Mose II, 19 - BAIBLO ALOO NGMAMI KLƆUKLƆU Ɔ

Israel bi ɔmɛ ngɛ Sinai yo ɔ nɔ

^1-2 Nɛ Israel bi ɔmɛ je Egipt ɔ se nyɔhiɔ etɛne ɔ kekleekle ligbi ɔ, a je Refidim kɛ ho Sinai nga a nɔ ya, nɛ a ya to si ngɛ Sinai yo ɔ sisi.

³ Mose kuɔ yo ɔ kɛ ho Mawu ngɔ ya. Kɛkɛ nɛ Yawɛ tsɛ Mose ngɛ yo ɔ mi, nɛ e de lɛ ke e ya nɛ e ya de Israel bi ɔmɛ, nɛ ji Yakob nina a ke,

⁴ “Nyɛ nitsɛmɛ nyɛ na nɔ́ nɛ i pee Egipt bi ɔmɛ, kɛ bɔ nɛ i kɛ he wami je nyɛ kɛ je Egipt kaa nɔ́ nɛ kɔle pɛli nɔ nɛ nyɛ hii si ngɛ, nɛ i ngɔ nyɛ kɛ ba imi nitsɛ ye ngɔ.

⁵ Lɔ ɔ he ɔ, ke nyɛ maa bu ye gbi tue, nɛ nyɛ maa ye ye somi ɔ nɔ ɔ, lɛɛ nyɛ maa pee imi nitsɛ ye ma titli pe ma amɛ kulaa; ejakaa je ɔ tsuo ye nɔ́ ji mɛ.

⁶ Se nyɛɛ lɛɛ nyɛ maa pee ye ma klɔuklɔu, nɛ nyɛ ma sɔmɔ mi kaa osɔfohi. Sɛ gbi nɛ ɔ, mo de Israel bi ɔmɛ.”

⁷ Mose kple si kɛ ba nɛ e ba tsɛ ma nimeli ɔmɛ, nɛ e ngɔ Yawɛ sɛ gbi ɔ ngɔ ha mɛ.

⁸ Nɛ ma a tsuo he nɔ nɛ a de ke, “Nɔ́ tsuaa nɔ́ nɛ Yawɛ de ɔ, wa maa pee.” Mose kpale ya bɔ Yawɛ bɔ nɛ ma a de ɔ.

⁹ Yawɛ de Mose ke, “Hyɛ, i ma o ngɔ ngɛ bɔku kpii mi, konɛ ke ma a nu nɛ i kɛ mo ngɛ munyu tue ɔ, a he mo nɛ a ye kɛ ya neneene.” Mose ho nɛ e ya bɔ Yawɛ heto nɛ ma a ha lɛ ɔ.

¹⁰ Nɛ Yawɛ de Mose ke, “Yaa nɛ o ya tsukɔ ma a he mwɔnɛ ɔ kɛ hwɔɔ. Ha nɛ a fɔ a tadehi a he,

¹¹ nɛ benɛ e maa su ligbi nɛ ji etɛ ɔ, a dla a he; ejakaa hiɛmɛ nɛ ɔ ligbi nɛ ji etɛ ɔ, imi Yawɛ, ma kple si kɛ ba Sinai yo ɔ nɔ, nɛ nɔ tsuaa nɔ maa na mi.

¹² Poo piɛ kɛ bɔle yo ɔ, nɛ o wo ma a si nɛ a hyɛ saminya nɛ nɔ ko nɔ ko kó kuɔ yo ɔ, loo e hɛ lɛ kɛ su he po. Nɔ tsuaa nɔ nɛ maa ta yo ɔ he ɔ, a gbe lɛ!

¹³ Nɔ ko nɔ ko nine nɛ ko sa nɔ ɔ he, se mohu a fia lɛ tɛ, loo a tsɛ̃ lɛ kɛ̃ɛ̃; lohwe ji lɛ jio, nɔmlɔ ji lɛ jio, e ko hi je mi. Ke titimati ɔ pɛ wawɛɛ nɛ e se kɛ ɔ, loko ma a nɛ kuɔ yo ɔ kɛ ba.”

¹⁴ Mose kple si kɛ je yo ɔ nɔ kɛ ba ma a ngɔ, nɛ e ha ni ɔmɛ tsukɔ a he, nɛ a fɔ a tade ɔmɛ a he.

¹⁵ E de ma a ke, “Nyɛ dla nyɛ he ha hiɛmɛ nɛ ɔ ligbi nɛ ji etɛ ɔ; nɔ ko nɔ ko kó ta yo he.”

¹⁶ Ligbi nɛ ji etɛ ɔ mɔtu ɔ, a nu hiɔmi simi, oslabai gbami, kɛ titimati pɛmi wawɛɛ ngɛ yo ɔ nɔ; bɔku kpii hu wo ngɛ lejɛ ɔ. Sawale nu ma a tsuo ngɛ a sito he ɔ, nɛ a he kpokpo.

¹⁷ Kɛkɛ nɛ Mose nyɛɛ ma a hɛ mi kɛ je sito he ɔ kɛ je kpo konɛ a kɛ Mawu nɛ ya kpe; nɛ a ho ya da si ngɛ yo ɔ sisi.

¹⁸ Sinai yo ɔ tsuo hyi kɛ la su ku; ejakaa Yawɛ kple si kɛ ba yo ɔ nɔ ngɛ la mi. La su ku ɔ ngɛ si tee kɛ ngɛ hiɔwe yae kaa buɛsa he la su ku, nɛ yo ɔ tsuo mimiɛ wawɛɛ nitsɛ.

¹⁹ Benɛ bɛ pɛmi ɔ nya wa a, Mose tu munyu, nɛ Mawu ha lɛ heto kɛ hiɔwe simi.

²⁰ Yawɛ kple si kɛ ba Sinai yo ɔ nɔ nɛ e tsɛ Mose, nɛ Mose kuɔ kɛ ho yo ɔ yi mi ya.

²¹ Nɛ Yawɛ de lɛ ke, “Kple si nɛ o ya tu munyu ngɔ tsɔɔ ma a, bɔ nɛ pee nɛ nɔ ko nɔ ko kó de ke e ngɛ piɛ ɔ gbae kɛ ma mi hyɛmi, nɛ́ nihi babauu a hɛ mi ko ba kpata.

²² Jã kɛ̃, osɔfo ɔmɛ nɛ mɛɛ a nyɛɔ suu ye he ɔ, mɛ hu hyɛ nɛ a tsukɔ a he, bɔ nɛ pee nɛ Yawɛ ko ba kpata a hɛ mi.”

²³ Mose de Yawɛ ke, “Ma a be nyɛe maa kuɔ Sinai yo ɔ; ejakaa mo nitsɛ nɛ o wo mlaa ke waa po piɛ kɛ wo he kɛ tsɔɔ kaa yo ɔ ngɛ klɔuklɔu.”

²⁴ Yawɛ de Mose ke, “Kple si nɛ o ya ngɔ Aaron kɛ ba. Se osɔfo ɔmɛ, kɛ ma a lɛɛ ko ha nɛ a gba piɛ ɔ nɛ a kuɔ kɛ ba ye ngɔ, nɛ ma ko ba gbla a tue.”

²⁵ Kɛkɛ nɛ Mose kple si nɛ e ya bɔ ma a nɔ́ nɛ Yawɛ de lɛ ɔ.