Mose I, 9 - BAIBLO ALOO NGMAMI KLƆUKLƆU Ɔ

Mawu kɛ Noa so

¹ Mawu gbaa Noa kɛ e binyumu ɔmɛ, nɛ e de mɛ ke, “Nyɛ fɔ babauu nɛ nyɛ he nɛ hiɛ, nɛ nyɛ hyi je ɔ mi tsuo.

² I ngɔ lohi kɛ je mi lohwehi: nane eywiɛɛywiɛtsɛmɛ, pɛlitsɛmɛ, kɛ ní nɛmɛ nɛ sãã si tsuo ngɔ wo nyɛ dɛ mi, nɛ a maa ye nyɛ gbeye.

³ I ngɔ mɛ tsuo ngɔ ha nyɛ nɛ nyɛɛ ye, kaa bɔ nɛ i ha nyɛ pui ba a.

⁴ Nɔ́ nɛ nyɛ ko ye ji lo nɛ muɔ ngɛ mi kɛ mwɔɔ; i kplɛɛ we enɛ ɔ, ejakaa muɔ ɔ, wami ngɛ mi.

⁵ Ke nɔ ko pue nɔmlɔ adesa muɔ si ɔ, a maa gbla e tue. Lohwe tsuaa lohwe nɛ maa gbe nɔmlɔ adesa a, ma gbe lɛ.

⁶ I pee nɔmlɔ kaa bɔ nɛ imi, Mawu ɔ nitsɛ i ngɛ ɔ; lɔ ɔ he ɔ, nɔ tsuaa nɔ nɛ ma pue nɔmlɔ adesa muɔ si ɔ, e nyɛmi nɔmlɔ adesa nɔuu ma pue lɛ hu e muɔ si.

⁷ “Nyɛ fɔ babauu nɛ nyɛ he nɛ hiɛ, konɛ nyɛ hyi je ɔ.”

Alale

⁸ Mawu de Noa kɛ e binyumu ɔmɛ ke,

^9-10 “I kɛ nyɛ, kɛ nyɛ nina, kɛ lohwe ɔmɛ tsuo nɛ nyɛɛ kɛ mɛ je kpo ngɛ lɛ ɔ mi ɔ ngɛ soe: lohwe pɛlitsɛmɛ, we mi lohwehi, kɛ pu mi lohwehi.

¹¹ I ngɛ si woe kaa kɛ je mwɔnɛ ɔ kɛ yaa a, a kɛ nyu kpekpemi be níhi nɛ ngɛ hɛ ngmengmle a hɛ mi kpatae hu kɔkɔɔkɔ; nyu kpekpemi ba be je ɔ hɛ mi kpatae hu kɔkɔɔkɔ.

¹² Somi nɛ i kɛ nyɛ, kɛ níhi tsuo nɛ a ngɛ hɛ ngmengmle ngɛ soe nɛ ɔ ji somi nɛ maa hi si kɛ maa ya neneene. E he okadi ji nɛ ɔ nɛ.

¹³ I ngɔ ye alale ngɔ to bɔku mi, nɛ e pee okadi kɛ ha somi nɛ i kɛ je ɔ so ɔ.

¹⁴ Be tsuaa be nɛ ma ngɔ bɔku kɛ ha hiɔwe nɛ alale maa ngmaa si ngɛ mi ɔ,

¹⁵ ma kai si nɛ i wo nyɛɛ kɛ lohwe ɔmɛ tsuo kaa i kɛ nyu kpekpemi be níhi tsuo nɛ ngɛ hɛ ngmengmle a hɛ mi kpatae hu kɔkɔɔkɔ ɔ.

¹⁶ Ke alale ɔ ngmaa si ngɛ bɔku ɔmɛ a mi ɔ, ma na nɛ ma kai neneene somi ɔ nɛ ngɛ imi Mawu, kɛ níhi tsuo nɛ ngɛ je ɔ mi nɛ ngɛ hɛ ngmengmle ɔ wa kpɛti ɔ.

¹⁷ Si nɛ i ngɛ níhi tsuo nɛ ngɛ hɛ ngmengmle woe ɔ, e he okadi ji nɛ ɔ nɛ.”

Noa kɛ e binyumu ɔmɛ

¹⁸ Noa binyumuhi nɛ je kpo ngɛ lɛ ɔ mi ji Shem, Ham, kɛ Yafet. Ham binyumu ji Kanaan.

¹⁹ Noa binyumu etɛ nɛ ɔmɛ a mi lɛ nimli tsuo kulaa nɛ ngɛ je nɛ ɔ mi ɔ je.

²⁰ Noa a, ngmɔ hulɔ ji lɛ; lɛ ji kekleekle nɔ nɛ pee wai ngmɔ.

²¹ Be ko ɔ, e nu wai nɛ e de, nɛ e ho ya hwɔ si kɛ e he gu ngɛ e bo tsu ɔ mi.

²² Benɛ Ham, Kanaan tsɛ ɔ, na e tsɛ Noa nɛ hwɔɔ si kɛ e he gu ɔ, e je kpo nɛ e ya sɛɛ ha e wetsɛmɛ enyɔ ɔmɛ.

²³ Kɛkɛ nɛ Shem kɛ Yafet ngɔ bo ngɔ fɔ a konɔ, nɛ a nyɛɛ senyasenya nɛ a kɛ bo ɔ ya ha a tsɛ ɔ he; a plɛ a hɛ mi ngɔ fɔ he kpa, nɛ a nɛ a tsɛ ɔ he gu ɔ.

²⁴ Benɛ wai ɔ tsɔ ngɛ Noa hɛ mi, nɛ e na le nɔ́ nɛ e bi jokuɛyo ɔ pee lɛ ɔ,

²⁵ e de ke, “A gbiɛ Kanaan! E maa pee e wetsɛmɛ ɔmɛ a nyɔguɛ.

²⁶ A je Yawɛ, Shem Mawu ɔ yi! Kanaan maa pee Shem nyɔguɛ.

²⁷ Mawu nɛ ha nɛ Yafet nɛ plɔke! E nina kɛ Shem nina maa hi si! Kanaan maa pee Yafet nyɔguɛ.”

²⁸ Nyu kpekpemi ɔ se ɔ, Noa hi si jeha 350,

²⁹ nɛ e gbo benɛ e ye jeha 950.