɛ o ya hyɛ e nɔ ha mi nɛ ma wo mo hiɔ.” Yo ɔ ngɔ bimwɔyo ɔ nɛ e ya hyɛ e nɔ.

¹⁰ Benɛ jokuɛ ɔ ba wa a, yo ɔ ngɔ lɛ ya ha Farao ɔ biyo ɔ, nɛ e ba pee e bi. E wo lɛ biɛ ke Mose, nɛ e de ke, “I wo lɛ kikɛmɛ a biɛ nɛ ɔ, ejakaa nyu mi i je lɛ kɛ je.”

Mose ku kɛ ho Midian ya

¹¹ Benɛ Mose ba wa a, e je kpo ligbi ko kɛ ho e nyɛmimɛ Hebri bi ɔmɛ a ngɔ ya, nɛ e ya hyɛ pɔtɔ, kɛ dengme ní tsumi kpakpataa nɛ a ngɛ tsue ɔ. E na Egipt no ko nɛ ngɛ e nyɛmimɛ Hebri bi ɔmɛ a ti nɔ kake gbee.

¹² Mose plɛ hyɛ hiɛ kɛ hiɛ, nɛ e nɛ nɔ ko. Kɛkɛ nɛ e fia Egipt no ɔ nɔ́ nɛ e gbe, nɛ e kɛ zia tsi e nɔ.

¹³ E nɔ jena a, benɛ Mose je kpo ekohu ɔ, e ya na Hebri bi enyɔ nɛ a ngɛ kunɔ nɔe. E bi nɔ nɛ nɔ́ dɛ ɔ ke, “Mɛni he je nɛ o ngɛ o nyɛmi ɔ nɔ fiae?”

¹⁴ Nyumu ɔ he nɔ ke, “Mɛnɔ wo mo wa nyatsɛ kɛ kojolɔ? Pe o ngɛ hlae nɛ o gbe mi kaa bɔ nɛ o gbe Egipt no ɔ lo?” Kɛkɛ nɛ Mose tsui po, nɛ e de ke, “Akuanyɛ! Sane ɔ je kpo.”

^15-16 Benɛ Farao ɔ nu he ɔ, e hla kaa e maa gbe Mose. Se Mose tu fo kɛ ho Midian zugba a nɔ ya. Ligbi ko ɔ, Mose ya hi si ngɛ vu ko he, nɛ e ba mi kaa Midian osɔfo ɔ biyiwi kpaago ba lejɛ ɔ nɛ́ a ba yɛ nyu kɛ wo nyu numi níhi a mi kɛ ha a tsɛ tohi.

¹⁷ Se to hyɛli kpa komɛ ba nɛ a ba fie Yetro biyi ɔmɛ. Kɛkɛ nɛ Mose te nɛ e fie to hyɛli kpa amɛ, nɛ e ha yihewi ɔmɛ a to ɔmɛ nyu.

¹⁸ Benɛ a kpale kɛ ba a tsɛ ɔ ngɔ ɔ, e bi mɛ ke, “Mwɔnɛ ɔ lɛɛ kɛ pee kɛɛ nɛ nyɛ ba mla kikɛ nɛ ɔ?”

¹⁹ A de lɛ ke, “Egipt no ko lɛ je wɔ ngɛ to hyɛli ɔmɛ a dɛ mi. Lɔ ɔ se ɔ, e sa nyu ha wɔ nɛ wa to ɔmɛ nu.”

²⁰ Yetro bi e biyi ɔmɛ ke, “Nɛ jije e ngɛ? Mɛni he je nyɛ je nyumu ɔ he? Nyɛ ya tsɛ lɛ kɛ ba nɛ e ba wo e nya mi nɔ́ ko.”

²¹ Mose kplɛɛ kaa e kɛ osɔfo ɔ maa hi si. Pee se ɔ, osɔfo ɔ ngɔ e biyo Zipora ngɔ ha Mose.

²² Zipora fɔ binyumu, nɛ Mose wo lɛ biɛ ke Gershon, nɛ e de ke, “I wo lɛ kikɛmɛ a biɛ nɛ ɔ, ejakaa i ba to nubwɔ ngɛ ma se zugba nɔ.”

²³ Jeha komɛ a se ɔ, Egipt matsɛ ɔ ba gbo. Se Israel bi ɔmɛ lɛɛ kɛmɛmi kɛkɛ a ngɛ kɛmɛe ngɛ a nyɔguɛ yemi ɔ mi. A fa kue ha Mawu, nɛ Mawu hu nu a gbi.

²⁴ Benɛ Mawu nu a kɛmɛmi ɔ, e kai somi nɛ e kɛ a nɛmɛ Abraham, Isak, kɛ Yakob so ɔ.

²⁵ Kɛkɛ nɛ Mawu mi mi sã lɛ ngɛ Israel bi ɔmɛ a si himi ɔ he; ejakaa e na kaa be su nɛ sa kaa e pee he nɔ́ ko.