Mose II, 10 - BAIBLO ALOO NGMAMI KLƆUKLƆU Ɔ

Baalɛhi ba

¹ Yawɛ de Mose ke, “Yaa nɛ o ya na Farao ɔ. I kplii e kɛ e tsɔli ɔmɛ a tsui, bɔ nɛ pee nɛ ma pee ye we okadi nɛ ɔmɛ ngɛ a kpɛti,

² konɛ okadihi nɛ i pee ngɛ Egipt, kɛ bɔ nɛ i ha nɛ Egipt bi ɔmɛ pee a he kuasia ha a, nyɛɛ sɛɛ nɛ nyɛ bimɛ, kɛ nyɛ bibimɛ nɛ a nu, konɛ nyɛ na nɛ nyɛɛ le kaa imi ji Yawɛ.”

³ Mose kɛ Aaron ho Farao ɔ ngɔ ya, nɛ a ya de lɛ ke, “Bɔ nɛ Yawɛ, Hebri bi ɔmɛ a Mawu ɔ de ji nɛ ɔ nɛ: ‘Mɛni be o ma kua o he si bami ha mi kɛ yaa si? Ha ye ma a nɛ ya nɛ a ya ja mi.

⁴ Ke o kplɛɛ we nɛ ye ma a nɛ ya a, lɛɛ hwɔɔmɛ a je hwɔɔ ɔ, ma ha baalɛhi maa ba o zugba a nɔ.

⁵ A maa ha zugba a tsuo nɔ, nɛ nɔ ko nɔ ko be zugba zu ɔ nae. A maa ye nɔ́ tsuaa nɔ́ nɛ piɛ ha nyɛ ngɛ gbiɛ ngo ngu ɔ se; tso tsuaa tso nɛ puɛ po a maa ye.

⁶ O we ɔmɛ a mi, o tsɔli ɔmɛ tsuo pɛpɛɛpɛ, kɛ Egipt bi ɔmɛ a we ɔmɛ a mi ma hyi tɔ kɛ baalɛhi bɔ nɛ nyɛ tsɛmɛ kɛ nyɛ nɛmɛ nɛ eko gblee kɛ je be nɛ a bɔ ade kɛ ba si mwɔnɛ ɔ.’ ” Kɛkɛ nɛ e plɛ e he nɛ e je.

⁷ Farao ɔ tsɔli ɔmɛ de lɛ ke, “Mɛni be po nyumu nɛ ɔ maa jɔɔ wɔ haomi? Ha nɛ e ni ɔmɛ nɛ a ho nɛ a ya ja Yawɛ, a Mawu ɔ. Anɛ o nɛ kɛ mwɔɔ kaa Egipt hɛ mi ngɛ kpatae lo?”

⁸ Lɔ ɔ he ɔ, a ya tsɛ Mose kɛ Aaron kɛ ba Farao ɔ ngɔ ekohu, nɛ Farao ɔ de mɛ ke, “Nyɛɛ ho nɛ nyɛ ya ja Yawɛ, nyɛ Mawu ɔ. Se mɛnɔmɛ ji ni nɛmɛ nɛ maa ya a?”

⁹ Mose ha lɛ heto ke, “Wɔ tsuo pɛpɛɛpɛ nɛ wa maa ya a nɛ; jokuɛwi kɛ nikɔtɔmahi. Waa kɛ wa binyumuhi, wa biyihi, kɛ wa lohwehi kulaa maa ya; ejakaa wa yaa nɛ wa ya ye nyami ligbi kɛ wo Yawɛ hɛ mi nyami.”

¹⁰ Nɛ Farao ɔ de mɛ ke, “Yawɛ nɛ gbaa nyɛ, ke i ngmɛ nyɛ blɔ nɛ nyɛɛ kɛ nyɛ bimɛ ɔmɛ ho fii! Ɛhɛɛ, juɛmi yaya ko ngɛ nyɛ yi mi.

¹¹ Dɛbi! Nyɛ nyumu ɔmɛ, nyɛ kɛkɛ nyɛɛ ya nɛ nyɛ ya ja Yawɛ, ejakaa lɔ ɔ ji nɔ́ nɛ nyɛ ngɛ hlae.” Kɛkɛ nɛ a fie mɛ kɛ je Farao ɔ hɛ mi.

¹² Yawɛ de Mose ke, “Wo o nine nɔ ngɛ Egipt zugba a nɔ, nɛ́ baalɛhi nɛ a pue Egipt zugba a nɔ, nɛ a ba ye zugba a nɔ tso kɛ nga, kɛ nɔ́ tsuaa nɔ́ nɛ gbiɛ ngo ngu ɔ si ɔ.”

¹³ Kɛkɛ nɛ Mose wo e tso ɔ nɔ ngɛ Egipt zugba a nɔ, nɛ Yawɛ ha kɔɔhiɔ bɔni fiami kɛ je beleku jamɛ a ligbi ɔ kulaa nyɔ kɛ pia; nɛ benɛ je na a, beleku kɔɔhiɔ ɔ muɔ baalɛhi kɛ ba.

¹⁴ Baalɛ ɔmɛ pue Egipt zugba a nɔ tsuo pɛpɛɛpɛ bɔ nɛ eko bɛ hyɛ, loo e maa ba.

¹⁵ A ha zugba a nɔ tsuo, nɛ lɔ ɔ ha zugba a nɔ yu tuu. A ye tsohi tsuo ngɛ zugba a nɔ, kɛ tso yibliihi nɛ gbiɛ ngo ngu ɔ si ɔ; nɛ nɔ mumu ko kulaa píɛ ngɛ Egipt zugba a tsuo nɔ.

¹⁶ Kɛkɛ nɛ Farao ɔ tsɛ Mose kɛ Aaron nɔuu nɛ e de mɛ ke, “I pee yayami kɛ si Yawɛ, nyɛ Mawu ɔ; nɛ nyɛ hu i tɔ̃ nyɛ nɔ.

¹⁷ Lɔ ɔ he ɔ, i kpa nyɛ pɛɛ, nyɛ ngɔ pa mi si kake nɛ ɔ pɛ, nɛ nyɛ kpa Yawɛ, nyɛ Mawu ɔ pɛɛ ha mi nɛ e je gbenɔ tue gblami nɛ ɔ pɛ kɛ je ye nɔ.”

¹⁸ Mose je Farao ɔ ngɔ, nɛ e ho nɛ e ya kpa Yawɛ pɛɛ.

¹⁹ Yawɛ tsake beleku kɔɔhiɔ ɔ kɛ pee bonyoku kɔɔhiɔ nɛ nya wa, nɛ kɔɔhiɔ ɔ muɔ baalɛ ɔmɛ kɛ ya pue Wo Tsu ɔ mi; e píɛ kake ngmelu ngɛ Egipt zugba a nɔ.

²⁰ Se Yawɛ kplii Farao ɔ tsui ekohu nɛ e ha we nɛ Israel bi ɔmɛ nɛ a ya.

Diblii wo

²¹ Yawɛ de Mose ke, “Wo o nine nɔ kɛ tsɔɔ hiɔwe, konɛ diblii kpii nɛ wo ngɛ Egipt zugba a nɔ.”

²² Mose pee ja, nɛ diblii kpii wo ngɛ Egipt ligbi etɛ.

²³ Nɔ ko nɔ ko nɛ e nyɛmi, nɛ nɔ ko nɔ ko ti si kɛ ji he nɛ e ngɛ ɔ ligbi etɛ. Se Israel bi ɔmɛ lɛɛ je mi tsɔ ha mɛ ngɛ a hi he ɔmɛ.

²⁴ Kɛkɛ nɛ Farao ɔ tsɛ Mose nɛ e de lɛ ke, “Nyɛɛ ho nɛ nyɛ ya ja Yawɛ ɔ; nyɛ bimɛ ɔmɛ ma nyɛ nɛ a kɛ nyɛ nɛ ya, se nyɛ to ɔmɛ, kɛ nyɛ na amɛ lɛɛ nyɛ si mɛ.”

²⁵ Se Mose bi lɛ ke, “Lɛɛ mo nitsɛ o ma ha wɔ lohwehi nɛ wa kɛ ya sã bɔ ha Yawɛ, wa Mawu ɔ lo?

²⁶ Dɛbi! Wa maa ngɔ wa lohwe ɔmɛ hu kɛ ho; wa be lohwe nane kokloto kake po sie ngɛ se. Lohwe nɛ ɔmɛ ekomɛ waa kɛ ma ja Yawɛ, wa Mawu ɔ nɛ; lohwe pɔtɛɛ nɛ waa kɛ maa sã bɔ ha Yawɛ ɔ, wa be lee, ja wa ya su lejɛ ɔ lolo.”

²⁷ Se Yawɛ kplii Farao ɔ tsui ekohu, nɛ e ha we nɛ a ya.

²⁸ Kɛkɛ nɛ Farao ɔ de Mose ke, “Jee hiɛ ɔ nɛ o ho! Hyɛ nɛ e hi nɛ o ko ha nɛ ma na o hɛ mi ekohu. Ligbi nɛ o ma ba da ye hɛ mi ekohu ɔ, o ma gbo.”

²⁹ Mose de lɛ ke, “Saminya! Kaa bɔ nɛ o de ɔ, o be imi hu ye hɛ mi nae hu gblegbleegble!”