Mose II, 14 - BAIBLO ALOO NGMAMI KLƆUKLƆU Ɔ

Wo Tsu ɔ pomi

¹ Yawɛ de Mose ke,

² “De Israel bi ɔmɛ ke a kpale a se nɛ a ya to si ngɛ Pi Hahirot hɛ mi, ngɛ Migdol kɛ wo ɔ a kpɛti. A sito he ɔ nɛ kpee Baal Zefon hɛ mi ngɛ wo ɔ nya.

³ Farao ɔ ma susu kaa Israel bi ɔmɛ ya tla blɔ, nɛ a ngɛ lalaalo woe ngɛ nga a nɔ, nɛ nga a sá a yi.

⁴ Ma kplii Farao ɔ tsui, nɛ e maa fie a se. Nɛ manye nɛ ma ye ngɛ Farao ɔ, kɛ e ta a tsuo a nɔ ɔ ma ha ye hɛ mi maa ba nyami. Jamɛ a be ɔ, Egipt bi ɔmɛ maa le kaa imi ji Yawɛ.” Nɛ Israel bi ɔmɛ pee ja.

⁵ Benɛ a ya bɔ Egipt matsɛ ɔ ke ni ɔmɛ tu fo kɛ je ɔ, Farao ɔ kɛ e tsɔli ɔmɛ tsake a juɛmi ngɛ Israel bi ɔmɛ a he, nɛ a de ke, “Mɛni wa pee nɛ ɔ, kaa wa ngmɛɛ Israel bi ɔmɛ a he nɛ a ho nɛ a be wɔ sɔmɔe hu nɛ ɔ?”

⁶ Kɛkɛ nɛ matsɛ ɔ dla e ta zugba lɛ ɔ, kɛ e tabo ɔ,

⁷ nɛ e hla ta zugba lɛ kpakpa lafa ekpa, kɛ Egipt ta zugba lɛ kpa amɛ tsuo, kɛ mɛ tsuo a tatsɛmɛ.

⁸ Yawɛ kplii Egipt matsɛ ɔ tsui, nɛ be nɛ Israel bi ɔmɛ yaa kɛ gɛjɛmi ɔ, e fie a se.

⁹ Farao ɔ we okpɔngɔ ɔmɛ, e tabo ɔ, kɛ Egipt bi ɔmɛ tsuo hia kɛ nyɛɛ Israel bi ɔmɛ a se, nɛ a ya na mɛ be nɛ a pueɔ si ngɛ Wo Tsu ɔ nya, ngɛ Pi Hahirot kasa nya, ngɛ Baal Zefon hɛ mi ɔ.

¹⁰ Benɛ Farao ɔ ná mɛ ta, nɛ Israel bi ɔmɛ wo a hɛ nɔ nɛ a na kaa Egipt bi ɔmɛ nyɛɛ a se kɛ ma a, sawale nu mɛ, nɛ a kpa bubuubui kɛ tsɛ Yawɛ.

¹¹ A bi Mose ke, “Anɛ yɔkɔhi nɛ be Egipt he je nɛ o kpaka wɔ kɛ ba nɛ wa ba gbo tlɔ nga pa lo? Mɛni he je o kɛ wɔ ye kikɛmɛ a sane, nɛ o ngɔ wɔ kɛ je Egipt ɔ?

¹² Enɛ ɔ he nɛ wa de mo ngɛ Egipt ke o ngmɛɛ wa he nɛ wa sɔmɔ Egipt bi ɔmɛ ɔ nɛ; ejakaa afani nɛ wa ma sɔmɔ Egipt bi ɔmɛ pe kaa wa ma gbo tlɔ nga pa.”

¹³ Se Mose de ma a ke, “Nyɛ ko je fɔ̃, nyɛɛ da si kaa nyumuhi, nɛ nyɛ maa na bɔ nɛ Yawɛ maa pee kɛ he nyɛ yi wami mwɔnɛ ɔ. Egipt bi ɔmɛ nɛ nyɛ ngɛ mɛ hyɛe mwɔnɛ ɔ, nyɛ be mɛ nae hu gblegbleegble.

¹⁴ Yawɛ maa hwu ha nyɛ; nyɛɛ lɛɛ nyɛɛ buɛ dii!”

¹⁵ Yawɛ bi Mose ke, “Mɛni he je o ngɛ ngmlaa kpae kɛ ngɛ mi tsɛe ɔ? De Israel bi ɔmɛ ke a ya a hɛ mi.

¹⁶ Wo o tso ɔ nɔ nɛ o kpã o nine mi ngɛ wo ɔ nɔ, nɛ o dla e mi enyɔ, konɛ Israel bi ɔmɛ nɛ a nyɛɛ zugba gbigbli nɔ kɛ po wo ɔ.

¹⁷ Ma kplii Egipt bi ɔmɛ a tsui, nɛ a maa nyɛɛ a se; kɛkɛ ɔ, ye hɛ mi maa ba nyami, ejakaa ma ye Farao ɔ kɛ e tabo ɔ, e ta zugba lɛ ɔmɛ, kɛ e we okpɔngɔ ta buli ɔmɛ tsuo a nɔ kunimi.

¹⁸ Nɛ ke i ye Farao ɔ kɛ e ta zugba lɛ ɔmɛ, kɛ e we okpɔngɔ ta buli ɔmɛ nɔ ɔ, Egipt bi ɔmɛ maa le kaa imi ji Yawɛ.”

¹⁹ Kɛkɛ nɛ Mawu bɔfo ɔ nɛ nyɛɛ Israel tabo ɔ hɛ mi ɔ plɛ ya je a se. Bɔku titima a je a hɛ mi, nɛ e ho ya je a se blɔ,

²⁰ ngɛ Egipt tabo ɔ, kɛ Israel tabo ɔ a kpɛti. Bɔku ɔ ha diblii wo Egipt bi ɔmɛ, se Israel bi ɔmɛ lɛɛ a hyɛ nɔ. Lɔ ɔ he ɔ, tabo enyɔ ɔmɛ nyɛ we nɛ a su a sibi a he nɛ je kɛ na.

²¹ Kɛkɛ nɛ Mose wo e nine nɔ ngɛ wo ɔ nɔ, nɛ Yawɛ ha kɔɔhiɔ nguaa ko fia kɛ je beleku jamɛ a nyɔ ɔ mi tsuo kɛ tsɛ̃ wo ɔ kɛ ya se. Nɛ wo ɔ mi gba enyɔ hiɛ kɛ hiɛ, nɛ e kpɛti ɔ plɛ pee zugba gbigbli.

²² Israel bi ɔmɛ nyɛɛ zugba gbigbli nɔ kɛ gu wo ɔ kpɛti, nɛ nyu ɔ pee kaa gbogbo ngɛ a hiɔ nɔ kɛ a muɔ nɔ.

²³ Egipt bi ɔmɛ, Farao ɔ we okpɔngɔ ɔmɛ, e ta zugba lɛ ɔmɛ, kɛ okpɔngɔ ta buli ɔmɛ tsuo hia kɛ nyɛɛ Israel bi ɔmɛ a se kɛ sɛ wo ɔ mi.

²⁴ Mɔtu kpla a, Yawɛ hyɛ Egipt tabo ɔ kɛ gu la titima a, kɛ bɔku titima a a mi, nɛ e ha nɛ sawale nu mɛ.

²⁵ Yawɛ ha nɛ Egipt bi ɔmɛ a ta zugba lɛ ɔmɛ a nanehi pu zu, nɛ a nyɛɛmi pee dengme. Egipt bi ɔmɛ a nya hé gbi nɛ a de ke, “Nyɛ ha waa tu fo ngɛ Israel bi ɔmɛ a nya; ejakaa Yawɛ piɛ a he nɛ e kɛ wɔ Egipt bi ɔmɛ ngɛ fiae.”

²⁶ Kɛkɛ nɛ Yawɛ de Mose ke, “Mo wo o nine nɔ ngɛ wo ɔ nɔ, konɛ nyu ɔ nɛ kpale ku pue Egipt bi ɔmɛ, kɛ a ta zugba lɛ ɔmɛ, kɛ a we okpɔngɔ ta buli ɔmɛ a nɔ.”

²⁷ Lɔ ɔ he ɔ, Mose wo e nine nɔ ngɛ wo ɔ nɔ, nɛ benɛ je maa na a, wo ɔ kpale tsa ekohu. Egipt bi ɔmɛ tu fo nɛ a kɛ wo ɔ ba kpe, nɛ Yawɛ tsitsɛɛ mɛ kɛ pue wo ɔ mi.

²⁸ Nyu ɔ kpale ba tsa, nɛ Farao ɔ ta zugba lɛ ɔmɛ, e we okpɔngɔ ta buli ɔmɛ, kɛ e tabo ɔ tsuo nɛ nyɛɛ Israel bi ɔmɛ a se kɛ ya sɛ wo ɔ mi ɔ tlɔ mi nɛ a ti nɔ kake po píɛ.

²⁹ Se Israel bi ɔmɛ lɛɛ a nyɛɛ zugba gbigbli nɔ kɛ po wo ɔ, nɛ nyu ɔ wlua kaa gbogbo ngɛ a hiɔ nɔ kɛ a muɔ nɔ.

³⁰ Bɔ nɛ Yawɛ pee kɛ kpɔ Israel bi ɔmɛ kɛ je Egipt bi ɔmɛ a dɛ jamɛ a ligbi ɔ ji nɛ ɔ nɛ. Israel bi ɔmɛ na Egipt bi ɔmɛ nɛ a gbo kɛ pueɔ si ngɛ wo ɔ nya.

³¹ Benɛ Israel bi ɔmɛ na he wami nguaa nɛ Yawɛ kɛ ye Egipt bi ɔmɛ a nɔ ɔ, a ye lɛ gbeye, nɛ a he lɛ, kɛ e tsɔlɔ Mose ɔ ye.