Mose II, 12 - BAIBLO ALOO NGMAMI KLƆUKLƆU Ɔ

Hetsɔmi ɔ

¹ Yawɛ de Mose kɛ Aaron ngɛ Egipt zugba a nɔ ke,

² “Nyɔhiɔ nɛ ɔ maa pee kekleekle nyɔhiɔ ngɛ jeha a mi ha nyɛ.

³ Nyɛ de Israel ma a tsuo ke nyɔhiɔ nɛ ɔ ligbi nɛ ji nyɔngma a, nyumu tsuaa nyumu nɛ hla to bi kake, jijɔ, loo apletsi kɛ ha e we.

⁴ Ke we ko mi bi a he pi nɛ a ma nyɛ to mluku kake maa ye ɔ, lɛɛ jamɛ a wetsɛ ɔ, kɛ wetsɛ nɛ we tsa e nɔ́ ɔ nɔ ɔ, a gbe kake ngɛ a hiɛmi nya, kɛ bɔ nɛ nɔ tsuaa nɔ ma nyɛ maa ye; a kane a yibɔ bɔ nɛ kake ɔ maa su mɛ.

⁵ To ɔ nɛ pee to ku nɛ ye jeha kake, nɛ kpa ko kulaa be e he. E pee jijɔ, loo apletsi.

⁶ Nyɛɛ to lohwe ɔmɛ kɛ ya si nyɔhiɔ ɔ ligbi nɛ ji nyɔngma kɛ eywiɛ ɔ. Jamɛ a gbɔkuɛ ɔ ji be nɛ Israel ma a tsuo maa gbe to bi ɔmɛ.

⁷ Lɔ ɔ se ɔ, a ngɔ muɔ ɔ eko kɛ diki we mi he nɛ a maa ye lo ɔ ngɛ ɔ sinya tso enyɔ ɔmɛ, kɛ a yiti nɔ́ ɔ a he.

⁸ A sã lo ɔ, nɛ a ye lɛ kɛ agba pui, kɛ abolo kplolo jamɛ a nyɔ ɔ mi nɔuu.

⁹ A ko ye lo ɔ mumu, nɛ a ko hoo lɛ ngɛ nyu mi hulɔ. Se a sã lohwe ɔ mluku; e yi ɔ, e nane ɔmɛ, kɛ e mi ní ɔmɛ tsuo.

¹⁰ A ko si eko nɛ je nɛ na yi. Ke eko piɛ kɛ ya si mɔtu ɔ, a sã.

¹¹ Nyɛɛ ye ní ɔ kaa blɔ hiali. Nyɛɛ fi nyɛ kpɛti; nyɛ tokota nɛ hi nyɛ nane; nyɛ dɛma tso nɛ hi nyɛ dɛ mi, nɛ nyɛɛ ye ní ɔ esɔesɔ; ejakaa Hetsɔmi nyami ligbi kɛ ha imi, Yawɛ ji nɛ ɔ nɛ.

¹² “Jamɛ a nyɔ ɔ mi ɔ, ma gu Egipt zugba a nɔ kɛ be, nɛ ma gbe bitɛtehi tsuo nɛ ngɛ Egipt zugba a nɔ ɔ, kɛ a lohwe ɔmɛ hu a kekleekle bi kuhi. Egipt mawu ɔmɛ lɛɛ ma kpata mɛ tsuo pɛpɛɛpɛ a hɛ mi. Imi ji Yawɛ.

¹³ Muɔ ɔ maa to nyɛ we ɔmɛ a he so, nɛ ke i na muɔ ɔ pɛ ma tsɔ nyɛ he kɛ be, nɛ Egipt bi ɔmɛ a tue gblami ɔ, nyɛɛ lɛɛ eko be nyɛ nɔ bae.

¹⁴ Ligbi nɛ ɔ maa pee kaimi ligbi nguaa ha nyɛ, nɛ nyɛ maa ye ligbi ɔ kaa nyami be kɛ ha Yawɛ; nɛ enɛ ɔ maa pee mlaa nɛ fɔɔ si ha nyɛɛ kɛ nyɛ nina kɛ maa ya neneene.

Abolokplolo nyami be

¹⁵ “Kɛ je kekleekle ligbi ɔ kɛ yaa si ligbi nɛ ji kpaago ɔ, nyɛɛ ye abolo kplolo. Nyɛ kpa masa peemi ngɛ we ɔmɛ a mi kɛ je kekleekle ligbi ɔ. Mo nɔ nɛ o maa ye masa nɔ́ ko ɔ, a ma je mo we kɛ je Israel.

¹⁶ Kekleekle ligbi ɔ, kɛ ligbi nɛ ji kpaago ɔ, nyɛɛ bɔ gua nɛ nyɛ ja Yawɛ. A ko tsu nɔ́ ko jamɛ a ligbi enyɔ ɔmɛ; ní nɛ nɔ maa ye pɛ nɛ nyɛ maa hoo.

¹⁷ Nyɛɛ ye Abolokplolo nyami be ɔ; ejakaa jamɛ a ligbi ɔ nɔ nɔuu nɛ i je nyɛ ma a wɛtso nya wɛtso nya kɛ je Egipt zugba a nɔ ɔ nɛ. Lɔ ɔ he ɔ, nyɛɛ ye ligbi nɛ ɔ, nɛ e pee nɔ́ ko nɛ fɔɔ si kaa mlaa ha nyɛɛ kɛ nyɛ nina kɛ maa ya neneene.

¹⁸ Nyɛ bɔni abolo kplolo yemi kɛ je kekleekle nyɔhiɔ ɔ ligbi nyɔngma kɛ eywiɛ ɔ gbɔkuɛ kɛ yaa si nyɔhiɔ ɔ ligbi nɛ ji nyingmi enyɔ kɛ kake ɔ gbɔkuɛ nya si.

¹⁹ Nɔ ko nɛ ko to masa ngɛ e we mi ligbi kpaago. Nɔ tsuaa nɔ nɛ maa ye masa nɔ́ ko ɔ, nubwɔ ji lɛ jio, we no ji lɛ jio, a je lɛ we.

²⁰ Nyɛ ko ye masa nɔ́ ko; he tsuaa he nɛ ji nyɛ we nɔ ɔ, nyɛɛ ye abolo kplolo pɛ.”

Kekleekle Hetsɔmi ɔ

²¹ Mose tsɛ Israel ma nimeli ɔmɛ tsuo kpe, nɛ e de mɛ ke, “Nyɛ ya hla jijɔhi nyɛɛ to we puɔ nya we puɔ nya, nɛ nyɛɛ gbe kɛ ha Hetsɔmi ɔ yemi.

²² Nyɛɛ ngɔ muɔ ɔ kɛ wo kã mi. Lɔ ɔ se ɔ, nyɛɛ fi nga kɛ bla kaa bɛ, nɛ nyɛ kɛ sɔ muɔ ɔ kɛ kpa sinya tso enyɔ ɔmɛ, kɛ yiti nɔ́ ɔ a he. Nyɛ ti nɔ ko nɛ ko gu sinya a nya kɛ je kpo kɛ yaa si mɔtu,

²³ ejakaa Yawɛ ma ba gu ma a mi kɛ be nɛ e ya gbe Egipt bi ɔmɛ. Se ke e na muɔ ɔ ngɛ sinya tso ɔmɛ a he ɔ, e maa tsɔ sinya a he kɛ be, nɛ e be hae nɛ gbenɔ bɔfo ɔ nɛ ji nɔ hɛ mi kpatalɔ ɔ maa sɛ nyɛ we ɔmɛ a mi nɛ e ba gbe nyɛ.

²⁴ Nyɛ maa ye blɔ nya tomi nɛ ɔ nɔ kaa mlaa nɛ fɔɔ si ha nyɛɛ kɛ nyɛ bimɛ kɛ yaa neneene.

²⁵ Ke nyɛ ya su zugba a nɛ Yawɛ wo si kaa e kɛ ma ha nyɛ ɔ nɔ ɔ, nyɛɛ pee kusumi nɛ ɔ daa.

²⁶ Nɛ ke nyɛ bimɛ bi nyɛ ke, ‘Kusumi nɛ ɔ sisi nɛɛ?’ ɔ,

²⁷ nyɛ de mɛ ke, ‘Yawɛ Hetsɔmi ɔ bɔ sami ɔ ji nɛ ɔ nɛ; ejakaa e tsɔ Israel bi ɔmɛ a he ngɛ Egipt. E gbe Egipt bi ɔmɛ, se wɔɔ lɛɛ e ha wa yi na wami.’ ” Kɛkɛ nɛ ni ɔmɛ ma a yi si nɛ a ja Mawu.

²⁸ Israel bi ɔmɛ ho nɛ a ya pee kaa bɔ nɛ Yawɛ de Mose kɛ Aaron ɔ pɛpɛɛpɛ.

Bitɛte ɔmɛ a gbenɔ

²⁹ Nyɔ mi kɔ̃kɔ̃ɔ̃kɔ̃ ɔ, Yawɛ gbe Egipt zugba a nɔ kekleekle binyumuhi tsuo, kɛ je Farao ɔ bitɛte ɔ nɛ maa ye tsɛ ngɛ sɛ ɔ nɔ ɔ nɔ kɛ ya si pã mi no bitɛte nɔ. We mi lohwehi hu Yawɛ gbe a kekleekle bihi tsuo.

³⁰ Nyɔ ɔ mi ɔ, Farao ɔ te si; e kɛ e tsɔli ɔmɛ, kɛ Egipt bi ɔmɛ tsuo, nɛ a wo yana nguaa ngɛ Egipt, ejakaa we ko we ko be nɛ a gbo we ngɛ mi.

³¹ Nɛ nyɔ ɔ mi nɔuu ɔ, Farao ɔ tsɔ nɛ a ya tsɛ Mose kɛ Aaron kɛ ba, nɛ e de mɛ ke, “Nyɛɛ te si nɛ nyɛɛ je ye ma mi bi ɔmɛ a kpɛti, nyɛɛ kɛ Israel ma a tsuo, nɛ nyɛ ya ja Yawɛ kaa bɔ nɛ nyɛ de ɔ.

³² Nyɛɛ ho kɛ nyɛ to ɔmɛ, kɛ nyɛ na amɛ kaa bɔ nɛ nyɛ de ɔ. Nyɛɛ sɔle ha mi, konɛ Yawɛ nɛ gbaa imi hulɔ.”

³³ Jehanɛ Egipt bi ɔmɛ tsitsɛɛ Israel bi ɔmɛ a yi se ke a pee esɔ nɛ a je a zugba a nɔ; ejakaa a kɛ hɛdɔ de ke, “Wa yi ta oo!”

³⁴ Lɔ ɔ he ɔ, Israel bi ɔmɛ ngɔ a ma nɛ sa we lolo ɔ, kɛ ma sowe ɔmɛ, nɛ a fi kpla a konɔ.

³⁵ Israel bi ɔmɛ pee kaa bɔ nɛ Mose de mɛ ɔ; a ya ba june ní, sika hiɔ, sika tsu, kɛ bohi ngɛ Egipt bi ɔmɛ a dɛ.

³⁶ Yawɛ ha Egipt bi ɔmɛ ná Israel bi ɔmɛ a he bua jɔmi, nɛ a ha mɛ níhi nɛ a ya ba ngɛ a dɛ ɔ. Blɔ nɔ nɛ Israel bi ɔmɛ gu kɛ kpakpaa Egipt bi ɔmɛ a he níhi kɛ je ji nɛ ɔ nɛ.

Israel bi ɔmɛ je Egipt

³⁷ Israel bi ɔmɛ nyɛɛ nane kɛ je Rameses kɛ ho Sukot ya. Nyumu ɔmɛ kɛkɛ a hiɛmi maa pee akpe lafa ekpa; slo yihi kɛ jokuɛwi.

³⁸ Futufutu nimli komɛ hu piɛ a he, kɛ tohi, kɛ nahi babauu.

³⁹ Nɛ a ngɔ ma a nɛ a kɛ je Egipt ɔ kɛ sã abolo kplolo. A na we be nɛ a kɛ gbe ma a; niye ní hu a hoo we, ejakaa pe a fie mɛ kpatakpata kɛ je Egipt.

⁴⁰ Be nɛ Israel bi ɔmɛ ye ngɛ Egipt zugba a nɔ ji jeha lafa eywiɛ kɛ nyingmi etɛ.

⁴¹ Nɛ jeha lafa eywiɛ kɛ nyingmi etɛ ɔ nyagbe ligbi ɔ tutuutu ɔ, Yawɛ tabo ɔmɛ tsuo je Egipt zugba a nɔ.

⁴² Jamɛ a nyɔ ɔ ji nyɔ nɛ Yawɛ huɔ nɛ e kɛ je Israel bi ɔmɛ kɛ je Egipt zugba a nɔ ɔ nɛ. Enɛ ɔ he je ɔ, jamɛ a nyɔ ɔ pee nyɔ nɛ daa jeha a, Israel bi ɔmɛ kɛ a nina tsuo huɔɔ nyɔ kɛ haa Yawɛ.

Hetsɔmi nyami be ɔ he mlaahi

⁴³ Yawɛ de Mose kɛ Aaron ke, “Hetsɔmi nyami be ɔ he mlaahi ji nɛ ɔmɛ nɛ: ma je no ko ma je no ko kó ye Hetsɔmi niye ní ɔ.

⁴⁴ Se nyɔguɛ nɛ a he ma nyɛ nɛ e ye eko ke a po lɛ se.

⁴⁵ Nubwɔ, loo apaatsɛ nɛ ko ye eko.

⁴⁶ Nɔ tsuaa nɔ nɛ ye ní ɔ ngɛ we mi he nɛ a gbe to ɔ ngɛ ɔ; a kɛ lo ɔ eko ko je kpo kɛ je we ɔ mi, nɛ a ko ywia lohwe ɔ wu ko hulɔ.

⁴⁷ Israel ma a tsuo nɛ ye nyami be nɛ ɔ.

⁴⁸ Se ke nubwɔ ko nɛ ngɛ nyɛ kpɛti suɔ nɛ e ye Yawɛ Hetsɔmi ɔ, moo po nyumuhi tsuo nɛ ngɛ e we ɔ mi ɔ; kɛkɛ e pee kaa we no. Se mɔmlɔtɔtsɛ be he blɔ kaa e yeɔ.

⁴⁹ Mlaa kake too nɛ ɔ maa fɔ si ha we no kɛ nubwɔ tsuo.”

⁵⁰ Israel bi ɔmɛ tsuo bu tue, nɛ a pee kaa bɔ nɛ Yawɛ wo Mose kɛ Aaron mlaa a.

⁵¹ Nɛ jamɛ a ligbi ɔ nɔuu ɔ, Yawɛ je Israel bi ɔmɛ kɛ je Egipt zugba a nɔ wɛtso nya wɛtso nya.