Mose II, 15 - BAIBLO ALOO NGMAMI KLƆUKLƆU Ɔ

Mose la

¹ Kɛkɛ nɛ Mose kɛ Israel bi ɔmɛ la la nɛ ɔ kɛ je Yawɛ yi: “Ma la kɛ je Yawɛ yi, ejakaa e ye kunimi nguaa. E tsɛ̃ okpɔngɔ kɛ e nɔ hilɔ ɔ kɛ wo wo ɔ mi.

² Yawɛ ji ye he falɔ kpanaa; lɛ ji nɔ nɛ he ye yi wami. Ma je e yi, ejakaa lɛ ji ye Mawu; ma wo e hɛ mi nyami, ejakaa Tsaatsɛ e Mawu ji lɛ.

³ Yawɛ ɔ, tatsɛ ji lɛ; e biɛ ji Yawɛ.

⁴ “E tsɛ̃ Farao ɔ ta zugba lɛ ɔmɛ, kɛ e tabo ɔ tsuo ngɔ wo wo ɔ mi bum! Nɛ e tatsɛ ngua amɛ hu gbo tlɔ Wo Tsu ɔ mi.

⁵ Nyu kpekpemi ɔ ha a nɔ, nɛ a mu kɛ ho nyu ɔ sisi lokoo ya kaa tɛ.

⁶ “Yawɛ, o hiɔ nine he wami ɔ ngɛ gbeye; o hiɔ nine ɔ tsɔtslɔɔ he nyɛli ɔmɛ a mi.

⁷ O kɛ o we agboje tsɛ̃ o he nyɛli ɔmɛ kɛ pue si. Nɛ o mi mi la a tso gegeege nɛ e sã mɛ kaa dwɔmi.

⁸ O fli o gugwɔ mi ngɛ wo ɔ nɔ, nɛ nyu ɔ bua e he nya da si kaa gbogbo; ohue mi nyu ɔ fi, nɛ e wlua gɛgɛnii.

⁹ He nyɛlɔ ɔ ke, ‘Ma nyɛɛ a se nɛ ma ya na mɛ; ma dla ta ní ɔmɛ ngɛ ye suɔmi nya. Ma hia ye ha a, nɛ ma kpata a hɛ mi.’

¹⁰ Se o ha kɔɔhiɔ fia, nɛ wo ɔ ha a nɔ; Egipt bi ɔmɛ mu kaa sumue ngɛ nyu nɛ he ngɛ gbeye ɔ mi.

¹¹ “Yawɛ lee, mɛnɔ ngɛ kaa mo? Mɛnɔ ngɛ kaa mo ngɛ mawu ɔmɛ a kpɛti? O je agbo; o he ngɛ gbeye; mo, mo nyakpɛ ní peelɔ.

¹² O je o he wami ɔ kpo, nɛ zugba a mii wa he nyɛli ɔmɛ.

¹³ O kɛ o suɔmi nɛ tsakee we ɔ kpaka ma nɛ o kpɔ ɔ; nɛ o kɛ o he wami tsɔɔ mɛ blɔ kɛ ba o zugba klɔuklɔu ɔ nɔ.

¹⁴ Je ma amɛ nu he, nɛ a tsui po; sawale nu Filisti bi ɔmɛ.

¹⁵ Edom matsɛmɛ ɔmɛ a he mi jɔ̃; sawale nu Moab nimeli ɔmɛ; Kanaan bi ɔmɛ tsuo a kã a laa.

¹⁶ Gbeye kɛ fɔ̃ nu mɛ; Yawɛ, o he wami ɔ ha a nya jɔ kɛ ya si be nɛ mo Yawɛ, o ma a nɛ mo nitsɛ o he ɔ ba be kɛ ho.

¹⁷ O ngɔ mɛ kɛ ba, nɛ o ba to mɛ si ngɛ mo nitsɛ o yo ɔ nɔ he nɛ mo Yawɛ nitsɛ o dla kɛ ha o si himi, he klɔuklɔu nɛ mo Yawɛ nitsɛ o to sisi ɔ.

¹⁸ Yawɛ maa ye matsɛ kɛ maa ya neneene.”

Miriam la

¹⁹ Benɛ Farao ɔ we okpɔngɔ ɔmɛ, ta zugba lɛ ɔmɛ, kɛ okpɔngɔ ta buli ɔmɛ sɛ wo ɔ mi ɔ, Yawɛ ha nɛ nyu ɔ kpale e se ba ha a nɔ. Se Israel bi ɔmɛ lɛɛ a nyɛɛ zugba gbigbli nɔ kɛ po wo ɔ.

²⁰ Kɛkɛ nɛ Aaron nyɛmiyo Miriam, gbalɔyo ɔ ngɔ fao, nɛ yi ɔmɛ tsuo nyɛɛ e se kɛ fao fiami kɛ domi.

²¹ Nɛ Miriam la ha mɛ ke, “Nyɛ la kɛ je Yawɛ yi, ejakaa e ye kunimi nguaa. E tsɛ̃ okpɔngɔ kɛ e nɔ hilɔ ɔ kɛ wo wo ɔ mi bum!”

Nyu doodooe ɔ

²² Mose kpaka Israel bi ɔmɛ kɛ je Wo Tsu ɔ he kɛ ho Shur nga a nɔ ya. A nyɛɛ nga a nɔ ligbi etɛ nɛ a nɛ́ nyu.

²³ Benɛ a su Mara a, a nyɛ we nɛ a nu nyu nɛ ngɛ lejɛ ɔ, ejakaa e dooɔ. Enɛ ɔ he je ɔ, a wo lejɛ ɔ biɛ ke Mara, nɛ a de ke a wo lɛ jamɛ a biɛ ɔ, ejakaa nyu ɔ dooɔ.

²⁴ Kɛkɛ nɛ ma a tu munyu huitihuiti kɛ si Mose ke, “Mɛni wa maa nu?”

²⁵ Mose kɛ hɛdɔ tsɛ Yawɛ, nɛ Yawɛ tsɔɔ lɛ tso ko. Mose sake tso ɔ ngɔ fɔ nyu ɔ mi, kɛkɛ nɛ nyu ɔ jɔ. Lejɛ ɔ nɛ Yawɛ wo mɛ mlaa ngɛ, nɛ lejɛ ɔ nɛ e ka mɛ ngɛ.

²⁶ E de mɛ ke, “Ke nyɛ maa bu Yawɛ, nyɛ Mawu ɔ tue, nɛ nyɛ maa pee nɔ́ nɛ da ngɛ e hɛ mi, nɛ nyɛ maa ye e kita amɛ, kɛ e mlaa amɛ tsuo a nɔ ɔ, lɛɛ hiɔ ɔmɛ nɛ i kɛ gbla Egipt bi ɔmɛ a tue ɔ, ekoeko be nyɛ nɔ bae. Imi ji Yawɛ; imi ji nyɛ tsalɔ.”

²⁷ Nɛ́ a je lejɛ ɔ, a ba to si ngɛ Elim. Lejɛ ɔ nɛ vu nyɔngma kɛ enyɔ, kɛ zani tso nyingmi kpaago ɔmɛ ngɛ ɔ nɛ.